ਬੀਜਿੰਗ/ਟੋਕੀਓ : ਚੀਨ ਨੇ ਜਪਾਨ 'ਤੇ ਤਾਈਵਾਨ ਦੇ ਮੁੱਦੇ 'ਤੇ "ਹੈਰਾਨੀਜਨਕ ਗਲਤ ਸੰਕੇਤ" ਦੇਣ ਦਾ ਖੁੱਲ੍ਹੇਆਮ ਦੋਸ਼ ਲਗਾਇਆ ਹੈ। ਚੀਨੀ ਵਿਦੇਸ਼ ਮੰਤਰੀ ਵਾਂਗ ਯੀ ਨੇ ਐਤਵਾਰ ਨੂੰ ਇੱਕ ਅਧਿਕਾਰਤ ਬਿਆਨ ਵਿੱਚ ਕਿਹਾ ਕਿ ਇਹ ਮਾਮਲਾ ਪਿਛਲੇ ਦੋ ਹਫ਼ਤਿਆਂ ਤੋਂ ਵੱਧ ਸਮੇਂ ਤੋਂ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਵਿੱਚ ਤਣਾਅ ਪੈਦਾ ਕਰ ਰਿਹਾ ਹੈ।
ਚੀਨ ਦਾ ਵੱਡਾ ਦੋਸ਼ ਅਤੇ 'ਰੈੱਡ ਲਾਈਨ' ਦੀ ਚਿਤਾਵਨੀ
ਚੀਨੀ ਵਿਦੇਸ਼ ਮੰਤਰਾਲੇ ਦੀ ਵੈੱਬਸਾਈਟ 'ਤੇ ਪੋਸਟ ਕੀਤੇ ਗਏ ਬਿਆਨ ਅਨੁਸਾਰ, ਵਿਦੇਸ਼ ਮੰਤਰੀ ਵਾਂਗ ਯੀ ਨੇ ਕਿਹਾ ਕਿ ਜਪਾਨ ਦੇ ਨੇਤਾ ਦਾ ਤਾਈਵਾਨ ਬਾਰੇ ਖੁੱਲ੍ਹੇਆਮ ਗਲਤ ਸੰਕੇਤ ਦੇਣਾ "ਹੈਰਾਨੀਜਨਕ" ਹੈ। ਵਾਂਗ, ਜੋ ਇਸ ਮੁੱਦੇ 'ਤੇ ਜਨਤਕ ਤੌਰ 'ਤੇ ਟਿੱਪਣੀ ਕਰਨ ਵਾਲੇ ਸਭ ਤੋਂ ਸੀਨੀਅਰ ਚੀਨੀ ਅਧਿਕਾਰੀ ਹਨ, ਨੇ ਕਿਹਾ ਕਿ ਜਪਾਨ ਇੱਕ "ਰੈੱਡ ਲਾਈਨ" ਨੂੰ ਪਾਰ ਕਰ ਰਿਹਾ ਹੈ ਜਿਸ ਨੂੰ ਛੂਹਿਆ ਨਹੀਂ ਜਾਣਾ ਚਾਹੀਦਾ। ਉਨ੍ਹਾਂ ਨੇ ਜਪਾਨ ਦੀ ਪ੍ਰਧਾਨ ਮੰਤਰੀ ਸਨਾਏ ਟਾਕਾਈਚੀ 'ਤੇ ਤਾਈਵਾਨ 'ਤੇ ਫੌਜੀ ਦਖਲ ਦੇਣ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਗਾਇਆ ਹੈ।
ਜਪਾਨ ਦੀ ਪ੍ਰਧਾਨ ਮੰਤਰੀ ਦੇ ਬਿਆਨ 'ਤੇ ਵਿਵਾਦ
ਵਿਵਾਦ 7 ਨਵੰਬਰ ਨੂੰ ਸ਼ੁਰੂ ਹੋਇਆ ਜਦੋਂ ਜਪਾਨੀ ਪ੍ਰਧਾਨ ਮੰਤਰੀ ਸਨਾਏ ਟਾਕਾਈਚੀ ਨੇ ਸੰਸਦ ਵਿੱਚ ਇੱਕ ਸਵਾਲ ਦੇ ਜਵਾਬ 'ਚ ਕਿਹਾ ਸੀ ਕਿ ਤਾਈਵਾਨ 'ਤੇ ਕਿਸੇ ਵੀ ਕਾਲਪਨਿਕ ਚੀਨੀ ਹਮਲੇ ਦੀ ਸੂਰਤ 'ਚ ਟੋਕੀਓ ਵੱਲੋਂ ਫੌਜੀ ਜਵਾਬ ਦਿੱਤਾ ਜਾ ਸਕਦਾ ਹੈ।
ਸੰਕਟ ਦਾ ਅਸਰ ਅਤੇ ਅੰਤਰਰਾਸ਼ਟਰੀ ਦਖਲ
ਇਸ ਵਿਵਾਦ ਨੂੰ ਸਾਲਾਂ ਵਿੱਚ ਚੀਨ-ਜਪਾਨ ਦਾ ਸਭ ਤੋਂ ਵੱਡਾ ਸੰਕਟ ਮੰਨਿਆ ਜਾ ਰਿਹਾ ਹੈ, ਜੋ ਵਪਾਰਕ ਅਤੇ ਸੱਭਿਆਚਾਰਕ ਸਬੰਧਾਂ ਤੱਕ ਫੈਲ ਚੁੱਕਾ ਹੈ। ਸ਼ੁੱਕਰਵਾਰ ਨੂੰ ਚੀਨ ਨੇ ਸੰਯੁਕਤ ਰਾਸ਼ਟਰ ਦੇ ਸਕੱਤਰ-ਜਨਰਲ ਐਂਟੋਨੀਓ ਗੁਟੇਰੇਸ ਕੋਲ ਵੀ ਇਹ ਮੁੱਦਾ ਉਠਾਇਆ ਅਤੇ ਆਪਣਾ ਬਚਾਅ ਕਰਨ ਦਾ ਪ੍ਰਣ ਲਿਆ। ਵਾਂਗ ਨੇ ਕਿਹਾ ਕਿ ਚੀਨ ਨੂੰ ਨਾ ਸਿਰਫ਼ ਆਪਣੀ ਪ੍ਰਭੂਸੱਤਾ ਅਤੇ ਖੇਤਰੀ ਅਖੰਡਤਾ ਦੀ ਰਾਖੀ ਲਈ, ਬਲਕਿ ਖੂਨ ਅਤੇ ਕੁਰਬਾਨੀ ਨਾਲ ਪ੍ਰਾਪਤ ਕੀਤੀ ਜੰਗ ਤੋਂ ਬਾਅਦ ਦੀਆਂ ਪ੍ਰਾਪਤੀਆਂ ਦੀ ਰੱਖਿਆ ਲਈ ਵੀ ਜਪਾਨ ਦੇ ਕਦਮ ਦਾ ਮੂੰਹ ਤੋੜ ਜਵਾਬ ਦੇਣਾ ਚਾਹੀਦਾ ਹੈ।
ਜਪਾਨ ਅਤੇ ਤਾਈਵਾਨ ਦਾ ਜਵਾਬ
ਚੀਨ ਵੱਲੋਂ ਸੰਯੁਕਤ ਰਾਸ਼ਟਰ ਨੂੰ ਭੇਜੇ ਗਏ ਪੱਤਰ ਦੇ ਜਵਾਬ ਵਿੱਚ ਜਪਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਸ਼ਨੀਵਾਰ ਨੂੰ ਚੀਨ ਦੇ ਦਾਅਵਿਆਂ ਨੂੰ "ਪੂਰੀ ਤਰ੍ਹਾਂ ਅਸਵੀਕਾਰਨਯੋਗ" ਦੱਸਿਆ ਅਤੇ ਕਿਹਾ ਕਿ ਸ਼ਾਂਤੀ ਪ੍ਰਤੀ ਜਪਾਨ ਦੀ ਪ੍ਰਤੀਬੱਧਤਾ ਅਟੱਲ ਹੈ। ਤਾਈਵਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਐਤਵਾਰ ਨੂੰ ਚੀਨ ਦੇ ਪੱਤਰ ਦੀ ਨਿੰਦਾ ਕਰਦਿਆਂ ਕਿਹਾ ਕਿ ਇਸ ਵਿੱਚ ਨਾ ਸਿਰਫ਼ "ਬਦਤਮੀਜ਼ ਅਤੇ ਗੈਰ-ਵਾਜਬ ਸਮੱਗਰੀ" ਹੈ, ਸਗੋਂ ਇਹ ਇਤਿਹਾਸਕ ਤੱਥਾਂ ਨੂੰ ਵੀ ਗਲਤ ਤਰੀਕੇ ਨਾਲ ਪੇਸ਼ ਕਰਦਾ ਹੈ। ਤਾਈਵਾਨ ਅਨੁਸਾਰ, ਚੀਨ ਦਾ ਪੱਤਰ ਸੰਯੁਕਤ ਰਾਸ਼ਟਰ ਚਾਰਟਰ ਦੇ ਆਰਟੀਕਲ 2(4) ਦੀ ਉਲੰਘਣਾ ਕਰਦਾ ਹੈ, ਜੋ ਅੰਤਰਰਾਸ਼ਟਰੀ ਸਬੰਧਾਂ ਵਿੱਚ ਤਾਕਤ ਦੀ ਧਮਕੀ ਜਾਂ ਵਰਤੋਂ 'ਤੇ ਪਾਬੰਦੀ ਲਗਾਉਂਦਾ ਹੈ।
ਚੀਨ ਵੱਲੋਂ ਫੌਜੀਵਾਦ ਰੋਕਣ ਦੀ ਚਿਤਾਵਨੀ
ਵਾਂਗ ਨੇ ਅੱਗੇ ਚਿਤਾਵਨੀ ਦਿੱਤੀ ਕਿ ਜੇਕਰ ਜਪਾਨ "ਆਪਣੇ ਗਲਤ ਰਾਹ 'ਤੇ ਅੜਿਆ ਰਹਿੰਦਾ ਹੈ ਅਤੇ ਇਸੇ ਰਸਤੇ 'ਤੇ ਚੱਲਦਾ ਰਹਿੰਦਾ ਹੈ", ਤਾਂ ਸਾਰੇ ਦੇਸ਼ਾਂ ਅਤੇ ਲੋਕਾਂ ਨੂੰ "ਜਪਾਨ ਦੇ ਇਤਿਹਾਸਕ ਅਪਰਾਧਾਂ ਦੀ ਮੁੜ ਜਾਂਚ" ਕਰਨ ਅਤੇ "ਜਪਾਨੀ ਫੌਜੀਵਾਦ ਦੇ ਮੁੜ ਉੱਭਰਨ ਨੂੰ ਰੋਕਣ" ਦਾ ਅਧਿਕਾਰ ਹੋਵੇਗਾ।
ਜ਼ਿਕਰਯੋਗ ਹੈ ਕਿ ਚੀਨ, ਅਮਰੀਕਾ ਤੋਂ ਬਾਅਦ ਜਪਾਨ ਦਾ ਸਭ ਤੋਂ ਵੱਡਾ ਨਿਰਯਾਤ ਬਾਜ਼ਾਰ ਹੈ। ਬੀਜਿੰਗ ਲੋਕਤੰਤਰੀ ਢੰਗ ਨਾਲ ਸ਼ਾਸਨ ਕਰਨ ਵਾਲੇ ਤਾਈਵਾਨ ਨੂੰ ਆਪਣਾ ਖੇਤਰ ਮੰਨਦਾ ਹੈ ਅਤੇ ਟਾਪੂ 'ਤੇ ਕਬਜ਼ਾ ਕਰਨ ਲਈ ਤਾਕਤ ਦੀ ਵਰਤੋਂ ਤੋਂ ਇਨਕਾਰ ਨਹੀਂ ਕਰਦਾ।
ਪਬਲਿਕ ਚਾਰਜਿੰਗ ਪੋਰਟਸ ਤੋਂ ਕਰੋ ਪਰਹੇਜ਼! 79 ਫੀਸਦੀ ਲੋਕ ਖਤਰੇ 'ਚ ਪਾ ਰਹੇ ਆਪਣਾ ਨਿੱਜੀ ਡਾਟਾ
NEXT STORY 
