ਮੱਖੂ(ਵਾਹੀ)—ਮੱਖੂ ਸ਼ਹਿਰ 'ਚ ਅਚਾਨਕ ਆਏ ਆਵਾਰਾ ਬਾਂਦਰ ਕਾਰਨ ਲੋਕਾਂ 'ਚ ਦਹਿਸ਼ਤ ਦਾ ਮਾਹੌਲ ਹੈ। ਭੂਤਰੇ ਬਾਂਦਰ ਨੇ ਸ਼ਹਿਰ ਦੇ ਇਕ ਦਰਜਨ ਤੋਂ ਵੱਧ ਲੋਕਾਂ 'ਤੇ ਹਮਲਾ ਕਰ ਕੇ ਉਨ੍ਹਾਂ ਨੂੰ ਜ਼ਖਮੀ ਕਰ ਦਿੱਤਾ। 2 ਸਾਲ ਦੀ ਬੱਚੀ ਤਮੰਨਾ ਨੂੰ ਜਦੋਂ ਆਵਾਰਾ ਬਾਂਦਰ ਧੂਹ ਕੇ ਲਿਜਾਣ ਲੱਗਾ ਤਾਂ ਬੱਚੀ ਦੀਆਂ ਚੀਕਾਂ ਨਿਕਲ ਗਈਆਂ ਅਤੇ ਬਾਂਦਰ ਨੇ ਉਸਦੇ ਗੋਡੇ 'ਤੇ ਦੰਦ ਮਾਰ ਕੇ ਜ਼ਖ਼ਮੀ ਕਰ ਦਿੱਤਾ। ਸ਼ਹਿਰ ਨਿਵਾਸੀ ਸਰਕਾਰੀ ਅਧਿਆਪਕਾ ਨੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਗਾਰਗੀ, ਗੀਤ ਅਤੇ ਨੀਰੂ ਨਾਮਕ ਤਿੰਨ ਹੋਰ ਸ਼ਹਿਰ ਵਸਨੀਕਾਂ ਨੂੰ ਅੱਜ ਉਕਤ ਬਾਂਦਰ ਨੇ ਵੱਢ ਲਿਆ। ਇਹ ਬਾਂਦਰ ਰਾਹ ਜਾਂਦੇ ਲੋਕਾਂ ਅਤੇ ਛੋਟੇ ਬੱਚਿਆਂ ਦੀਆਂ ਚੀਜ਼ਾਂ ਖੋਹ ਲੈਂਦਾ ਹੈ। ਸ਼ਹਿਰ ਦੇ ਕਈ ਡਾਕਟਰਾਂ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਬਾਂਦਰ ਦੇ ਵੱਢੇ ਕਈ ਮਰੀਜ਼ ਆਏ ਹਨ। ਜ਼ਿਕਰਯੋਗ ਹੈ ਕਿ ਮੱਖੂ ਨੇੜੇ ਬਹੁਤ ਵੱਡੀ ਗਿਣਤੀ ਬਾਂਦਰਾਂ ਦੀ ਹੈ। ਆਵਾਰਾ ਬਾਂਦਰ ਪਿੰਡਾਂ ਤੇ ਸ਼ਹਿਰ ਦਾ ਰੁਖ ਕਰ ਕੇ ਆਮ ਲੋਕਾਂ 'ਚ ਸਹਿਮ ਦਾ ਮਾਹੌਲ ਪੈਦਾ ਕਰ ਦਿੰਦੇ ਹਨ। ਰਾਬਤਾ ਕਰਨ 'ਤੇ ਜੰਗਲੀ ਜੀਵ ਵਿਭਾਗ ਦੇ ਰੇਂਜ ਅਫਸਰ ਹਰਭਿੰਦਰ ਸਿੰਘ ਨੇ ਦੱਸਿਆ ਕਿ ਪਿੰਡ ਗੱਟਾ ਬਾਦਸ਼ਾਹ, ਤਲਵੰਡੀ ਨਿਪਾਲਾਂ, ਖਡੂਰ ਆਦਿ 'ਚ ਪਹਿਲਾਂ ਪਿੰਜਰਾ ਲਾਇਆ ਗਿਆ ਸੀ ਪਰ ਬਾਂਦਰ ਕਾਬੂ ਨਹੀਂ ਆਇਆ। ਮੱਖੂ ਦੇ ਫਾਟਕ ਵਾਲੇ ਗੁਰਦੁਆਰਾ ਸਾਹਿਬ ਨੇੜੇ ਵੀ ਪਿੰਜਰਾ ਲਾ ਦਿੱਤਾ ਹੈ ਅਤੇ ਭੂਤਰੇ ਬਾਂਦਰ ਨੂੰ ਕਾਬੂ ਕਰ ਕੇ ਦੂਰ-ਦੁਰਾਡੇ ਛੱਡ ਦਿੱਤਾ ਜਾਵੇਗਾ। ਵਰਨਣਯੋਗ ਹੈ ਕਿ ਨਗਰ ਪੰਚਾਇਤ ਮੱਖੂ ਅਤੇ ਵਣ ਵਿਭਾਗ ਵੱਲੋਂ ਗੰਭੀਰਤਾ ਨਾਲ ਯਤਨ ਨਾ ਕਰਨ ਕਰ ਕੇ ਇਕ ਮਹੀਨੇ ਤੋਂ ਵੱਧ ਸਮਾਂ ਬੀਤ ਜਾਣ ਦੇ ਬਾਵਜੂਦ ਹਾਲੇ ਇਹ ਬਾਂਦਰ ਕਾਬੂ ਨਹੀਂ ਕੀਤਾ ਜਾ ਸਕਿਆ, ਜਿਸ ਕਾਰਨ ਸ਼ਹਿਰ ਵਾਲੇ ਸਹਿਮ ਵਿਚ ਹਨ।
ਟਰੱਕ ਦੀ ਲਪੇਟ 'ਚ ਆਉਣ ਨਾਲ ਮੋਟਰਸਾਈਕਲ ਸਵਾਰ ਦੀ ਮੌਤ
NEXT STORY 
