ਇੰਟਰਨੈਸ਼ਨਲ ਡੈਸਕ- ਬ੍ਰਿਟੇਨ ਸਰਕਾਰ ਨੇ ਗੈਰ-ਕਾਨੂੰਨੀ ਪ੍ਰਵਾਸ ਨੂੰ ਰੋਕਣ ਲਈ ਹਰ ਨਾਗਰਿਕ ਲਈ ਇਕ ਡਿਜੀਟਲ ਆਈਡੈਂਟੀਟੀ ਕਾਰਡ ਲਾਗੂ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਕਾਰਡ ਨੂੰ ‘ਬ੍ਰਿਟਕਾਰਡ’ ਕਿਹਾ ਜਾਵੇਗਾ। ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਇਸ ਬਾਰੇ ਜਲਦ ਹੀ ਸਰਕਾਰੀ ਐਲਾਨ ਕਰਨ ਵਾਲੇ ਹਨ। ਮਿਰਰ ਦੀ ਰਿਪੋਰਟ ਮੁਤਾਬਕ, ਇਹ ਕਾਰਡ ਸਾਰੇ ਬਾਲਗਾਂ ਲਈ ਲਾਗੂ ਕੀਤਾ ਜਾਵੇਗਾ, ਤਾਂ ਜੋ ਉਹ ਲੋਕ ਜੋ ਛਾਇਆ ਅਰਥਵਿਵਸਥਾ (shadow economy) 'ਚ ਫਸੇ ਹੋਏ ਹਨ ਜਾਂ ਗੈਰ-ਕਾਨੂੰਨੀ ਤਰੀਕੇ ਨਾਲ ਰਹਿ ਰਹੇ ਹਨ, ਉਨ੍ਹਾਂ 'ਤੇ ਨਿਗਰਾਨੀ ਕੀਤੀ ਜਾ ਸਕੇ।
ਬ੍ਰਿਟਕਾਰਡ ਕੀ ਹੈ?
ਬ੍ਰਿਟਕਾਰਡ ਵਰਤਣ ਵਾਲੇ ਵਿਅਕਤੀ ਦੇ ਬ੍ਰਿਟੇਨ 'ਚ ਰਹਿਣ ਅਤੇ ਕੰਮ ਕਰਨ ਦੇ ਅਧਿਕਾਰ ਦੀ ਪੁਸ਼ਟੀ ਕਰੇਗਾ। ਹਾਲਾਂਕਿ ਇਸ ਬ੍ਰਿਟਕਾਰਡ ਨੂੰ ਜ਼ਰੂਰੀ ਨਹੀਂ ਦੱਸਿਆ ਗਿਆ ਹੈ ਪਰ ਬ੍ਰਿਟੇਨ 'ਚ ਨੌਕਰੀ ਜਾਂ ਘਰ ਕਿਰਾਏ 'ਤੇ ਲੈਣ ਲਈ ਇਸ ਦੀ ਲੋੜ ਹੋਵੇਗੀ। ਇਹ ਪ੍ਰਣਾਲੀ ਐਸਟੋਨੀਆ 'ਚ ਵਰਤੀ ਜਾਣ ਵਾਲੀ ਡਿਜੀਟਲ ਆਈਡੈਂਟੀਟੀ ਪ੍ਰਣਾਲੀ ਵਰਗੀ ਹੈ।
ਬ੍ਰਿਟਕਾਰਡ ਦੇ ਫਾਇਦੇ
ਡਿਜੀਟਲ ਕਾਰਡ ਨਾਲ ਮਾਲਕਾਂ ਅਤੇ ਕੰਪਨੀਆਂ ਲਈ ਕਿਸੇ ਵਿਅਕਤੀ ਦੇ ਪ੍ਰਵਾਸੀ ਦਰਜੇ ਜਾਂ ਕੰਮ ਕਰਨ ਦੇ ਅਧਿਕਾਰ ਦੀ ਜਾਂਚ ਕਰਨਾ ਆਸਾਨ ਹੋ ਜਾਵੇਗਾ। ਕਾਰਡ ਨੂੰ GOV.UK ਵਾਲਿਟ ਐਪ 'ਚ ਸਮਾਰਟਫੋਨ ‘ਤੇ ਸੇਵ ਕੀਤਾ ਜਾ ਸਕਦਾ ਹੈ। ਜੋ ਲੋਕ ਸਮਾਰਟਫੋਨ ਨਹੀਂ ਵਰਤ ਸਕਦੇ, ਉਨ੍ਹਾਂ ਲਈ ਵਿਸ਼ੇਸ਼ ਆਈਡੈਂਟੀਟੀ ਦਾ ਵਿਵਸਥਾ ਕੀਤੀ ਜਾਵੇਗੀ।
ਸ਼ਰਾਬ ਖਰੀਦਣ ਤੋਂ ਪਹਿਲਾਂ ਦਿਖਾਉਣਾ ਹੋਵੇਗਾ ਇਹ ਕਾਰਡ
ਉਮੀਦ ਹੈ ਕਿ ਇਸ ਡਿਜੀਟਲ ਆਈਡੀ ਦੇ ਹੋਰ ਵੀ ਕਈ ਫ਼ਾਇਦੇ ਹੋਣਗੇ। ਜਿਵੇਂ ਸ਼ਰਾਬ ਖਰੀਦਦੇ ਸਮੇਂ ਉਮਰ ਪ੍ਰਮਾਣ ਵਜੋਂ ਪਛਾਣ ਪੱਤਰ ਦੀ ਤਰ੍ਹਾਂ ਇਸ ਦਾ ਇਸਤੇਮਾਲ ਕੀਤਾ ਜਾ ਸਕੇਗਾ। ਇਸ ਨੂੰ ਦਿਖਾਉਣ ਤੋਂ ਬਾਅਦ ਹੀ ਸ਼ਰਾਬ ਮਿਲ ਸਕੇਗੀ। ਡਾਕਘਰ ਤੋਂ ਸਾਮਾਨ ਪ੍ਰਾਪਤ ਕਰਦੇ ਸਮੇਂ ਵੀ ਇਸ ਬ੍ਰਿਟਕਾਰਡ ਦਾ ਇਸਤੇਮਾਲ ਕਰਨਾ ਹੋਵੇਗਾ। ਸਾਬਕਾ ਪ੍ਰਧਾਨ ਮੰਤਰੀ ਟੋਨੀ ਬਲੇਅਰ ਲੰਬੇ ਸਮੇਂ ਤੋਂ ਆਈਡੀ ਕਾਰਡ ਦੀ ਮੰਗ ਕਰਦੇ ਰਹੇ ਹਨ ਪਰ ਸਰਕਾਰ ਨੇ ਪਹਿਲਾਂ ਕਿਹਾ ਸੀ ਕਿ ਉਹ ਇਸ ਨੂੰ ਲਿਆਉਣ ਦੀ ਯੋਜਨਾ ਨਹੀਂ ਬਣਾ ਰਹੀ ਹੈ।
ਪ੍ਰਾਈਵੇਸੀ ਅਤੇ ਚਿੰਤਾਵਾਂ
ਕੁਝ ਲੋਕਾਂ ਨੇ ਡਿਜੀਟਲ ਆਈਡੈਂਟੀਟੀ ਕਾਰਡ ਨੂੰ ਲੈ ਕੇ ਡਾਟਾ ਪ੍ਰਾਈਵੇਸੀ ਅਤੇ ਪੁਰਾਣੇ, ਗਰੀਬ ਜਾਂ ਵਿਸ਼ੇਸ਼ ਜ਼ਰੂਰਤ ਵਾਲੇ ਲੋਕਾਂ ਦੇ ਡਿਜੀਟਲ ਬਾਈਕਾਟ (digital exclusion) ਨੂੰ ਲੈ ਕੇ ਚਿੰਤਾਵਾਂ ਜਤਾਈਆਂ ਹਨ। ਸਰਕਾਰ ਇਸ ਬਾਰੇ ਵਿਸ਼ੇਸ਼ ਕਾਨੂੰਨੀ ਪ੍ਰਬੰਧ ਬਣਾਏਗੀ।
ਗੈਰ-ਕਾਨੂੰਨੀ ਪ੍ਰਵਾਸ ਤੇ ਨਿਗਰਾਨੀ
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਹ ਪ੍ਰਣਾਲੀ ਚੈਨਲ ਪਾਰ ਕਰਕੇ ਆਉਣ ਵਾਲੇ ਲੋਕਾਂ ਦੀ ਸੰਖਿਆ ‘ਤੇ ਨਿਗਰਾਨੀ 'ਚ ਮਦਦ ਕਰੇਗੀ। ਡਿਜੀਟਲ ਕਾਰਡ ਨਾਲ ਕੰਪਨੀਆਂ ਲਈ ਵਿਅਕਤੀਆਂ ਦੀ ਆਵਾਸੀ ਅਤੇ ਕੰਮ ਕਰਨ ਦੀ ਸਥਿਤੀ ਦੀ ਜਾਂਚ ਆਸਾਨ ਹੋ ਜਾਵੇਗੀ। ਬ੍ਰਿਟੇਨ 'ਚ ਲੇਬਰ ਸਰਕਾਰ ਨੇ ਚੁਣੇ ਜਾਣ ਤੋਂ ਬਾਅਦ ਗੈਰ-ਕਾਨੂੰਨੀ ਕੰਮਾਂ ‘ਤੇ ਨਿਗਰਾਨੀ ਵਧਾ ਦਿੱਤੀ ਹੈ, ਜਿਸ 'ਚ ਡਿਲਿਵਰੀ ਕੰਪਨੀਆਂ ਜਿਵੇਂ ਡੇਲੀਵਰੂ, ਜਸਟ ਈਟ ਅਤੇ ਉਬਰ ਈਟਸ ਲਈ ਕੰਮ ਕਰਨ ਵਾਲੇ ਸ਼ਰਨਾਰਥੀਆਂ ਦੀ ਵੀ ਜਾਂਚ ਸ਼ਾਮਲ ਹੈ। ਇਸ ਨਵੀਂ ਪ੍ਰਣਾਲੀ ਨਾਲ ਬ੍ਰਿਟੇਨ 'ਚ ਗੈਰ-ਕਾਨੂੰਨੀ ਪ੍ਰਵਾਸ 'ਤੇ ਕੰਟਰੋਲ ਹੋਣ ਦੀ ਉਮੀਦ ਹੈ।
ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਸਲੋਵੇਨੀਆ ਨੇ ਨੇਤਨਯਾਹੂ ਦੇ ਦੇਸ਼ 'ਚ ਦਾਖਲ ਹੋਣ 'ਤੇ ਲਾਈ ਪਾਬੰਦੀ
NEXT STORY 
