ਕਪੂਰਥਲਾ, (ਮੱਲ੍ਹੀ)- ਜ਼ਿਲਾ ਕਪੂਰਥਲਾ ਵਿਖੇ ਅੱਜ ਸੂਬਾਈ ਆਗੂ ਅਰੁਨਦਾਪੀ ਸਿੰਘ ਸੈਦਪੁਰ, ਹਰਵਿੰਦਰ ਅੱਲੂਵਾਲ, ਰਮਨ ਸ਼ਰਮਾ ਤੇ ਰਣਵੀਰ ਬ੍ਰਹਮ ਆਦਿ ਦੀ ਅਗਵਾਈ ਹੇਠ ਸੈਂਕੜੇ ਰਮਸਾ, ਐੱਸ. ਐੱਸ. ਏ. ਤੇ ਕੰਪਿਊਟਰ ਅਧਿਆਪਕਾਂ ਨੇ ਪੰਜਾਬ ਸਰਕਾਰ ਦੀਆਂ ਮੁਲਾਜ਼ਮ ਮਾਰੂ ਨੀਤੀਆਂ ਨੂੰ ਲੈ ਕੇ ਕੈਪਟਨ ਸਰਕਾਰ ਦਾ ਪੁਤਲਾ ਫੂਕਿਆ ਤੇ ਗੁੱਸੇ 'ਚ ਆਏ ਪ੍ਰਦਰਸ਼ਨਕਾਰੀਆਂ ਨੇ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ।
ਪ੍ਰਦਰਸ਼ਨਕਾਰੀ ਆਗੂਆਂ ਕਿਹਾ ਕਿ ਸਿੱਖਿਆ ਵਿਭਾਗ 'ਚ ਡੀ. ਜੀ. ਐੱਸ. ਈ. ਪੰਜਾਬ ਅਧੀਨ ਵੱਖ-ਵੱਖ ਸੋਸਾਇਟੀਆਂ (ਪਿਕਟਸ, ਰਮਸਾ, ਮਾਡਲ ਸਕੂਲ, ਆਦਰਸ਼ ਸਕੂਲ, ਆਈ. ਈ. ਆਰ. ਟੀ., ਐੱਮ. ਡੀ. ਐੱਮ.) 'ਚ ਪਿਛਲੇ 10-12 ਸਾਲਾਂ ਤੋਂ ਅਧਿਆਪਕ ਸੇਵਾਵਾਂ ਨਿਭਾਅ ਰਹੇ ਅਧਿਆਪਕਾਂ, ਕਰਮਚਾਰੀਆਂ, ਜਿਨ੍ਹਾਂ ਨੂੰ ਪਿਕਟਸ ਅਧੀਨ 2011 ਤੋਂ ਰੈਗੂਲਰ ਤੌਰ 'ਤੇ ਸੇਵਾਵਾਂ ਨਿਭਾਅ ਰਹੇ 7000 ਕੰਪਿਊਟਰ ਅਧਿਆਪਕ, ਸ. ਸ. ਅ., ਰਮਸਾ, ਮਾਡਲ ਸਕੂਲ, ਆਦਰਸ਼ ਸਕੂਲ, ਆਈ. ਈ. ਆਰ. ਟੀ., ਐੱਮ. ਡੀ. ਐੈੱਮ. ਸੋਸਾਇਟੀਆਂ ਅਧੀਨ 10 ਸਾਲਾਂ ਤੋਂ ਠੇਕੇ 'ਤੇ ਲਗਾਤਾਰ ਸੇਵਾਵਾਂ ਨਿਭਾ ਰਹੇ ਲਗਭਗ 15000 ਅਧਿਆਪਕ, ਕਮਰਚਾਰੀ ਕੰਮ ਕਰ ਰਹੇ ਹਨ, ਨੂੰ ਨਵੇਂ-ਨਵੇਂ ਨਾਦਰਸ਼ਾਰੀ ਫਰਮਾਨ ਜਾਰੀ ਕਰ ਕੇ ਤੰਗ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ।
ਉਕਤ ਆਗੂਆਂ ਕਿਹਾ ਕਿ ਕੈਪਟਨ ਸਰਕਾਰ ਦੀਆਂ ਤਾਨਾਸ਼ਾਹੀ ਨੀਤੀਆਂ ਕਾਰਨ ਨਿਰਾਸ਼ਤਾ ਦੇ ਆਲਮ 'ਚ ਡੁੱਬੇ ਅਧਿਆਪਕ ਤੇ ਕਰਮਚਾਰੀ ਆਪਣਾ ਮਾਨਸਿਕ ਸੰਤੁਲਨ ਗੁਆ ਰਹੇ ਹਨ। ਪ੍ਰਦਰਸ਼ਨ ਕਾਰੀਆਂ ਅਖਿਆ ਕਿ ਕੰਪਿਊਟਰ ਅਧਿਆਪਕ ਜੋ ਕਿ 2005 'ਚ ਠੇਕੇ 'ਤੇ ਭਰਤੀ ਹੋਏ ਸਨ, ਨੇ ਪਹਿਲਾ 6 ਸਾਲ ਠੇਕੇ 'ਤੇ ਬਹੁਤ ਥੋੜ੍ਹੀ ਤਨਖਾਹ 'ਤੇ ਕੰਮ ਕੀਤਾ ਤੇ ਜੁਲਾਈ 2011 'ਚ ਅਕਾਲੀ-ਭਾਜਪਾ ਗਠਜੋੜ ਸਰਕਾਰ ਨੇ ਪਿਕਟਸ 'ਚ ਵੋਕੇਸ਼ਨਲ ਮਾਸਟਰ ਦਾ ਗਰੇਡ ਦੇ ਕੇ ਰੈਗੂਲਰ ਕੀਤਾ ਸੀ, ਜਦਕਿ ਹੁਣ 7 ਸਾਲ ਦੀ ਰੈਗੂਲਰ ਸੇਵਾ ਕਰਨ ਉਪਰੰਤ ਫਿਰ ਕੰਪਿਊਟਰ ਅਧਿਆਪਕਾਂ ਨੂੰ ਕਿਹਾ ਜਾ ਰਿਹਾ ਹੈ ਕਿ ਤੁਸੀਂ 3 ਸਾਲ ਲਈ 10300 ਰੁਪਏ 'ਤੇ ਆ ਜਾਓ ਤਾਂ ਜੋ ਬਹੁਤ ਹੀ ਹਾਸੋਹੀਣੀ ਗੱਲ ਹੈ।
ਇਸੇ ਤਰ੍ਹਾਂ ਹੀ ਐੱਸ. ਐੱਸ. ਏ., ਰਮਸਾ ਅਧੀਨ ਠੇਕੇ 'ਤੇ 10 ਸਾਲਾਂ ਤੋਂ ਕੰਮ ਕਰ ਰਹੇ ਅਧਿਆਪਕ ਜੋ ਕਿ 42000 ਰੁਪਏ ਤਨਖਾਹ ਲੈ ਰਹੇ ਹਨ, ਉਨ੍ਹਾਂ ਨੂੰ ਸਿੱਖਿਆ ਵਿਭਾਗ ਦੇ ਨਾਂ 'ਤੇ ਜਬਰੀ 3 ਸਾਲ ਲਈ 10300 ਰੁਪਏ ਲੈਣ ਲਈ ਕਿਹਾ ਜਾ ਰਿਹਾ ਹੈ। ਸਰਕਾਰ ਇਹੀ ਰਕਮ ਐੱਸ. ਐੱਸ. ਏ. ਅਧੀਨ ਦਫ਼ਤਰਾਂ 'ਚ ਕੰਮ ਕਰਦੇ ਕਰਮਚਾਰੀਆਂ 'ਤੇ ਥੋਪਣ ਜਾ ਰਹੀ ਹੈ, ਜਿਸ ਨੂੰ ਲੈ ਕੇ ਰਮਸਾ, ਐੱਸ. ਐੱਸ. ਏ. ਤੇ ਕੰਪਿਊਟਰ ਅਧਿਆਪਕ, ਕਰਮਚਾਰੀਆਂ 'ਚ ਗੁੱਸੇ ਤੇ ਨਿਰਾਸ਼ਤਾ ਦੀ ਲਹਿਰ ਪਾਈ ਜਾ ਰਹੀ ਹੈ।
ਇਸ ਮੌਕੇ ਸਰਵਣ ਕੁਮਾਰ, ਜਗਜੀਤ ਸਿੰਘ, ਰਣਜੀਤ ਸਿੰਘ, ਬੀਰ ਮੋਹਨ, ਪੰਕਜ ਰਾਵਨ, ਵਿਪਨ ਕੁਮਾਰ, ਗੁਰਜੀਤ ਸਿੰਘ, ਭੁਪਿੰਦਰ ਸਿੰਘ, ਲਖਵੀਰ ਸਿੰਘ, ਗੁਰਪ੍ਰੀਤ ਸਿੰਘ, ਨਿਸ਼ਾ ਭਗਤ, ਜਤਿੰਦਰ ਕੌਰ, ਮੀਨੂੰ, ਰਸ਼ਪਾਲ ਸਿੰਘ ਵੜੈਚ, ਅਨਮੋਲ ਸਹੋਤਾ, ਕਰਮ ਸਿੰਘ, ਬਲਵਿੰਦਰ ਕੌਰ, ਨਵਨੀਤ ਕੌਰ, ਹਰਪ੍ਰੀਤ ਕੌਰ, ਪੂਨਮ, ਅਰਜੁਨਜੀਤ ਸਿੰਘ ਤੇ ਨਰਿੰਦਰ ਭੰਡਾਰੀ ਆਦਿ ਨੇ ਰੋਸ ਧਰਨੇ ਦੌਰਾਨ ਐਲਾਨ ਕੀਤਾ ਕਿ ਜੇ ਸਰਕਾਰ ਨੇ ਆਪਣਾ ਤਾਨਾਸ਼ਾਹੀ ਫਰਮਾਨ ਜਬਰੀ ਅਧਿਆਪਕਾਂ 'ਤੇ ਥੋਪਣ ਦੀ ਕੋਸ਼ਿਸ਼ ਕੀਤੀ ਤਾਂ ਬਹੁਤ ਤਿੱਖਾ ਸੰਘਰਸ਼ ਕੀਤਾ ਜਾਵੇਗਾ, ਜੋ ਸਰਕਾਰ ਦੇ ਨੱਕ 'ਚ ਦਮ ਕਰ ਦੇਵੇਗਾ।
ਪਾਵਰਕਾਮ ਵਿਭਾਗ ਦੀ ਬੇਧਿਆਨੀ ਬਣ ਸਕਦੀ ਹੈ ਜਾਨ ਲੇਵਾ
NEXT STORY