ਦੁਬਈ : ਸਾਊਦੀ ਅਰਬ ਨੇ ਸਰਕਾਰੀ ਮਾਲਕੀ ਵਾਲੀ ਪੈਟਰੋਲੀਅਮ ਕੰਪਨੀ ਅਰਾਮਕੋ ਵਿੱਚ ਸਰਕਾਰ ਦੀ ਚਾਰ ਪ੍ਰਤੀਸ਼ਤ ਹਿੱਸੇਦਾਰੀ, ਜਾਂ ਲਗਭਗ 80 ਅਰਬ ਡਾਲਰ ਇੱਕ ਸਰਕਾਰੀ ਨਿਵੇਸ਼ ਫੰਡ ਵਿੱਚ ਤਬਦੀਲ ਕਰਨ ਦਾ ਐਲਾਨ ਕੀਤਾ ਹੈ। ਸਾਊਦੀ ਅਰਬ ਆਪਣੀ ਊਰਜਾ 'ਤੇ ਨਿਰਭਰ ਅਰਥ ਵਿਵਸਥਾ ਨੂੰ ਬਦਲਣ ਲਈ ਇਹ ਕਦਮ ਚੁੱਕ ਰਿਹਾ ਹੈ। ਸਰਕਾਰੀ ਮੀਡੀਆ ਨੇ ਇਹ ਜਾਣਕਾਰੀ ਦਿੱਤੀ ਹੈ।
ਜਨਤਕ ਖੇਤਰ ਦੀ ਪੈਟਰੋਲੀਅਮ ਕੰਪਨੀ ਦਾ ਮੁਲਾਂਕਣ 2,000 ਅਰਬ ਡਾਲਰ ਤੋਂ ਥੋੜ੍ਹਾ ਘੱਟ ਹੈ। ਇਸ ਦੇ ਨਾਲ ਹੀ ਕੱਚਾ ਤੇਲ 90 ਡਾਲਰ ਪ੍ਰਤੀ ਬੈਰਲ ਨੂੰ ਪਾਰ ਕਰ ਗਿਆ ਹੈ, ਜੋ 2014 ਤੋਂ ਬਾਅਦ ਸਭ ਤੋਂ ਉੱਚਾ ਪੱਧਰ ਹੈ। ਸਾਊਦੀ ਅਰਬ ਦੇ ਕ੍ਰਾਊਨ ਪ੍ਰਿੰਸ (ਵਲੀ ਅਹਦ) ਮੁਹੰਮਦ ਬਿਨ ਸਲਮਾਨ ਨੇ ਇਹ ਸ਼ੇਅਰ ਟਰਾਂਸਫਰ ਕਰਨ ਦਾ ਫੈਸਲਾ ਕੀਤਾ ਹੈ।
ਇਹ ਸਾਊਦੀ ਅਰਬ ਦਾ ਸਰਕਾਰੀ ਦੌਲਤ ਫੰਡ ਹੈ। ਇਸ ਫੰਡ ਦੇ ਜ਼ਰੀਏ, ਸਾਊਦੀ ਕ੍ਰਾਊਨ ਪ੍ਰਿੰਸ ਨੇ ਉਬੇਰ ਤੋਂ ਲੈ ਕੇ ਯੂਕੇ ਦੀ ਫੁੱਟਬਾਲ ਟੀਮ ਨਿਊਕੈਸਲ ਯੂਨਾਈਟਿਡ ਤੱਕ ਹਰ ਚੀਜ਼ ਵਿੱਚ ਨਿਵੇਸ਼ ਕੀਤਾ ਹੈ। ਸਰਕਾਰ ਨੇ ਨੌਜਵਾਨਾਂ ਲਈ ਨੌਕਰੀਆਂ ਪੈਦਾ ਕਰਨ ਲਈ ਤੇਲ ਦੀ ਦੌਲਤ ਦੀ ਵਰਤੋਂ ਕਰਨ ਦੀ ਯੋਜਨਾ ਬਣਾਈ ਹੈ, ਜਿਸ ਨਾਲ ਸਮੇਂ ਦੇ ਨਾਲ ਤੇਲ 'ਤੇ ਆਰਥਿਕਤਾ ਦੀ ਨਿਰਭਰਤਾ ਘਟੇਗੀ। ਫੰਡ ਨੇ ਨੇਵਾਰਕ, ਕੈਲੀਫੋਰਨੀਆ ਵਿੱਚ ਸਥਿਤ ਇੱਕ ਇਲੈਕਟ੍ਰਿਕ ਕਾਰ ਕੰਪਨੀ ਲੂਸੀਡ ਮੋਟਰਜ਼ ਇੰਕ. ਵਿੱਚ ਵੀ ਨਿਵੇਸ਼ ਕੀਤਾ ਹੈ। ਹਾਲਾਂਕਿ, ਫੰਡ ਵਲੋਂ ਤੁਰੰਤ ਨਹੀਂ ਦੱਸਿਆ ਗਿਆ ਕਿ ਇਹ ਕਿਸ ਲਈ ਵਰਤਿਆ ਜਾਵੇਗਾ।
ਸਰਕਾਰ 94 ਫੀਸਦੀ ਹਿੱਸੇਦਾਰੀ ਦੇ ਨਾਲ ਅਰਾਮਕੋ ਵਿੱਚ ਸਭ ਤੋਂ ਵੱਡੀ ਸ਼ੇਅਰਧਾਰਕ ਹੈ। ਸਾਲ 2019 ਵਿੱਚ, ਕੰਪਨੀ ਦੇ ਸ਼ੇਅਰ ਰਿਆਦ ਵਿੱਚ ਤਾਦਾਉਲ ਸਟਾਕ ਐਕਸਚੇਂਜ ਵਿੱਚ ਪੇਸ਼ ਕੀਤੇ ਗਏ ਸਨ। ਰੇਟਿੰਗ ਏਜੰਸੀ ਮੂਡੀਜ਼ ਇਨਵੈਸਟਰ ਸਰਵਿਸਿਜ਼ ਨੇ ਪਿਛਲੇ ਹਫ਼ਤੇ ਕਿਹਾ ਸੀ ਕਿ ਫੰਡ ਦੇ ਅਧੀਨ ਜਾਇਦਾਦ 2015 ਵਿੱਚ 152 ਅਰਬ ਡਾਲਰ ਤੋਂ ਵੱਧ ਕੇ 2020 ਵਿੱਚ 412 ਅਰਬ ਡਾਲਰ ਹੋ ਗਈ ਹੈ।
ਇਹ ਵੀ ਪੜ੍ਹੋ : ਭਾਰਤ 2024 ਤੱਕ ਖੇਤੀਬਾੜੀ ਵਿੱਚ ਡੀਜ਼ਲ ਦੀ ਥਾਂ ਨਵਿਆਉਣਯੋਗ ਊਰਜਾ ਦਾ ਕਰੇਗਾ ਇਸਤੇਮਾਲ : ਬਿਜਲੀ ਮੰਤਰੀ
ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।
ਮੌਜੂਦਾ ਵਿੱਤੀ ਸਾਲ ਲਈ ਪ੍ਰਾਵੀਡੈਂਟ ਫੰਡ 'ਤੇ ਕਿੰਨਾ ਵਿਆਜ ਮਿਲੇਗਾ, ਜਲਦ ਫੈਸਲਾ ਕਰੇਗਾ EPFO
NEXT STORY 
