ਅਟਲਾਂਟਾ, (ਏਜੰਸੀ)- ਲਿਓਨਲ ਮੈਸੀ ਨੇ ਸਹੀ ਸਮੇਂ ’ਤੇ ਆਪਣੇ ਹੁਨਰ ਦਾ ਸ਼ਾਨਦਾਰ ਨਮੂਨਾ ਪੇਸ਼ ਕਰ ਕੇ ਅਰਜਨਟੀਨਾ ਨੂੰ ਵਿਸ਼ਵ ਕੱਪ ਫੁੱਟਬਾਲ ਦੇ ਸੈਮੀਫਾਈਨਲ ’ਚ ਇੰਗਲੈਂਡ ’ਤੇ 2-1 ਨਾਲ ਜਿੱਤ ਦਿਵਾਉਣ ’ਚ ਅਹਿਮ ਭੂਮਿਕਾ ਨਿਭਾਈ, ਜਿਸ ਤੋਂ ਬਾਅਦ ਵਿਰੋਧੀ ਟੀਮ ਦੇ ਸਟਾਰ ਖਿਡਾਰੀ ਹੈਰੀ ਕੇਨ ਨੇ ਵੀ ਉਸ ਦੀ ਜੰਮ ਕੇ ਸ਼ਲਾਘਾ ਕੀਤੀ। ਮੈਸੀ ਨੇ ਭਾਵੇਂ ਕੋਈ ਗੋਲ ਨਹੀਂ ਕੀਤਾ ਪਰ ਉਸ ਨੇ ਅਰਜਨਟੀਨਾ ਵੱਲੋਂ ਦੋਵੇਂ ਗੋਲ ਕਰਨ ’ਚ ਮਦਦ ਕੀਤੀ। ਇਸ ਨਾਲ ਉਸ ਦੀ ਟੀਮ ਨੇ ਫਿਰ ਤੋਂ ਵਾਪਸੀ ਕਰ ਕੇ ਲਗਾਤਾਰ ਦੂਜੀ ਵਾਰ ਫਾਈਨਲ ’ਚ ਜਗ੍ਹਾ ਬਣਾਈ।
ਰਾਊਂਡ ਆਫ 16 ’ਚ ਮਿਸਰ ਵਿਰੁੱਧ ਅਣਕਿਆਸੀ ਵਾਪਸੀ ਦੇ 8 ਦਿਨਾਂ ਬਾਅਦ ਮੈਸੀ ਅਟਲਾਂਟਾ ਪਰਤਿਆ ਅਤੇ ਉਸ ਨੇ ਆਪਣੇ ਕਰੀਅਰ ’ਚ ਇਕ ਹੋਰ ਸ਼ਾਨਦਾਰ ਇਕ ਹੋਰ ਪੰਨਾ ਜੋੜਿਆ। ਐਂਥਨੀ ਗਾਰਡਨ ਦੇ 55ਵੇਂ ਮਿੰਟ ’ਚ ਕੀਤੇ ਗਏ ਗੋਲ ਨਾਲ ਇੰਗਲੈਂਡ ਦੀ ਉਮੀਦ ਬੱਝੀ ਸੀ ਪਰ ਮੈਸੀ ਅਤੇ ਉਸ ਦੇ ਨੀਲੀ ਜਰਸੀ ਵਾਲੇ ਸਾਥੀਆਂ ਨੇ ਫਿਰ ਤੋਂ ਸਾਬਿਤ ਕੀਤਾ ਕਿ ਉਹ ਕਦੇ ਹਾਰ ਨਹੀਂ ਮੰਨਦਾ। ਖੇਡ ਦੇ 85ਵੇਂ ਮਿੰਟ ’ਚ ਮੈਸੀ ਨੇ ਇਕ ਸ਼ਾਰਟ ਕਾਰਨਰ ਕਿੱਕ ਮਾਰੀ। ਇਸ ਤੋਂ ਤੁਰੰਤ ਬਾਅਦ ਹੀ ਉਸ ਨੂੰ ਵਾਪਸ ਪਾਸ ਮਿਲਿਆ। ਉਸ ਨੇ ਦੇਖਿਆ ਕਿ ਐਂਜ਼ੋ ਫਰਨਾਂਡੀਜ਼ ਗੋਲ ਤੋਂ 25 ਗਜ਼ ਦੀ ਦੂਰੀ ’ਤੇ ਘਾਤ ਲਾਈ ਬੈਠਾ ਹੈ। ਉਸ ਨੇ ਗੇਂਦ ਫਰਨਾਂਡੀਜ਼ ਨੂੰ ਦਿੱਤੀ, ਜਿਸ ਨੇ ਗੋਲਕੀਪਰ ਜਾਰਡਨ ਪਿਕਫੋਰਡ ਨੂੰ ਚਕਮਾ ਦੇ ਕੇ ਸਕੋਰ ਬਰਾਬਰ ਕਰ ਦਿੱਤਾ। ਉਸ ਸਮੇਂ ਅਜਿਹਾ ਲੱਗ ਰਿਹਾ ਸੀ ਕਿ ਅਰਜਨਟੀਨਾ ਦੀ ਜਿੱਤ ਨਿਸ਼ਚਿਤ ਹੈ ਅਤੇ ਠੀਕ ਉਸੇ ਤਰ੍ਹਾਂ ਹੀ ਹੋਇਆ।
ਇਕ ਵਾਰ ਫਿਰ ਮੈਸੀ ਨੇ ਹੀ ਕਮਾਲ ਦਿਖਾਇਆ। ਸਟਾਪੇਜ ਟਾਈਮ ਦੇ ਦੂਜੇ ਮਿੰਟ ’ਚ ਉਸ ਨੇ ਅਚਾਨਕ ਆਪਣੀ ਗਤੀ ਵਧਾ ਦਿੱਤੀ ਅਤੇ ਗੋਲਪੋਸਟ ਵੱਲ ਦੌੜਦਿਅਾਂ ਲੋੜੀਂਦੀ ਜਗ੍ਹਾ ਬਣਾ ਲਈ, ਜਿਸ ਨਾਲ ਉਸ ਨੂੰ ਪਿੱਛੇ ਵਾਲੀ ਪੋਸਟ ’ਤੇ ਸਟੀਕ ਕਰਾਸ ਭੇਜਣ ਦਾ ਮੌਕਾ ਮਿਲ ਗਿਆ। ਗੇਂਦ ਲੋਟਾਰੋ ਮਾਰਟੀਨੇਜ ਕੋਲ ਪਹੁੰਚੀ, ਜਿਸ ਨੇ 2 ਡਿਫੈਂਡਰਾਂ ਦੇ ਵਿਚਾਲਿਓਂ ਨਿਕਲ ਕੇ ਬੜੀ ਆਸਾਨੀ ਨਾਲ ਹੈੱਡਰ ਨਾਲ ਜੇਤੂ ਗੋਲ ਦਾਗ ਦਿੱਤਾ। ਇਹ ਮਾਰਟੀਨੇਜ ਲਈ ਇਕ ਭਾਵੁਕ ਪਲ ਸੀ ਅਤੇ ਇਹ ਸਭ ਉਸ ਦੇ ਕਪਤਾਨ ਦੀ ਬਦੌਲਤ ਹੀ ਸੰਭਵ ਹੋ ਸਕਿਆ। ਜਦੋਂ ਆਖਰੀ ਸੀਟੀ ਵੱਜੀ ਤਾਂ ਮੈਸੀ ਮੈਦਾਨ ਵਿਚਾਲੇ ਗੋਡਿਆਂ ਦੇ ਭਾਰ ਬੈਠ ਗਿਆ ਅਤੇ ਆਪਣੀਆਂ ਮੁੱਠੀਆਂ ਹਵਾ ’ਚ ਲਹਿਰਾਉਣ ਲੱਗਾ। ਮੈਸੀ ਨੇ ਮੌਜੂਦਾ ਟੂਰਨਾਮੈਂਟ ’ਚ ਅਜੇ ਤੱਕ 8 ਗੋਲ ਕੀਤੇ ਹਨ ਅਤੇ ਉਹ ਫਰਾਂਸ ਦੇ ਕਿਲੀਅਨ ਐਮਬਾਪੇ ਦੀ ਬਰਾਬਰੀ ’ਤੇ ਹੈ।
‘‘ਲਿਓ ਹੁਣ ਵੀ ਬਿਹਤਰੀਨ ਪ੍ਰਦਰਸ਼ਨ ਕਰ ਰਿਹਾ ਹੈ। ਮੈਨੂੰ ਲੱਗਾ ਕਿ ਮੈਚ ਦੇ ਵੱਡੇ ਹਿੱਸੇ ’ਚ ਅਸੀਂ ਉਸ ਦਾ ਬਾਖੂਬੀ ਸਾਹਮਣਾ ਕੀਤਾ ਪਰ ਦੁਨੀਆ ਦੇ ਸਭ ਤੋਂ ਖ਼ਤਰਨਾਕ ਖਿਡਾਰੀਆਂ ਵਾਂਗ ਜਦੋਂ ਗੇਂਦ ਆਖਰੀ ਛੋਰ ’ਤੇ ਉਸ ਕੋਲ ਹੁੰਦੀ ਹੈ ਤਾਂ ਉਹ ਸ਼ਾਨਦਾਰ ਖੇਡ ਦਿਖਾਉਂਦਾ ਹੈ। ਅੱਜ ਉਸ ਨੇ ਫਿਰ ਇਹੀ ਕੀਤਾ। ਉਹ ਸਰਵਸ਼੍ਰੇਸ਼ਠ ਖਿਡਾਰੀਆਂ ’ਚੋਂ ਇਕ ਹੈ।’’
– ਹੈਰੀ ਕੇਨ, ਇੰਗਲੈਂਡ ਕਪਤਾਨ
ਇਹ ਕਹਿਣਾ ਆਸਾਨ ਕਿ ਬੜ੍ਹਤ ਹੁੰਦੇ ਹੋਏ ਰੱਖਿਆਤਮਕ ਹੋ ਕੇ ਖੇਡਣਾ ਗਲਤ ਸੀ : ਇੰਗਲੈਂਡ ਦਾ ਕੋਚ ਟਿਊਸ਼ੇਲ
ਅਟਲਾਂਟਾ, (ਏਜੰਸੀ)- ਵਿਸ਼ਵ ਕੱਪ ਸੈਮੀਫਾਈਨਲ ’ਚ ਜਦੋਂ ਸਮਾਂ ਖਤਮ ਹੋ ਰਿਹਾ ਸੀ ਤਾਂ ਇੰਗਲੈਂਡ ਆਪਣੀ ਬੜ੍ਹਤ ਨੂੰ ਹਰ ਹਾਲ ’ਚ ਬਚਾ ਕੇ ਰੱਖਣਾ ਚਾਹੁੰਦਾ ਸੀ। ਕੋਚ ਥਾਮਸ ਟਿਊਸ਼ੇਲ ਨੇ ਗੋਲਮੁਖ ਦੇ ਸਾਹਮਣੇ ਇਕ ਮਜ਼ਬੂਤ ਦੀਵਾਰ ਬਣਾਉਣ ਲਈ ਆਖਰੀ-11 ਅਤੇ ਰਣਨੀਤੀ ’ਚ ਬਦਲਾਅ ਕੀਤੇ ਪਰ ਅਰਜਨਟੀਨਾ ਅਤੇ ਲਿਓਨਲ ਮੈਸੀ ਨੇ ਉਸ ਦੀਵਾਰ ਨੂੰ ਆਸਾਨੀ ਨਾਲ ਤੋੜ ਦਿੱਤਾ। ਫੁੱਟਬਾਲ ਦੀਆਂ ਸਭ ਤੋਂ ਵੱਡੀਆਂ ਵਿਰੋਧਤਾਈਆਂ ’ਚੋਂ ਇਕ ਇਸ ਵੱਡੇ ਮੁਕਾਬਲੇ ’ਚ ਟਿਊਸ਼ੇਲ ਦੀਆਂ ਰਣਨੀਤਕ ਚਾਲਾਂ ਦੀ ਸ਼ਾਇਦ ਸਾਲਾਂ ਤੱਕ ਸਮੀਖਿਆ ਅਤੇ ਆਲੋਚਨਾ ਹੋਵੇਗੀ ਕਿਉਂਕਿ ਇੰਗਲੈਂਡ 1966 ਤੋਂ ਬਾਅਦ ਪਹਿਲੀ ਵਾਰ ਵਿਸ਼ਵ ਕੱਪ ਫਾਈਨਲ ’ਚ ਪਹੁੰਚਣ ਤੋਂ ਖੁੰਝ ਗਿਆ।
ਟਿਊਸ਼ੇਲ ਨੇ ਕਿਹਾ, ‘‘ਉਹ ਹਰ ਹੈਡਰ ’ਤੇ ਹਮਲਾ ਕਰ ਰਿਹਾ ਸੀ। ਉਹ ਲਗਾਤਾਰ ਕਰਾਸ ’ਤੇ ਕਰਾਸ ਦੇ ਰਿਹਾ ਸੀ। ਇਸ ਲਈ ਅਸੀਂ ‘ਬੈਕ ਫਾਈਵ’ (ਰੱਖਿਆ ਕਤਾਰ ’ਚ 5 ਖਿਡਾਰੀ) ਵਾਲੀ ਰਣਨੀਤੀ ਅਪਣਾਈ। ਸਾਡੇ ਗੋਲ ਦੇ ਠੀਕ ਬਾਅਦ ਅਸੀਂ ਬਹੁਤ ਸਾਰੇ ਕਰਾਸ ਅਤੇ ਬਹੁਤ ਸਾਰੇ ਮੌਕੇ ਵਿਰੋਧੀ ਟੀਮ ਨੂੰ ਦੇ ਦਿੱਤੇ। ਇਸ ਲਈ ਅਸੀਂ ਮਦਦ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਜ਼ਾਹਿਰ ਹੈ ਕਿ ਜ਼ਿੰਮੇਵਾਰੀ ਕੋਚ ਦੀ ਹੁੰਦੀ ਹੈ। ਅਤੇ... ਜੇਕਰ ਚੀਜ਼ਾਂ ਠੀਕ ਨਹੀਂ ਹੁੰਦੀਆਂ ਤਾਂ ਇਹ ਕਹਿਣਾ ਆਸਾਨ ਹੁੰਦਾ ਹੈ ਕਿ ਫੈਸਲਾ ਗਲਤ ਸੀ।’’
ਪੋਸਟ ਮਾਲੋਨ, ਟੌਮ ਕਰੂਜ਼ ਅਤੇ ਆਈਸ਼ੋਸਪੀਡ ਵਿਸ਼ਵ ਕੱਪ ਸਮਾਪਤੀ ਸਮਾਰੋਹ ’ਚ ਹੋਣਗੇ ਮੁੱਖ ਕਲਾਕਾਰ
ਨਿਊਯਾਰਕ, (ਏਜੰਸੀ)- ਕੌਮਾਂਤਰੀ ਫੁੱਟਬਾਲ ਮਹਾਸੰਘ (ਫੀਫਾ) ਨੇ ਕਿਹਾ ਕਿ ਵਿਸ਼ਵ ਕੱਪ 2026 ਦੇ ਸਮਾਪਤੀ ਸਮਾਰੋਹ ’ਚ ਅਭਿਨੇਤਾ ਟੌਮ ਕਰੂਜ਼ ਤੋਂ ਲੈ ਕੇ ਸਟ੍ਰੀਮਰ ਆਈਸ਼ੋਸਪੀਡ ਤੱਕ ਕਈ ਤਰ੍ਹਾਂ ਦੇ ਕਲਾਕਾਰ ਆਪਣੀ ਪੇਸ਼ਕਾਰੀ ਦੇਣਗੇ। ਫੀਫਾ ਨੇ ਬੁੱਧਵਾਰ ਨੂੰ ਕਿਹਾ ਕਿ ਅਮਰੀਕੀ ਰੈਪਰ-ਗਾਇਕ ਪੋਸਟ ਮਾਲੋਨ ਸਮਾਪਤੀ ਸਮਾਰੋਹ ’ਚ ਮੁੱਖ ਪੇਸ਼ਕਾਰੀ ਦੇਣਗੇ। ਇਹ ਸਮਾਰੋਹ ਐਤਵਾਰ ਦੇ ਫਾਈਨਲ ਤੋਂ 90 ਮਿੰਟ ਪਹਿਲਾਂ ਆਯੋਜਿਤ ਕੀਤਾ ਜਾਵੇਗਾ।
ਫੀਫਾ ਨੇ ਇਕ ਬਿਆਨ ’ਚ ਕਿਹਾ ਕਿ ਇਸ ਪ੍ਰੋਗਰਾਮ ਦਾ ਉਦੇਸ਼ 3 ਦੇਸ਼ਾਂ ਦੇ 16 ਮੇਜ਼ਬਾਨ ਸ਼ਹਿਰਾਂ ’ਚ 48 ਟੀਮਾਂ ਦੀ ਅਭੁੱਲ ਯਾਤਰਾ ਦਾ ਜਸ਼ਨ ਮਨਾਉਣਾ ਹੈ। ਆਈਸ਼ੋਸਪੀਡ ਜਿਨ੍ਹਾਂ ਨੇ ਕਈ ਮੈਚਾਂ ਦੀ ਲਾਈਵ ਸਟ੍ਰੀਮਿੰਗ ਕੀਤੀ ਹੈ, ਨੂੰ ਇਕ ਕਲਾਕਾਰ ਦੇ ਰੂਪ ’ਚ ਸੂਚੀਬੱਧ ਕੀਤਾ ਗਿਆ ਹੈ, ਜਦਕਿ ਕਰੂਜ਼ ਨੂੰ ‘ਵਿਸ਼ੇਸ਼ ਹਾਜ਼ਰੀ’ ਦੇਣ ਵਾਲੇ ਵਜੋਂ ਦੱਸਿਆ ਗਿਆ ਹੈ। ਇਸ ਸਮਾਰੋਹ ’ਚ ਇਟਲੀ ਦੀ ਗਾਇਕਾ ਲੌਰਾ ਪੌਸਿਨੀ, ਟੋਨੀ ਐਵਾਰਡ ਜੇਤੂ ਅਤੇ ਪੁਸੀਕੈਟ ਡੌਲਸ ਦੀ ਮੈਂਬਰ ਨਿਕੋਲ ਸ਼ੇਰਜ਼ਿੰਗਰ ਅਤੇ ਬ੍ਰਿਟਿਸ਼ ਗਾਇਕ ਅਤੇ ਟੇਕ ਦੈਟ ਦੇ ਸਾਬਕਾ ਮੈਂਬਰ ਰੌਬੀ ਵਿਲੀਅਮਜ਼ ਵੱਲੋਂ ਪੇਸ਼ਕਾਰੀਆਂ ਵੀ ਸ਼ਾਮਿਲ ਹੋਣਗੀਆਂ। ਜੈਨੀਫਰ ਹਡਸਨ ਅਮਰੀਕੀ ਰਾਸ਼ਟਰੀ ਗੀਤ ਗਾਉਣਗੇ।
ਰੋਹਿਤ ਸ਼ਰਮਾ ਦੇ ਆਖਰੀ ਮੈਚ ਨੂੰ ਲੈ ਕੇ ਪਾਰਥਿਵ ਪਟੇਲ ਦੀ ਵੱਡੀ ਉਮੀਦ; ਕਿਹਾ- 'ਖੇਡਣਗੇ ਯਾਦਗਾਰ ਪਾਰੀ'
NEXT STORY 
