ਹੈਲਥ ਡੈਸਕ - ਗਰਮੀਆਂ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਬਾਜ਼ਾਰ 'ਚ ਖੀਰੇ ਦੀ ਮੰਗ ਬਹੁਤ ਵਧ ਜਾਂਦੀ ਹੈ। ਸਰੀਰ 'ਚ ਪਾਣੀ ਦੀ ਕਮੀ ਨੂੰ ਪੂਰਾ ਕਰਨ ਅਤੇ ਪੇਟ ਨੂੰ ਠੰਢਕ ਦੇਣ ਲਈ ਖੀਰਾ ਸਭ ਤੋਂ ਉੱਤਮ ਮੰਨਿਆ ਜਾਂਦਾ ਹੈ। ਇਸ 'ਚ ਲਗਭਗ 95% ਪਾਣੀ ਹੁੰਦਾ ਹੈ, ਜੋ ਸਾਨੂੰ ਲੂ ਅਤੇ ਡੀਹਾਈਡ੍ਰੇਸ਼ਨ (ਪਾਣੀ ਦੀ ਘਾਟ) ਤੋਂ ਬਚਾਉਂਦਾ ਹੈ।
ਪਰ ਅਕਸਰ ਲੋਕ ਖੀਰਾ ਖਾਂਦੇ ਸਮੇਂ ਕੁਝ ਅਜਿਹੀਆਂ ਵੱਡੀਆਂ ਗਲਤੀਆਂ ਕਰ ਬੈਠਦੇ ਹਨ, ਜਿਸ ਨਾਲ ਫਾਇਦੇ ਦੀ ਜਗ੍ਹਾ ਸਿਹਤ ਨੂੰ ਭਾਰੀ ਨੁਕਸਾਨ ਪਹੁੰਚ ਸਕਦਾ ਹੈ। ਆਓ ਜਾਣਦੇ ਹਾਂ ਸਿਹਤ ਮਾਹਰਾਂ ਅਤੇ ਡਾਇਟੀਸ਼ੀਅਨਾਂ ਮੁਤਾਬਕ ਖੀਰਾ ਖਾਣ ਦਾ ਸਹੀ ਤਰੀਕਾ ਕੀ ਹੈ :-
ਭੁੱਲ ਕੇ ਵੀ ਨਾ ਕਰੋ ਇਹ 3 ਗਲਤੀਆਂ :-
ਖੀਰਾ ਖਾਣ ਤੋਂ ਤੁਰੰਤ ਬਾਅਦ ਪਾਣੀ ਪੀਣਾ
- ਇਹ ਸਭ ਤੋਂ ਆਮ ਅਤੇ ਖ਼ਤਰਨਾਕ ਗਲਤੀ ਹੈ। ਖੀਰੇ 'ਚ ਪਹਿਲਾਂ ਹੀ ਬਹੁਤ ਪਾਣੀ ਹੁੰਦਾ ਹੈ। ਜੇਕਰ ਤੁਸੀਂ ਇਸ ਨੂੰ ਖਾਣ ਤੋਂ ਤੁਰੰਤ ਬਾਅਦ ਪਾਣੀ ਪੀਂਦੇ ਹੋ, ਤਾਂ ਸਰੀਰ ਦੀ ਪਾਚਨ ਪ੍ਰਣਾਲੀ ਵਿਗੜ ਜਾਂਦੀ ਹੈ ਅਤੇ ਤੁਹਾਨੂੰ ਉਲਟੀ, ਦਸਤ ਜਾਂ ਢਿੱਡ ਪੀੜ ਦੀ ਸਮੱਸਿਆ ਹੋ ਸਕਦੀ ਹੈ।
ਰਾਤ ਦੇ ਸਮੇਂ ਖੀਰਾ ਖਾਣਾ
- ਮਾਹਰਾਂ ਮੁਤਾਬਕ ਰਾਤ ਨੂੰ ਸੌਣ ਤੋਂ ਪਹਿਲਾਂ ਖੀਰਾ ਖਾਣ ਤੋਂ ਬਚਣਾ ਚਾਹੀਦਾ ਹੈ। ਖੀਰੇ 'ਚ ਭਾਰੀ ਮਾਤਰਾ 'ਚ ਫਾਈਬਰ ਹੁੰਦਾ ਹੈ, ਜਿਸ ਨੂੰ ਪਚਣ 'ਚ ਸਮਾਂ ਲੱਗਦਾ ਹੈ। ਰਾਤ ਨੂੰ ਖਾਣ ਨਾਲ ਪੇਟ ਭਾਰੀ ਹੋ ਸਕਦਾ ਹੈ ਅਤੇ ਗੈਸ ਜਾਂ ਐਸੀਡਿਟੀ ਹੋ ਸਕਦੀ ਹੈ, ਜਿਸ ਨਾਲ ਨੀਂਦ ਵੀ ਖ਼ਰਾਬ ਹੁੰਦੀ ਹੈ।
ਛਿੱਲ ਕੇ ਖਾਣਾ
- ਬਹੁਤ ਸਾਰੇ ਲੋਕ ਖੀਰੇ ਦਾ ਛਿਲਕਾ ਪੂਰੀ ਤਰ੍ਹਾਂ ਲਾਹ ਦਿੰਦੇ ਹਨ। ਜਦਕਿ ਖੀਰੇ ਦੇ ਛਿਲਕੇ 'ਚ ਸਭ ਤੋਂ ਵੱਧ ਵਿਟਾਮਿਨ ਅਤੇ ਖਣਿਜ ਹੁੰਦੇ ਹਨ। ਇਸ ਨੂੰ ਚੰਗੀ ਤਰ੍ਹਾਂ ਧੋ ਕੇ ਛਿਲਕੇ ਸਮੇਤ ਖਾਣਾ ਵਧੇਰੇ ਫਾਇਦੇਮੰਦ ਹੁੰਦਾ ਹੈ।
ਖੀਰਾ ਖਾਣ ਦਾ ਸਭ ਤੋਂ ਸਹੀ ਤਰੀਕਾ ਅਤੇ ਸਮਾਂ
ਸਹੀ ਸਮਾਂ
- ਖੀਰਾ ਖਾਣ ਦਾ ਸਭ ਤੋਂ ਵਧੀਆ ਸਮਾਂ ਦੁਪਹਿਰ ਦਾ ਹੁੰਦਾ ਹੈ। ਇਸ ਸਮੇਂ ਖਾਧਾ ਖੀਰਾ ਪੇਟ ਨੂੰ ਦਿਨ ਭਰ ਠੰਢਾ ਰੱਖਦਾ ਹੈ ਅਤੇ ਹਾਜ਼ਮੇ ਨੂੰ ਦਰੁਸਤ ਕਰਦਾ ਹੈ।
ਪਾਣੀ ਦਾ ਗੈਪ
- ਖੀਰਾ ਖਾਣ ਤੋਂ ਘੱਟੋ-ਘੱਟ 30 ਤੋਂ 45 ਮਿੰਟ ਬਾਅਦ ਹੀ ਪਾਣੀ ਪੀਓ।
ਨਮਕ ਦੀ ਸੀਮਤ ਵਰਤੋਂ
- ਜੇਕਰ ਤੁਸੀਂ ਵਜ਼ਨ ਘਟਾਉਣ ਲਈ ਖੀਰਾ ਖਾ ਰਹੇ ਹੋ, ਤਾਂ ਇਸ ਉੱਪਰ ਬਹੁਤ ਜ਼ਿਆਦਾ ਚਿੱਟਾ ਨਮਕ ਲਗਾਉਣ ਤੋਂ ਬਚੋ। ਇਸ ਦੀ ਜਗ੍ਹਾ ਕਾਲਾ ਨਮਕ ਜਾਂ ਕਾਲੀ ਮਿਰਚ ਦੀ ਵਰਤੋਂ ਕਰੋ।
ਗਰਮੀਆਂ 'ਚ ਸੰਜੀਵਨੀ ਬੂਟੀ ਤੋਂ ਘੱਟ ਨਹੀਂ 'ਅਜਵਾਈਨ' ! ਜਾਣੋ ਇਸ ਦੇ ਫਾਇਦੇ ਤੇ ਵਰਤਣ ਦਾ ਸਹੀ ਤਰੀਕਾ
NEXT STORY 
