9 ਸਾਲ ਦੀ ਮਿਹਨਤ ਹੈ ‘ਕਨੱਪਾ’, 2014 ’ਚ ਆਈਡੀਆ ਆਇਆ, 2023 ’ਚ ਸ਼ੂਟਿੰਗ : ਵਿਸ਼ਨੂੰ ਮੰਚੂ

Edited By Cherry,
Updated: 16 Jun, 2025 03:02 PM

kannappa is 9 years of hard work vishnu manchu

ਮੁੰਬਈ- ਮੁਕੇਸ਼ ਕੁਮਾਰ ਸਿੰਘ ਦੇ ਨਿਰਦੇਸ਼ਨ ’ਚ ਬਣਨ ਵਾਲੀ ‘ਕਨੱਪਾ’ ਦਾ ਨਿਰਮਾਣ ਮੋਹਨ ਬਾਬੂ ਦੁਆਰਾ ਕੀਤਾ ਗਿਆ ਹੈ। ਇਸ ਫਿਲਮ ’ਚ ਪ੍ਰਭਾਸ, ਅਕਸ਼ੈ ਕੁਮਾਰ ਅਤੇ ਵਿਸ਼ਨੂੰ ਮੰਚੂ ਸਮੇਤ ਕਈ ਵੱਡੇ ਸਿਤਾਰੇ ਸ਼ਾਮਲ ਹਨ। ਇਹ ਫਿਲਮ 27 ਜੂਨ ਨੂੰ ਸਿਨੇਮਾਘਰਾਂ ਵਿਚ ਰਿਲੀਜ਼ ਹੋਣ ਜਾ ਰਹੀ ਹੈ।

ਫਿਲਮ ਵਿਚ ਇਤਿਹਾਸ ਦੀਆਂ ਕੁਝ ਕਹਾਣੀਆਂ ਨੂੰ ਦਿਖਾਇਆ ਜਾਵੇਗਾ। ਹਾਲ ਹੀ ’ਚ ਫਿਲਮ ਦੇ ਮੁੱਖ ਅਦਾਕਾਰ ਵਿਸ਼ਨੂੰ ਮੰਚੂ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ ਜਗ ਬਾਣੀ/ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਅਤੇ ਦਿਲਚਸਪ ਗੱਲਾਂ ਸਾਂਝੀਆਂ ਕੀਤੀਆਂ...

ਪ੍ਰ. ‘ਕਨੱਪਾ ਨੂੰ ਤੁਸੀਂ ਕਿਸ ਜਾਨਰ ’ਚ ਰੱਖਦੇ ਹੋ ਅਤੇ ਇਸ ਨੂੰ ਬਣਾਉਣ ’ਚ ਕਿੰਨਾ ਸਮਾਂ ਲੱਗਾ?

- ਮੈਂ ‘ਕਨੱਪਾ’ ਨੂੰ ਇਕ ਇਤਿਹਾਸਕ ਐਕਸ਼ਨ ਮੂਵੀ ਕਹਾਂਗਾ। ਇਸ ਦਾ ਆਈਡੀਆ ਮੈਨੂੰ 2014 ’ਚ ਆਇਆ ਸੀ ਅਤੇ 2015 ’ਚ ਮੈਂ ਇਸ ਦੀ ਸਕ੍ਰਿਪਟ ਲਿਖਣੀ ਸ਼ੁਰੂ ਕੀਤੀ। ਇਸ ਤੋਂ ਬਾਅਦ ਫਿਲਮ ਦੀ ਸ਼ੂਟਿੰਗ 2023 ’ਚ ਕੀਤੀ ਗਈ। ਯਾਨੀ ਇਸ ਫਿਲਮ ਨੂੰ ਬਣਾਉਣ ’ਚ ਕੁੱਲ ਮਿਲਾ ਕੇ 9 ਸਾਲ ਲੱਗੇ।

ਪ੍ਰ. ਫਿਲਮ ਦੀ ਕਾਸਟਿੰਗ ਪ੍ਰਕਿਰਿਆ ਬਾਰੇ ਦੱਸੋ?

- ਫਿਲਮ ਦੀ ਕਾਸਟਿੰਗ ਲਈ ਮੈਂ ਸਾਰੇ ਕਲਾਕਾਰਾਂ ਨਾਲ ਨਿੱਜੀ ਤੌਰ ’ਤੇ ਸੰਪਰਕ ਕੀਤਾ ਅਤੇ ਸਾਰਿਆਂ ਨੇ ਖ਼ੁਸ਼ੀ-ਖ਼ੁਸ਼ੀ ਹਾਮੀ ਭਰ ਦਿੱਤੀ। ਮੈਂ ਉਨ੍ਹਾਂ ਦਾ ਦਿਲੋਂ ਧੰਨਵਾਦ ਕਰਨਾ ਚਾਹੁੰਦਾ ਹਾਂ ਕਿਉਂਕਿ ਇਸ ਫਿਲਮ ਲਈ ਇੰਨੇ ਵੱਡੇ ਕਲਾਕਾਰਾਂ ਦੀ ਲੋੜ ਨਹੀਂ ਸੀ, ਫਿਰ ਵੀ ਉਹ ਇਸ ਲਈ ਤਿਆਰ ਹੋਏ। ਇਸ ਦਾ ਇਕ ਕਾਰਨ ਇਹ ਵੀ ਹੈ ਕਿ ਸਾਰੇ ਮੇਰੇ ਪਿਤਾ (ਮੋਹਨ ਬਾਬੂ) ਦੀ ਬਹੁਤ ਇੱਜ਼ਤ ਕਰਦੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੂੰ ਸਕ੍ਰਿਪਟ ’ਤੇ ਪੂਰਾ ਭਰੋਸਾ ਸੀ। ਇਸ ਫਿਲਮ ਵਿਚ ਮੋਹਨ ਲਾਲ ਜੀ ਵੀ ਹਨ ਅਤੇ ਤਾਮਿਲਨਾਡੂ ਤੋਂ ਸ਼ਰਦ ਕੁਮਾਰ ਵੀ ਜੁੜੇ ਹਨ। ਫਿਲਮ ਦੇ ਤਿੰਨ ਗੀਤਾਂ ਨੂੰ ਪ੍ਰਭੂਦੇਵਾ ਜੀ ਨੇ ਕੋਰੀਓਗ੍ਰਾਫ ਕੀਤਾ ਹੈ। ਮੈਂ ਬੇਨਤੀ ਕੀਤੀ ਤਾਂ ਤੁਰੰਤ ਮੰਨ ਗਏ ਅਕਸ਼ੈ ਸਰ।

ਪ੍ਰ. ਕੀ ਅਕਸ਼ੈ ਕੁਮਾਰ ਨੇ ਪਹਿਲਾਂ ਇਸ ਫਿਲਮ ਲਈ ਮਨ੍ਹਾ ਕੀਤਾ ਸੀ?

- ਅਕਸ਼ੈ ਕੁਮਾਰ ਜੀ ਦੇਸ਼ ਦੇ ਬਹੁਤ ਵੱਡੇ ਸੁਪਰਸਟਾਰ ਹਨ। ਫਿਲਮ ’ਚ ਉਨ੍ਹਾਂ ਦਾ ਰੋਲ 7 ਦਿਨਾਂ ਦਾ ਸੀ, ਜਿਸ ਨੂੰ ਲੈ ਕੇ ਉਨ੍ਹਾਂ ਦੀ ਟੀਮ ਸ਼ੁਰੂ ’ਚ ਰਾਜ਼ੀ ਨਹੀਂ ਹੋ ਰਹੀ ਸੀ। ਫਿਰ ਮੈਂ ਸੁਧਾ ਕੁੰਦਰੂ ਜੀ ਨਾਲ ਗੱਲ ਕੀਤੀ, ਜੋ ਪਹਿਲਾਂ ਅਕਸ਼ੈ ਸਰ ਨਾਲ ਕੰਮ ਕਰ ਚੁੱਕੇ ਹਨ। ਮੈਂ ਉਨ੍ਹਾਂ ਨੂੰ ਬੇਨਤੀ ਕੀਤੀ ਕਿ ਉਹ ਅਕਸ਼ੈ ਸਰ ਨਾਲ ਗੱਲ ਕਰਨ। ਫਿਰ ਮੇਰੀ ਖ਼ੁਦ ਅਕਸ਼ੈ ਸਰ ਨਾਲ ਫੋਨ ’ਤੇ ਗੱਲ ਹੋਈ ਅਤੇ ਪਹਿਲੀ ਕਾਲ ’ਚ ਹੀ ਉਹ ਮੰਨ ਗਏ।

ਪ੍ਰ. ਅਕਸ਼ੈ ਕੁਮਾਰ ਅਤੇ ਪ੍ਰਭਾਸ ਦੇ ਕੰਮ ਕਰਨ ਦੀ ਟਾਈਮਿੰਗ ’ਚ ਅੰਤਰ ਹੈ ਤਾਂ ਕੀ ਸ਼ੂਟਿੰਗ ਦੌਰਾਨ ਕੋਈ ਸਮੱਸਿਆ ਆਈ?

- ਨਹੀਂ, ਅਜਿਹਾ ਕੁਝ ਨਹੀਂ ਹੋਇਆ। ਸਾਰੇ ਬਹੁਤ ਪ੍ਰੋਫੈਸ਼ਨਲ ਹਨ, ਇਸ ਲਈ ਹਰ ਕੰਮ ਸਮੇਂ ’ਤੇ ਅਤੇ ਵਧੀਆ ਢੰਗ ਨਾਲ ਹੋ ਜਾਂਦਾ ਸੀ। ਮੈਂ ਖ਼ੁਦ ਵੀ ਸਵੇਰੇ ਕੰਮ ਕਰਨਾ ਪਸੰਦ ਕਰਦਾ ਹਾਂ ਕਿਉਂਕਿ ਰਾਤ ਨੂੰ ਜਲਦੀ ਸੌਂ ਜਾਂਦਾ ਹਾਂ। ਸ਼ਾਮ ਨੂੰ ਸ਼ੂਟਿੰਗ ਕਰਨਾ ਮੇਰੀ ਤਰਜੀਹ ਨਹੀਂ ਹੈ ਪਰ ਲੋੜ ਪੈਣ ’ਤੇ ਕਰਦਾ ਹਾਂ।

ਪ੍ਰ. ਤੁਸੀਂ ਅਦਾਕਾਰ ਕਿਵੇਂ ਬਣੇ? ਕੀ ਬਚਪਨ ਤੋਂ ਹੀ ਅਦਾਕਾਰ ਬਣਨ ਦੀ ਚਾਹਤ ਸੀ?

- ਜੀ ਹਾਂ, ਮੈਂ ਬਚਪਨ ਤੋਂ ਹੀ ਅਦਾਕਾਰ ਬਣਨਾ ਚਾਹੁੰਦਾ ਸੀ ਪਰ ਮੇਰੇ ਪਿਤਾ ਚਾਹੁੰਦੇ ਸਨ ਕਿ ਮੈਂ ਇਕ ਆਈ.ਪੀ.ਐੱਸ. ਅਫ਼ਸਰ ਬਣਾਂ ਪਰ ਮੇਰਾ ਸੁਪਨਾ ਐਕਟਰ ਬਣਨ ਦਾ ਸੀ ਤੇ ਅੱਜ ਮੈਂ ‘ਕਨੱਪਾ’ ਬਣਾਈ ਹੈ। ਮੇਰੇ ਭੈਣ-ਭਰਾ ਵੀ ਅਦਾਕਾਰ ਹਨ ਅਤੇ ਇਹ ਇਕ ਵਿਰਾਸਤ ਹੈ, ਜਿਸ ਨੂੰ ਅਸੀਂ ਅੱਗੇ ਲਿਜਾ ਰਹੇ ਹਾਂ। ਇਹ ਚੰਗੀ ਵੀ ਹੈ ਕਿਉਂਕਿ ਸਾਨੂੰ ਆਪਣੇ ਪਿਤਾ ਤੋਂ ਪੂਰਾ ਸਮਰਥਨ ਮਿਲਿਆ। ਹਾਲਾਂਕਿ ਲੋਕ ਤੁਲਨਾ ਕਰਦੇ ਹਨ ਪਰ ਉਨ੍ਹਾਂ ਨੂੰ ਸਮਝਣਾ ਚਾਹੀਦਾ ਹੈ ਕਿ ਮੇਰੇ ਪਿਤਾ ਇਕ ਵੱਖਰੇ ਅਦਾਕਾਰ ਹਨ ਤੇ ਮੈਂ ਵੱਖਰਾ।

ਪ੍ਰ. ਫਿਲਮ ‘ਕਨੱਪਾ’ ’ਚ ਜੇਨ-ਜ਼ੈੱਡ ਲਈ ਕੀ ਖਾਸ ਹੈ?

- ਇਸ ਫਿਲਮ ’ਚ ਭਰਪੂਰ ਐਕਸ਼ਨ ਹੈ ਅਤੇ ਇਸ ਨੂੰ ਖ਼ਾਸ ਤੌਰ ’ਤੇ ਅੱਜ ਦੀ ਨੌਜਵਾਨ ਪੀੜ੍ਹੀ ਨੂੰ ਧਿਆਨ ’ਚ ਰੱਖਦਿਆਂ ਬਣਾਇਆ ਗਿਆ ਹੈ। ਇਸ ’ਚ ਕਨੱਪਾ ਦੀ ਪੂਰੀ ਕਹਾਣੀ ਦਿਖਾਈ ਗਈ ਹੈ, ਉਹ ਕਿੱਥੋਂ ਆਇਆ, ਕਿਉਂ ਉਹ ਨਾਸਤਿਕ ਸੀ ਅਤੇ ਉਸ ਦੀ ਜ਼ਿੰਦਗੀ ਕਿਵੇਂ ਦੀ ਰਹੀ। ਹਰ ਚੀਜ਼ ਨੂੰ ਧਿਆਨ ’ਚ ਰੱਖਦਿਆਂ ਇਸ ਨੂੰ ਇਕ ਫਿਕਸ਼ਨਲ ਤਰੀਕੇ ਨਾਲ ਲਿਖਿਆ ਤੇ ਬਣਾਇਆ ਗਿਆ ਹੈ।

ਪ੍ਰ. ਤੁਹਾਨੂੰ ਇਸ ਫਿਲਮ ਤੋਂ ਕੀ ਸਿੱਖਣ ਲਈ ਮਿਲਿਆ?

-ਇਸ ਫਿਲਮ ਨੇ ਮੈਨੂੰ ਸਬਰ ਰੱਖਣਾ ਸਿਖਾਇਆ। ਨਾਲ ਹੀ ਇਹ ਵੀ ਸਿਖਾਇਆ ਕਿ ਜੇਕਰ ਅਸੀਂ ਦਿਲੋਂ ਸੋਚੀਏ ਅਤੇ ਪੂਰੀ ਲਗਨ ਨਾਲ ਕੰਮ ਕਰੀਏ ਤਾਂ ਕੋਈ ਵੀ ਸੁਪਨਾ ਅਸੰਭਵ ਨਹੀਂ ਹੁੰਦਾ। ਜਦੋਂ ਤੁਹਾਨੂੰ ਆਪਣੇ ਕੰਮ ’ਤੇ ਪੂਰਾ ਭਰੋਸਾ ਹੁੰਦਾ ਹੈ ਤਾਂ ਤੁਸੀਂ ਸਭ ਕੁਝ ਕਰ ਸਕਦੇ ਹੋ। ਮੇਰਾ ਸੁਨੇਹਾ ਇਹੋ ਹੈ, ਸਬਰ ਰੱਖੋ ਅਤੇ ਸਖ਼ਤ ਮਿਹਨਤ ਕਰੋ।

ਪ੍ਰ. ਇਕ ਅਦਾਕਾਰ ਵਜੋਂ ਤੁਹਾਡੀ ਪ੍ਰੇਰਨਾ ਕੌਣ ਰਹੇ ਹਨ?

-ਮੇਰੀ ਪ੍ਰੇਰਨਾ ਹਮੇਸ਼ਾ ਤੋਂ ਹੀ ਵੱਡੇ ਅਦਾਕਾਰ ਰਹੇ ਹਨ ਜਿਵੇਂ ਕਿ ਅਮਿਤਾਭ ਬੱਚਨ, ਸ਼ਤਰੂਘਨ ਸਿਨਹਾ ਅਤੇ ਅਮਰੀਸ਼ ਪੁਰੀ ਜੀ। ਇਸ ਤੋਂ ਇਲਾਵਾ ਹਿੰਦੀ ਫਿਲਮ ਇੰਡਸਟਰੀ ’ਚ ਮੈਨੂੰ ਅਨਿਲ ਕਪੂਰ ਦੀ ਊਰਜਾ ਅਤੇ ਨਾਨਾ ਪਾਟੇਕਰ ਦੀ ਅਦਾਕਾਰੀ ਸਮਰੱਥਾ ਤੋਂ ਵੀ ਬਹੁਤ ਕੁਝ ਸਿੱਖਣ ਨੂੰ ਮਿਲਿਆ ਹੈ। ਇਨ੍ਹਾਂ ਸਾਰਿਆਂ ਤੋਂ ਪ੍ਰੇਰਨਾ ਲੈ ਕੇ ਹੀ ਮੈਂ ਆਪਣੀਆਂ ਫਿਲਮਾਂ ’ਚ ਕੁਝ ਨਵਾਂ ਕਰਨ ਦੀ ਕੋਸ਼ਿਸ਼ ਕਰਦਾ ਹਾਂ।

‘ਬੜੇ ਅੱਛੇ ਲਗਤੇ ਹੈਂ’ ਦੇ ਨਵੇਂ ਸੀਜ਼ਨ ਲਈ ਐਕਸਾਈਟਿਡ ਦਿਸੇ ਰਵੀ ਦੂਬੇ ਤੇ ਸਰਗੁਨ ਮਹਿਤਾ