ਪਣਜੀ (ਗੋਆ)- ਮਸ਼ਹੂਰ ਅਭਿਨੇਤਾ ਕਮਲ ਹਾਸਨ ਸ਼ੁੱਕਰਵਾਰ (21 ਨਵੰਬਰ) ਨੂੰ ਭਾਰਤੀ ਅੰਤਰਰਾਸ਼ਟਰੀ ਫਿਲਮ ਮਹਾਉਤਸਵ (IFFI) ਦੇ ਰੈੱਡ ਕਾਰਪੇਟ 'ਤੇ ਨਜ਼ਰ ਆਏ। ਉਹ ਇੱਥੇ ਆਪਣੀ ਫਿਲਮ ‘ਅਮਰਨ’ ਦੀ ਸਕ੍ਰੀਨਿੰਗ ਤੋਂ ਪਹਿਲਾਂ ਪਹੁੰਚੇ ਸਨ। ਕਮਲ ਹਾਸਨ ਨੇ ਇਸ ਦੌਰਾਨ ਆਜ਼ਾਦ ਸਿਨੇਮਾ ਨਾਲ ਸਬੰਧਤ ਇੱਕ ਵੱਡਾ ਮੁੱਦਾ ਚੁੱਕਿਆ। ਉਨ੍ਹਾਂ ਨੇ ਕਿਹਾ ਕਿ ਉਹ ਪਿਛਲੇ ਚਾਰ ਦਹਾਕਿਆਂ ਤੋਂ ਇਸ ਗੱਲ ਦੀ ਸ਼ਿਕਾਇਤ ਕਰ ਰਹੇ ਹਨ ਕਿ ਮੁੱਖ ਧਾਰਾ ਤੋਂ ਬਾਹਰ ਦੀਆਂ ਫਿਲਮਾਂ ਨੂੰ ਸਿਨੇਮਾਘਰਾਂ ਵਿੱਚ ਜਗ੍ਹਾ ਨਹੀਂ ਮਿਲਦੀ।
"ਆਜ਼ਾਦ ਸਿਨੇਮਾ, ਭਾਰਤ ਜਿੰਨਾ ਹੀ ਆਜ਼ਾਦ"
'ਅਪੂਰਵਾ ਰਾਗੰਗਲ', 'ਨਾਇਕਨ', 'ਸਦਮਾ' ਅਤੇ 'ਚਾਚੀ 420' ਵਰਗੀਆਂ ਕਈ ਹਿੱਟ ਫਿਲਮਾਂ ਦੇਣ ਵਾਲੇ ਕਮਲ ਹਾਸਨ ਦਾ ਮੰਨਣਾ ਹੈ ਕਿ ਆਜ਼ਾਦ ਸਿਨੇਮਾ ਨੂੰ ਮੁੱਖ ਧਾਰਾ ਦੇ ਕਾਰੋਬਾਰੀ ਸਿਨੇਮਾ ਦੇ ਸੀਮਤ ਦਾਇਰੇ ਵਿੱਚ ਨਹੀਂ ਢਾਲਿਆ ਜਾਣਾ ਚਾਹੀਦਾ। ਉਨ੍ਹਾਂ ਨੇ ਕਿਹਾ, "ਆਜ਼ਾਦ ਸਿਨੇਮਾ ਬਹੁਤ ਆਜ਼ਾਦ ਹੈ, ਭਾਰਤ ਜਿੰਨਾ ਹੀ ਆਜ਼ਾਦ"।
ਮੁੱਖ ਧਾਰਾ ਤੋਂ ਬਾਹਰ ਦੀਆਂ ਫਿਲਮਾਂ ਨੂੰ ਥੀਏਟਰਾਂ ਵਿੱਚ ਜਗ੍ਹਾ ਨਾ ਮਿਲਣ ਬਾਰੇ ਪੁੱਛੇ ਜਾਣ 'ਤੇ ਹਾਸਨ ਨੇ ਕਿਹਾ, "ਹਾਂ, ਲਗਭਗ 40 ਸਾਲਾਂ ਤੋਂ ਮੈਂ ਵੀ ਇਹੀ ਸ਼ਿਕਾਇਤ ਕਰਦਾ ਆ ਰਿਹਾ ਹਾਂ"।
'ਅਮਰਨ' IFFI ਦੀ ਉਦਘਾਟਨੀ ਫਿਲਮ
ਕਮਲ ਹਾਸਨ ਦੀ ਫਿਲਮ 'ਅਮਰਨ' IFFI ਦੇ 56ਵੇਂ ਸੰਸਕਰਣ ਦੇ ਉਦਘਾਟਨੀ ਸੈਸ਼ਨ ਵਿੱਚ ਦਿਖਾਈ ਜਾਣ ਵਾਲੀ ਪਹਿਲੀ ਫਿਲਮ ਹੋਵੇਗੀ। ਫਿਲਮ 'ਅਮਰਨ' ਦਾ ਨਿਰਮਾਣ ਹਾਸਨ ਦੇ ਬੈਨਰ 'ਰਾਜ ਕਮਲ ਫਿਲਮਸ ਇੰਟਰਨੈਸ਼ਨਲ' ਹੇਠ ਕੀਤਾ ਗਿਆ ਹੈ। ਇਸ ਦੀ ਕਹਾਣੀ ਮੇਜਰ ਮੁਕੁੰਦ ਵਰਧਰਾਜਨ ਦੇ ਜੀਵਨ 'ਤੇ ਆਧਾਰਿਤ ਹੈ, ਜੋ 2014 ਵਿੱਚ ਕਸ਼ਮੀਰ ਵਿੱਚ ਇੱਕ ਅੱਤਵਾਦ ਵਿਰੋਧੀ ਆਪਰੇਸ਼ਨ ਦੌਰਾਨ ਸ਼ਹੀਦ ਹੋ ਗਏ ਸਨ। ਇਸ ਦਾ ਨਿਰਦੇਸ਼ਨ ਰਾਜਕੁਮਾਰ ਪੇਰੀਆਸਾਮੀ ਨੇ ਕੀਤਾ ਹੈ। ਰੈੱਡ ਕਾਰਪੇਟ 'ਤੇ ਕਮਲ ਹਾਸਨ ਦੇ ਨਾਲ 'ਅਮਰਨ' ਦੇ ਸਹਿ-ਕਲਾਕਾਰ ਸ਼ਿਵਕਾਰਤਿਕੇਅਨ ਅਤੇ ਸਾਈ ਪੱਲਵੀ ਨੇ ਵੀ ਸ਼ਮੂਲੀਅਤ ਕੀਤੀ
ਉਦੈਪੁਰ 'ਚ ਹਾਈ-ਪ੍ਰੋਫ਼ਾਈਲ ਵਿਆਹ: ਟਰੰਪ ਜੂਨੀਅਰ ਤੋਂ ਬਾਲੀਵੁੱਡ ਤੱਕ—ਸਭ ਇੱਕ ਮੰਚ ‘ਤੇ ਹੋਣਗੇ ਇਕੱਠੇ
NEXT STORY 
