ਇੰਟਰਨੈਸ਼ਨਲ ਡੈਸਕ- ਇਕ ਪਾਸੇ ਜਦੋਂ ਪੂਰੀ ਦੁਨੀਆ AI 'ਤੇ ਨਿਰਭਰ ਹੁੰਦੀ ਜਾ ਰਹੀ ਹੈ ਤੇ ਚਰਚਾ ਚੱਲ ਰਹੀ ਹੈ ਕਿ AI ਦੇ ਕਾਰਨ ਕਈ ਲੋਕਾਂ ਨੂੰ ਆਪਣੀਆਂ ਨੌਕਰੀਆਂ ਤੋਂ ਵੀ ਹੱਥ ਧੋਣਾ ਪਵੇਗਾ। ਉੱਥੇ ਹੀ ਇਕ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ AI ਦੀ ਤੇਜ਼ੀ ਨਾਲ ਵਧਦੀ ਜਾ ਰਹੀ ਵਰਤੋਂ ਕਾਰਨ ਕੰਪਨੀ ਨੇ ਸੈਂਕੜੇ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਪਰ ਜਦੋਂ AI ਮਨੁੱਖੀ ਦਿਮਾਗ ਦੀ ਬਰਾਬਰੀ ਤੇ ਮੁਕਾਬਲਾ ਨਾ ਕਰ ਸਕੀ ਤਾਂ ਕੰਪਨੀ ਨੂੰ ਕੱਢੇ ਹੋਏ ਤਜ਼ਰਬੇਕਾਰ ਕਰਮਚਾਰੀਆਂ ਨੂੰ ਵਾਪਸ ਬੁਲਾਉਣਾ ਪੈ ਗਿਆ ਹੈ।
ਇਹ ਘਟਨਾ ਹੈ ਦੁਨੀਆ ਦੀ ਮਸ਼ਹੂਰ ਅਮਰੀਕੀ ਕਾਰ ਨਿਰਮਾਤਾ ਕੰਪਨੀ ਫੋਰਡ ਦੀ, ਜਿਸ ਨੇ ਮੰਨਿਆ ਹੈ ਕਿ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਤਕਨੀਕ ਵਾਹਨਾਂ ਦੀ ਕੁਆਲਟੀ ਪਰਖਣ 'ਚ ਮਨੁੱਖੀ ਦਿਮਾਗ ਅਤੇ ਤਜ਼ਰਬੇ ਦਾ ਮੁਕਾਬਲਾ ਨਹੀਂ ਕਰ ਸਕੀ। ਰਿਪੋਰਟ ਮੁਤਾਬਕ, ਕੰਪਨੀ ਨੇ ਆਪਣੇ ਆਟੋਮੈਟਿਕ ਸਿਸਟਮ ਦੀਆਂ ਖਾਮੀਆਂ ਨੂੰ ਦੂਰ ਕਰਨ ਲਈ ਹਾਲ ਹੀ ਦੇ ਸਾਲਾਂ ਵਿੱਚ ਆਪਣੇ 300 ਤੋਂ ਵੱਧ ਤਜ਼ਰਬੇਕਾਰ ਇੰਜੀਨੀਅਰਾਂ ਅਤੇ ਕੁਆਲਟੀ ਇੰਸਪੈਕਟਰਾਂ ਨੂੰ ਦੁਬਾਰਾ ਨੌਕਰੀ 'ਤੇ ਰੱਖਿਆ ਹੈ।
ਇਹ ਵੀ ਪੜ੍ਹੋ- 50° ਗਰਮੀ 'ਚ ਵੀ ਭਾਰਤੀ ਨਹੀਂ ਕਰਦੇ ਪਰਵਾਹ ! ਫ਼ਿਰ 'ਗੋਰਿਆਂ' ਦੀ 35°-40° 'ਤੇ ਹੀ ਕਿਉਂ ਨਿਕਲ ਜਾਂਦੀ ਹੈ 'ਫ਼ੂਕ' ?
ਫੋਰਡ ਦੇ ਹਾਰਡਵੇਅਰ ਇੰਜੀਨੀਅਰਿੰਗ ਦੇ ਵਾਈਸ ਪ੍ਰੈਜ਼ੀਡੈਂਟ ਚਾਰਲਸ ਪੂਨ ਨੇ ਦੱਸਿਆ ਕਿ ਕੰਪਨੀ ਨੇ ਸੋਚਿਆ ਸੀ ਕਿ ਪਲਾਂਟਾਂ ਵਿੱਚ AI ਲਗਾਉਣ ਅਤੇ ਡਿਜ਼ਾਈਨ ਦੀਆਂ ਲੋੜਾਂ ਫੀਡ ਕਰਨ ਨਾਲ ਬਿਹਤਰ ਪ੍ਰੋਡਕਟ ਤਿਆਰ ਹੋਣਗੇ, ਪਰ ਇਹ ਯੋਜਨਾ ਉਮੀਦਾਂ 'ਤੇ ਖ਼ਰੀ ਨਹੀਂ ਉਤਰ ਸਕੀ। ਲਗਾਏ ਗਏ AI ਟੂਲਸ ਕੋਲ ਉਨ੍ਹਾਂ ਪੁਰਾਣੇ ਟੈਕਨੀਸ਼ੀਅਨਾਂ ਵਰਗੀ ਮੁਹਾਰਤ ਅਤੇ ਟ੍ਰੇਨਿੰਗ ਨਹੀਂ ਸੀ, ਜਿਨ੍ਹਾਂ ਨੂੰ AI ਕਾਰਨ ਕੰਪਨੀ ਨੇ ਕੱਢਿਆ ਸੀ।
ਚਾਰਲਸ ਪੂਨ ਮੁਤਾਬਕ, AI ਇੱਕ ਬਿਹਤਰੀਨ ਟੂਲ ਹੈ ਪਰ ਇਹ ਓਨਾ ਹੀ ਵਧੀਆ ਕੰਮ ਕਰ ਸਕਦਾ ਹੈ ਜਿੰਨੀ ਚੰਗੀ ਇਸ ਦੀ ਟ੍ਰੇਨਿੰਗ ਹੋਵੇ। ਹੁਣ ਇਹ ਪੁਰਾਣੇ ਇੰਜੀਨੀਅਰ ਦੁਬਾਰਾ ਆ ਕੇ ਕੰਪਨੀ ਦੇ AI ਸਿਸਟਮਾਂ ਨੂੰ ਟ੍ਰੇਨਿੰਗ ਦੇਣਗੇ ਅਤੇ ਨੌਜਵਾਨ ਕਰਮਚਾਰੀਆਂ ਦੀ ਅਗਵਾਈ ਕਰਨਗੇ।
ਇਸ ਤੋਂ ਪਹਿਲਾਂ, ਕੰਪਨੀ ਦੇ ਚੀਫ਼ ਓਪਰੇਟਿੰਗ ਆਫ਼ਿਸਰ ਕੁਮਾਰ ਗਲਹੋਤਰਾ ਨੇ ਨਿਵੇਸ਼ਕਾਂ ਨੂੰ ਦੱਸਿਆ ਸੀ ਕਿ ਉਨ੍ਹਾਂ ਨੇ ਪ੍ਰੋਡਕਸ਼ਨ ਦੌਰਾਨ ਖਾਮੀਆਂ ਫੜਨ ਲਈ ਫੈਕਟਰੀਆਂ ਵਿੱਚ 900 AI-ਪਾਵਰਡ ਕੈਮਰੇ ਲਗਾਏ ਸਨ। ਕੰਪਨੀ ਦੇ ਮੁਖੀ ਜਿਮ ਫਾਰਲੇ ਨੇ ਵੀ ਪਿਛਲੇ ਸਾਲ ਕਿਹਾ ਸੀ ਕਿ AI ਕਾਰਨ ਕਈ ਵ੍ਹਾਈਟ-ਕਾਲਰ ਨੌਕਰੀਆਂ ਖ਼ਤਮ ਹੋ ਜਾਣਗੀਆਂ।
ਇਸ ਮਗਰੋਂ ਪੁਰਾਣੇ ਇੰਜੀਨੀਅਰਾਂ ਦੀ ਵਾਪਸੀ ਅਤੇ ਸੀਨੀਅਰ ਲੀਡਰਸ਼ਿਪ ਵਿੱਚ ਕੀਤੇ ਬਦਲਾਅ ਸਦਕਾ ਫੋਰਡ ਕੰਪਨੀ ਨੂੰ ਵੱਡੀ ਸਫ਼ਲਤਾ ਮਿਲੀ ਹੈ। ਕੰਪਨੀ ਮਸ਼ਹੂਰ 'JD Power Initial Quality Study' ਸੂਚਕਾਂਕ ਵਿੱਚ ਅਮਰੀਕਾ ਦੀ ਨੰਬਰ ਇੱਕ ਮੇਨਸਟ੍ਰੀਮ ਆਟੋਮੇਕਰ ਬਣ ਗਈ ਹੈ। ਸਾਲ 2010 ਤੋਂ ਬਾਅਦ ਫੋਰਡ ਪਹਿਲੀ ਵਾਰ ਇਸ ਰੈਂਕਿੰਗ 'ਤੇ ਪਹੁੰਚੀ ਹੈ। ਕੰਪਨੀ ਨੇ ਪ੍ਰੈੱਸ ਨੋਟ 'ਚ ਦੱਸਿਆ ਕਿ ਇਸ ਸੁਪਰੀਮ ਕੁਆਲਟੀ ਤੱਕ ਪਹੁੰਚਣ ਲਈ ਉਨ੍ਹਾਂ ਨੂੰ ਆਪਣੇ ਉਨ੍ਹਾਂ 300 ਇੰਜੀਨੀਅਰਾਂ ਦੇ ਕਈ ਸਾਲਾਂ ਦੇ ਤਜ਼ਰਬੇ ਅਤੇ ਦਿਮਾਗ ਦੀ ਲੋੜ ਪਈ ਹੈ।
ਇਹ ਵੀ ਪੜ੍ਹੋ- ਜੇ ਪਾਸਪੋਰਟ ਨਹੀਂ, ਤਾਂ ਕੀ ਹੈ ਨਾਗਰਿਕਤਾ ਦਾ ਸਬੂਤ ?
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਪਾਕਿਸਤਾਨ: ਪੰਜਾਬ ਸੂਬੇ 'ਚ 14 ਕੈਦੀ ਹੋਏ ਫਰਾਰ
NEXT STORY 
