ਸੰਗਰੂਰ (ਵਿਜੈ ਕੁਮਾਰ ਸਿੰਗਲਾ)-ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਭ੍ਰਿਸ਼ਟਾਚਾਰ ਨੂੰ ਰੋਕਣ ਲਈ ਸਖ਼ਤ ਕਦਮ ਚੁੱਕੇ ਗਏ ਹਨ ਅਤੇ ‘ਆਪ’ ਸਰਕਾਰ ਵੱਲੋਂ ਚੁੱਕੇ ਇਨ੍ਹਾਂ ਕਦਮਾਂ ਕਾਰਨ ਪੰਜਾਬ ਅੰਦਰ ਸਰਕਾਰੀ ਦਫ਼ਤਰਾਂ ’ਚ ਭ੍ਰਿਸ਼ਟਾਚਾਰ ਖ਼ਤਮ ਹੋਇਆ ਹੈ। ਗੌਤਮ ਸਿੰਗਲ ਸੀਨੀਅਰ ਕਪਤਾਨ ਪੁਲਸ ਵਿਜੀਲੈਂਸ ਬਿਊਰੋ ਪਟਿਆਲਾ ਦੀਆਂ ਹਦਾਇਤਾਂ ’ਤੇ ਸਤਨਾਮ ਸਿੰਘ ਵਿਰਕ ਉਪ ਕਪਤਾਨ ਪੁਲਸ ਸੰਗਰੂਰ ਵੱਲੋਂ ਦੋ ਵਿਅਕਤੀਆਂ ਪੰਚਾਇਤ ਸੈਕਟਰੀ ਅਤੇ ਸਾਬਕਾ ਸਰਪੰਚ ਨੂੰ ਪਿਛਲੇ ਸਮੇਂ ’ਚ ਪੰਚਾਇਤੀ ਫੰਡਾਂ ਅੰਦਰ ਘਪਲੇਬਾਜ਼ੀ ਕਰਨ ਦੇ ਦੋਸ਼ ’ਚ ਅੱਜ ਗ੍ਰਿਫ਼ਤਾਰ ਕੀਤਾ ਹੈ। ਤਫ਼ਤੀਸ਼ੀ ਅਫ਼ਸਰ ਇੰਸਪੈਕਟਰ ਸੁਦਰਸ਼ਨ ਕੁਮਾਰ ਵਿਜੀਲੈਂਸ ਬਿਊਰੋ ਸੰਗਰੂਰ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਵਿਜੀਲੈਂਸ ਇਨਕੁਆਰੀ ਨੰਬਰ 11 ਮਿਤੀ 04/08/2017 ਪਟਿਆਲਾ, ਵਿਜੀਲੈਂਸ ਇਨਕੁਆਰੀ ਨੰਬਰ 08 ਮਿਤੀ 18/07/2017 ਪਟਿਆਲਾ ਸ਼ਿਕਾਇਤ ਨੰਬਰ 64/2017 ਸੰਗਰੂਰ ਅਤੇ ਸ਼ਿਕਾਇਤ ਨੰਬਰ 117/2017 ਸੰਗਰੂਰ ਦੀ ਪਡ਼ਤਾਲ ਤੋਂ ਪਾਇਆ ਗਿਆ ਹੈ ਕਿ ਪਿੰਡ ਚਾਂਦੂ ਰਾਜਲਹੇੜੀ ਨਵਾਂਗਾਓਂ ਅਤੇ ਸ਼ੇਰਗੜ੍ਹ ਉਰਫ ਸ਼ੀਹਾਂ ਸਿੰਘ ਵਾਲਾ ਜ਼ਿਲ੍ਹਾ ਸੰਗਰੂਰ ਵਿਖੇ ਧਨਵੰਤ ਸਿੰਘ ਬਤੌਰ ਪੰਚਾਇਤ ਸੈਕਟਰੀ ਲੱਗਿਆ ਹੋਇਆ ਸੀ। ਇਨ੍ਹਾਂ ਪਿੰਡਾਂ ਵਿਚ ਵਿਕਾਸ ਦੇ ਕੰਮਾਂ ਲਈ ਕਾਫ਼ੀ ਪੈਸਾ ਆਇਆ।
ਇਹ ਵੀ ਪੜ੍ਹੋ : ‘ਆਪ’ ਵਿਧਾਇਕ ਬਰਿੰਦਰ ਗੋਇਲ ਐਡਵੋਕੇਟ ਨੂੰ ਮਿਲੀ ਜਾਨੋਂ ਮਾਰਨ ਦੀ ਧਮਕੀ
ਵਿਕਾਸ ਦੇ ਕੰਮਾਂ ’ਚ ਹੋਈ ਘਪਲੇਬਾਜ਼ੀ ਸਬੰਧੀ ਪਿੰਡ ਨਵਾਂ ਗਾਓਂ ਦੇ ਲੋਕਾਂ ਵੱਲੋਂ ਪੇਂਡੂ ਵਿਕਾਸ ਤੇ ਪੰਚਾਇਤ ਮੰਤਰੀ ਨੂੰ ਮਿਤੀ 18/04/2017 ਨੂੰ ਸ਼ਿਕਾਇਤ ਕੀਤੀ ਗਈ। ਪੰਚਾਇਤ ਦੇ ਕੰਮਾਂ ’ਚ ਹੋਏ ਘਪਲਿਆਂ ਸਬੰਧੀ ਸ਼ਿਕਾਇਤਾਂ ਹੋਣ ’ਤੇ ਧਨਵੰਤ ਸਿੰਘ ਪੰਚਾਇਤ ਸੈਕਟਰੀ ਗਰਾਮ ਪੰਚਾਇਤਾਂ ਚਾਂਦੂ, ਰਾਜਲਹੇੜੀ ਨਵਾਂ ਗਾਓਂ ਅਤੇ ਸ਼ੇਰਗੜ੍ਹ ਉਰਫ ਸ਼ੀਹਾਂ ਸਿੰਘ ਵਾਲਾ ਨਾਲ ਸਬੰਧਤ ਰਿਕਾਰਡ, ਜਿਵੇਂ ਕਿ ਕੈਸ਼ ਬੁੱਕ, ਕਾਰਵਾਈ ਰਜਿਸਟਰ, ਪਟਾਨਾਮਾ ਰਜਿਸਟਰ, 4 ਨੰਬਰ ਰਸੀਦ, ਵਾਊਚਰ ਫਾਈਲਾਂ, ਬਿੱਲ, ਮਸਟਰੋਲ ਵਗੈਰਾ ਖੁਰਦ-ਬੁਰਦ ਕਰਨ ਲਈ ਆਪਣੇ ਘਰ ਲੈ ਗਿਆ। ਗ੍ਰਾਮ ਪੰਚਾਇਤ ਪਿੰਡ ਚਾਂਦੂ ਦੇ ਕੰਮਾਂ ’ਚ 1,33,000,00/- ਰੁਪਈਏ ਦੇ ਘਪਲੇ ਦਾ ਦੋਸ਼ ਹੈ, ਪਿੰਡ ਸ਼ੇਰਗੜ੍ਹ ਉਰਫ ਸ਼ੀਹਾਂ ਸਿੰਘ ਵਾਲਾ ਦੇ ਵਿਕਾਸ ਕੰਮਾਂ ਲਈ ਤਕਰੀਬਨ 1,18,000,00/-ਰੁਪਏ ਪ੍ਰਾਪਤ ਹੋਏ ਸਨ। ਪਿੰਡ ਨਵਾਂ ਗਾਓਂ ਵਿਖੇ 274 ਏਕੜ ਸ਼ਾਮਲਾਟ ਜ਼ਮੀਨ ਹੈ, ਜਿਸ ਨੂੰ ਠੇਕੇ ’ਤੇ ਦੇਣ ਤੋਂ ਗਰਾਮ ਪੰਚਾਇਤ ਨਵਾਂ ਗਾਓਂ ਨੂੰ ਤਕਰੀਬਨ 55,000,00/,- ਰੁਪਏ ਦੀ ਸਾਲਾਨਾ ਆਮਦਨ ਹੁੰਦੀ ਹੈ, ਜੋ ਪਿੰਡ ਦੇ ਵਿਕਾਸ ਕੰਮਾਂ ’ਤੇ ਖ਼ਰਚ ਕਰਨੇ ਹੁੰਦੇ ਹਨ ਪਰ ਇਸ ਖਰਚੇ ਸਬੰਧੀ ਰਿਕਾਰਡ ਖੁਰਦ-ਬੁਰਦ ਕਰ ਦਿੱਤਾ ਗਿਆ। ਪਿੰਡ ਰਾਜਲ ਹੇੜੀ ਵਿਖੇ ਪਿੰਡ ਦੇ ਵਿਕਾਸ ਦੇ ਕੰਮਾਂ ਸਬੰਧੀ ਤਕਰੀਬਨ 71,17,648/- ਰੁਪਈਏ ਦੇ ਖਰਚੇ ਸਬੰਧੀ ਰਿਕਾਰਡ ਖੁਰਦ-ਬੁਰਦ ਕਰ ਦਿੱਤਾ ਗਿਆ।
ਇਹ ਵੀ ਪੜ੍ਹੋ : CM ਮਾਨ ਵੱਲੋਂ ਡਿਪਟੀ ਕਮਿਸ਼ਨਰਾਂ ਨਾਲ ਅਹਿਮ ਬੈਠਕ, ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਲੈ ਕੇ ਦਿੱਤੇ ਇਹ ਹੁਕਮ
ਪੜਤਾਲ ਤੋਂ ਪਾਇਆ ਗਿਆ ਕਿ ਧਨਵੰਤ ਸਿੰਘ ਪੰਚਾਇਤ ਸੈਕਟਰੀ ਵੱਲੋਂ ਸਰਕਾਰੀ ਰਿਕਾਰਡ ਅੱਗ ਨਾਲ ਸਾੜਨਾ ਸਾਬਤ ਕਰਨ ਦੀ ਕੋਸ਼ਿਸ਼ ਕੀਤੀ, ਜਦਕਿ ਅਸਲ ’ਚ ਪੰਚਾਇਤਾਂ ਦੇ ਫੰਡਾਂ ’ਚ ਘਪਲੇਬਾਜ਼ੀ ਕਾਰਨ ਅਤੇ ਘਪਲਿਆਂ ਨੂੰ ਛੁਪਾਉਣ ਲਈ ਧਨਵੰਤ ਸਿੰਘ ਪੰਚਾਇਤ ਸੈਕਟਰੀ, ਪਰਮਜੀਤ ਸਿੰਘ ਸਰਪੰਚ ਪਿੰਡ ਨਵਾਂ ਗਾਓਂ ਅਤੇ ਗੁਰਮੀਤ ਸਿੰਘ ਸਰਪੰਚ ਪਿੰਡ ਚਾਂਦੂ ਵੱਲੋਂ ਆਪਸੀ ਮਿਲੀਭੁਗਤ ਕਰਕੇ ਸੋਚੀ-ਸਮਝੀ ਸਾਜ਼ਿਸ਼ ਤਹਿਤ ਕਾਨੂੰਨੀ ਕਾਰਵਾਈ ਤੋਂ ਬਚਣ ਲਈ ਪੰਚਾਇਤਾਂ ਦਾ ਰਿਕਾਰਡ ਖੁਰਦ-ਬੁਰਦ ਕੀਤਾ ਗਿਆ ਹੈ ਅਤੇ ਆਪਣੇ ਇਸ ਜੁਰਮ ਨੂੰ ਛੁਪਾਉਣ ਲਈ ਇਹ ਸਰਕਾਰੀ ਰਿਕਾਰਡ ਧਨਵੰਤ ਸਿੰਘ ਪੰਚਾਇਤ ਸੈਕਟਰੀ ਵੱਲੋਂ ਆਪਣੇ ਘਰ ’ਚ ਸਡ਼ਿਆ ਵਿਖਾਉਣ ਦੀ ਕੋਸ਼ਿਸ਼ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ ਮੁਕੱਦਮੇ ਦੇ ਦੋਸ਼ੀਆਂ ਧਨਵੰਤ ਸਿੰਘ ਪੰਚਾਇਤ ਸੈਕਟਰੀ ਅਤੇ ਪਰਮਜੀਤ ਸਿੰਘ ਸਾਬਕਾ ਸਰਪੰਚ ਪਿੰਡ ਨਵਾਂ ਗਾਓਂ ਨੂੰ ਮਾਮਲੇ ’ਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਪੜ੍ਹੋ ਅੱਜ ਦੀਆਂ ਵੱਡੀਆਂ ਖ਼ਬਰਾਂ
NEXT STORY 
