ਨਿਊਯਾਰਕ - ਸਾਲ 2021 ਵਿੱਚ ਇੱਕ ਜ਼ੂਮ ਕਾਲ (Zoom call) ਰਾਹੀਂ ਇਕੱਠੇ 900 ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਬਰਖ਼ਾਸਤ ਕਰਕੇ ਦੁਨੀਆ ਭਰ ਵਿੱਚ ਸੁਰਖੀਆਂ ਬਟੋਰਨ ਵਾਲੇ ਵਿਸ਼ਾਲ ਗਰਗ ਨੂੰ ਹੁਣ ਖੁਦ ਆਪਣੀ ਹੀ ਕੰਪਨੀ ਵਿੱਚੋਂ ਬਾਹਰ ਦਾ ਰਸਤਾ ਦਿਖਾ ਦਿੱਤਾ ਗਿਆ ਹੈ। ਹੋਮ ਲੋਨ ਪ੍ਰਦਾਨ ਕਰਨ ਵਾਲੀ ਪ੍ਰਸਿੱਧ ਡਿਜੀਟਲ ਕੰਪਨੀ 'ਬੈਟਰ ਹੋਮ ਐਂਡ ਫਾਇਨਾਂਸ' ਦੇ ਬੋਰਡ ਨੇ ਵਿਸ਼ਾਲ ਗਰਗ ਨੂੰ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਦੇ ਅਹੁਦੇ ਤੋਂ ਹਟਾ ਦਿੱਤਾ ਹੈ, ਜਿਸ ਕਾਰਨ ਉਹ ਖੁਦ ਨੂੰ ਬੇਹੱਦ ਠੱਗਿਆ ਹੋਇਆ ਅਤੇ ਪਰੇਸ਼ਾਨ ਮਹਿਸੂਸ ਕਰ ਰਹੇ ਹਨ।
ਵਿਸ਼ਾਲ ਗਰਗ ਨੇ ਕੰਪਨੀ ਦੇ ਨਵੇਂ ਬਣੇ ਸੀ.ਈ.ਓ. ਡੈਨੀਅਲ ਲੁਈਸ 'ਤੇ ਧੋਖਾਧੜੀ ਦੇ ਗੰਭੀਰ ਦੋਸ਼ ਲਗਾਏ ਹਨ। ਗਰਗ ਦਾ ਕਹਿਣਾ ਹੈ ਕਿ ਲੁਈਸ ਨੇ ਪਹਿਲਾਂ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਉਨ੍ਹਾਂ ਦੀ ਕੰਪਨੀ ਦੀ ਰਣਨੀਤੀ ਦੀ ਬਹੁਤ ਸ਼ਲਾਘਾ ਕੀਤੀ ਅਤੇ ਉਨ੍ਹਾਂ ਦਾ ਭਰੋਸਾ ਜਿੱਤ ਕੇ ਬੋਰਡ ਆਫ਼ ਡਾਇਰੈਕਟਰਜ਼ ਵਿੱਚ ਸ਼ਾਮਲ ਹੋ ਗਿਆ। ਲੁਈਸ ਲੰਘੀ 27 ਜੁਲਾਈ ਨੂੰ ਬੋਰਡ ਵਿੱਚ ਸ਼ਾਮਲ ਹੋਇਆ ਸੀ, ਪਰ ਮਹਿਜ਼ ਇੱਕ ਹਫ਼ਤੇ ਬਾਅਦ, 3 ਅਗਸਤ ਨੂੰ ਉਸ ਨੇ ਬਾਕੀ ਡਾਇਰੈਕਟਰਾਂ ਨੂੰ ਭੜਕਾ ਕੇ ਗਰਗ ਨੂੰ ਸੀ.ਈ.ਓ. ਦੇ ਅਹੁਦੇ ਤੋਂ ਹਟਵਾ ਦਿੱਤਾ ਅਤੇ ਖੁਦ ਉਹ ਕੁਰਸੀ ਸੰਭਾਲ ਲਈ। ਗਰਗ ਅਨੁਸਾਰ, ਉਹ ਕੰਪਨੀ ਨੂੰ ਸਫਲਤਾ ਦੀ ਦਹਿਲੀਜ਼ 'ਤੇ ਲਿਆ ਚੁੱਕੇ ਸਨ, ਜਦੋਂ ਉਨ੍ਹਾਂ ਨਾਲ ਇਹ ਧੋਖਾ ਕੀਤਾ ਗਿਆ।
ਵਿਸ਼ਾਲ ਗਰਗ ਦੀ ਅਗਵਾਈ ਹੇਠ ਕੰਪਨੀ ਨੇ ਕਈ ਵੱਡੇ ਉਤਾਰ-ਚੜ੍ਹਾਅ ਦੇਖੇ ਹਨ। ਕੋਰੋਨਾ ਮਹਾਂਮਾਰੀ ਦੌਰਾਨ ਜਦੋਂ ਹੋਮ ਲੋਨ ਰੀਫਾਇਨੈਂਸਿੰਗ ਦਾ ਕੰਮ ਬਹੁਤ ਤੇਜ਼ੀ 'ਤੇ ਸੀ ਅਤੇ ਵਿਆਜ ਦਰਾਂ 3% ਤੋਂ ਘੱਟ ਸਨ, ਉਦੋਂ ਕੰਪਨੀ ਦੀ ਮਾਰਕੀਟ ਵੈਲਿਊ (Valuation) 8 ਅਰਬ ਡਾਲਰ (8 Billion Dollars) ਸੀ। ਪਰ ਮੌਜੂਦਾ ਸਮੇਂ ਵਿੱਚ ਕਾਰੋਬਾਰ ਮੰਦਾ ਹੋਣ ਅਤੇ ਵਿਆਜ ਦਰਾਂ 7% ਦੇ ਕਰੀਬ ਪਹੁੰਚਣ ਕਾਰਨ ਇਸ ਏਆਈ (AI) ਮਾਰਗੇਜ ਕੰਪਨੀ ਦੀ ਮਾਰਕੀਟ ਵੈਲਿਊ ਘਟ ਕੇ ਸਿਰਫ਼ 300 ਮਿਲੀਅਨ ਡਾਲਰ ਰਹਿ ਗਈ ਹੈ।
ਗਰਗ ਦੇ ਕਾਰਜਕਾਲ ਦੌਰਾਨ ਜ਼ੂਮ 'ਤੇ ਮੁਲਾਜ਼ਮਾਂ ਦੀ ਵੱਡੀ ਛੰਗਾਈ ਦੇ ਸ਼ਰਮਨਾਕ ਵਾਕਏ ਤੋਂ ਇਲਾਵਾ, ਵ੍ਹਿਸਲਬਲੋਅਰ ਦੇ ਮੁਕੱਦਮੇ, ਸਕਿਓਰਿਟੀਜ਼ ਐਂਡ ਐਕਸਚੇਂਜ ਕਮਿਸ਼ਨ (SEC) ਦੀ ਜਾਂਚ ਅਤੇ ਸਾਲ 2023 ਵਿੱਚ SPAC ਮਰਜਰ ਦੀ ਵੱਡੀ ਅਸਫਲਤਾ ਕਾਰਨ ਕੰਪਨੀ ਦੇ ਸ਼ੇਅਰ 93% ਤੱਕ ਡਿੱਗ ਗਏ ਸਨ। ਗਰਗ ਖੁਦ ਵੀ ਇਹ ਮੰਨਦੇ ਹਨ ਕਿ ਜ਼ੂਮ 'ਤੇ ਹੋਈ ਉਸ ਛੰਗਾਈ ਨੇ ਕੰਪਨੀ ਦੇ ਅਕਸ ਨੂੰ ਬਹੁਤ ਨੁਕਸਾਨ ਪਹੁੰਚਾਇਆ ਹੈ ਅਤੇ ਇਹ ਗਲਤੀ ਉਨ੍ਹਾਂ ਨੂੰ ਹਮੇਸ਼ਾ ਪਰੇਸ਼ਾਨ ਕਰਦੀ ਰਹੇਗੀ।
ਦਿਲਚਸਪ ਗੱਲ ਇਹ ਹੈ ਕਿ ਜਦੋਂ ਤੋਂ ਨਵੇਂ ਸੀ.ਈ.ਓ. ਡੈਨੀਅਲ ਲੁਈਸ ਨੇ ਅਹੁਦਾ ਸੰਭਾਲਿਆ ਹੈ, ਕੰਪਨੀ ਦੇ ਸਟਾਕ ਵਿੱਚ 45 ਫੀਸਦੀ ਦੀ ਹੋਰ ਭਾਰੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਗਰਗ ਦਾ ਦਾਅਵਾ ਹੈ ਕਿ ਕੰਪਨੀ ਦੀ ਮਾੜੀ ਹਾਲਤ ਨੂੰ ਦੇਖਦੇ ਹੋਏ ਕਈ ਚਿੰਤਤ ਨਿਵੇਸ਼ਕਾਂ (investors) ਨੇ ਉਨ੍ਹਾਂ ਨਾਲ ਸੰਪਰਕ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਦੁਬਾਰਾ ਸੀ.ਈ.ਓ. ਦੀ ਨੌਕਰੀ ਵਾਪਸ ਲੈਣ ਦੀ ਅਪੀਲ ਕੀਤੀ ਹੈ। ਦੂਜੇ ਪਾਸੇ, ਲੁਈਸ ਨੇ ਬੀਤੀ 4 ਅਗਸਤ ਨੂੰ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਕੇ ਲਿਖਿਆ ਸੀ ਕਿ ਵਿਸ਼ਾਲ ਗਰਗ ਤੋਂ ਬਿਨਾਂ ਇਹ ਕੰਪਨੀ ਕਦੇ ਹੋਂਦ ਵਿੱਚ ਨਹੀਂ ਆ ਸਕਦੀ ਸੀ ਅਤੇ ਉਹ ਸਨਮਾਨ ਦੇ ਹੱਕਦਾਰ ਹਨ।
ਇਟਲੀ 'ਚ ਭਾਰਤੀਆਂ ਨੇ ਧੂਮ-ਧਾਮ ਨਾਲ ਮਨਾਇਆ ਭਾਰਤ ਦਾ 80ਵਾਂ ਆਜ਼ਾਦੀ ਦਿਹਾੜਾ
NEXT STORY 
