ਮੁੰਬਈ (ਬਿਊਰੋ)– ਹਾਲੀਵੁੱਡ ਅਦਾਕਾਰ ਟੌਮ ਹੈਂਕਸ ਆਪਣੇ ਨਿੱਘੇ ਸੁਭਾਅ ਲਈ ਜਾਣੇ ਜਾਂਦੇ ਹਨ। ਕਈ ਵੱਡੇ ਖਿਤਾਬ ਜਿੱਤਣ ਤੋਂ ਬਾਅਦ ਵੀ ਇਹ ਦਿੱਗਜ ਅਦਾਕਾਰ ਆਮ ਲੋਕਾਂ ’ਚ ਵਿਚਰਦੇ ਹੋਏ ਦੇਖੇ ਜਾ ਸਕਦੇ ਹਨ। ਟੌਮ ਹੈਂਕਸ ਨੇ ਹਾਲ ਹੀ ’ਚ ਕੈਲੀਫੋਰਨੀਆ ਦੇ ਸੈਂਟਾ ਮੋਨਿਕਾ ’ਚ ਵਿਆਹ ਸਮਾਗਮ ਦੌਰਾਨ ਨਵ-ਵਿਆਹੇ ਜੋੜੇ ਨੂੰ ਵਧਾਈ ਦੇਣ ਦਾ ਫ਼ੈਸਲਾ ਕੀਤਾ ਤੇ ਇਸ ਜੋੜੇ ਦੇ ਵਿਆਹ ਨੂੰ ਹੋਰ ਯਾਦਗਾਰ ਬਣਾ ਦਿੱਤਾ ਹੈ। 22 ਅਕਤੂਬਰ ਨੂੰ ਵਿਆਹ ਕਰਵਾਉਣ ਵਾਲੇ ਡਿਸਿਮਬਰੇ ਤੇ ਤਾਸ਼ੀਆ ਫਰੀਸ ਆਪਣੇ ਵਿਆਹ ਸਮਾਗਮ ਦੌਰਾਨ ਉਸ ਸਮੇਂ ਹੈਰਾਨ ਰਹਿ ਗਏ, ਜਦੋਂ ਆਸਕਰ ਜੇਤੂ ਅਦਾਕਾਰ ਉਨ੍ਹਾਂ ਦੇ ਵਿਆਹ ਸਮਾਗਮ ’ਚ ਪਹੁੰਚੇ।
ਆਪਣੇ ਇੰਸਟਾਗ੍ਰਾਮ ਅਕਾਊਂਟ ’ਤੇ ਤਾਸ਼ੀਆ ਨੇ ਅਦਾਕਾਰ ਦੇ ਨਾਲ ਤਸਵੀਰਾਂ ਪੋਸਟ ਕਰਦਿਆਂ ਲਿਖਿਆ, ‘ਵਿਆਹ ਦਾ ਦਿਨ ਬਹੁਤ ਖ਼ਾਸ ਹੁੰਦਾ ਹੈ ਪਰ ਮੇਰੇ ਜੀਵਨ ਦਾ ਸਭ ਤੋਂ ਵਧੀਆ ਦਿਨ ਜ਼ਿੰਦਗੀ ਭਰ ਦੀ ਸਭ ਤੋਂ ਵਧੀਆ ਯਾਦ ’ਚ ਬਦਲ ਗਿਆ। ਸਾਡੇ ਸੁੰਦਰ ਤੇ ਸ਼ਾਨਦਾਰ ਦਿਨ ਨੂੰ ਹੋਰ ਵਧੀਆ ਬਣਾਉਣ ਲਈ ਟੌਮ ਹੈਂਕਸ ਦਾ ਧੰਨਵਾਦ।’
ਤਾਸ਼ੀਆ ਨੇ ਅੱਗੇ ਦੱਸਿਆ ਕਿ ਟੌਮ ਹੈਂਕਸ ਸਾਡੇ ਕੋਲ ਅਚਾਨਕ ਆ ਗਏ ਤੇ ਅਸੀਂ ਸਭ ਹੈਰਾਨ ਰਹਿ ਗਏ ਸੀ। ਸਾਨੂੰ ਪਤਾ ਹੀ ਨਹੀਂ ਲੱਗਾ ਕਿ ਇੰਨੀ ਵੱਡੀ ਸ਼ਖ਼ਸੀਅਤ ਸਾਡੇ ਵਿਆਹ ਸਮਾਗਮ ’ਚ ਸ਼ਾਮਲ ਹੋ ਗਈ ਹੈ। ਟੌਮ ਨੇ ਵਿਆਹ ਵਾਲੇ ਜੋੜੇ ਨੂੰ ਸ਼ੁਭਕਾਮਨਾਵਾਂ ਦਿੱਤੀਆਂ ਤੇ ਕਿਹਾ ਕਿ ਉਹ ਦੋਵੇਂ ਬਹੁਤ ਸੋਹਣੇ ਲੱਗ ਰਹੇ ਹਨ।
ਵਿਆਹ ਸਮਾਰੋਹ ਦੀ ਇਕ ਵੀਡੀਓ ਹੁਣ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਹੈ, ਜਿਸ ’ਚ 65 ਸਾਲਾ ਅਦਾਕਾਰ ਜੋੜੇ ਨੂੰ ਵਧਾਈ ਦਿੰਦਿਆਂ ਤੇ ਖੁਸ਼ੀ ਨਾਲ ਉਨ੍ਹਾਂ ਨਾਲ ਤਸਵੀਰਾਂ ਖਿੱਚਵਾਉਂਦੇ ਹੋਏ ਦਿਖਾਈ ਦੇ ਰਹੇ ਹਨ। ਹਾਲਾਂਕਿ ਇਹ ਪਹਿਲੀ ਵਾਰ ਨਹੀਂ ਹੈ, ਜਦੋਂ ਅਦਾਕਾਰ ਨੇ ਕਿਸੇ ਦੇ ਵਿਆਹ ’ਚ ਬੇਤਰਤੀਬੇ ਤੌਰ ’ਤੇ ਇਕ ਜੋੜੇ ਨੂੰ ਹੈਰਾਨ ਕੀਤਾ ਹੈ।
ਸਾਲ 2016 ’ਚ ਹੈਂਕਸ ਨੇ ਨਿਊਯਾਰਕ ’ਚ ਇਕ ਜੋੜੇ ਦੇ ਵਿਆਹ ਦੀ ਸ਼ੂਟਿੰਗ ਨੂੰ ‘ਫੋਟੋ ਬੌਂਬ’ ਕੀਤਾ ਸੀ। ਦਰਅਸਲ ਨਵੀਂ ਵਿਆਹੀ ਜੋੜੀ ਨਿਊਯਾਰਕ ਦੇ ਮਸ਼ਹੂਰ ਸੈਂਟਰਲ ਪਾਰਕ ’ਚ ਫੋਟੋਸ਼ੂਟ ਕਰਵਾ ਰਹੀ ਸੀ। ਇਸ ਦੌਰਾਨ ਉਥੋਂ ਟੌਮ ਹੈਂਕਸ ਸੈਰ ਕਰਦੇ ਹੋਏ ਲੰਘੇ। ਟੌਮ ਅਚਾਨਕ ਉਨ੍ਹਾਂ ਦੇ ਸਾਹਮਣੇ ਆਏ ਤੇ ਉਨ੍ਹਾਂ ਨੂੰ ਵਧਾਈ ਦੇਣ ਲੱਗੇ, ਦੋਵਾਂ ਦੀ ਖ਼ੁਸ਼ੀ ਦੇਖਦੇ ਹੀ ਬਣਦੀ ਸੀ।
ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।
ਦੀਵਾਲੀ 'ਤੇ ਕਪਿਲ ਸ਼ਰਮਾ ਨੇ ਲਾੜੀ ਵਾਂਗ ਸਜਾਇਆ ਆਪਣਾ ਘਰ, ਦੇਖੋ ਖੂਬਸੂਰਤ ਤਸਵੀਰਾਂ
NEXT STORY 
