ਸਪੋਰਟਸ ਡੈਸਕ- ਆਈਪੀਐਲ (IPL) 2026 ਦਾ ਆਗਾਜ਼ 28 ਮਾਰਚ ਤੋਂ ਹੋਣ ਜਾ ਰਿਹਾ ਹੈ ਪਰ ਸੀਜ਼ਨ ਦੇ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਪੰਜਾਬ ਕਿੰਗਜ਼ ਦੇ ਧਾਕੜ ਬੱਲੇਬਾਜ਼ ਸ਼ਸ਼ਾਂਕ ਸਿੰਘ ਨੇ ਆਪਣੀ ਟੀਮ ਦੀ ਜਿੱਤ ਨੂੰ ਲੈ ਕੇ ਇੱਕ ਬਹੁਤ ਵੱਡੀ ਭਵਿੱਖਬਾਣੀ ਕਰ ਦਿੱਤੀ ਹੈ। ਸ਼ਸ਼ਾਂਕ ਦਾ ਮੰਨਣਾ ਹੈ ਕਿ ਇਸ ਵਾਰ ਪੰਜਾਬ ਕਿੰਗਜ਼ ਖ਼ਿਤਾਬ ਜਿੱਤਣ ਦਾ ਆਪਣਾ ਸਪਨਾ ਜ਼ਰੂਰ ਪੂਰਾ ਕਰੇਗੀ।
ਸ਼ਸ਼ਾਂਕ ਸਿੰਘ ਨੇ ਪੂਰੇ ਆਤਮਵਿਸ਼ਵਾਸ ਨਾਲ ਕਿਹਾ ਹੈ ਕਿ 31 ਮਈ ਨੂੰ ਬੈਂਗਲੁਰੂ ਦੇ ਐਮ. ਚਿੰਨਾਸਵਾਮੀ ਸਟੇਡੀਅਮ ਵਿੱਚ ਪੰਜਾਬ ਕਿੰਗਜ਼ ਟਰਾਫੀ ਉਠਾਏਗੀ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ, "ਮੈਨੂੰ ਪਤਾ ਹੈ ਕਿ ਅਸੀਂ ਫਾਈਨਲ ਖੇਡਾਂਗੇ ਅਤੇ ਜਿੱਤਾਂਗੇ। ਇਹ ਸਿਰਫ਼ ਇੱਕ ਅਹਿਸਾਸ ਨਹੀਂ ਹੈ, ਬਲਕਿ ਮੈਨੂੰ ਪੂਰਾ ਯਕੀਨ ਹੈ ਕਿ ਅਜਿਹਾ ਹੋਵੇਗਾ"। ਸ਼ਸ਼ਾਂਕ ਅਨੁਸਾਰ ਟੀਮ ਦਾ ਪੂਰਾ ਡਰੈਸਿੰਗ ਰੂਮ ਇਸ ਵੇਲੇ ਇੱਕੋ ਸੋਚ 'ਤੇ ਹੈ ਅਤੇ ਹਰ ਖਿਡਾਰੀ ਜਿੱਤ ਲਈ ਉਤਸ਼ਾਹਿਤ ਹੈ।
ਜ਼ਿਕਰਯੋਗ ਹੈ ਕਿ ਸਾਲ 2025 ਵਿੱਚ ਪੰਜਾਬ ਕਿੰਗਜ਼ ਨੇ 10 ਸਾਲਾਂ ਦੇ ਲੰਬੇ ਇੰਤਜ਼ਾਰ ਤੋਂ ਬਾਅਦ ਫਾਈਨਲ ਤੱਕ ਦਾ ਸਫਰ ਤੈਅ ਕੀਤਾ ਸੀ। ਟੀਮ ਨੇ ਲੀਗ ਸਟੇਜ ਦੇ 14 ਵਿੱਚੋਂ 9 ਮੈਚ ਜਿੱਤ ਕੇ ਟਾਪ 'ਤੇ ਜਗ੍ਹਾ ਬਣਾਈ ਸੀ ਅਤੇ ਕੁਆਲੀਫਾਇਰ-2 ਵਿੱਚ ਮੁੰਬਈ ਇੰਡੀਅਨਜ਼ ਨੂੰ ਮਾਤ ਦਿੱਤੀ ਸੀ। ਹਾਲਾਂਕਿ, ਫਾਈਨਲ ਵਿੱਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਹੱਥੋਂ ਸਿਰਫ਼ ਛੇ ਦੌੜਾਂ ਨਾਲ ਹਾਰ ਕੇ ਟੀਮ ਖ਼ਿਤਾਬ ਤੋਂ ਖੁੰਝ ਗਈ ਸੀ।
ਸ਼ਸ਼ਾਂਕ ਨੇ ਆਪਣੀ ਰਣਨੀਤੀ ਸਾਂਝੀ ਕਰਦਿਆਂ ਕਿਹਾ ਕਿ ਉਹ ਪਿਛਲੇ ਸਾਲ ਦੇ ਪ੍ਰਦਰਸ਼ਨ ਦਾ ਦਬਾਅ ਲੈਣ ਦੀ ਬਜਾਏ ਹਰ ਮੈਚ ਨੂੰ ਇੱਕ ਨਵੀਂ ਚੁਣੌਤੀ ਵਜੋਂ ਲੈਣਗੇ। ਉਨ੍ਹਾਂ ਦਾ ਪਹਿਲਾ ਟੀਚਾ ਗੁਜਰਾਤ ਟਾਈਟਨਸ (GT) ਵਿਰੁੱਧ ਪਹਿਲੇ ਮੈਚ ਦੀ ਤਿਆਰੀ ਕਰਨਾ ਹੈ, ਜਿਸ ਤੋਂ ਬਾਅਦ ਉਹ ਚੇਨਈ ਸੁਪਰ ਕਿੰਗਜ਼ (CSK) ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਵਰਗੀਆਂ ਟੀਮਾਂ ਨਾਲ ਦੋ-ਦੋ ਹੱਥ ਕਰਨਗੇ।
ਸ਼ਸ਼ਾਂਕ ਸਿੰਘ ਦਾ ਸ਼ਾਨਦਾਰ ਰਿਕਾਰਡ
ਸ਼ਸ਼ਾਂਕ ਸਿੰਘ ਪਿਛਲੇ ਕੁਝ ਸੀਜ਼ਨਾਂ ਤੋਂ ਪੰਜਾਬ ਕਿੰਗਜ਼ ਲਈ ਇੱਕ ਵੱਡੇ ਮੈਚ ਵਿਨਰ ਵਜੋਂ ਉੱਭਰੇ ਹਨ। ਉਨ੍ਹਾਂ ਨੇ 2024 ਵਿੱਚ 354 ਦੌੜਾਂ ਬਣਾਈਆਂ ਸਨ ਅਤੇ ਪਿਛਲੇ ਸੀਜ਼ਨ ਵਿੱਚ ਵੀ ਉਨ੍ਹਾਂ ਦੇ ਬੱਲੇ ਤੋਂ 350 ਦੌੜਾਂ ਨਿਕਲੀਆਂ ਸਨ। ਭਾਵੇਂ ਉਨ੍ਹਾਂ ਦੇ ਆਈਪੀਐਲ ਕਰੀਅਰ ਦੀ ਸ਼ੁਰੂਆਤ ਧੀਮੀ ਰਹੀ ਸੀ, ਪਰ ਹੁਣ ਉਹ ਟੀਮ ਦੇ ਸਭ ਤੋਂ ਭਰੋਸੇਮੰਦ ਬੱਲੇਬਾਜ਼ਾਂ ਵਿੱਚੋਂ ਇੱਕ ਹਨ।
ODI World Cup 2027 'ਚ ਨਹੀਂ ਨਜ਼ਰ ਆਉਣਗੇ TEAM INDIA ਦੇ 5 ਧਾਕੜ ਖਿਡਾਰੀ!
NEXT STORY 
