ਮੁੰਬਈ- ਬਾਲੀਵੁੱਡ ਦੀ ਸਭ ਤੋਂ ਵੱਧ ਉਡੀਕੀ ਜਾਣ ਵਾਲੀ ਫਿਲਮ 'ਬਾਰਡਰ 2' ਦੀ ਰਿਲੀਜ਼ ਨੂੰ ਲੈ ਕੇ ਦਰਸ਼ਕਾਂ ਵਿੱਚ ਭਾਰੀ ਉਤਸ਼ਾਹ ਹੈ। ਫਿਲਮ ਦੀ ਰਿਲੀਜ਼ ਤੋਂ ਪਹਿਲਾਂ ਪ੍ਰਸ਼ੰਸਕਾਂ ਦੇ ਮਨ ਵਿੱਚ ਇੱਕ ਵੱਡਾ ਸਵਾਲ ਸੀ ਕਿ ਪਹਿਲੇ ਭਾਗ ਵਿੱਚ ਸੰਨੀ ਦਿਓਲ ਦੀ ਪਤਨੀ ਦਾ ਯਾਦਗਾਰ ਕਿਰਦਾਰ ਨਿਭਾਉਣ ਵਾਲੀ ਅਦਾਕਾਰਾ ਤੱਬੂ ਇਸ ਵਾਰ ਫਿਲਮ ਵਿੱਚ ਕਿਉਂ ਨਹੀਂ ਹੈ। ਹੁਣ ਫਿਲਮ ਦੀ ਪ੍ਰੋਡਿਊਸਰ ਨਿਧੀ ਦੱਤਾ ਨੇ ਇਸ ਸਬੰਧੀ ਚੁੱਪੀ ਤੋੜੀ ਹੈ।
ਸੰਨੀ ਦਿਓਲ ਦਾ ਕਿਰਦਾਰ ਹੈ ਵੱਖਰਾ
ਪ੍ਰੋਡਿਊਸਰ ਨਿਧੀ ਦੱਤਾ ਨੇ ਇੱਕ ਇੰਟਰਵਿਊ ਦੌਰਾਨ ਦੱਸਿਆ ਕਿ 'ਬਾਰਡਰ 2' ਪਹਿਲੇ ਭਾਗ ਦਾ ਸਿੱਧਾ ਸੀਕਵਲ ਨਹੀਂ ਹੈ, ਸਗੋਂ ਇਹ ਇੱਕ ਬਿਲਕੁਲ ਵੱਖਰੀ ਫਿਲਮ ਹੈ। ਉਨ੍ਹਾਂ ਖੁਲਾਸਾ ਕੀਤਾ ਕਿ ਇਸ ਵਾਰ ਸੰਨੀ ਦਿਓਲ, ‘ਕੁਲਦੀਪ ਸਿੰਘ ਚਾਂਦਪੁਰੀ’ ਦਾ ਕਿਰਦਾਰ ਨਹੀਂ ਨਿਭਾ ਰਹੇ ਹਨ। ਕਿਉਂਕਿ ਫਿਲਮ ਵਿੱਚ ਉਨ੍ਹਾਂ ਦਾ ਕਿਰਦਾਰ ਨਵਾਂ ਹੈ, ਇਸ ਲਈ ਉਨ੍ਹਾਂ ਦੀ ਪਤਨੀ ਦਾ ਕਿਰਦਾਰ ਵੀ ਵੱਖਰਾ ਹੋਵੇਗਾ ਅਤੇ ਇਹੀ ਮੁੱਖ ਕਾਰਨ ਹੈ ਕਿ ਤੱਬੂ ਨੂੰ ਇਸ ਵਾਰ ਕਾਸਟ ਨਹੀਂ ਕੀਤਾ ਗਿਆ।
ਜਨਰਲ ਬਿਪਿਨ ਰਾਵਤ ਦਾ ਸੀ ਸੁਪਨਾ
ਨਿਧੀ ਦੱਤਾ ਨੇ ਇੱਕ ਬੇਹੱਦ ਭਾਵੁਕ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਇਹ ਫਿਲਮ ਬਣਾਉਣਾ ਸਿਰਫ਼ ਇੱਕ ਵਿਚਾਰ ਨਹੀਂ ਸੀ, ਸਗੋਂ ਉਨ੍ਹਾਂ ਲਈ ਇੱਕ ਨੈਤਿਕ ਜ਼ਿੰਮੇਵਾਰੀ ਹੈ। ਉਨ੍ਹਾਂ ਦੱਸਿਆ ਕਿ ਸਵਰਗਵਾਸੀ ਸੀਡੀਐਸ ਜਨਰਲ ਬਿਪਿਨ ਰਾਵਤ ਨੇ ਉਨ੍ਹਾਂ ਨੂੰ ਅਤੇ ਉਨ੍ਹਾਂ ਦੇ ਪਿਤਾ ਜੇਪੀ ਦੱਤਾ ਨੂੰ ਖਾਸ ਤੌਰ 'ਤੇ ਦਿੱਲੀ ਬੁਲਾਇਆ ਸੀ। ਉਸ ਮੁਲਾਕਾਤ ਦੌਰਾਨ ਰਾਵਤ ਜੀ ਨੇ ਉਨ੍ਹਾਂ ਨੂੰ 22 ਅਜਿਹੇ ਸ਼ਹੀਦਾਂ ਦੀਆਂ ਕਹਾਣੀਆਂ ਦਿੱਤੀਆਂ ਸਨ ਜੋ ਲੋਕਾਂ ਤੱਕ ਪਹੁੰਚਣੀਆਂ ਚਾਹੀਦੀਆਂ ਸਨ। 'ਬਾਰਡਰ 2' ਵਿੱਚ ਉਨ੍ਹਾਂ ਵਿੱਚੋਂ 3-4 ਬਹਾਦਰ ਸ਼ਹੀਦਾਂ ਦੀਆਂ ਕਹਾਣੀਆਂ ਨੂੰ ਪਰਦੇ 'ਤੇ ਉਤਾਰਿਆ ਗਿਆ ਹੈ।
ਦਿੱਗਜ ਕਲਾਕਾਰਾਂ ਨਾਲ 23 ਜਨਵਰੀ ਨੂੰ ਹੋਵੇਗੀ ਰਿਲੀਜ਼
ਅਨੁਰਾਗ ਸਿੰਘ ਦੁਆਰਾ ਨਿਰਦੇਸ਼ਿਤ ਇਸ ਫਿਲਮ ਵਿੱਚ ਸੰਨੀ ਦਿਓਲ ਦੇ ਨਾਲ ਵਰੁਣ ਧਵਨ, ਦਿਲਜੀਤ ਦੋਸਾਂਝ ਅਤੇ ਅਹਾਨ ਸ਼ੈੱਟੀ ਮੁੱਖ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ। ਫਿਲਮ ਨੂੰ ਭੂਸ਼ਣ ਕੁਮਾਰ, ਕ੍ਰਿਸ਼ਨ ਕੁਮਾਰ, ਜੇਪੀ ਦੱਤਾ ਅਤੇ ਨਿਧੀ ਦੱਤਾ ਮਿਲ ਕੇ ਪ੍ਰੋਡਿਊਸ ਕਰ ਰਹੇ ਹਨ। ਇਹ ਫਿਲਮ 23 ਜਨਵਰੀ ਨੂੰ ਸਿਨੇਮਾਘਰਾਂ ਵਿੱਚ ਦਸਤਕ ਦੇਵੇਗੀ।
ਅਮਾਲ ਮਲਿਕ ਦੇ ‘ਪੇਡ ਪੀਆਰ’ ਇਲਜ਼ਾਮਾਂ ‘ਤੇ ਭੜਕੀ ਤਾਨਿਆ ਮਿੱਤਲ, ਦਿੱਤਾ ਕਰਾਰਾ ਜਵਾਬ
NEXT STORY 
