ਮੁੰਬਈ : ਮਸ਼ਹੂਰ ਯੂਟਿਊਬਰ ਅਤੇ 'ਬਿੱਗ ਬੌਸ 17' ਦੇ ਮੁਕਾਬਲੇਬਾਜ਼ ਅਨੁਰਾਗ ਡੋਭਾਲ (UK07 Rider), ਜੋ ਪਿਛਲੇ ਦਿਨੀਂ ਇੱਕ ਭਿਆਨਕ ਹਾਦਸੇ ਦਾ ਸ਼ਿਕਾਰ ਹੋ ਗਏ ਸਨ, ਨੇ ਸੋਸ਼ਲ ਮੀਡੀਆ 'ਤੇ ਆਪਣੀ ਸਿਹਤ ਬਾਰੇ ਤਾਜ਼ਾ ਜਾਣਕਾਰੀ ਸਾਂਝੀ ਕੀਤੀ ਹੈ। ਅਨੁਰਾਗ ਦੀ ਇਸ ਪੋਸਟ ਤੋਂ ਬਾਅਦ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਅਤੇ ਦੋਸਤਾਂ ਨੇ ਰਾਹਤ ਦਾ ਸਾਹ ਲਿਆ ਹੈ ਅਤੇ ਉਨ੍ਹਾਂ ਦੇ ਜਲਦੀ ਠੀਕ ਹੋਣ ਦੀ ਦੁਆ ਕੀਤੀ। ਇਸ ਦੌਰਾਨ ਅਦਾਕਾਰਾ ਮੰਨਾਰਾ ਚੋਪੜਾ ਨੇ ਵੀ ਅਨੁਰਾਗ ਲਈ ਇੱਕ ਖਾਸ ਸੰਦੇਸ਼ ਸਾਂਝਾ ਕੀਤਾ ਹੈ।
ਮੰਨਾਰਾ ਚੋਪੜਾ ਦਾ ਭਾਵੁਕ ਸੰਦੇਸ਼
ਅਨੁਰਾਗ ਦੀ ਪੋਸਟ 'ਤੇ ਕੁਮੈਂਟ ਕਰਦਿਆਂ ਮੰਨਾਰਾ ਚੋਪੜਾ ਨੇ ਲਿਖਿਆ, "ਤੁਹਾਨੂੰ ਮੁਸਕਰਾਉਂਦੇ ਹੋਏ ਦੇਖ ਕੇ ਚੰਗਾ ਲੱਗਿਆ, ਪ੍ਰਮਾਤਮਾ ਤੁਹਾਡੇ 'ਤੇ ਮਿਹਰ ਕਰੇ।" ਦੱਸ ਦੇਈਏ ਕਿ 'ਬਿੱਗ ਬੌਸ 17' ਦੇ ਘਰ ਵਿੱਚ ਮੰਨਾਰਾ ਅਤੇ ਅਨੁਰਾਗ ਦੀ ਦੋਸਤੀ ਕਾਫੀ ਚਰਚਾ ਵਿੱਚ ਰਹੀ ਸੀ। ਦੋਵਾਂ ਨੇ ਸ਼ੋਅ ਦੌਰਾਨ ਇੱਕ-ਦੂਜੇ ਦਾ ਕਾਫੀ ਸਾਥ ਦਿੱਤਾ ਸੀ, ਜੋ ਹੁਣ ਵੀ ਬਰਕਰਾਰ ਨਜ਼ਰ ਆ ਰਿਹਾ ਹੈ।
ਹਾਦਸੇ ਪਿੱਛੇ ਸੀ ਪਰਿਵਾਰਕ ਕਲੇਸ਼ ?
ਰਿਪੋਰਟਾਂ ਅਨੁਸਾਰ, ਅਨੁਰਾਗ ਡੋਭਾਲ ਨੇ ਇਹ ਹਾਦਸਾ ਕਥਿਤ ਤੌਰ 'ਤੇ ਮਾਨਸਿਕ ਪਰੇਸ਼ਾਨੀ ਕਾਰਨ ਖੁਦ ਨੂੰ ਨੁਕਸਾਨ ਪਹੁੰਚਾਉਣ ਦੇ ਇਰਾਦੇ ਨਾਲ ਕੀਤਾ ਸੀ। ਹਾਦਸੇ ਤੋਂ ਪਹਿਲਾਂ ਉਨ੍ਹਾਂ ਨੇ ਇੱਕ ਭਾਵੁਕ ਵੀਡੀਓ (ਵਲੌਗ) ਸਾਂਝਾ ਕੀਤਾ ਸੀ, ਜਿਸ ਨੂੰ ਉਨ੍ਹਾਂ ਨੇ ਆਪਣਾ 'ਆਖਰੀ ਸੰਦੇਸ਼' ਦੱਸਿਆ ਸੀ। ਅਨੁਰਾਗ ਨੇ ਦੋਸ਼ ਲਾਇਆ ਕਿ ਉਨ੍ਹਾਂ ਦੇ ਪਰਿਵਾਰ ਵੱਲੋਂ ਉਨ੍ਹਾਂ ਨੂੰ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਸੀ। ਉਨ੍ਹਾਂ ਦੱਸਿਆ ਸੀ ਕਿ ਉਹ ਇੱਕ ਬ੍ਰਾਹਮਣ ਪਰਿਵਾਰ ਨਾਲ ਸਬੰਧ ਰੱਖਦੇ ਹਨ, ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਰਿਤਿਕਾ ਰਾਜਪੂਤ ਪਰਿਵਾਰ ਤੋਂ ਹੈ। ਪਰਿਵਾਰ ਨੇ ਪਹਿਲਾਂ ਵਿਆਹ ਲਈ ਸਹਿਮਤੀ ਦਿੱਤੀ ਸੀ, ਪਰ ਵਿਆਹ ਤੋਂ ਸਿਰਫ 5 ਦਿਨ ਪਹਿਲਾਂ ਆਪਣਾ ਸਮਰਥਨ ਵਾਪਸ ਲੈ ਲਿਆ। ਯੂਟਿਊਬਰ ਨੇ ਦੋਸ਼ ਲਾਇਆ ਕਿ ਰਿਸ਼ਤੇਦਾਰਾਂ ਸਾਹਮਣੇ ਉਨ੍ਹਾਂ ਦੀ ਬੇਇੱਜ਼ਤੀ ਕੀਤੀ ਗਈ, ਜਿਸ ਕਾਰਨ ਉਹ ਕਾਫੀ ਟੁੱਟ ਚੁੱਕੇ ਸਨ। ਫਿਲਹਾਲ, ਅਨੁਰਾਗ ਦੀ ਨਵੀਂ ਪੋਸਟ ਨੇ ਉਨ੍ਹਾਂ ਦੇ ਲੱਖਾਂ ਚਾਹੁਣ ਵਾਲਿਆਂ ਨੂੰ ਕੁਝ ਰਾਹਤ ਦਿੱਤੀ ਹੈ ਕਿ ਉਹ ਹੁਣ ਖਤਰੇ ਤੋਂ ਬਾਹਰ ਹਨ ਅਤੇ ਹੌਲੀ-ਹੌਲੀ ਠੀਕ ਹੋ ਰਹੇ ਹਨ।
TVK ਆਗੂ ਆਧਵ ਅਰਜੁਨ ਨੇ ਰਜਨੀਕਾਂਤ ਤੋਂ ਮੰਗੀ ਮੁਆਫ਼ੀ; ਕਿਹਾ- 'ਮੇਰਾ ਮਕਸਦ ਅਪਮਾਨ ਕਰਨਾ ਨਹੀਂ ਸੀ'
NEXT STORY 
