ਵਾਸ਼ਿੰਗਟਨ - ਅਮਰੀਕੀ ਸਪੇਸ ਏਜੰਸੀ ਨਾਸਾ ਨੇ ਪੁਲਾੜ ਵਿਗਿਆਨ ਦੇ ਖੇਤਰ 'ਚ ਇਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਨਾਸਾ ਦਾ 'ਆਰਟੇਮਿਸ 2' ਮਿਸ਼ਨ ਸਫਲਤਾਪੂਰਵਕ ਪੂਰਾ ਹੋ ਗਿਆ ਹੈ ਅਤੇ ਇਸ 'ਚ ਸ਼ਾਮਲ ਚਾਰੇ ਪੁਲਾੜ ਯਾਤਰੀ 10 ਦਿਨਾਂ ਦੀ ਇਤਿਹਾਸਕ ਯਾਤਰਾ ਤੋਂ ਬਾਅਦ ਸੁਰੱਖਿਅਤ ਧਰਤੀ 'ਤੇ ਵਾਪਸ ਪਰਤ ਆਏ ਹਨ। ਸ਼ਨੀਵਾਰ ਸਵੇਰੇ ਨਾਸਾ ਦੇ ਪੁਲਾੜ ਯਾਨ ਨੇ ਪ੍ਰਸ਼ਾਂਤ ਮਹਾਸਾਗਰ 'ਚ ਸੈਨ ਡਿਏਗੋ ਤੱਟ ਦੇ ਨੇੜੇ ਲੈਂਡਿੰਗ ਕੀਤੀ।
10 ਦਿਨਾਂ 'ਚ ਤੈਅ ਕੀਤਾ 6.9 ਲੱਖ ਮੀਲ ਦਾ ਸਫ਼ਰ
ਇਸ ਮਿਸ਼ਨ ਦੌਰਾਨ ਪੁਲਾੜ ਯਾਤਰੀਆਂ ਨੇ 6,90,000 ਮੀਲ ਤੋਂ ਵੱਧ ਦਾ ਸਫ਼ਰ ਤੈਅ ਕੀਤਾ। ਇਹ 50 ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਪਹਿਲਾ ਮਨੁੱਖੀ ਚੰਦਰ ਮਿਸ਼ਨ ਸੀ। ਹਾਲਾਂਕਿ ਇਹ ਯਾਤਰੀ ਚੰਦ ਦੀ ਸਤਹ 'ਤੇ ਨਹੀਂ ਉਤਰੇ ਪਰ ਉਨ੍ਹਾਂ ਦਾ ਕੈਪਸੂਲ ਚੰਦ ਦੇ ਕੋਲੋਂ ਗੁਜ਼ਰਿਆ ਅਤੇ ਉਸ ਤੋਂ ਲਗਭਗ 6,400 ਕਿਲੋਮੀਟਰ ਅੱਗੇ ਜਾਣ ਤੋਂ ਬਾਅਦ ਯੂ-ਟਰਨ ਲੈ ਕੇ ਵਾਪਸ ਧਰਤੀ ਵੱਲ ਮੁੜਿਆ। ਇਸ ਯਾਤਰਾ ਦੇ ਨਾਲ ਹੀ ਇਹ ਚਾਰੇ ਯਾਤਰੀ ਪੁਲਾੜ 'ਚ ਸਭ ਤੋਂ ਦੂਰ ਤੱਕ ਜਾਣ ਵਾਲੇ ਇਨਸਾਨ ਬਣ ਗਏ ਹਨ।
ਮਿਸ਼ਨ ਦੀਆਂ ਖ਼ਾਸ ਗੱਲਾਂ :-
ਵਿਲੱਖਣ ਟੀਮ
- 53 ਸਾਲਾਂ ਬਾਅਦ ਚੰਦ ਵੱਲ ਗਏ ਇਸ ਦਲ 'ਚ ਪਹਿਲੀ ਵਾਰ ਇਕ ਮਹਿਲਾ (ਕ੍ਰਿਸਟੀਨਾ ਕੋਚ), ਇਕ ਅਸ਼ਵੇਤ ਪੁਲਾੜ ਯਾਤਰੀ ਅਤੇ ਇਕ ਗੈਰ-ਅਮਰੀਕੀ ਕੈਨੇਡੀਅਨ ਮੈਂਬਰ (ਜੇਰੇਮੀ ਹੈਨਸਨ) ਸ਼ਾਮਲ ਸਨ। ਮਿਸ਼ਨ ਦੀ ਅਗਵਾਈ ਕਮਾਂਡਰ ਰੀਡ ਵਾਈਜ਼ਮੈਨ ਨੇ ਕੀਤੀ।
ਨਵੀਆਂ ਸੁਵਿਧਾਵਾਂ ਦੀ ਪਰਖ
- ਇਸ ਮਿਸ਼ਨ ਦੌਰਾਨ ਪਹਿਲੀ ਵਾਰ ਪੁਲਾੜ 'ਚ ਜੀਵਨ ਰੱਖਿਅਕ ਪ੍ਰਣਾਲੀ, ਪਾਣੀ ਦੀ ਵਿਵਸਥਾ ਅਤੇ ਟਾਇਲਟ ਵਰਗੀਆਂ ਸਹੂਲਤਾਂ ਦੀ ਵਰਤੋਂ ਕੀਤੀ ਗਈ, ਜੋ ਕਿ ਭਵਿੱਖ ਦੇ ਲੰਬੇ ਮਿਸ਼ਨਾਂ ਲਈ ਅਹਿਮ ਹੈ।
ਚੁਣੌਤੀਆਂ 'ਤੇ ਪਾਈ ਫਤਿਹ
- ਇਹ ਮਿਸ਼ਨ ਪਹਿਲਾਂ ਫਰਵਰੀ 'ਚ ਸ਼ੁਰੂ ਹੋਣਾ ਸੀ, ਪਰ ਹਾਈਡ੍ਰੋਜਨ ਲੀਕੇਜ ਅਤੇ ਹੀਲੀਅਮ ਪ੍ਰੈਸ਼ਰ ਲਾਈਨ 'ਚ ਰੁਕਾਵਟ ਕਾਰਨ ਇਸ ਨੂੰ ਟਾਲਣਾ ਪਿਆ ਸੀ। ਸਾਰੀਆਂ ਤਕਨੀਕੀ ਖਾਮੀਆਂ ਨੂੰ ਦੂਰ ਕਰਕੇ ਨਾਸਾ ਨੇ ਅਪ੍ਰੈਲ ਦੇ ਪਹਿਲੇ ਹਫਤੇ ਇਸ ਨੂੰ ਸਫਲਤਾਪੂਰਵਕ ਲਾਂਚ ਕੀਤਾ।
ਹੁਣ ਚੰਦ 'ਤੇ ਉਤਰਨ ਦੀ ਤਿਆਰੀ
ਆਰਟੇਮਿਸ 2 ਦੀ ਸਫਲਤਾ ਤੋਂ ਬਾਅਦ ਹੁਣ ਨਾਸਾ 'ਆਰਟੇਮਿਸ 3' ਮਿਸ਼ਨ ਦੀ ਤਿਆਰੀ ਵਿੱਚ ਜੁਟ ਗਿਆ ਹੈ। ਇਸ ਅਗਲੇ ਮਿਸ਼ਨ ਦਾ ਮੁੱਖ ਉਦੇਸ਼ ਇਨਸਾਨਾਂ ਨੂੰ ਚੰਦ ਦੀ ਸਤਹ 'ਤੇ ਉਤਾਰਨਾ ਹੈ, ਜਿਸ ਦੇ ਇਸੇ ਸਾਲ ਦੇ ਅੰਤ ਤੱਕ ਸ਼ੁਰੂ ਹੋਣ ਦੀ ਉਮੀਦ ਹੈ। ਨਾਸਾ ਦਾ ਅੰਤਿਮ ਟੀਚਾ ਚੰਦ 'ਤੇ ਮਨੁੱਖਾਂ ਦੀ ਸਥਾਈ ਮੌਜੂਦਗੀ ਸਥਾਪਿਤ ਕਰਨਾ ਹੈ।
'ਪਾਗਲਪਨ' ਵੀ ਬਣ ਸਕਦੈ ਹਥਿਆਰ ! ਜਾਣੋ ਆਖ਼ਿਰ ਕੀ ਹੈ ਟਰੰਪ ਦੀ MadMan ਥਿਊਰੀ
NEXT STORY 
