ਮੈਲਬੌਰਨ (ਮਨਦੀਪ ਸਿੰਘ ਸੈਣੀ )- ਪਰਦੇਸਾਂ ਵਿਚ ਵੱਸਦੇ ਪੰਜਾਬੀ ਭਾਈਚਾਰੇ ਲਈ ਆਪਣੀ ਮਾਂ-ਬੋਲੀ, ਸਾਹਿਤਕ ਵਿਰਾਸਤ ਅਤੇ ਇਤਿਹਾਸਕ ਜੜ੍ਹਾਂ ਨਾਲ ਨਿਰੰਤਰ ਸੰਵਾਦ ਬਣਾਏ ਰੱਖਣਾ ਹਮੇਸ਼ਾ ਹੀ ਇੱਕ ਬਹੁਤ ਵੱਡਾ ਅਤੇ ਅਹਿਮ ਉੱਦਮ ਰਿਹਾ ਹੈ। ਪਰਦੇਸ ਦੀ ਭੱਜ-ਦੌੜ ਭਰੀ ਜ਼ਿੰਦਗੀ ਦੇ ਬਾਵਜੂਦ ਅੱਖਰਾਂ ਦੀ ਰੋਸ਼ਨੀ ਅਤੇ ਚੇਤਨਾ ਫੈਲਾਉਣ ਦੇ ਇਸੇ ਸਿਲਸਿਲੇ ਨੂੰ ਅੱਗੇ ਵਧਾਉਂਦਿਆਂ, ਆਸਟ੍ਰੇਲੀਆ ਦੇ ਮੈਲਬੌਰਨ ਸ਼ਹਿਰ ਦੇ ਐਪਿੰਗ ਇਲਾਕੇ 'ਚ ਸਥਿਤ ਹੈਰੀਟੇਜ ਹਾਲ ਵਿਖੇ ਇੱਕ ਬਹੁਤ ਹੀ ਯਾਦਗਾਰੀ ਅਤੇ ਪ੍ਰਭਾਵਸ਼ਾਲੀ ਸਾਹਿਤਕ ਸ਼ਾਮ ਰਚਾਈ ਗਈ। 'ਦੋਆਬਾ ਹੋਮਜ਼' ਅਤੇ 'ਸੁਹਾਵੀ ਆਡੀਓ ਬੁੱਕਸ' ਦੇ ਸਾਂਝੇ ਉਪਰਾਲੇ ਨਾਲ ਕਰਵਾਏ ਗਏ ਇਸ ਵਿਸ਼ੇਸ਼ ਸਮਾਗਮ ਦੌਰਾਨ ਤਿੰਨ ਵੱਖ-ਵੱਖ ਨਿਵੇਕਲੇ ਤੇ ਗੰਭੀਰ ਵਿਸ਼ਿਆਂ 'ਤੇ ਅਧਾਰਿਤ ਪੁਸਤਕਾਂ ਦਾ ਰਿਲੀਜ਼ ਸਮਾਰੋਹ ਸਫ਼ਲਤਾਪੂਰਵਕ ਨੇਪਰੇ ਚੜ੍ਹਿਆ। ਇਹਨਾਂ ਵਿੱਚ ਕ੍ਰਾਂਤੀਕਾਰੀ ਸ਼ਾਇਰੀ ਦੀ ਸ਼ਾਹਕਾਰ ਰਚਨਾ 'ਲੋਕ ਪੀੜਾ' (ਲੇਖਕ: ਜੈਮਲ ਪੱਡਾ) ਦਾ ਨਵਾਂ ਸੰਸਕਰਣ, ਭੁਪਿੰਦਰ ਸਿੰਘ ਸੰਧੂ ਦੀ ਦੇਖ-ਰੇਖ ਹੇਠ ਸੰਪਾਦਿਤ ਹੋਈ 'ਲਹੂ ਭਿੱਜੀ ਦਾਸਤਾਨ' ਅਤੇ ਡਾ. ਕੁਲਦੀਪ ਸਿੰਘ ਦੀ ਕਿਸਾਨੀ ਜੀਵਨ ਤੇ ਅਰਥਚਾਰੇ 'ਤੇ ਝਾਤ ਪਾਉਂਦੀ ਅਹਿਮ ਰਚਨਾ 'ਛੋਟੀ ਖੇਤੀ' ਰਸਮੀ ਤੌਰ 'ਤੇ ਲੋਕ-ਅਰਪਣ ਕੀਤੀਆਂ ਗਈਆਂ।
ਇਸ ਮੌਕੇ ਹਾਜ਼ਰ ਚਿੰਤਕਾਂ ਬਿਕਰਮ ਸੇਖੋਂ, ਡਾ. ਹਰਜਿੰਦਰ ਸਿੰਘ, ਚਰਨਾਮਤ ਸਿੰਘ ਅਤੇ ਡਾ. ਲੱਛਮੀ ਨਰੈਣ ਭਿੱਖੀ ਨੇ ਇਨ੍ਹਾਂ ਲਿਖਤਾਂ ਦੇ ਵੱਖ-ਵੱਖ ਪਹਿਲੂਆਂ 'ਤੇ ਗੰਭੀਰ ਚਰਚਾ ਕਰਦਿਆਂ ਇਹਨਾਂ ਦੀ ਸਮਾਜਿਕ ਅਤੇ ਸਾਹਿਤਕ ਮਹੱਤਤਾ ਨੂੰ ਉਭਾਰਿਆ। ਸਮਾਗਮ ਵਿੱਚ ਉਸ ਵੇਲੇ ਜੋਸ਼ੀਲਾ ਮਾਹੌਲ ਬਣ ਗਿਆ ਜਦੋਂ ਮਨਦੀਪ ਬਰਾੜ ਅਤੇ ਅਜੀਤਪਾਲ ਸਿੰਘ ਬੁੱਟਰ ਨੇ ਆਪਣੀਆਂ ਇਨਕਲਾਬੀ ਰਚਨਾਵਾਂ ਨਾਲ ਹਾਜ਼ਰੀਨ ਅੰਦਰ ਨਵਾਂ ਸਾਹਿਤਕ ਉਤਸ਼ਾਹ ਭਰਿਆ। ਪ੍ਰੋਗਰਾਮ ਨੂੰ ਸੁਚੱਜੇ ਢੰਗ ਨਾਲ ਅੱਗੇ ਵਧਾਉਣ ਦੀ ਜ਼ਿੰਮੇਵਾਰੀ ਡਾ. ਪ੍ਰੀਤਇੰਦਰ ਸਿੰਘ ਗਰੇਵਾਲ ਨੇ ਮੰਚ ਸੰਚਾਲਕ ਵਜੋਂ ਬਖ਼ੂਬੀ ਨਿਭਾਈ। ਸਮਾਗਮ ਦੀ ਸਮਾਪਤੀ 'ਤੇ ਮੇਜ਼ਬਾਨ ਟੀਮ ਵੱਲੋਂ ਡਾ. ਸਰਮੁਹੱਬਤ ਸਿੰਘ ਰੰਧਾਵਾ , ਨਵਦੀਪ ਪੱਡਾ ਅਤੇ ਸਰਪੰਚ ਜਰਨੈਲ ਸਿੰਘ ਨੇ ਇਕੱਤਰ ਹੋਏ ਸਾਹਿਤ ਪ੍ਰੇਮੀਆਂ ਦਾ ਧੰਨਵਾਦ ਪ੍ਰਗਟਾਇਆ। ਇਸ ਇਕੱਠ ਵਿੱਚ 'ਪੰਜਾਬ ਕਿਤਾਬ ਘਰ' ਵੱਲੋਂ ਲਗਾਈ ਗਈ ਪੁਸਤਕ ਪ੍ਰਦਰਸ਼ਨੀ ਖਿੱਚ ਦਾ ਕੇਂਦਰ ਰਹੀ।
ਪੰਜਾਬ ਸਪੋਰਟਸ ਕਲੱਬ ਵੱਲੋਂ ਡਿਪਟੀ ਸਪੀਕਰ ਜੈ ਕ੍ਰਿਸ਼ਨ ਸਿੰਘ ਰੋੜੀ ਦਾ ਆਸਟ੍ਰੇਲੀਆ ਪਹੁੰਚਣ 'ਤੇ ਸਵਾਗਤ
NEXT STORY 
