ਸਪੋਰਟਸ ਡੈਸਕ- ਚੋਟੀ ਦਰਜਾ ਪ੍ਰਾਪਤ ਅਲੈਕਜ਼ੈਂਡਰ ਜ਼ਵੇਰੇਵ ਦਾ ਅਮਰੀਕੀ ਓਪਨ ਟੈਨਿਸ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਤੱਕ ਦਾ ਸਫਰ ਉਤਾਰ-ਚੜ੍ਹਾਅ ਭਰਿਆ ਰਿਹਾ ਸੀ ਪਰ ਉਸ ਨੂੰ ਸੈਮੀਫਾਈਨਲ ’ਚ ਪਹੁੰਚਣ ਲਈ ਕਿਸੇ ਤਰ੍ਹਾਂ ਦੀ ਪ੍ਰੇਸ਼ਾਨੀ ਨਹੀਂ ਹੋਈ। ਜ਼ਵੇਰੇਵ ਨੇ ਕੁਆਰਟਰ ਫਾਈਨਲ ’ਚ ਬੋਟਿਕ ਵੈਨ ਡੇ ਜ਼ੈਂਡਸ਼ੁਲਪ ਨੂੰ 6-2, 7-5, 6-1 ਨਾਲ ਆਸਾਨੀ ਨਾਲ ਹਰਾਇਆ। ਇਸ ਤਰ੍ਹਾਂ ਨਾਲ ਉਸ ਨੇ ਮੌਜੂਦਾ ਸੈਸ਼ਨ ਦੇ ਸਾਰੇ ਗ੍ਰੈਂਡ ਸਲੈਮ ਟੂਰਨਾਮੈਂਟਾਂ ਦੇ ਆਖਰੀ-4 ’ਚ ਜਗ੍ਹਾ ਬਣਾਉਣ ਦੀ ਵਿਸ਼ੇਸ਼ ਪ੍ਰਾਪਤੀ ਹਾਸਲ ਕੀਤੀ।
ਫ੍ਰੈਂਚ ਓਪਨ ਚੈਂਪੀਅਨ ਤੇ ਵਿੰਬਲਡਨ ਉਪ ਜੇਤੂ ਜ਼ਵੇਰੇਵ ਸੈਮੀਫਾਈਨਲ ’ਚ ਸ਼ੁੱਕਰਵਾਰ ਨੂੰ ਕਰੇਨ ਖਾਚਾਨੋਵ ਦਾ ਸਾਹਮਣਾ ਕਰਨਗੇ ਜਦਕਿ ਦੂਜੇ ਸੈਮੀਫਾਈਨਲ ’ਚ ਅਮਰੀਕੀ ਖਿਡਾਰੀ ਬੇਨ ਸ਼ੈਲਟਨ ਅਤੇ ਫ੍ਰਾਂਸਿਸ ਟਿਆਫੋ ਆਹਮੋ-ਸਾਹਮਣੇ ਹੋਣਗੇ। ਜ਼ਵੇਰੇਵ 1968 ’ਚ ਸ਼ੁਰੂ ਹੋਏ ਓਪਨ ਯੁੱਗ ’ਚ ਕਿਸੇ ਗ੍ਰੈਂਡ ਸਲੈਮ ਟੂਰਨਾਮੈਂਟ ਦੇ ਪਹਿਲੇ ਦੋ ਰਾਊਂਡਾਂ ’ਚ 5 ਸੈੱਟਾਂ ਤੱਕ ਖੇਡਣ ਵਾਲਾ ਪਹਿਲਾ ਚੋਟੀ ਦਰਜਾ ਪ੍ਰਾਪਤ ਖਿਡਾਰੀ ਬਣਿਆ ਪਰ ਇਸ ਤੋਂ ਬਾਅਦ ਉਸ ਨੇ ਆਪਣੇ ਅਗਲੇ ਤਿੰਨ ਮੈਚ ਸਿੱਧੇ ਸੈੱਟਾਂ ’ਚ ਜਿੱਤੇ।
ਖਾਚਾਨੋਵ ਇਸ ਸਾਲ ਹਰੇਕ ਗ੍ਰੈਂਡ ਸਲੈਮ ਟੂਰਨਾਮੈਂਟ ਦੇ ਘੱਟੋ-ਘੱਟ ਤੀਜੇ ਦੌਰ ਤੱਕ ਪਹੁੰਚਿਆ ਪਰ ਇੱਥੇ ਉਹ ਸੈਮੀਫਾਈਨਲ ’ਚ ਜਗ੍ਹਾ ਬਣਾਉਣ ’ਚ ਸਫਲ ਰਿਹਾ। ਉਸ ਨੇ ਅਲੈਕਜ਼ੈਂਡਰ ਬਲਾਕਸ ਦੇ ਮੈਚ ਦੇ ਵਿਚਾਲਿਓਂ ਹਟ ਜਾਣ ਤੋਂ ਬਾਅਦ ਆਖਰੀ-4 ’ਚ ਜਗ੍ਹਾ ਸੁਰੱਖਿਅਤ ਕੀਤੀ। ਬਲਾਕਸ ਨੇ ਪੈਰ, ਪੱਸਲੀਆਂ ਤੇ ਪਿੱਠ ’ਚ ਸੱਟ ਲੱਗਣ ਕਾਰਨ ਤੀਜੇ ਸੈੱਟ ’ਚ ਖੇਡਣਾ ਬੰਦ ਕਰ ਦਿੱਤਾ, ਜਿਸ ਨਾਲ ਖਾਚਾਨੋਵ ਆਪਣੇ ਤੀਜੇ ਗ੍ਰੈਂਡ ਸਲੈਮ ਸੈਮੀਫਾਈਨਲ ’ਚ ਪਹੁੰਚ ਗਿਆ। ਬਲਾਕਸ ਨੇ ਜਦੋਂ ਹਟਣ ਦਾ ਫੈਸਲਾ ਕੀਤਾ ਤਦ ਖਾਚਾਨੋਵ ਪਹਿਲੇ ਦੋ ਸੈੱਟ 6-2, 7-5 ਨਾਲ ਜਿੱਤਣ ਤੋਂ ਬਾਅਦ ਤੀਜੇ ਸੈੱਟ ’ਚ 3-2 ਨਾਲ ਅੱਗੇ ਚੱਲ ਰਿਹਾ ਸੀ।
ਕੈਨੇਡਾ ਸੁਪਰ 60 ਦੀ ਟੀਮ ਵੈਨਕੂਵਰ ਐਂਕਰਸ ਦਾ ਸਾਂਝਾ ਮਾਲਕ ਬਣਿਆ ਜ਼ਹੀਰ ਖਾਨ
NEXT STORY 
