ਬਿਜ਼ਨੈੱਸ ਡੈਸਕ- ਭਾਰਤ ਦੇ ਚੇਨਈ ਨੇੜੇ ਤਾਈਵਾਨ ਦੀ ਕੰਟਰੈਕਟ ਨਿਰਮਾਤਾ ਕੰਪਨੀ ਫਾਕਸਕਾਨ ਮੈਗਾ ਹੋਸਟਲ ਦਾ ਨਿਰਮਾਣ ਕਰਵਾ ਰਹੀ ਹੈ। ਇਕ ਰਿਪੋਰਟ ਮੁਤਾਬਕ ਕਰੀਬ 20 ਏਕੜ ਜ਼ਮੀਨ 'ਤੇ ਇਸ ਮੈਗਾ ਹੋਸਟਲ ਦੀ ਉਸਾਰੀ ਦਾ ਕੰਮ ਤੇਜ਼ੀ ਨਾਲ ਚੱਲ ਰਿਹਾ ਹੈ। ਇਸ 'ਚ ਕਈ ਵੱਡੇ ਹੋਸਟਲ ਬਲਾਕ ਹੋਣਗੇ। ਤੁਹਾਨੂੰ ਦੱਸ ਦਈਏ ਕਿ ਕੰਟਰੈਕਟ ਨਿਰਮਾਤਾ ਕੰਪਨੀ ਫਾਕਸਕਾਨ ਦੇਸ਼ 'ਚ ਐਪਲ ਫੋਨਾਂ-ਆਈਫੋਨ 14 ਦਾ ਨਿਰਮਾਣ ਕਰਦੀ ਹੈ। ਵਰਤਮਾਨ 'ਚ ਫਾਕਸਕਾਨ ਦੇ 15,000 ਕਰਮਚਾਰੀ ਸ਼੍ਰੀਪੇਰੰਬਦੂਰ ਵਿਖੇ ਇਲੈਕਟ੍ਰੋਨਿਕਸ ਕੋਰੀਡੋਰ 'ਚ ਕੰਮ ਕਰ ਰਹੇ ਹਨ। ਇਨ੍ਹਾਂ 'ਚ ਜ਼ਿਆਦਾਤਰ ਔਰਤਾਂ ਹਨ। ਚੀਨ 'ਚ ਆਈਫੋਨ ਫੈਕਟਰੀ 'ਚ ਬੀਤੇ ਦਿਨੀਂ ਹੋਏ ਹੰਗਾਮੇ ਤੋਂ ਬਾਅਦ ਫਾਕਸਕਾਨ ਹੁਣ ਭਾਰਤ 'ਚ ਹੀ ਆਈਫੋਨ ਦਾ ਉਤਪਾਦਨ ਵਧਾਉਣ ਦੀ ਤਿਆਰੀ ਕਰ ਰਹੀ ਹੈ। ਫਾਕਸਕਾਨ ਤਾਈਵਾਨ ਇਲੈਕਟ੍ਰਾਨਿਕਸ ਦੀ ਮਲਕੀਅਤ ਵਾਲੀ ਭਾਰਤ ਅਧਾਰਤ ਕਾਰਪੋਰੇਟ ਇਕਾਈ ਹੈ।
ਕਰਮਚਾਰੀਆਂ ਦੀ ਭਰਤੀ ਲਈ ਤਿਆਰੀ ਕੀਤੀ ਜਾ ਰਹੀ ਹੈ
ਫਾਕਸਕਾਨ ਦੀਆਂ ਯੋਜਨਾਵਾਂ ਤੋਂ ਜਾਣੂ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ ਆਉਣ ਵਾਲੇ 18 ਮਹੀਨਿਆਂ 'ਚ ਇਨ੍ਹਾਂ ਇਕਾਈਆਂ 'ਚ ਕਰਮਚਾਰੀਆਂ ਦੀ ਕੁੱਲ ਗਿਣਤੀ 70,000 ਤੋਂ ਵੱਧ ਹੋ ਸਕਦੀ ਹੈ। ਅਜਿਹੇ 'ਚ ਆਉਣ ਵਾਲੇ ਸਮੇਂ 'ਚ ਵੱਡੀ ਗਿਣਤੀ 'ਚ ਭਰਤੀ ਹੋ ਸਕਦੀ ਹੈ। ਇਨ੍ਹਾਂ ਕਾਮਿਆਂ ਨੂੰ ਰਹਿਣ ਲਈ ਜਗ੍ਹਾ ਦੀ ਲੋੜ ਪਵੇਗੀ। ਇਸ ਦੇ ਲਈ ਫਾਕਸਕਾਨ ਵੱਲੋਂ ਇਸ ਮੈਗਾ ਹੋਸਟਲ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ। ਇਸ 'ਚ ਨਵੇਂ ਕਰਮਚਾਰੀਆਂ ਲਈ ਰਿਹਾਇਸ਼ ਦੀ ਸਹੂਲਤ ਦਾ ਪੂਰਾ ਪ੍ਰਬੰਧ ਹੋਵੇਗਾ। ਰਿਪੋਰਟ ਮੁਤਾਬਕ ਕਰੀਬ 20,000 ਬੈੱਡਾਂ ਵਾਲਾ ਹੋਸਟਲ ਕਰੀਬ ਦਸ ਮਹੀਨਿਆਂ 'ਚ ਤਿਆਰ ਹੋ ਸਕਦਾ ਹੈ। ਰਿਪੋਰਟ ਦੇ ਅਨੁਸਾਰ, ਦੋਵੇਂ ਹੋਸਟਲ ਉਸਾਰੀ ਅਧੀਨ ਹਨ ਅਤੇ ਦੋਵਾਂ ਵਿਚਕਾਰ ਇਹ ਲਗਭਗ 60,000 ਕਰਮਚਾਰੀਆਂ ਦੇ ਰਹਿਣ ਲਈ ਕਾਫੀ ਹੋਣਗੇ।
ਦੋ ਨਵੇਂ ਨਿਰਮਾਣ ਪਲਾਂਟ ਵੀ ਬਣਾਏ ਜਾ ਰਹੇ ਹਨ
ਰਿਪੋਰਟ ਮੁਤਾਬਕ ਤਾਈਵਾਨੀ ਕੰਪਨੀ ਆਪਣੇ ਕੈਂਪਸ 'ਚ ਦੋ ਨਵੇਂ ਨਿਰਮਾਣ ਪਲਾਂਟ ਵੀ ਬਣਾ ਰਹੀ ਹੈ, ਜਿੱਥੇ ਸਮਾਰਟਫੋਨ ਬਣਾਏ ਜਾਣਗੇ। ਇਨ੍ਹਾਂ ਪਲਾਂਟਾਂ 'ਚ ਮਜ਼ਦੂਰਾਂ ਦੇ ਰਹਿਣ ਲਈ ਕੁਆਰਟਰ ਵੀ ਹੋਣਗੇ। ਇਹੀ ਮਾਡਲ ਫਾਕਸਕਾਨ ਨੇ ਚੀਨ 'ਚ ਵੀ ਅਪਣਾਇਆ ਸੀ। ਈਟੀ ਨੇ ਆਪਣੇ 6 ਦਸੰਬਰ ਦੇ ਐਡੀਸ਼ਨ 'ਚ ਰਿਪੋਰਟ ਦਿੱਤੀ ਸੀ ਕਿ ਭਾਰਤ ਆਈਫੋਨ ਨਿਰਮਾਣ ਲਈ ਇੱਕ ਪ੍ਰਮੁੱਖ ਹੱਬ ਵਜੋਂ ਉਭਰਨ ਲਈ ਤਿਆਰ ਹੈ। ਅਜਿਹਾ ਇਸ ਲਈ ਕਿਉਂਕਿ ਐਪਲ ਚੀਨ ਤੋਂ ਬਾਹਰ ਉਤਪਾਦਨ ਯੂਨਿਟਾਂ ਨੂੰ ਵਧਾਉਣ ਦੀ ਤਿਆਰੀ ਕਰ ਰਿਹਾ ਹੈ। ਉਦਯੋਗ ਦੇ ਅਧਿਕਾਰੀਆਂ ਅਤੇ ਮਾਹਰਾਂ ਨੂੰ ਉਮੀਦ ਹੈ ਕਿ ਅਗਲੇ ਤਿੰਨ ਤੋਂ ਚਾਰ ਸਾਲਾਂ 'ਚ ਸਥਾਨਕ ਤੌਰ 'ਤੇ ਨਿਰਮਿਤ ਆਈਫੋਨ ਦੀ ਹਿੱਸੇਦਾਰੀ 5 ਫੀਸਦੀ ਦੇ ਮੌਜੂਦਾ ਪੱਧਰ ਤੋਂ ਵਧ ਕੇ ਕੁੱਲ ਉਤਪਾਦਨ ਦੇ ਪੰਜਵੇਂ ਹਿੱਸੇ ਤੱਕ ਪਹੁੰਚ ਜਾਵੇਗੀ।
ਨੋਟ-ਇਸ ਖ਼ਬਰ ਸਬੰਧੀ ਆਪਣੀ ਰਾਏ ਕੁਮੈਂਟ ਕਰਕੇ ਦਿਓ।
ਕਣਕ ਅਤੇ ਚੌਲ ਵਿਗਾੜ ਰਹੇ ਹਨ ਰਸੋਈ ਦਾ ਬਜਟ
NEXT STORY 
