ਦੁਬਈ— ਦੁਬਈ 'ਚ ਰਹਿ ਰਹੇ ਇਕ ਭਾਰਤੀ ਵਿਅਕਤੀ ਨੇ ਆਪਣੀ ਪਤਨੀ ਨਾਲ ਮਿਲ ਕੇ ਆਪਣੀ ਮਾਂ ਨੂੰ ਇੰਨਾ ਕੁ ਕੁੱਟਿਆ ਕਿ ਉਸ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਫੌਰਾਂਸਿਕ ਰਿਪੋਰਟ 'ਚ ਦੱਸਿਆ ਗਿਆ ਕਿ ਮੌਤ ਸਮੇਂ ਬਜ਼ੁਰਗ ਔਰਤ ਦਾ ਭਾਰ ਸਿਰਫ 29 ਕਿਲੋ ਸੀ। ਨੂੰਹ-ਪੁੱਤ ਨੇ ਬਜ਼ੁਰਗ ਔਰਤ ਦੀ ਸੱਜੀ ਅੱਖ ਦੀ ਪੁਤਲੀ ਤਕ ਕੱਢ ਦਿੱਤੀ ਸੀ। ਫਿਲਹਾਲ ਪੁਲਸ ਨੇ ਦੋਹਾਂ ਨੂੰ ਹਿਰਾਸਤ 'ਚ ਲੈ ਲਿਆ ਹੈ ਅਤੇ ਉਹ ਜੇਲ 'ਚ ਹਨ। ਅਦਾਲਤ ਦੀ ਸੁਣਵਾਈ 3 ਜੁਲਾਈ ਤਕ ਟਲ ਗਈ ਹੈ ਅਤੇ ਤਦ ਤਕ ਦੋਹਾਂ ਦੋਸ਼ੀਆਂ ਨੂੰ ਜੇਲ 'ਚ ਰਹਿਣਾ ਪਵੇਗਾ।
ਪੁਲਸ ਨੂੰ ਗੁਆਂਢਣ ਨੇ ਦਿੱਤੀ ਜਾਣਕਾਰੀ—
ਪੁਲਸ ਨੂੰ ਬਜ਼ੁਰਗ 'ਤੇ ਤਸ਼ੱਦਦ ਕਰਨ ਦੀ ਸੂਚਨਾ ਜੋੜੇ ਦੇ ਫਲੈਟ ਕੋਲ ਰਹਿਣ ਵਾਲੀ 54 ਸਾਲਾ ਔਰਤ ਨੇ ਦਿੱਤੀ। ਜੋੜੇ ਖਿਲਾਫ ਅਲ ਕੁਸਾਇਸ ਪੁਲਸ ਸਟੇਸ਼ਨ 'ਚ ਕੇਸ ਦਰਜ ਕੀਤਾ ਗਿਆ ਹੈ। ਹਾਲਾਂਕਿ 29 ਸਾਲਾ ਭਾਰਤੀ ਵਿਅਕਤੀ ਨੇ ਦੋਸ਼ਾਂ ਨੂੰ ਖਾਰਜ ਕੀਤਾ ਹੈ।
ਗੁਆਂਢਣ ਦਾ ਕਹਿਣਾ ਹੈ ਕਿ ਭਾਰਤੀ ਵਿਅਕਤੀ ਦੀ ਨੌਕਰੀਪੇਸ਼ਾ ਪਤਨੀ ਉਨ੍ਹਾਂ ਦੇ ਫਲੈਟ 'ਚ ਆਪਣੀ ਧੀ ਨੂੰ ਛੱਡ ਕੇ ਜਾਂਦੀ ਸੀ । ਉਹ ਉਨ੍ਹਾਂ ਨੂੰ ਕਹਿੰਦੀ ਸੀ ਕਿ ਉਸ ਦੀ ਸੱਸ ਭਾਰਤ ਤੋਂ ਆਈ ਹੈ ਪਰ ਉਹ ਉਸ ਦੀ ਧੀ ਦਾ ਖਿਆਲ ਨਹੀਂ ਰੱਖਦੀ।
ਗੁਆਂਢਣ ਨੇ ਦੱਸਿਆ ਕਿ ਇਕ ਦਿਨ ਉਸ ਨੇ ਬਜ਼ੁਰਗ ਔਰਤ ਨੂੰ ਫਲੈਟ ਦੀ ਬਾਲਕਨੀ 'ਚ ਪਿਆ ਦੇਖਿਆ। ਉਸ ਦੇ ਸਰੀਰ 'ਤੇ ਕੱਪੜੇ ਤਕ ਨਹੀਂ ਸਨ ਅਤੇ ਉਸ ਦੇ ਸਰੀਰ 'ਤੇ ਸਾੜੇ ਜਾਣ ਦੇ ਕਈ ਨਿਸ਼ਾਨ ਸਨ ਅਤੇ ਉਹ ਦਰਦ ਨਾਲ ਤੜਫ ਰਹੀ ਸੀ। ਇਸ ਦੀ ਖਬਰ ਉਸ ਨੇ ਸੁਰੱਖਿਆ ਗਾਰਡਾਂ ਨੂੰ ਦਿੱਤੀ। ਇਸ ਦੇ ਬਾਅਦ ਐਂਬੂਲੈਂਸ ਨੂੰ ਸੱਦਿਆ ਗਿਆ। ਪੁੱਤ ਤੇ ਨੂੰਹ ਐਂਬੂਲੈਂਸ 'ਚ ਨਹੀਂ ਗਏ ਅਤੇ ਡਾਕਟਰ ਦੇ ਸੱਦਣ 'ਤੇ ਪੁੱਤ ਹਸਪਤਾਲ 'ਚ ਗਿਆ। ਬਜ਼ੁਰਗ ਔਰਤ ਦੀ ਇੱਥੇ ਹੀ ਮੌਤ ਹੋ ਗਈ।
ਰਿਪੋਰਟ 'ਚ ਤਸ਼ੱਦਦ ਬਾਰੇ ਖੁਲ੍ਹਾਸਾ—
ਡਾਕਟਰ ਨੇ ਦੱਸਿਆ ਕਿ ਬਜ਼ੁਰਗ ਔਰਤ ਦੀਆਂ ਕਈ ਹੱਡੀਆਂ ਟੁੱਟੀਆਂ ਸਨ। ਰਿਪੋਰਟ 'ਚ ਪਤਾ ਲੱਗਾ ਹੈ ਕਿ ਵੱਖ-ਵੱਖ ਚੀਜ਼ਾਂ ਨਾਲ ਉਸ ਨੂੰ ਕੁੱਟਿਆ ਗਿਆ। ਉਸ ਦੇ ਸਰੀਰ ਦੇ ਅੰਦਰੂਨੀ ਹਿੱਸਿਆਂ 'ਚ ਖੂਨ ਵਗਣ ਦੀ ਗੱਲ ਵੀ ਰਿਪੋਰਟ 'ਚ ਕਹੀ ਗਈ। ਡਾਕਟਰਾਂ ਨੇ ਦੱਸਿਆ ਕਿ ਉਸ ਨੂੰ ਲਗਾਤਾਰ ਭੁੱਖੀ ਵੀ ਰੱਖਿਆ ਗਿਆ, ਇਸੇ ਕਾਰਨ ਉਸ ਦਾ ਭਾਰ ਇੰਨਾ ਘੱਟ ਰਹਿ ਗਿਆ ਸੀ।
ਹਸਪਤਾਲ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਬਜ਼ੁਰਗ ਔਰਤ ਨੂੰ ਜੁਲਾਈ ਤੋਂ ਅਕਤੂਬਰ 2018 ਤਕ ਬੁਰੀ ਤਰ੍ਹਾਂ ਨਾਲ ਕੁੱਟਿਆ-ਮਾਰਿਆ ਗਿਆ ਤੇ 31 ਅਕਤੂਬਰ ਨੂੰ ਉਸ ਦੀ ਮੌਤ ਹੋ ਗਈ। ਪੁੱਤ ਦਾ ਦਾਅਵਾ ਹੈ ਕਿ ਉਸ ਦੀ ਮਾਂ ਉੱਪਰ ਗਰਮ ਪਾਣੀ ਰੁੜ ਗਿਆ ਸੀ। ਫਿਲਹਾਲ 3 ਜੁਲਾਈ ਨੂੰ ਅਦਾਲਤ ਇਸ ਕੇਸ 'ਤੇ ਮੁੜ ਸੁਣਵਾਈ ਕਰੇਗੀ।
ਦੁਬਈ 'ਚ ਭਾਰਤੀ ਪਤੀ-ਪਤਨੀ 'ਤੇ ਮਾਂ ਨਾਲ ਕੁੱਟਮਾਰ ਕਰਨ ਦੇ ਦੋਸ਼
NEXT STORY 
