ਹੈਲਥ ਡੈਸਕ - ਕੀ ਤੁਸੀਂ ਜਾਣਦੇ ਹੋ ਕਿ ਭਾਰ ਵਧਣ ਦਾ ਕਾਰਨ ਸਿਰਫ਼ ਜ਼ਿਆਦਾ ਖਾਣਾ ਹੀ ਨਹੀਂ ਹੈ? ਇਕ ਹੈਰਾਨੀਜਨਕ ਨਵੀਂ ਖੋਜ ਨੇ ਮੋਟਾਪੇ ਅਤੇ ਖੁਰਾਕ ਨਾਲ ਜੁੜੇ ਪੁਰਾਣੇ ਸਿਧਾਂਤਾਂ ਨੂੰ ਚੁਣੌਤੀ ਦਿੱਤੀ ਹੈ। ਵਿਗਿਆਨੀਆਂ ਨੇ ਖੁਲਾਸਾ ਕੀਤਾ ਹੈ ਕਿ ਬ੍ਰੈੱਡ, ਚੌਲ ਅਤੇ ਕਣਕ ਵਰਗੇ ਕਾਰਬੋਹਾਈਡ੍ਰੇਟ ਨਾ ਸਿਰਫ਼ ਸਾਡੀਆਂ ਖਾਣ-ਪੀਣ ਦੀਆਂ ਆਦਤਾਂ ਨੂੰ ਬਦਲਦੇ ਹਨ, ਸਗੋਂ ਸਰੀਰ ਦੀ ਮੈਟਾਬੋਲਿਜ਼ਮ (ਊਰਜਾ ਖਰਚਣ ਦੀ ਸਮਰੱਥਾ) ਨੂੰ ਵੀ ਸੁਸਤ ਕਰ ਦਿੰਦੇ ਹਨ।
ਖੋਜ 'ਚ ਹੋਇਆ ਵੱਡਾ ਖੁਲਾਸਾ
ਮਾਹਿਰਾਂ ਅਨੁਸਾਰ ਸ਼ੀਗੇਨੋਬੂ ਮਾਤਸੁਮੁਰਾ ਦੀ ਅਗਵਾਈ 'ਚ ਇਕ ਖੋਜ ਟੀਮ ਨੇ ਚੂਹਿਆਂ 'ਤੇ ਅਧਿਐਨ ਕੀਤਾ। ਇਸ ਅਧਿਐਨ 'ਚ ਦੇਖਿਆ ਗਿਆ ਕਿ ਚੂਹਿਆਂ ਨੇ ਆਮ ਚਾਰੇ ਦੀ ਬਜਾਏ ਕਾਰਬੋਹਾਈਡ੍ਰੇਟ ਯੁਕਤ ਭੋਜਨ ਜਿਵੇਂ ਕਿ ਬ੍ਰੈੱਡ, ਕਣਕ ਅਤੇ ਚੌਲਾਂ ਦੇ ਆਟੇ ਨੂੰ ਜ਼ਿਆਦਾ ਪਸੰਦ ਕੀਤਾ।
ਕੈਲੋਰੀ ਵਧੇ ਬਿਨਾਂ ਵੀ ਵਧਿਆ ਭਾਰ
ਅਧਿਐਨ ਦੇ ਨਤੀਜੇ ਕਾਫੀ ਹੈਰਾਨ ਕਰਨ ਵਾਲੇ ਸਨ। ਖੋਜਕਰਤਾਵਾਂ ਨੇ ਪਾਇਆ ਕਿ ਭਾਵੇਂ ਚੂਹਿਆਂ ਦੁਆਰਾ ਲਈਆਂ ਜਾਣ ਵਾਲੀਆਂ ਕੁੱਲ ਕੈਲੋਰੀਆਂ 'ਚ ਕੋਈ ਖਾਸ ਵਾਧਾ ਨਹੀਂ ਹੋਇਆ ਸੀ, ਫਿਰ ਵੀ ਉਨ੍ਹਾਂ ਦੇ ਸਰੀਰ ਦਾ ਭਾਰ ਅਤੇ ਚਰਬੀ ਦੋਵੇਂ ਵਧ ਗਏ। ਪ੍ਰੋਫੈਸਰ ਮਾਤਸੁਮੁਰਾ ਨੇ ਦੱਸਿਆ ਕਿ ਇਹ ਵਾਧਾ 'ਜ਼ਿਆਦਾ ਖਾਣ' ਕਾਰਨ ਨਹੀਂ, ਸਗੋਂ ਕਾਰਬੋਹਾਈਡ੍ਰੇਟਸ ਕਾਰਨ ਹੋਏ ਮੈਟਾਬੋਲਿਕ ਬਦਲਾਅ ਅਤੇ ਊਰਜਾ ਦੀ ਹੌਲੀ ਵਰਤੋਂ ਕਾਰਨ ਹੋਇਆ ਸੀ।
ਸੰਤੁਲਿਤ ਖੁਰਾਕ 'ਚ ਹੈ ਇਲਾਜ
ਇਸ ਖੋਜ 'ਚ ਇਕ ਰਾਹਤ ਵਾਲੀ ਗੱਲ ਵੀ ਸਾਹਮਣੇ ਆਈ ਹੈ। ਜਿਵੇਂ ਹੀ ਚੂਹਿਆਂ ਦੀ ਖੁਰਾਕ 'ਚੋਂ ਕਾਰਬੋਹਾਈਡ੍ਰੇਟ (ਕਣਕ ਦਾ ਆਟਾ) ਹਟਾ ਦਿੱਤਾ ਗਿਆ, ਉਨ੍ਹਾਂ ਦਾ ਭਾਰ ਅਤੇ ਮੈਟਾਬੋਲਿਜ਼ਮ ਤੇਜ਼ੀ ਨਾਲ ਸੁਧਰਨਾ ਸ਼ੁਰੂ ਹੋ ਗਿਆ। ਇਸ ਤੋਂ ਸਾਬਤ ਹੁੰਦਾ ਹੈ ਕਿ ਸਹੀ ਅਤੇ ਸੰਤੁਲਿਤ ਖੁਰਾਕ ਭਾਰ ਘਟਾਉਣ 'ਚ ਜਾਦੂਈ ਅਸਰ ਦਿਖਾ ਸਕਦੀ ਹੈ।
ਇਨਸਾਨਾਂ 'ਤੇ ਜਲਦ ਹੋਵੇਗੀ ਪਰਖ
ਪ੍ਰੋਫੈਸਰ ਮਾਤਸੁਮੁਰਾ ਹੁਣ ਇਸ ਖੋਜ ਨੂੰ ਇਨਸਾਨਾਂ 'ਤੇ ਪਰਖਣ ਦੀ ਤਿਆਰੀ ਕਰ ਰਹੇ ਹਨ। ਉਹ ਇਹ ਵੀ ਦੇਖਣਾ ਚਾਹੁੰਦੇ ਹਨ ਕਿ ਕੀ ਸਾਬਤ ਅਨਾਜ ਅਤੇ ਫਾਈਬਰ ਦਾ ਸੇਵਨ ਇਨ੍ਹਾਂ ਨਕਾਰਾਤਮਕ ਪ੍ਰਭਾਵਾਂ ਨੂੰ ਘੱਟ ਕਰਨ 'ਚ ਮਦਦਗਾਰ ਹੋ ਸਕਦਾ ਹੈ। ਮੋਟਾਪਾ ਕਈ ਗੰਭੀਰ ਬਿਮਾਰੀਆਂ ਦਾ ਖਤਰਾ ਵਧਾਉਂਦਾ ਹੈ, ਇਸ ਲਈ ਇਹ ਖੋਜ ਭਵਿੱਖ 'ਚ ਸਿਹਤਮੰਦ ਜੀਵਨ ਸ਼ੈਲੀ ਚੁਣਨ 'ਚ ਅਹਿਮ ਸਾਬਤ ਹੋ ਸਕਦੀ ਹੈ।
ਗਰਮੀ ਦਾ ਕਾਲ ਹੈ 'ਖਰਬੂਜਾ'! ਇਸ ਦੇ ਫਾਇਦੇ ਜਾਣ ਹੋ ਜਾਓਗੇ ਹੈਰਾਨ
NEXT STORY 
