ਵੈੱਬ ਡੈਸਕ: ਦਹਾਕਿਆਂ ਤੋਂ ਇਹ ਮੰਨਿਆ ਜਾਂਦਾ ਰਿਹਾ ਹੈ ਕਿ ਘਿਓ, ਮੱਖਣ ਤੇ ਰੈੱਡ ਮੀਟ (ਲਾਲ ਮੀਟ) ਸਿਹਤ ਲਈ ਨੁਕਸਾਨਦੇਹ ਹਨ, ਪਰ ਸਾਲ 2026 ਦੀ ਸ਼ੁਰੂਆਤ 'ਚ ਅਮਰੀਕਾ ਦੀਆਂ ਨਵੀਆਂ ਡਾਇਟਰੀ ਗਾਈਡਲਾਈਨਜ਼ ਨੇ ਇਸ ਸੋਚ ਨੂੰ ਇੱਕ ਨਵਾਂ ਮੋੜ ਦਿੱਤਾ ਹੈ। ਅਮਰੀਕੀ ਸਿਹਤ ਵਿਭਾਗ (HHS) ਵੱਲੋਂ 2025-2030 ਲਈ ਜਾਰੀ ਨਵੀਆਂ ਹਦਾਇਤਾਂ ਅਨੁਸਾਰ, ਸੈਚੂਰੇਟਿਡ ਫੈਟ ਨੂੰ ਲੈ ਕੇ ਪੁਰਾਣੇ ਨਜ਼ਰੀਏ 'ਚ ਵੱਡਾ ਬਦਲਾਅ ਆਇਆ ਹੈ।
ਅਸਲ ਖ਼ਤਰਾ ਕੀ ਹੈ?
ਨਵੀਆਂ ਗਾਈਡਲਾਈਨਜ਼ ਮੁਤਾਬਕ, ਅਸਲ ਖ਼ਤਰਾ ਘਿਓ ਜਾਂ ਮੱਖਣ ਨਹੀਂ, ਸਗੋਂ ਪ੍ਰੋਸੈਸਡ ਫੂਡ ਅਤੇ ਜ਼ਿਆਦਾ ਖੰਡ ਦਾ ਸੇਵਨ ਹੈ। ਮਾਹਿਰਾਂ ਅਨੁਸਾਰ ਆਂਡੇ, ਰੈੱਡ ਮੀਟ ਅਤੇ ਫੁੱਲ-ਫੈਟ ਦੁੱਧ ਵਰਗੇ ਪਦਾਰਥ ਹਾਈ-ਕੁਆਲਿਟੀ ਪ੍ਰੋਟੀਨ ਦੇ ਚੰਗੇ ਸਰੋਤ ਹਨ। ਭਾਰਤ ਵਰਗੇ ਦੇਸ਼ਾਂ ਲਈ ਇਹ ਬਦਲਾਅ ਮਹੱਤਵਪੂਰਨ ਹੈ ਕਿਉਂਕਿ ਇੱਥੇ ਦੁੱਧ, ਘਿਓ ਅਤੇ ਪਨੀਰ ਰਵਾਇਤੀ ਖਾਣ-ਪੀਣ ਦਾ ਅਹਿਮ ਹਿੱਸਾ ਹਨ।
ਕਿੰਨੀ ਮਾਤਰਾ ਵਿੱਚ ਕਰਨਾ ਚਾਹੀਦਾ ਹੈ ਸੇਵਨ?
ਸੀਨੀਅਰ ਗੈਸਟ੍ਰੋਐਂਟਰੋਲੋਜਿਸਟਾਂ ਅਤੇ ਕਾਰਡੀਓਲੋਜਿਸਟਾਂ ਦਾ ਕਹਿਣਾ ਹੈ ਕਿ ਭਾਰਤੀ ਖੁਰਾਕ ਵਿੱਚ ਰੈੱਡ ਮੀਟ ਬਹੁਤਾ ਜ਼ਰੂਰੀ ਨਹੀਂ ਹੈ। ਜੇਕਰ ਕੋਈ ਇਸ ਦਾ ਸੇਵਨ ਕਰਦਾ ਵੀ ਹੈ, ਤਾਂ ਇਸਨੂੰ ਹਫ਼ਤੇ ਵਿੱਚ ਇੱਕ ਵਾਰ ਜਾਂ 10-15 ਦਿਨਾਂ ਵਿੱਚ ਸੀਮਤ ਮਾਤਰਾ ਵਿੱਚ ਲੈਣਾ ਹੀ ਬਿਹਤਰ ਹੈ। ਵਧੇਰੇ ਸੇਵਨ ਨਾਲ ਕੋਲੈਸਟ੍ਰੋਲ, ਮੋਟਾਪਾ ਅਤੇ ਦਿਲ ਦੀਆਂ ਬਿਮਾਰੀਆਂ ਦਾ ਖ਼ਤਰਾ ਵੱਧ ਸਕਦਾ ਹੈ। ਪੱਛਮੀ ਦੇਸ਼ਾਂ ਵਿੱਚ ਹਫ਼ਤੇ ਵਿੱਚ 500 ਗ੍ਰਾਮ ਰੈੱਡ ਮੀਟ ਨੂੰ ਸਹੀ ਮੰਨਿਆ ਜਾਂਦਾ ਹੈ, ਪਰ ਭਾਰਤੀਆਂ ਲਈ ਇਸ ਤੋਂ ਘੱਟ ਮਾਤਰਾ ਦੀ ਸਲਾਹ ਦਿੱਤੀ ਜਾਂਦੀ ਹੈ ਕਿਉਂਕਿ ਸਾਡੀ ਡਾਇਟ ਵਿੱਚ ਪਹਿਲਾਂ ਹੀ ਕਾਰਬੋਹਾਈਡ੍ਰੇਟਸ ਜ਼ਿਆਦਾ ਹੁੰਦੇ ਹਨ।
ਗੰਭੀਰ ਬਿਮਾਰੀਆਂ ਦਾ ਖ਼ਤਰਾ
ਡਾਕਟਰਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਹਫ਼ਤੇ ਵਿੱਚ ਦੋ ਵਾਰ ਤੋਂ ਵੱਧ ਰੈੱਡ ਮੀਟ ਖਾਣ ਨਾਲ ਕੋਲੋਰੈਕਟਲ ਕੈਂਸਰ ਤੇ ਦਿਲ ਦੀਆਂ ਬਿਮਾਰੀਆਂ ਦਾ ਜੋਖਮ ਵੱਧ ਜਾਂਦਾ ਹੈ। ਰੈੱਡ ਮੀਟ 'ਚ ਮੌਜੂਦ ਕੁਝ ਤੱਤ ਸਰੀਰ 'ਚ ਸੋਜ ਤੇ ਕੈਂਸਰ ਦੇ ਖ਼ਤਰੇ ਨੂੰ ਵਧਾ ਸਕਦੇ ਹਨ।
ਪ੍ਰੋਸੈਸਡ ਮੀਟ ਤੋਂ ਬਣਾਓ ਦੂਰੀ
ਮਾਹਿਰਾਂ ਨੇ ਖਾਸ ਤੌਰ 'ਤੇ ਸਾਸੇਜ, ਸਲਾਮੀ ਅਤੇ ਬੇਕਨ ਵਰਗੇ ਪ੍ਰੋਸੈਸਡ ਮੀਟ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ ਹੈ। ਇਹਨਾਂ ਵਿੱਚ ਨਮਕ, ਪ੍ਰੀਜ਼ਰਵੇਟਿਵਜ਼ ਅਤੇ ਸੈਚੂਰੇਟਿਡ ਫੈਟ ਬਹੁਤ ਜ਼ਿਆਦਾ ਹੁੰਦਾ ਹੈ, ਜੋ ਹਾਈ ਬਲੱਡ ਪ੍ਰੈਸ਼ਰ ਅਤੇ ਦਿਲ ਦੇ ਰੋਗਾਂ ਦਾ ਕਾਰਨ ਬਣਦਾ ਹੈ।
ਸੰਤੁਲਨ ਹੀ ਹੱਲ
ਹਾਰਵਰਡ ਮੈਡੀਕਲ ਸਕੂਲ ਦੇ ਪ੍ਰੋਫੈਸਰ ਵਾਲਟਰ ਵਿਲੇਟ ਅਨੁਸਾਰ, ਰੈੱਡ ਮੀਟ ਦੀ ਬਜਾਏ ਪਲਾਂਟ-ਬੇਸਡ ਪ੍ਰੋਟੀਨ ਜਿਵੇਂ ਕਿ ਦਾਲਾਂ, ਬੀਨਜ਼, ਨਟਸ ਅਤੇ ਸੋਇਆ ਦਾ ਸੇਵਨ ਕਰਨਾ ਸਿਹਤ ਲਈ ਵਧੇਰੇ ਫਾਇਦੇਮੰਦ ਹੈ। ਸਿਹਤਮੰਦ ਰਹਿਣ ਲਈ ਖੁਰਾਕ ਵਿੱਚ ਸੰਤੁਲਨ ਬਣਾ ਕੇ ਰੱਖਣਾ ਹੀ ਸਭ ਤੋਂ ਵਧੀਆ ਤਰੀਕਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਦੁੱਧ ਪੀਣ ਨਾਲ ਕੈਂਸਰ ! ਮੂੰਹ ਮੋੜਨ ਲੱਗੇ ਲੋਕ, ਡਾਕਟਰ ਵੀ...
NEXT STORY 
