ਗੈਜੇਟ ਡੈਸਕ - ਭਾਰਤ 'ਚ ਤੇਜ਼ੀ ਨਾਲ ਫੈਲ ਰਹੇ 'ਡਿਜੀਟਲ ਅਰੈਸਟ' ਸਕੈਮ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਦਿਆਂ, ਮੈਟਾ ਦੇ ਮਾਲਕੀ ਵਾਲੇ ਵਟਸਐਪ (WhatsApp) ਨੇ 9400 ਤੋਂ ਵੱਧ ਸ਼ੱਕੀ ਖਾਤਿਆਂ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਹ ਕਾਰਵਾਈ ਇਸ ਸਾਲ ਜਨਵਰੀ ਤੋਂ ਸ਼ੁਰੂ ਹੋਈ 12 ਹਫ਼ਤਿਆਂ ਦੀ ਮਿਆਦ ਦੌਰਾਨ ਕੀਤੀ ਗਈ ਹੈ।
ਸੁਪਰੀਮ ਕੋਰਟ 'ਚ ਦਿੱਤੀ ਗਈ ਜਾਣਕਾਰੀ
ਇਸ ਮਾਮਲੇ ਬਾਰੇ ਅਹਿਮ ਜਾਣਕਾਰੀ ਅਟਾਰਨੀ ਜਨਰਲ ਆਰ. ਵੈਂਕਟਰਮਣੀ ਨੇ ਸੁਪਰੀਮ ਕੋਰਟ 'ਚ ਇਕ ਸੁਣਵਾਈ ਦੌਰਾਨ ਸਾਂਝੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਵਟਸਐਪ ਨੇ ਸਰਕਾਰੀ ਏਜੰਸੀਆਂ ਨਾਲ ਮਿਲ ਕੇ ਇਹ ਕਦਮ ਚੁੱਕਿਆ ਹੈ।
ਕੰਬੋਡੀਆ ਕਨੈਕਸ਼ਨ ਆਇਆ ਸਾਹਮਣੇ
ਜਾਂਚ 'ਚ ਇਹ ਹੈਰਾਨੀਜਨਕ ਖੁਲਾਸਾ ਹੋਇਆ ਹੈ ਕਿ ਭਾਰਤੀ ਉਪਭੋਗਤਾਵਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਜ਼ਿਆਦਾਤਰ ਅਕਾਊਂਟ ਦੱਖਣ-ਪੂਰਬੀ ਏਸ਼ੀਆ, ਖਾਸ ਕਰਕੇ ਕੰਬੋਡੀਆ 'ਚ ਸਥਿਤ ਸਕੈਮ ਸੈਂਟਰਾਂ ਤੋਂ ਚਲਾਏ ਜਾ ਰਹੇ ਸਨ। ਭਾਰਤ 'ਚ ਡਿਜੀਟਲ ਅਰੈਸਟ ਦਾ ਜੋ ਜਾਲ ਵਿਛਾਇਆ ਜਾ ਰਿਹਾ ਸੀ, ਉਸ ਦੀਆਂ ਤਾਰਾਂ ਸਿੱਧੀਆਂ ਕੰਬੋਡੀਆ ਨਾਲ ਜੁੜੀਆਂ ਹੋਈਆਂ ਸਨ।
ਕਿਵੇਂ ਕਰਦੇ ਸਨ ਠੱਗੀ?
ਠੱਗ ਲੋਕਾਂ ਨੂੰ ਡਰਾਉਣ ਅਤੇ ਭਰੋਸਾ ਜਿੱਤਣ ਲਈ ਬਹੁਤ ਹੀ ਸ਼ਾਤਰ ਤਰੀਕੇ ਵਰਤਦੇ ਸਨ:
- ਉਹ ਆਪਣੇ ਡਿਸਪਲੇਅ ਨਾਮ ਵਜੋਂ ਦਿੱਲੀ ਪੁਲਿਸ, ਮੁੰਬਈ ਹੈੱਡਕੁਆਰਟਰ, CBI ਅਤੇ ATS ਵਰਗੇ ਵਿਭਾਗਾਂ ਦੀ ਵਰਤੋਂ ਕਰਦੇ ਸਨ।
- ਪ੍ਰੋਫਾਈਲ ਪਿਕਚਰ ਵਜੋਂ ਸਰਕਾਰੀ ਲੋਗੋ ਲਗਾਏ ਜਾਂਦੇ ਸਨ ਤਾਂ ਜੋ ਕਿਸੇ ਨੂੰ ਕੋਈ ਸ਼ੱਕ ਨਾ ਹੋਵੇ।
ਸੁਰੱਖਿਆ ਲਈ ਨਵੇਂ ਕਦਮ
ਵਟਸਐਪ ਨੇ ਦੱਸਿਆ ਕਿ ਉਨ੍ਹਾਂ ਨੇ ਜਾਲਸਾਜ਼ਾਂ ਨਾਲ ਨਜਿੱਠਣ ਲਈ ਨਵੇਂ ਐਨਫੋਰਸਮੈਂਟ ਟੂਲ ਲਗਾਏ ਹਨ। ਇਸ ਤੋਂ ਇਲਾਵਾ, ਭਾਰਤੀ ਸਾਈਬਰ ਕ੍ਰਾਈਮ ਕੋਆਰਡੀਨੇਸ਼ਨ ਸੈਂਟਰ (I4C) ਦੀ ਰਿਪੋਰਟ ਅਨੁਸਾਰ, ਵਟਸਐਪ ਹੁਣ 'ਸਿਮ ਬਾਈਂਡਿੰਗ' ਨੂੰ ਲਾਗੂ ਕਰਨ ਲਈ ਵੀ ਸਹਿਮਤ ਹੋ ਗਿਆ ਹੈ, ਜਿਸ ਨਾਲ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਕੀਤਾ ਜਾ ਸਕੇਗਾ। ਕੰਪਨੀ ਨੇ ਆਈਟੀ ਨਿਯਮਾਂ ਦੀ ਪਾਲਣਾ ਕਰਨ ਅਤੇ ਨਿਯਮਤ ਅੰਤਰਾਲ 'ਤੇ ਡੇਟਾ ਸਾਂਝਾ ਕਰਨ ਦਾ ਵੀ ਵਾਅਦਾ ਕੀਤਾ ਹੈ।
ਇਹ ਕਾਰਵਾਈ ਇਲੈਕਟ੍ਰਾਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ ਅਤੇ ਦੂਰਸੰਚਾਰ ਵਿਭਾਗ ਤੋਂ ਮਿਲੀ ਜਾਣਕਾਰੀ ਦੇ ਆਧਾਰ 'ਤੇ ਕੀਤੀ ਗਈ ਹੈ।
8,600mAh ਬੈਟਰੀ ਵਾਲਾ ਧਾਕੜ ਫੋਨ ਹੋਇਆ ਲਾਂਚ! ਫੀਚਰਜ਼ ਜਾਣ ਉਡਣਗੇ ਹੋਸ਼
NEXT STORY 
