ਇੰਟਰਨੈਸ਼ਨਲ ਡੈਸਕ: ਅਮਰੀਕਾ ਵਿੱਚ ਸਰਕਾਰੀ ਖੁਰਾਕ ਸਹਾਇਤਾ ਯੋਜਨਾ 'ਸਨੈਪ' (SNAP) ਨੂੰ ਲੈ ਕੇ ਹੋਈ ਸੰਸਦੀ ਸੁਣਵਾਈ ਦਾ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਇਸ ਸੁਣਵਾਈ ਦੌਰਾਨ ਇੱਕ ਸਾਂਸਦ ਨੇ ਕੋਕਾ-ਕੋਲਾ ਵਰਗੇ ਮਿੱਠੇ ਪੀਣ ਵਾਲੇ ਪਦਾਰਥਾਂ ਨੂੰ ਲੈ ਕੇ ਅਜਿਹੇ ਸਵਾਲ ਪੁੱਛੇ ਕਿ ਪੂਰੇ ਹਾਲ ਵਿੱਚ ਬਹਿਸ ਛਿੜ ਗਈ।
ਰਿਪਬਲਿਕਨ ਸਾਂਸਦ ਬ੍ਰੈਂਡਨ ਗਿੱਲ ਨੇ ਸਵਾਲ ਉਠਾਇਆ ਕਿ ਕੀ ਟੈਕਸਪੇਅਰਾਂ ਦੇ ਪੈਸੇ ਦੀ ਵਰਤੋਂ ਕੋਕਾ-ਕੋਲਾ ਵਰਗੇ ਸ਼ੂਗਰ ਵਾਲੇ ਡਰਿੰਕਸ ਖਰੀਦਣ ਲਈ ਕੀਤੀ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਨੇ ਉੱਥੇ ਮੌਜੂਦ ਇੱਕ ਪਾਲਿਸੀ ਐਡਵੋਕੇਟ ਨੂੰ ਬੜੇ ਸਖ਼ਤ ਲਹਿਜੇ ਵਿੱਚ ਪੁੱਛਿਆ, "ਕੀ ਕੋਕਾ-ਕੋਲਾ ਵਿੱਚ ਕੋਈ ਪੌਸ਼ਟਿਕ ਤੱਤ ਹੁੰਦਾ ਹੈ?" ਅਤੇ "ਕੀ ਅਮਰੀਕੀਆਂ ਨੂੰ ਜਿਊਂਦੇ ਰਹਿਣ ਲਈ ਕੋਕਾ-ਕੋਲਾ ਦੀ ਲੋੜ ਹੈ?"। ਸਾਂਸਦ ਵਾਰ-ਵਾਰ ਸਿਰਫ਼ 'ਹਾਂ' ਜਾਂ 'ਨਹੀਂ' ਵਿੱਚ ਜਵਾਬ ਮੰਗਦੇ ਰਹੇ।
ਸੁਣਵਾਈ ਦੌਰਾਨ ਮੌਜੂਦ ਪਾਲਿਸੀ ਐਡਵੋਕੇਟ ਨੇ ਸਵਾਲਾਂ ਦਾ ਸਿੱਧਾ ਜਵਾਬ ਨਹੀਂ ਦਿੱਤਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਮਹਾਰਤ 'ਫੂਡ ਸਕਿਓਰਿਟੀ'ਵਿੱਚ ਹੈ, ਨਾ ਕਿ 'ਨਿਊਟ੍ਰੀਸ਼ਨ ਸਾਇੰਸ' ਵਿੱਚ। ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਪੋਸ਼ਣ ਨਾਲ ਜੁੜੇ ਸਵਾਲਾਂ 'ਤੇ ਉਹ ਸਿਰਫ਼ ਸਰਕਾਰੀ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਕਰਨਗੇ।
ਪੜ੍ਹੋ ਇਹ ਅਹਿਮ ਖ਼ਬਰ- ਸਟੱਡੀ ਵੀਜ਼ਾ 'ਤੇ ਕੈਨੇਡਾ ਜਾਣ ਵਾਲੇ ਪੰਜਾਬੀ ਵਿਦਿਆਰਥੀਆਂ ਲਈ ਅਹਿਮ ਖ਼ਬਰ
ਕੀ ਹੈ SNAP ਯੋਜਨਾ?
SNAP ਅਮਰੀਕਾ ਦੀ ਇੱਕ ਸਰਕਾਰੀ ਖੁਰਾਕ ਸਹਾਇਤਾ ਯੋਜਨਾ ਹੈ, ਜਿਸ ਨੂੰ ਭਾਰਤ ਦੀ ਰਾਸ਼ਨ ਪ੍ਰਣਾਲੀ ਵਾਂਗ ਸਮਝਿਆ ਜਾ ਸਕਦਾ ਹੈ। ਇਸ ਤਹਿਤ ਘੱਟ ਆਮਦਨ ਵਾਲੇ ਪਰਿਵਾਰਾਂ ਨੂੰ ਖਾਣ-ਪੀਣ ਦਾ ਸਾਮਾਨ ਖਰੀਦਣ ਲਈ ਆਰਥਿਕ ਮਦਦ ਦਿੱਤੀ ਜਾਂਦੀ ਹੈ। ਜ਼ਿਕਰਯੋਗ ਹੈ ਕਿ ਲਗਭਗ 4 ਕਰੋੜ ਤੋਂ ਵੱਧ ਅਮਰੀਕੀ ਇਸ ਯੋਜਨਾ ਦਾ ਲਾਭ ਲੈਂਦੇ ਹਨ। ਸਾਰਾ ਵਿਵਾਦ ਇਸ ਗੱਲ 'ਤੇ ਹੈ ਕਿ SNAP ਦੇ ਪੈਸਿਆਂ ਨਾਲ ਕੋਕਾ-ਕੋਲਾ ਅਤੇ ਹੋਰ ਮਿੱਠੇ ਡਰਿੰਕਸ ਵੀ ਖਰੀਦੇ ਜਾ ਸਕਦੇ ਹਨ। ਸਾਂਸਦ ਬ੍ਰੈਂਡਨ ਗਿੱਲ ਦਾ ਤਰਕ ਹੈ ਕਿ ਜਨਤਾ ਦਾ ਪੈਸਾ ਅਜਿਹੀਆਂ ਚੀਜ਼ਾਂ 'ਤੇ ਖਰਚ ਨਹੀਂ ਹੋਣਾ ਚਾਹੀਦਾ ਜੋ ਸਿਹਤ ਲਈ ਹਾਨੀਕਾਰਕ ਮੰਨੀਆਂ ਜਾਂਦੀਆਂ ਹਨ। ਦੂਜੇ ਪਾਸੇ ਕਈ ਮਾਹਿਰਾਂ ਦਾ ਕਹਿਣਾ ਹੈ ਕਿ ਸਰਕਾਰ ਦਾ ਕੰਮ ਲੋਕਾਂ ਨੂੰ ਭੋਜਨ ਮੁਹੱਈਆ ਕਰਵਾਉਣਾ ਹੈ, ਨਾ ਕਿ ਇਹ ਤੈਅ ਕਰਨਾ ਕਿ ਉਹ ਕਿਹੜੀ ਕਾਨੂੰਨੀ ਖਾਧ ਚੀਜ਼ ਖਰੀਦਣ। ਫਿਲਹਾਲ ਇਸ ਬਹਿਸ ਦਾ ਵੀਡੀਓ ਇੰਟਰਨੈੱਟ 'ਤੇ ਖੂਬ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਸਟੱਡੀ ਵੀਜ਼ਾ 'ਤੇ ਕੈਨੇਡਾ ਜਾਣ ਵਾਲੇ ਪੰਜਾਬੀ ਵਿਦਿਆਰਥੀਆਂ ਲਈ ਅਹਿਮ ਖ਼ਬਰ
NEXT STORY 
