ਮੁੰਬਈ - ਐਮਾਜ਼ਾਨ ਪ੍ਰਾਈਮ ਵੀਡੀਓ ਦੀ ਨਵੀਂ ਕ੍ਰਾਈਮ-ਡਰਾਮਾ ਸੀਰੀਜ਼ ‘ਦਲਦਲ’ ਅੱਜਕੱਲ੍ਹ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਸੀਰੀਜ਼ ’ਚ ਭੂਮੀ ਪੇਡਨੇਕਰ ਇਕ ਅਜਿਹੀ ਪੁਲਸ ਅਧਿਕਾਰੀ ਦੇ ਕਿਰਦਾਰ ’ਚ ਨਜ਼ਰ ਆ ਰਹੀ ਹੈ, ਜੋ ਘੱਟ ਬੋਲਦੀ ਹੈ ਪਰ ਉਸ ਦੀਆਂ ਅੱਖਾਂ ਬਹੁਤ ਕੁਝ ਕਹਿ ਜਾਂਦੀਆਂ ਹਨ। ਸੀਰੀਜ਼ ‘ਦਲਦਲ’ ਨੂੰ ਅੰਮ੍ਰਿਤਰਾਜ ਗੁਪਤਾ ਨੇ ਨਿਰਦੇਸ਼ਤ ਕੀਤਾ ਹੈ। ਇਸ ਸੀਰੀਜ਼ ਵਿਚ ਭੂਮੀ ਪੇਡਨੇਕਰ ਤੋਂ ਇਲਾਵਾ ਆਦਿਤਿਆ ਰਾਵਲ, ਸਮਾਰਾ ਤਿਜੋਰੀ ਵੀ ਨਜ਼ਰ ਆ ਰਹੇ ਹਨ। ਸੀਰੀਜ਼ ਬਾਰੇ ਆਦਿਤਿਆ ਰਾਵਲ, ਸਮਾਰਾ ਤਿਜੋਰੀ ਅਤੇ ਇਸ ਫਿਲਮ ਦੇ ਕ੍ਰਿਏਟਰ ਸੁਰੇਸ਼ ਤ੍ਰਿਵੇਣੀ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ਜਗ ਬਾਣੀ/ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਅਤੇ ਦਿਲਚਸਪ ਗੱਲਾਂ ਸਾਂਝੀਆਂ ਕੀਤੀਆਂ...
ਸੁਰੇਸ਼ ਤ੍ਰਿਵੇਣੀ
ਸਿਰਫ਼ ਰਾਈਟਿੰਗ ਨਹੀਂ, ਕਾਸਟਿੰਗ ਤੋਂ ਵਿਜ਼ਨ ਤੱਕ ਸ਼ੋਅ ਰਨਰ ਦੀ ਭੂਮਿਕਾ
ਸਵਾਲ : ਇਸ ਸ਼ੋਅ ‘ਦਲਦਲ’ ਦੀ ਸ਼ੁਰੂਆਤ ਕਿਵੇਂ ਅਤੇ ਕਦੋਂ ਹੋਈ?
ਜਵਾਬ : ਕੋਵਿਡ ਦੌਰਾਨ ਵਿਕਰਮ ਸਰ ਨੇ ਵਿਸ਼ਵ ਧਮੀਜਾ ਦੀ ਇਕ ਕਿਤਾਬ ਪੜ੍ਹੀ ਸੀ, ਜਿਸ ਦੇ ਰਾਈਟਸ ਉਨ੍ਹਾਂ ਨੇ ਲਏ। ਉਸ ਸਮੇਂ ਇੰਡਸਟਰੀ ਵਿਚ ਕੰਮ ਥੋੜ੍ਹਾ ਮੱਠਾ ਸੀ ਤਾਂ ਅਸੀਂ ਸੋਚਿਆ ਕਿ ਕੁਝ ਨਵਾਂ ਸ਼ੁਰੂ ਕੀਤਾ ਜਾਵੇ। ਮੈਂ ਲੇਖਕਾਂ ਦੀ ਟੀਮ ਬਣਾਈ। ਸ਼ੁਰੂਆਤ ਵਿਚ ਮੈਂ ਸੀਰੀਜ਼ ਨੂੰ ਲੈ ਕੇ ਥੋੜ੍ਹਾ ਦੁਵਿਧਾ ’ਚ ਸੀ ਕਿਉਂਕਿ ਇਹ ਜਾਨਰ ਕਾਫ਼ੀ ਡਿਮਾਂਡਿੰਗ ਹੁੰਦਾ ਹੈ ਪਰ ਹੌਲੀ-ਹੌਲੀ ਮੈਨੂੰ ਇਸ ਵਿਚ ਮਜ਼ਾ ਆਉਣ ਲੱਗਿਆ।
ਸਵਾਲ : ਤੁਸੀਂ ਪਹਿਲੀ ਵਾਰ ਸ਼ੋਅ ਰਨਰ ਬਣੇ। ਸ਼ੋਅ ਰਨਰ ਦਾ ਕੰਮ ਕੀ ਹੁੰਦਾ ਹੈ?
ਜਵਾਬ : ਸ਼ੋਅ ਰਨਰ ਦਾ ਕੰਮ ਰਾਈਟਿੰਗ ਤੋਂ ਲੈ ਕੇ ਕਾਸਟਿੰਗ, ਕਰੂ ਸਿਲੈਕਸ਼ਨ ਅਤੇ ਸ਼ੋਅ ਦੀ ਵਿਜ਼ਨ ਤੈਅ ਕਰਨਾ ਹੁੰਦਾ ਹੈ। ਡਾਇਰੈਕਟਰ ਉਸ ਵਿਜ਼ਨ ਨੂੰ ਅੱਗੇ ਲੈ ਜਾਂਦਾ ਹੈ। ਸ਼ੋਅ ਰਨਰ ਦਾ ਮਕਸਦ ਇਹ ਹੁੰਦਾ ਹੈ ਕਿ ਕਹਾਣੀ ਸ਼ੁਰੂਆਤ ਤੋਂ ਲੈ ਕੇ ਅੰਤ ਤੱਕ ਬਿਨਾਂ ਆਪਣੀ ਆਬਜ਼ੈਕਟੀਵਿਟੀ ਗੁਆਏ ਪੂਰੀ ਹੋਵੇ।
ਸਵਾਲ : ਇਸ ਸ਼ੋਅ ਵਿਚ ਭੂਮੀ ਪੇਡਨੇਕਰ ਨੂੰ ਕਾਸਟ ਕਰਨ ਬਾਰੇ ਕਿਵੇਂ ਸੁੱਝਿਆ?
ਜਵਾਬ : ਵਿਕਰਮ ਨੇ ਪਹਿਲੀ ਵਾਰ ਭੂਮੀ ਨਾਲ ਕਿਸੇ ਪ੍ਰਾਜੈਕਟ ਬਾਰੇ ਗੱਲ ਕੀਤੀ ਸੀ, ਜਿਸ ਵਿਚ ਸ਼ੁਰੂਆਤ ਵਿਚ ਉਨ੍ਹਾਂ ਨਾਲ ਇਕ ਛੋਟੀ ਜਿਹੀ ਗੱਲਬਾਤ ਹੋਈ ਸੀ। ਇਹ ਗੱਲ ਸ਼ੁਰੂ ਵਿਚ ਬਹੁਤ ਹਲਕੀ ਜਿਹੀ ਸੀ, ਬਸ ਸੰਖੇਪ ’ਚ। ਉਸ ਤੋਂ ਬਾਅਦ ਲਿਖਦੇ-ਲਿਖਦੇ ਅਤੇ ਡਿਲੀਟ ਕਰਦੇ-ਕਰਦੇ ਕਾਫ਼ੀ ਸਮਾਂ ਨਿਕਲ ਗਿਆ। ਫਿਰ 2023 ਵਿਚ ਵਿਕਰਮ ਨੇ ਭੂਮੀ ਨਾਲ ਫਿਰ ਸੰਪਰਕ ਕੀਤਾ ਅਤੇ ਇਸ ਵਾਰ ਭੂਮੀ ਨੇ ਖ਼ੁਸ਼ੀ-ਖ਼ੁਸ਼ੀ ਸਹਿਮਤੀ ਦੇ ਦਿੱਤੀ। ਉਹ ਉਨ੍ਹਾਂ ਨਾਲ ਕੋਲੈਬੋਰੇਟ ਕਰਨ ਲਈ ਉਤਸ਼ਾਹਿਤ ਸੀ ਅਤੇ ਇਸ ਨੂੰ ਲੈ ਕੇ ਬਹੁਤ ਹਾਂ-ਪੱਖੀ ਸੀ।
ਸਮਾਰਾ ਤਿਜੋਰੀ
ਸੈੱਟ ’ਤੇ ਕਿਰਦਾਰ ’ਚ ਪੂਰੀ ਤਰ੍ਹਾਂ ਡੁੱਬ ਜਾਂਦੀ ਸੀ
ਸਵਾਲ : ਤੁਸੀਂ ਸਾਈਕੋਲੋਜੀ ਪੜ੍ਹੀ ਹੈ, ਕੀ ਇਸ ਨਾਲ ਐਕਟਿੰਗ ਵਿਚ ਮਦਦ ਮਿਲੀ?
ਜਵਾਬ : ਬਹੁਤ ਜ਼ਿਆਦਾ। ਖ਼ਾਸ ਕਰਕੇ ਇਸ ਕਿਰਦਾਰ ਲਈ। ਸਾਈਕੋਲੋਜੀ ਪੜ੍ਹਨ ਨਾਲ ਤੁਸੀਂ ਜ਼ਿਆਦਾ ਭਾਵਨਾਵਾਂ ਨੂੰ ਮਹਿਸੂਸ ਕਰਨ ਵਾਲੇ ਬਣਦੇ ਹੋ। ਤੁਸੀਂ ਸਮਝਦੇ ਹੋ ਕਿ ਕੋਈ ਇਨਸਾਨ ਅਜਿਹਾ ਕਿਉਂ ਕਰ ਰਿਹਾ ਹੈ, ਉਸ ਦਾ ਟਰਾਮਾ ਕੀ ਹੈ। ਅਜਿਹੇ ਕਿਰਦਾਰਾਂ ਦੇ ਮਾਈਂਡਸੈੱਟ ’ਚ ਵੜਨਾ ਆਸਾਨ ਨਹੀਂ ਹੁੰਦਾ ਪਰ ਪੜ੍ਹਾਈ ਅਤੇ ਖੋਜ ਨਾਲ ਬਹੁਤ ਮਦਦ ਮਿਲਦੀ ਹੈ। ਇਸ ਲਈ ਮੈਂ ਕਾਫ਼ੀ ਪੜ੍ਹਿਆ ਅਤੇ ਖੋਜ ਕੀਤੀ। ਥੋੜ੍ਹੀ ਮੁਸ਼ਕਲ ਹੁੰਦੀ ਹੈ ਪਰ ਕਰਨ ਨਾਲ ਹੋ ਜਾਂਦਾ ਹੈ।
ਸਵਾਲ : ਥੋੜ੍ਹਾ ਆਪਣੇ ਕਿਰਦਾਰ ਬਾਰੇ ਦੱਸੋ, ਕੀ ਤੁਸੀਂ ਕਿਰਦਾਰ ਨੂੰ ਘਰ ਤੱਕ ਲੈ ਜਾਂਦੇ ਸੀ?
ਜਵਾਬ : ਨਹੀਂ। ਮੈਂ ਸੈੱਟ ’ਤੇ ਕਿਰਦਾਰ ਵਿਚ ਪੂਰੀ ਤਰ੍ਹਾਂ ਵੜ ਜਾਂਦੀ ਸੀ ਪਰ ਘਰ ਜਾ ਕੇ ਖ਼ੁਦ ਨੂੰ ਉਸ ਤੋਂ ਵੱਖ ਕਰ ਲੈਂਦੀ ਸੀ। ਇਹ ਕਿਰਦਾਰ ਥੋੜ੍ਹਾ ਖ਼ਤਰਨਾਕ ਵੀ ਸੀ, ਇਸ ਲਈ ਉਸ ਨੂੰ ਨਾਲ ਲੈ ਕੇ ਚੱਲਣਾ ਸਹੀ ਨਹੀਂ ਲੱਗਦਾ ਸੀ। ਮੇਕਅਪ, ਕਾਸਟਿਊਮ ਅਤੇ ਫਿਜ਼ੀਕਲ ਲੁਕ ਨੇ ਵੀ ਬਹੁਤ ਮਦਦ ਕੀਤੀ। ਹਰ ਸੀਨ ਨੂੰ ਅਸੀਂ ਬੀਟ-ਬਾਏ-ਬੀਟ ਡਿਸਕਸ ਕੀਤਾ। ਦਿਮਾਗ਼ ਵਿਚ ਕੀ ਚੱਲ ਰਿਹਾ ਹੈ, ਕੀ ਨਹੀਂ ਦਿਖਾਉਣਾ ਹੈ, ਸਭ ਕੁਝ। ਕਈ ਵਾਰ ਚੁੱਪੀ ਹੀ ਸਭ ਤੋਂ ਜ਼ਿਆਦਾ ਬੋਲਦੀ ਹੈ।
ਸਵਾਲ : ਇਸ ਸ਼ੋਅ ਵਿਚ ਤੁਹਾਡੀ ਕਾਸਟਿੰਗ ਕਿਵੇਂ ਹੋਈ?
ਜਵਾਬ: ਮੇਰਾ ਆਡੀਸ਼ਨ ਮੁਕੇਸ਼ ਸਰ ਨੇ ਲਿਆ ਸੀ। ਮੇਰਾ ਆਡੀਸ਼ਨ ਪ੍ਰੋਸੈੱਸ ਕਾਫ਼ੀ ਵੱਖਰਾ ਸੀ। ਮੈਨੂੰ ਸਿਰਫ਼ 5-6 ਲਾਈਨਾਂ ਦਾ ਇਕ ਫਸਟ-ਪਰਸਨ ਬ੍ਰੀਫ ਦਿੱਤਾ ਗਿਆ ਸੀ ਕਿ ਮੈਂ ਕੌਣ ਹਾਂ। ਪਹਿਲੇ ਰਾਊਂਡ ਵਿਚ ਕੋਈ ਸੀਨ ਨਹੀਂ ਸੀ, ਬਸ ਇੰਟਰਵਿਊ ਸੀ ਪਰ ਮੈਂ ‘ਅਨੀਤਾ’ ਬਣ ਕੇ ਜਵਾਬ ਦੇ ਰਹੀ ਸੀ। ਇਹ ਬਹੁਤ ਦਿਲਚਸਪ ਅਨੁਭਵ ਸੀ। ਦੂਜੇ ਰਾਊਂਡ ਵਿਚ ਸੀਨ ਦਿੱਤੇ ਗਏ।
ਆਦਿਤਿਆ ਰਾਵਲ
ਸਮਾਰਾ ਦੇ ਨਾਲ ਕੰਮ ਕਰਨਾ ਸੌਖਾ ਰਿਹਾ, ਕੈਮਿਸਟਰੀ ਆਪਣੇ-ਆਪ ਬਣ ਗਈ : ਆਦਿਤਿਆ ਰਾਵਲ
ਸਵਾਲ : ਸ਼ੋਅ ਵਿਚ ਤੁਹਾਡੇ ਅਤੇ ਸਮਾਰਾ ਦੇ ਕਿਰਦਾਰਾਂ ’ਚ ਜੋ ਬਦਲਾਅ ਆਉਂਦਾ ਹੈ, ਉਸ ਨੂੰ ਤੁਸੀਂ ਕਿਵੇਂ ਸਮਝਿਆ?
ਜਵਾਬ: ਇਹ ਸ਼ਿਫਟ ਪੂਰੀ ਤਰ੍ਹਾਂ ਰਾਈਟਿੰਗ ਦੇ ਹਿਸਾਬ ਨਾਲ ਰੱਖਿਆ ਗਿਆ ਸੀ। ਸਮਾਰਾ ਨਾਲ ਕੰਮ ਕਰਨਾ ਪਹਿਲੇ ਦਿਨ ਤੋਂ ਹੀ ਬੇਹੱਦ ਆਸਾਨ ਅਤੇ ਮਜ਼ੇਦਾਰ ਰਿਹਾ। ਲੁਕ ਟੈਸਟ ਦੌਰਾਨ ਹੀ ਸਾਨੂੰ ਮਹਿਸੂਸ ਹੋ ਗਿਆ ਸੀ ਕਿ ਸਾਡੇ ਵਿਚਕਾਰ ਇਕ ਨੈਚੁਰਲ ਏਜ਼ ਹੈ, ਜਿਸ ਨਾਲ ਸਕ੍ਰੀਨ ’ਤੇ ਕੈਮਿਸਟਰੀ ਆਪਣੇ-ਆਪ ਬਣ ਜਾਵੇਗੀ। ਜਿੱਥੋਂ ਤੱਕ ਕਿਰਦਾਰਾਂ ਦੀ ਗੱਲ ਹੈ, ਹਰ ਇਨਸਾਨ ਦੀ ਆਪਣੀ ਇਕ ਨੈਤਿਕ ਰੇਖਾ ਹੁੰਦੀ ਹੈ, ਭਾਵੇਂ ਉਹ ਕਿੰਨਾ ਵੀ ਚੰਗਾ ਹੋਵੇ, ਕਿੰਨੀਆਂ ਵੀ ਮੁਸ਼ਕਲਾਂ ’ਚੋਂ ਲੰਘ ਰਿਹਾ ਹੋਵੇ। ਸ਼ੋਅ ਵਿਚ ਸਮਾਰਾ ਦੇ ਕਿਰਦਾਰ ਦੀ ਵੀ ਇਕ ਲਾਈਨ ਹੈ ਅਤੇ ਮੇਰੇ ਕਿਰਦਾਰ ਸਾਜ਼ਿਦ ਦੀ ਵੀ।
ਸਵਾਲ : ਆਪਣੇ ਕਿਰਦਾਰ ਸਾਜ਼ਿਦ ਬਾਰੇ ਦੱਸੋ?
ਜਵਾਬ: ਸਾਜ਼ਿਦ ਕਿਸੇ ਦਾ ਸਾਥ ਕਿੰਨੀ ਦੂਰ ਤੱਕ ਦੇ ਸਕਦਾ ਹੈ, ਇਹ ਉਸ ਦੀਆਂ ਹੱਦਾਂ ’ਤੇ ਨਿਰਭਰ ਕਰਦਾ ਹੈ। ਬੇਸ਼ੁਮਾਰ ਮੁਹੱਬਤ ਹੋ ਸਕਦੀ ਹੈ ਪਰ ਜਦੋਂ ਹਾਲਾਤ ਉਸ ਹੱਦ ਨੂੰ ਪਾਰ ਕਰ ਜਾਂਦੇ ਹਨ, ਉਦੋਂ ਸਾਜ਼ਿਦ ਆਪਣੇ ਹਿਸਾਬ ਨਾਲ ਥੋੜ੍ਹਾ ਪਿੱਛੇ ਹਟ ਜਾਂਦਾ ਹੈ।
ਸਵਾਲ : ਇਕ ਸਕ੍ਰਿਪਟ ਆਉਣ ’ਤੇ ਉਸ ਨੂੰ ਜੱਜ ਕਿਵੇਂ ਕਰਦੇ ਹੋ?
ਜਵਾਬ: ਜਦੋਂ ਇਕ ਸਕ੍ਰਿਪਟ ਆਉਂਦੀ ਹੈ ਤਾਂ ਸਭ ਤੋਂ ਪਹਿਲਾਂ ਉਸ ਨੂੰ ਸਮਝਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ ਕਿ ਉਸ ਵਿਚ ਕਿਰਦਾਰਾਂ ਦਾ ਕੀ ਮਹੱਤਵ ਹੈ ਅਤੇ ਕੀ ਕਹਾਣੀ ਚੰਗੀ ਤਰ੍ਹਾਂ ਪੇਸ਼ ਕੀਤੀ ਜਾ ਰਹੀ ਹੈ। ਰੋਲ ਨੂੰ ਜੱਜ ਕਰਦੇ ਸਮੇਂ ਇਹ ਦੇਖਣਾ ਹੁੰਦਾ ਹੈ ਕਿ ਕੀ ਉਸ ਕਿਰਦਾਰ ਦਾ ਅੰਦਰੂਨੀ ਅਤੇ ਬਾਹਰੀ ਵਿਕਾਸ ਸਕ੍ਰਿਪਟ ਦੇ ਹਿਸਾਬ ਨਾਲ ਸਟੀਕ ਹੈ ਤੇ ਕੀ ਲੇਖਕ ਨੇ ਉਸ ਕਿਰਦਾਰ ਨੂੰ ਪੂਰੀ ਤਰ੍ਹਾਂ ਸਮਝਿਆ ਹੈ। ਹਾਲਾਂਕਿ ਇਹ ਕਦੇ-ਕਦੇ ਮੁਸ਼ਕਲ ਹੋ ਸਕਦਾ ਹੈ ਕਿਉਂਕਿ ਕਈ ਵਾਰ ਅਜਿਹੇ ਹਾਲਾਤ ਸਾਹਮਣੇ ਆਉਂਦੇ ਹਨ ਜਦੋਂ ਸਾਡੇ ਤੋਂ ਕਿਸੇ ਸਵਾਲ ਦਾ ਜਵਾਬ ਤਿਆਰ ਨਹੀਂ ਹੁੰਦਾ ਅਤੇ ਸਾਨੂੰ ਸੀਰੀਅਸ ਚਿਹਰੇ ਨਾਲ ਸੋਚਣਾ ਪੈਂਦਾ ਹੈ ਕਿ ਉਸ ਸਵਾਲ ਦਾ ਜਵਾਬ ਕੀ ਹੋ ਸਕਦਾ ਹੈ। ਇਸ ਪ੍ਰਕਿਰਿਆ ਨਾਲ ਇਹ ਸਮਝਣ ਵਿਚ ਮਦਦ ਮਿਲਦੀ ਹੈ ਕਿ ਇਕ ਚੰਗੇ ਲੇਖਕ ਲਈ ਕਹਾਣੀ ਦਾ ਡੂੰਘਾ ਵਿਸ਼ਲੇਸ਼ਣ ਅਤੇ ਕਿਰਦਾਰਾਂ ਨੂੰ ਸਹੀ ਰੂਪ ’ਚ ਪੇਸ਼ ਕਰਨਾ ਕਿੰਨਾ ਜ਼ਰੂਰੀ ਹੈ।
ਸਵਾਲ: ਇੰਡਸਟਰੀ ਵਿਚ ਪਰਿਵਾਰ ਦੇ ਵੱਡੇ ਨਾਮ ਹੋਣ ਦਾ ਪ੍ਰੈੱਸ਼ਰ ਰਹਿੰਦਾ ਹੈ?
ਜਵਾਬ: ਈਮਾਨਦਾਰੀ ਨਾਲ ਕਹਾਂ ਤਾਂ ਨਹੀਂ। ਉਨ੍ਹਾਂ ਨੇ 40 ਸਾਲ ਵਿਚ ਜੋ ਹਾਸਲ ਕੀਤਾ ਹੈ, ਉਸ ਦੀ ਤੁਲਨਾ ਹੁਣੇ ਕਰਨਾ ਬੇਈਮਾਨੀ ਹੋਵੇਗੀ। ਅਸੀਂ ਆਪਣੇ ਸਫ਼ਰ ਦਾ ਮਜ਼ਾ ਲੈ ਰਹੇ ਹਾਂ, ਜਦੋਂ ਸਮਾਂ ਆਵੇਗਾ ਉਦੋਂ ਦੇਖਿਆ ਜਾਵੇਗਾ।
ਸਵਾਲ: ਪਿਤਾ ਦੀ ਫਿਲਮ ਦੇ ਲਈ ਲਿਖਣ ਅਤੇ ਸੈੱਟ ’ਤੇ ਕੰਮ ਕਰਨ ਦਾ ਅਨੁਭਵ ਕਿਹੋ ਜਿਹਾ ਰਿਹਾ?
ਜਵਾਬ: ਇਹ ਅਨੁਭਵ ਸੱਚ ਵਿਚ ਬਹੁਤ ਸ਼ਾਨਦਾਰ ਅਤੇ ਮਜ਼ੇਦਾਰ ਰਿਹਾ। ਉਨ੍ਹਾਂ ਦੇ ਲਈ ਲਿਖਣਾ ਆਪਣੇ-ਆਪ ਵਿਚ ਬਹੁਤ ਖਾਸ ਸੀ ਅਤੇ ਉਹ ਖੁਦ ਵੀ ਇਸ ਪ੍ਰੋਸੈੱਸ ਦਾ ਹਿੱਸਾ ਸੀ, ਇਸ ਲਈ ਇਕ ਵੱਖਰੀ ਹੀ ਤਰ੍ਹਾਂ ਦੀ ਸਮਝ ਬਣ ਗਈ ਸੀ। ਸੈੱਟ ’ਤੇ ਸਾਫ਼ ਮਹਿਸੂਸ ਹੁੰਦਾ ਹੈ ਕਿ ਰਿਸ਼ਤਾ ਐਕਟਰ-ਰਾਈਟਰ ਦਾ ਹੀ ਹੁੰਦਾ ਹੈ, ਜਿੱਥੇ ਦੋਵੇਂ ਮਿਲ ਕੇ ਸੀਨ ਨੂੰ ਬੇਹਤਰ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਹਨ। ਇਕ ਸੀਨ ਦੇ ਦੌਰਾਨ ਕਈ ਟੇਕ ਹੋਏ ਪਰ ਜਦੋਂ ਚੌਥੇ ਟੇਕ ਤੋਂ ਬਾਅਦ ਸਭ ਨੂੰ ਲੱਗਿਆ ਕਿ ਇਸ ਤੋਂ ਬਿਹਤਰ ਹੋ ਹੀ ਨਹੀਂ ਸਕਦਾ ਤਾਂ ਉਹੀ ਪਲ ਸਭ ਤੋਂ ਜ਼ਿਆਦਾ ਸੈਟਿਸਫਾਇੰਗ ਸੀ। ਕੰਮ ਦੇ ਦੌਰਾਨ ਹਾਸਾ-ਮਜ਼ਾਕ ਵੀ ਚਲਦਾ ਰਹਿੰਦਾ ਹੈ, ਕਦੇ ਹਲਕੀ ਝਿੜਕ ਵੀ ਪੈ ਜਾਂਦੀ ਹੈ ਪਰ ਜਦੋਂ ਤੱਕ ਤੁਸੀਂ ਪੂਰੀ ਮਿਹਨਤ ਅਤੇ ਆਪਣੀ ਸਮਰੱਥਾ ਦੇ ਹਿਸਾਬ ਨਾਲ ਕੰਮ ਕਰ ਰਹੇ ਹੋ, ਉਦੋਂ ਤੱਕ ਕੋਈ ਪ੍ਰੈੱਸ਼ਰ ਨਹੀਂ ਹੁੰਦਾ।
ਨਹੀਂ ਰਹੀ ਹਾਰਰ ਫਿਲਮਾਂ ਦੀ ਦਿੱਗਜ ਅਦਾਕਾਰਾ ! ਭਿਆਨਕ ਬਿਮਾਰੀ ਕਾਰਨ ਦੁਨੀਆ ਨੂੰ ਕਿਹਾ ਅਲਵਿਦਾ
NEXT STORY 
