ਲੁਧਿਆਣਾ (ਰਾਜ): ਸ਼ਹਿਰ ਵਿਚ ਰਸੂਖਦਾਰਾਂ ਦੀ ਗੁੰਡਾਗਰਦੀ ਅਤੇ ਹੈਵਾਨੀਅਤ ਦਾ ਇਕ ਅਜਿਹਾ ਖੌਫਨਾਕ ਚਿਹਰਾ ਸਾਹਮਣੇ ਆਇਆ ਹੈ ਜਿਸ ਨੂੰ ਸੁਣ ਕੇ ਰੂਹ ਕੰਬ ਜਾਵੇ। ਇਕ ਗਰੀਬ ਸ਼ਖਸ ਨੂੰ ਨਵੀਂ ਕੋਠੀ ਵਿਚ ਰਾਖੀ ਲਈ ਬੁਲਾ ਕੇ ਨਾ ਸਿਰਫ਼ ਬੰਧਕ ਬਣਾਇਆ ਗਿਆ, ਸਗੋਂ ਉਸ 'ਤੇ ਚੋਰੀ ਦਾ ਝੂਠਾ ਦੋਸ਼ ਮੜ੍ਹ ਕੇ ਉਸ ਨੂੰ ਅਜਿਹੀ ਤਾਲਿਬਾਨੀ ਸਜ਼ਾ ਦਿੱਤੀ ਗਈ ਕਿ ਉਹ ਹੁਣ ਜ਼ਿੰਦਗੀ ਅਤੇ ਮੌਤ ਦੀ ਜੰਗ ਲੜ ਰਿਹਾ ਹੈ। ਮੁਲਜ਼ਮਾਂ ਨੇ ਸਾਰੀਆਂ ਮਰਯਾਦਾਵਾਂ ਪਾਰ ਕਰਦਿਆਂ ਪੀੜਤ ਦੇ ਗੁਪਤ ਅੰਗਾਂ (ਪ੍ਰਾਈਵੇਟ ਪਾਰਟਸ) 'ਤੇ ਬਿਜਲੀ ਦਾ ਕਰੰਟ ਲਗਾਇਆ ਅਤੇ ਡੰਡਿਆਂ ਨਾਲ ਉਸ ਨੂੰ ਉਦੋਂ ਤੱਕ ਕੁੱਟਿਆ ਜਦੋਂ ਤੱਕ ਉਹ ਅੱਧਮਰਿਆ ਨਹੀਂ ਹੋ ਗਿਆ।
ਪੁਲਸ ਕਮਿਸ਼ਨਰ ਨੂੰ ਦਿੱਤੀ ਸ਼ਿਕਾਇਤ ਵਿਚ ਪੀੜਤਾ ਸੁਨੀਤਾ ਨੇ ਆਪਣੇ ਪਤੀ ਨਾਲ ਹੋਈ ਇਸ ਦਰਿੰਦਗੀ ਲਈ ਇਨਸਾਫ਼ ਦੀ ਗੁਹਾਰ ਲਗਾਈ ਹੈ। ਸਿਵਲ ਸਿਟੀ ਦੀ ਰਹਿਣ ਵਾਲੀ ਸੁਨੀਤਾ ਮੁਤਾਬਕ ਉਸ ਦਾ ਪਤੀ ਮਦਨ ਲਾਲ ਆਪਣੀ ਦਿਵਿਆਂਗ ਧੀ ਦੇ ਇਲਾਜ ਅਤੇ ਘਰ ਦੇ ਖਰਚੇ ਲਈ ਰਾਤ ਦੀ ਐਕਸਟਰਾ ਡਿਊਟੀ ਲੱਭ ਰਿਹਾ ਸੀ। ਇਸੇ ਦੌਰਾਨ ਇਕ ਸੁਰੱਖਿਆ ਗਾਰਡ (ਸਿਕਿਓਰਿਟੀ ਗਾਰਡ) ਨੇ ਉਸ ਨੂੰ ਹੰਬੜਾਂ ਰੋਡ ਦੀ ਇਕ ਨਵੀਂ ਕੋਠੀ ਵਿਚ ਕੰਮ 'ਤੇ ਲਗਵਾਉਣ ਦੇ ਬਹਾਨੇ ਬੁਲਾਇਆ। 8 ਅਪ੍ਰੈਲ ਦੀ ਰਾਤ ਕੋਠੀ ਦੇ ਮਾਲਕਾਂ ਨੇ ਮਦਨ ਲਾਲ ਨੂੰ ਅੰਦਰ ਛੱਡ ਕੇ ਬਾਹਰੋਂ ਤਾਲਾ ਲਗਾ ਦਿੱਤਾ। ਪੀੜਤਾ ਦਾ ਦੋਸ਼ ਹੈ ਕਿ ਅਗਲੀ ਸਵੇਰ ਜਦੋਂ ਮਾਲਕ ਵਾਪਸ ਆਏ ਤਾਂ ਉਨ੍ਹਾਂ ਨੇ ਮਦਨ ਲਾਲ 'ਤੇ 15 ਤੋਂ 20 ਲੱਖ ਰੁਪਏ ਦੀ ਚੋਰੀ ਦਾ ਇਲਜ਼ਾਮ ਲਗਾ ਦਿੱਤਾ। ਸੱਚਾਈ ਦੱਸਣ ਦੇ ਬਾਵਜੂਦ ਮਾਲਕਾਂ ਅਤੇ ਉਨ੍ਹਾਂ ਦੇ ਸਾਥੀਆਂ ਨੇ ਮਦਨ ਲਾਲ ਨੂੰ ਕਮਰੇ ਵਿਚ ਬੰਦ ਕਰਕੇ ਬੇਰਹਿਮੀ ਨਾਲ ਟਾਰਚਰ ਕਰਨਾ ਸ਼ੁਰੂ ਕਰ ਦਿੱਤਾ। ਮੁਲਜ਼ਮਾਂ ਦਾ ਮਨ ਇੰਨੇ ਨਾਲ ਵੀ ਨਹੀਂ ਭਰਿਆ ਤਾਂ ਉਨ੍ਹਾਂ ਨੇ ਮਦਨ ਲਾਲ ਦੇ ਪ੍ਰਾਈਵੇਟ ਪਾਰਟ 'ਤੇ ਕਰੰਟ ਦੇ ਝਟਕੇ ਦਿੱਤੇ ਤਾਂ ਜੋ ਉਹ ਜ਼ਬਰਦਸਤੀ ਚੋਰੀ ਦੀ ਗੱਲ ਸਵੀਕਾਰ ਕਰ ਲਵੇ।
ਇਸ ਦੌਰਾਨ ਉਸ ਦਾ ਮੋਬਾਈਲ, ਬਾਈਕ ਅਤੇ ਜੇਬ ਵਿਚ ਰੱਖੇ ਪੈਸੇ ਵੀ ਖੋਹ ਲਏ ਗਏ। ਜਦੋਂ ਪਰਿਵਾਰ ਥਾਣੇ ਪਹੁੰਚਿਆ ਤਾਂ ਮਦਨ ਲਾਲ ਦੀ ਹਾਲਤ ਇੰਨੀ ਨਾਜ਼ੁਕ ਸੀ ਕਿ ਖੁਦ ਪੁਲਸ ਮੁਲਾਜ਼ਮਾਂ ਨੇ ਉਸ ਨੂੰ ਤੁਰੰਤ ਹਸਪਤਾਲ ਲੈ ਕੇ ਜਾਣ ਦੀ ਸਲਾਹ ਦਿੱਤੀ। ਫਿਲਹਾਲ ਸਿਵਲ ਹਸਪਤਾਲ ਦੇ ਡਾਕਟਰਾਂ ਨੇ ਉਸ ਦੀ ਹਾਲਤ ਗੰਭੀਰ ਦੇਖਦੇ ਹੋਏ ਉਸ ਨੂੰ ਪੀ.ਜੀ.ਆਈ. ਰੈਫਰ ਕਰਨ ਦੀ ਤਿਆਰੀ ਕਰ ਲਈ ਹੈ। ਪੀੜਤ ਪਰਿਵਾਰ ਦਾ ਦੋਸ਼ ਹੈ ਕਿ ਪੁਲਸ ਰਸੂਖਦਾਰ ਕੋਠੀ ਮਾਲਕਾਂ ਦੇ ਨਾਮ ਉਜਾਗਰ ਨਹੀਂ ਕਰ ਰਹੀ ਹੈ, ਜਦਕਿ ਕੋਠੀ ਮਾਲਕ ਉਨ੍ਹਾਂ ਨੂੰ ਝੂਠੇ ਕੇਸ ਵਿਚ ਫਸਾਉਣ ਦੀਆਂ ਧਮਕੀਆਂ ਦੇ ਰਹੇ ਹਨ।
ਪੰਜਾਬ ਦੇ ਮੌਸਮ ਦੀ ਤਾਜ਼ਾ ਅਪਡੇਟ ਜਾਰੀ! ਚੱਲਣਗੀਆਂ ਤੇਜ਼ ਹਵਾਵਾਂ, ਮੀਂਹ ਸਬੰਧੀ ਮਿਲੇ ਇਹ ਸੰਕੇਤ
NEXT STORY 
