ਨਵੀਂ ਦਿੱਲੀ (ਏਜੰਸੀ) : ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਯਵੰਸ਼ੀ ਆਪਣੇ ਪਹਿਲੇ ਸੀਨੀਅਰ ਕੌਮਾਂਤਰੀ ਦੌਰੇ ’ਤੇ ਇਕ ਅਨੋਖੇ ਤਜਰਬੇ ’ਚੋਂ ਲੰਘਣ ਵਾਲਾ ਹੈ, ਜਿੱਥੇ ਇਸ 15 ਸਾਲਾ ਖਿਡਾਰੀ ਨੂੰ ਭਾਰਤ ਦੀ ਆਗਾਮੀ ਇੰਗਲੈਂਡ ਟੀ-20 ਕੌਮਾਂਤਰੀ ਲੜੀ ਦੌਰਾਨ ਸੁਰੱਖਿਆ ਸਬੰਧੀ ਨਿਯਮਾਂ ਤਹਿਤ ਵੱਖਰਾ ‘ਚੇਂਜਿੰਗ ਰੂਮ’ ਦਿੱਤਾ ਜਾਵੇਗਾ।
ਆਪਣੀ ਹਮਲਾਵਰ ਬੱਲੇਬਾਜ਼ੀ ਨਾਲ ਪਹਿਲਾਂ ਹੀ ਸੁਰਖੀਆਂ ਬਟੋਰ ਚੁੱਕਾ ਸੂਰਯਵੰਸ਼ੀ ਡੈਬਿਊ ਦਾ ਮੌਕਾ ਮਿਲਣ ’ਤੇ ਭਾਰਤ ਦਾ ਸਭ ਤੋਂ ਨੌਜਵਾਨ ਕੌਮਾਂਤਰੀ ਕ੍ਰਿਕਟਰ ਬਣ ਜਾਵੇਗਾ। ਉਹ ਇਸ ਮਾਮਲੇ ’ਚ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਦਾ ਰਿਕਾਰਡ ਤੋੜ ਸਕਦਾ ਹੈ, ਜਿਸ ਨੇ 1989 ’ਚ 16 ਸਾਲ ਅਤੇ 205 ਦਿਨਾਂ ਦੀ ਉਮਰ ’ਚ ਟੈਸਟ ਡੈਬਿਊ ਕੀਤਾ ਸੀ। ਭਾਰਤ ਦਾ ਬ੍ਰਿਟੇਨ ਦੌਰਾ ਸ਼ੁੱਕਰਵਾਰ ਤੋਂ ਬੇਲਫਾਸਟ ’ਚ ਆਇਰਲੈਂਡ ਵਿਰੁੱਧ 2 ਮੈਚਾਂ ਦੀ ਟੀ-20 ਲੜੀ ਨਾਲ ਸ਼ੁਰੂ ਹੋਵੇਗਾ, ਜਿਸ ਤੋਂ ਬਾਅਦ ਅਗਲੇ ਬੁੱਧਵਾਰ ਤੋਂ ਇੰਗਲੈਂਡ ਵਿਰੁੱਧ 5 ਮੈਚਾਂ ਦੀ ਟੀ-20 ਲੜੀ ਖੇਡੀ ਜਾਵੇਗੀ। ਇੰਗਲੈਂਡ ਦੌਰੇ ਦੌਰਾਨ ਸੂਰਯਵੰਸ਼ੀ ਲਈ ਪਹਿਲੀ ਵਾਰ ਇਕ ਵਿਸ਼ੇਸ਼ ਵਿਵਸਥਾ ਲਾਗੂ ਕੀਤੀ ਜਾਵੇਗੀ।
ਬ੍ਰਿਟਿਸ਼ ਅਖਬਾਰ ‘ਦਿ ਗਾਰਡੀਅਨ’ ਦੀ ਰਿਪੋਰਟ ਅਨੁਸਾਰ, ਕੌਮਾਂਤਰੀ ਕ੍ਰਿਕਟ ਕੌਂਸਲ (ਆਈ.ਸੀ.ਸੀ.) ਦੇ ਸੁਰੱਖਿਆ ਨਿਯਮਾਂ ਅਤੇ ਇੰਗਲੈਂਡ ਐਂਡ ਵੇਲਜ਼ ਕ੍ਰਿਕਟ ਬੋਰਡ (ਈ.ਸੀ.ਬੀ.) ਦੇ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਅੰਡਰ-16 ਖਿਡਾਰੀਆਂ ਨੂੰ ਬਾਲਗ ਖਿਡਾਰੀਆਂ ਦੇ ਚੇਂਜਿੰਗ ਰੂਮ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਨਹੀਂ ਹੁੰਦੀ। ਰਿਪੋਰਟ ਮੁਤਾਬਕ, ‘‘ਸੂਰਯਵੰਸ਼ੀ ਮੈਚ ਦੌਰਾਨ ਭਾਰਤੀ ਡ੍ਰੈਸਿੰਗ ਰੂਮ ’ਚ ਰਹਿ ਸਕਦਾ ਹੈ ਅਤੇ ਟੀਮ ਦੀਆਂ ਮੀਟਿੰਗਾਂ ’ਚ ਵੀ ਸ਼ਾਮਲ ਹੋ ਸਕੇਗਾ ਪਰ ਨਿਯਮ ਸਿਰਫ ਕੱਪੜੇ ਬਦਲਣ ਦੇ ਸਮੇਂ ਲਾਗੂ ਹੋਣਗੇ।’’
ਇਸ ’ਚ ਕਿਹਾ ਗਿਆ, ‘‘ਇਹ ਵਿਵਸਥਾ ਇੰਗਲੈਂਡ ਦੀਆਂ ਖੇਡਾਂ ’ਚ ਆਮ ਹੈ। ਉਦਾਹਰਨ ਵਜੋਂ ਆਰਸਨੈੱਲ ਦੇ ਮੈਕਸ ਡੌਮੈਨ ਨੂੰ ਵੀ ਪਿਛਲੇ ਸੀਜ਼ਨ ’ਚ ਇਸੇ ਤਰ੍ਹਾਂ ਵੱਖਰੀ ਚੇਂਜਿੰਗ ਸਹੂਲਤ ਦਿੱਤੀ ਗਈ ਸੀ, ਜਦੋਂ ਤੱਕ ਕਿ ਉਹ ਦਸੰਬਰ ’ਚ 16 ਸਾਲ ਦਾ ਨਹੀਂ ਹੋ ਗਿਆ। ਇਹ ਹਾਲਾਂਕਿ ਸੂਰਯਵੰਸ਼ੀ ਲਈ ਨਵਾਂ ਤਜਰਬਾ ਹੋਵੇਗਾ ਕਿਉਂਕਿ ਭਾਰਤ ’ਚ ਇਸ ਤਰ੍ਹਾਂ ਦਾ ਕੋਈ ਨਿਯਮ ਨਹੀਂ ਹੈ।’’
ਸੂਰਯਵੰਸ਼ੀ ਦੇ ਮਾਤਾ-ਪਿਤਾ ਦੇ ਵੀ ਇਸ ਦੌਰੇ ’ਤੇ ਉਸ ਦੇ ਨਾਲ ਰਹਿਣ ਦੀ ਸੰਭਾਵਨਾ ਹੈ। ਰਾਜਸਥਾਨ ਰਾਇਲਜ਼ ਦੇ ਇਸ ਨੌਜਵਾਨ ਖਿਡਾਰੀ ਲਈ ਇਹ ਤਜਰਬਾ ਨਵਾਂ ਹੋਵੇਗਾ, ਕਿਉਂਕਿ ਆਈ.ਪੀ.ਐੱਲ. ਦੌਰਾਨ ਉਹ ਆਪਣੇ ਸੀਨੀਅਰ ਖਿਡਾਰੀਆਂ ਨਾਲ ਇਕੋ ਡਰੈਸਿੰਗ ਰੂਮ ਸਾਂਝਾ ਕਰਦਾ ਸੀ। ਈ.ਸੀ.ਬੀ. ਨੇ ਦੱਸਿਆ ਹੈ ਕਿ ਉਹ ਬੀ.ਸੀ.ਸੀ.ਆਈ. ਅਤੇ ਸਟੇਡੀਅਮ ਅਧਿਕਾਰੀਆਂ ਨਾਲ ਮਿਲ ਕੇ ਸਾਰੇ ਸੁਰੱਖਿਆ ਪ੍ਰੋਟੋਕੋਲ ਦੀ ਪਾਲਣਾ ਯਕੀਨੀ ਬਣਾ ਰਿਹਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਵਿੰਬਲਡਨ ਵਿੱਚ ਖਿਤਾਬ ਦਾ ਬਚਾਅ ਕਰਨ ਉਤਰੇਗਾ ਸਿਨਰ
NEXT STORY 
