ਜੇਨੇਵਾ (ਏਜੰਸੀ) : ਰੂਸੀ ਫੁੱਟਬਾਲ ਟੀਮਾਂ ਨੂੰ ਮਹਿਲਾ ਯੂਰਪੀਅਨ ਚੈਂਪੀਅਨਸ਼ਿਪ, ਪੁਰਸ਼ਾਂ ਦੀ ਚੈਂਪੀਅਨਜ਼ ਲੀਗ ਅਤੇ 2023 ਮਹਿਲਾ ਵਿਸ਼ਵ ਕੱਪ ਕੁਆਲੀਫਾਈ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ। UEFA ਨੇ ਇਹ ਪਾਬੰਦੀਆਂ ਰੂਸ ਦੇ ਯੂਕ੍ਰੇਨ 'ਤੇ ਫੌਜੀ ਹਮਲੇ ਕਾਰਨ ਲਗਾਈਆਂ ਹਨ। ਇਸ ਤੋਂ ਪਹਿਲਾਂ ਫਰਵਰੀ ਵਿੱਚ, ਫੀਫਾ ਅਤੇ UEFA ਨੇ ਰੂਸ ਦੀ ਰਾਸ਼ਟਰੀ ਅਤੇ ਕਲੱਬ ਟੀਮਾਂ ਦੇ ਅੰਤਰਰਾਸ਼ਟਰੀ ਫੁੱਟਬਾਲ ਖੇਡਣ 'ਤੇ ਪਾਬੰਦੀ ਲਗਾ ਦਿੱਤੀ ਸੀ, ਜਿਸ ਵਿਚ ਪੁਰਸ਼ਾਂ ਦਾ ਵਿਸ਼ਵ ਕੱਪ ਪਲੇਆਫ ਸ਼ਾਮਲ ਹੈ।
ਇਹ ਵੀ ਪੜ੍ਹੋ: 66 ਸਾਲਾ ਸਾਬਕਾ ਭਾਰਤੀ ਕ੍ਰਿਕਟਰ ਮੁੜ ਬਣਿਆ ਲਾੜਾ, 28 ਸਾਲ ਛੋਟੀ ਕੁੜੀ ਨਾਲ ਰਚਾਇਆ ਵਿਆਹ
ਉਨ੍ਹਾਂ ਫ਼ੈਸਲਿਆਂ ਦੇ ਖ਼ਿਲਾਫ਼ ਰੂਸੀ ਫੁੱਟਬਾਲ ਫੈੱਡਰੇਸ਼ਨ ਨੇ ਖੇਡ ਆਰਬਿਟਰੇਸ਼ਨ ਕੋਲ ਅਪੀਲ ਕੀਤੀ ਹੈ। ਨਵੀਆਂ ਪਾਬੰਦੀਆਂ ਵਿਰੁੱਧ ਵੀ ਅਪੀਲ ਦਾਇਰ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਯੂ.ਈ.ਐੱਫ.ਏ. ਨੇ ਸੋਮਵਾਰ ਨੂੰ ਕਿਹਾ ਕਿ ਇੰਗਲੈਂਡ ਵਿੱਚ ਜੁਲਾਈ ਵਿਚ ਹੋਣ ਵਾਲੇ ਮਹਿਲਾ ਯੂਰੋ 2022 ਵਿੱਚ ਰੂਸ ਦੀ ਥਾਂ ਪੁਰਤਗਾਲ ਲਵੇਗਾ। ਰੂਸ ਨੇ ਪੁਰਤਗਾਲ ਨੂੰ ਹਰਾ ਕੇ ਪਲੇਆਫ ਵਿੱਚ ਕੁਆਲੀਫਾਈ ਕੀਤਾ ਸੀ। ਉਥੇ ਹੀ ਚੈਂਪੀਅਨਜ਼ ਲੀਗ 'ਚ ਰੂਸੀ ਪ੍ਰੀਮੀਅਰ ਲੀਗ ਦੇ ਜੇਤੂ ਜ਼ੇਨਿਤ ਸੇਂਟ ਪੀਟਰਸਬਰਗ ਦੀ ਜਗ੍ਹਾ ਸਕਾਟਲੈਂਡ ਦੀ ਚੈਂਪੀਅਨ ਟੀਮ ਲਵੇਗੀ। ਇਸ ਸੀਜ਼ਨ ਦਾ ਚੈਂਪੀਅਨਜ਼ ਲੀਗ ਫਾਈਨਲ ਵੀ ਰੂਸ ਦੀ ਬਜਾਏ ਪੈਰਿਸ 'ਚ ਹੋਵੇਗਾ। ਰੂਸ ਅਗਲੇ ਸੀਜ਼ਨ ਵਿੱਚ ਯੂਰੋਪਾ ਲੀਗ ਅਤੇ ਯੂਰੋਪਾ ਕਾਨਫਰੰਸ ਲੀਗ ਤੋਂ ਵੀ ਖੁੰਝ ਜਾਵੇਗਾ। ਉਥੇ ਹੀ ਪੁਰਸ਼ਾਂ ਦੇ ਯੂਰੋ ਕੱਪ 2028 ਜਾਂ 2032 ਦੀ ਮੇਜ਼ਬਾਨੀ ਦੀ ਰੂਸ ਦੀ ਦਾਅਵੇਦਾਰੀ ਵੀ ਰੱਦ ਕਰ ਦਿੱਤੀ ਗਈ ਹੈ।
66 ਸਾਲਾ ਸਾਬਕਾ ਭਾਰਤੀ ਕ੍ਰਿਕਟਰ ਮੁੜ ਬਣਿਆ ਲਾੜਾ, 28 ਸਾਲ ਛੋਟੀ ਕੁੜੀ ਨਾਲ ਰਚਾਇਆ ਵਿਆਹ
NEXT STORY 
