ਨਵੀਂ ਦਿੱਲੀ : ਭਾਰਤ ਦੀ ਅਮਰੀਕੀ ਟੈਰਿਫਾਂ ਨਾਲ ਜੁੜੀਆਂ ਚੁਣੌਤੀਆਂ ਦੇ ਬਾਵਜੂਦ, ਨਵੰਬਰ ਮਹੀਨੇ ਵਿੱਚ ਦੇਸ਼ ਦੀ ਕੁੱਲ ਵਸਤੂਆਂ ਦੀ ਬਰਾਮਦ ਸਾਲਾਨਾ ਆਧਾਰ 'ਤੇ 19% ਵਧ ਕੇ 38.13 ਬਿਲੀਅਨ ਡਾਲਰ ਹੋ ਗਈ ਹੈ। ਇਸ ਤੋਂ ਇਲਾਵਾ, ਭਾਰਤ ਦੇ ਵਪਾਰ ਲਈ ਵੱਡੀ ਰਾਹਤ ਦੀ ਖਬਰ ਹੈ ਕਿ ਅਕਤੂਬਰ ਵਿੱਚ ਲਗਭਗ $41.7 ਬਿਲੀਅਨ ਦੇ ਰਿਕਾਰਡ ਉੱਚ ਪੱਧਰ 'ਤੇ ਪਹੁੰਚ ਚੁੱਕਿਆ ਵਸਤੂਆਂ ਦਾ ਵਪਾਰ ਘਾਟਾ ਨਵੰਬਰ ਵਿੱਚ ਘੱਟ ਕੇ 24.5ਬਿਲੀਅਨ 'ਤੇ ਆ ਗਿਆ, ਜੋ ਕਿ ਰਾਇਟਰਜ਼ ਦੇ ਅਨੁਮਾਨਾਂ (32 ਬਿਲੀਅਨ) ਤੋਂ ਕਿਤੇ ਬਿਹਤਰ ਹੈ।
ਇਸ ਵਾਧੇ ਵਿੱਚ ਅਮਰੀਕਾ ਨਾਲ ਵਪਾਰ ਵਿੱਚ ਵੱਡਾ ਸੁਧਾਰ ਦਰਜ ਕੀਤਾ ਗਿਆ ਹੈ। ਨਵੰਬਰ ਵਿੱਚ ਅਮਰੀਕਾ ਨੂੰ ਭਾਰਤ ਦੀ ਬਰਾਮਦ ਵਿੱਚ 22.6% ਦਾ ਵਾਧਾ ਦਰਜ ਕੀਤਾ ਗਿਆ, ਜੋ ਕਿ $6.98 ਬਿਲੀਅਨ ਤੱਕ ਪਹੁੰਚ ਗਈ। ਇਹ ਵਾਧਾ ਇਸ ਲਈ ਖਾਸ ਤੌਰ 'ਤੇ ਮਹੱਤਵਪੂਰਨ ਹੈ ਕਿਉਂਕਿ ਇਹ ਉਸ ਸਮੇਂ ਹੋਇਆ ਹੈ ਜਦੋਂ ਅਗਸਤ ਵਿੱਚ ਅਮਰੀਕਾ ਨੇ ਭਾਰਤੀ ਦਰਾਮਦਾਂ 'ਤੇ ਵਾਧੂ 25% ਟੈਰਿਫ ਲਗਾਏ ਸਨ, ਜਿਸ ਨਾਲ ਕੁੱਲ ਡਿਊਟੀਆਂ 50% ਤੱਕ ਪਹੁੰਚ ਗਈਆਂ ਸਨ। ਇਸ ਤੋਂ ਪਹਿਲਾਂ, ਸਤੰਬਰ ਵਿੱਚ 11.9% ਅਤੇ ਅਕਤੂਬਰ ਵਿੱਚ 8.6% ਬਰਾਮਦ ਘੱਟ ਹੋਈ ਸੀ।
ਸਮੁੱਚੇ ਤੌਰ 'ਤੇ, ਨਵੰਬਰ ਲਈ ਵਸਤੂਆਂ ਅਤੇ ਸੇਵਾਵਾਂ ਦੀ ਭਾਰਤੀ ਬਰਾਮਦ 15.52% ਦੇ ਵਾਧੇ ਨਾਲ $73.99 ਬਿਲੀਅਨ ਰਹੀ। ਜਿਨ੍ਹਾਂ ਖੇਤਰਾਂ ਵਿੱਚ ਸੁਧਾਰ ਹੋਇਆ ਹੈ, ਉਹਨਾਂ ਵਿੱਚ ਇਲੈਕਟ੍ਰੋਨਿਕਸ, ਰਤਨ ਅਤੇ ਗਹਿਣੇ, ਇੰਜੀਨੀਅਰਿੰਗ ਵਸਤੂਆਂ, ਅਤੇ ਰੇਡਿਮੇਡ ਕੱਪੜੇ ਸ਼ਾਮਲ ਹਨ।
ਇੰਡਸਟਰੀ ਬਾਡੀ PHDCCI ਦੇ ਪ੍ਰਧਾਨ, ਰਾਜੀਵ ਜੂਨੇਜਾ ਨੇ ਕਿਹਾ ਕਿ "ਆਲਮੀ ਮੁਸ਼ਕਲਾਂ ਦੇ ਬਾਵਜੂਦ, ਭਾਰਤ ਨੇ ਆਪਣੇ 20 ਪ੍ਰਮੁੱਖ ਵਪਾਰਕ ਭਾਈਵਾਲਾਂ ਵਿੱਚੋਂ 14 ਨਾਲ ਸਕਾਰਾਤਮਕ ਬਰਾਮਦ ਵਾਧਾ ਦਰਜ ਕੀਤਾ," ਜੋ ਦੇਸ਼ ਦੇ ਬਾਹਰੀ ਵਪਾਰ ਵਿੱਚ ਵਧਦੇ ਵਿਭਿੰਨਤਾ ਅਤੇ ਲਚਕੀਲੇਪਨ ਨੂੰ ਦਰਸਾਉਂਦਾ ਹੈ।
ਦੱਸਣਯੋਗ ਹੈ ਕਿ ਅਮਰੀਕਾ ਅਤੇ ਭਾਰਤ ਵਿਚਾਲੇ ਵਪਾਰਕ ਗੱਲਬਾਤ ਲਗਾਤਾਰ ਜਾਰੀ ਹੈ, ਅਤੇ ਦੋਵੇਂ ਪੱਖ ਆਪਣੇ ਰੁਖ ਨੂੰ ਨਰਮ ਕਰਦੇ ਨਜ਼ਰ ਆ ਰਹੇ ਹਨ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਾਰਤ 'ਤੇ ਟੈਰਿਫ ਘਟਾਉਣ ਦਾ ਸੰਕੇਤ ਵੀ ਦਿੱਤਾ ਹੈ। ਵਾਸ਼ਿੰਗਟਨ ਨਾਲ ਆਪਣੇ ਵਪਾਰਕ ਵਾਧੇ ਨੂੰ ਘਟਾਉਣ ਦੀ ਕੋਸ਼ਿਸ਼ ਵਿੱਚ, ਨਵੀਂ ਦਿੱਲੀ ਨੇ ਅਮਰੀਕਾ ਤੋਂ ਤੇਲ ਅਤੇ ਗੈਸ ਦੀ ਖਰੀਦ ਵਿੱਚ ਵਾਧਾ ਕੀਤਾ ਹੈ, ਅਤੇ ਦੇਸ਼ ਤੋਂ ਖੇਤੀ ਉਤਪਾਦ ਖਰੀਦਣ ਦੀ ਵੀ ਉਮੀਦ ਹੈ।
ਭਾਰਤ 'ਚ ਕਿੱਥੇ ਮਿਲਦੈ ਸਭ ਤੋਂ ਸਸਤਾ ਤੇ ਸਭ ਤੋਂ ਮਹਿੰਗਾ ਪੈਟਰੋਲ-ਡੀਜ਼ਲ?
NEXT STORY 
