ਜੈਨੇਵਾ— ਸਵਿਟਜ਼ਰਲੈਂਡ ਦੇ ਲੁਸਾਨੇ 'ਚ ਓਲੰਪਿਕ ਅਤੇ ਪੈਰਾਲੰਪਿਕ ਗੇਮਜ਼ ਦਾ ਨਵਾਂ ਹੈੱਡਕੁਆਟਰ ਖੁੱਲ੍ਹ ਗਿਆ ਹੈ। ਇਸ ਨੂੰ ਨੀਦਰਲੈਂਡ ਦੀ ਕੰਪਨੀ 3 ਐਕਸਐੱਨ ਨੇ ਤਿਆਰ ਕੀਤਾ ਹੈ, ਜੋ ਪੁਰਾਣੀ ਇਮਾਰਤ ਦੀ ਥਾਂ 'ਤੇ ਹੀ ਬਣਿਆ ਹੈ। ਸਵਿਸ ਆਰਕਿਟੈਕਟ ਇਟੇਨ ਬ੍ਰੇਸ਼ਬੁਲ ਮੁਤਾਬਕ ਇਹ ਦੁਨੀਆ ਦੀਆਂ ਸਭ ਤੋਂ 'ਈਕੋ ਫਰੈਂਡਲੀ ਇਮਾਰਤਾਂ' 'ਚੋਂ ਇਕ ਹੈ। ਇਟੇਨ ਦੇ ਦਾਅਵੇ ਨੂੰ ਇਸ ਤੱਥ ਨਾਲ ਸਮਝਿਆ ਜਾ ਸਕਦਾ ਹੈ ਕਿ ਨਵੇਂ ਹੈੱਡ ਕੁਆਟਰ 'ਚ ਪੁਰਾਣੀ ਇਮਾਰਤ ਦਾ ਤਕਰੀਬਨ 95 ਫੀਸਦੀ ਮਟੀਰੀਅਲ ਰੀਸਾਇਕਲ ਕੀਤਾ ਗਿਆ ਹੈ।
14.5 ਕਰੋੜ ਡਾਲਰ (ਤਕਰੀਬਨ 1000 ਕਰੋੜ ਰੁਪਏ) 'ਚ ਬਣੀ ਇਸ ਇਮਾਰਤ ਨੂੰ ਆਈ. ਓ. ਸੀ. ਦੇ 500 ਕਰਮਚਾਰੀਆਂ ਲਈ ਤਿਆਰ ਕੀਤਾ ਗਿਆ ਹੈ। ਇਸ 'ਚ ਊਰਜਾ ਜ਼ਰੂਰਤਾਂ ਨੂੰ ਪੂਰਾ ਕਰਨ ਲਈ ਵੀ ਰੀਨਿਊਏਬਲ ਸਰੋਤਾਂ ਦੀ ਵਰਤੋਂ ਕੀਤੀ ਗਈ ਹੈ। ਇਮਾਰਤ ਦੀ ਪੂਰੀ ਛੱਤ 'ਤੇ ਸੋਲਰ ਪੈਨਲਸ ਲੱਗੇ ਹਨ, ਜੋ ਸੌਰ ਊਰਜਾ ਜ਼ਰੀਏ ਤਕਰੀਬਨ 60 ਘਰਾਂ ਦੇ ਬਰਾਬਰ ਬਿਜਲੀ ਪੈਦਾ ਕਰਨਗੇ ਅਤੇ ਇਮਾਰਤ ਨੂੰ ਰੌਸ਼ਨ ਕਰਨਗੇ।
ਹੈੱਡਕੁਆਟਰ ਇਮਾਰਤ 'ਚ ਪਾਣੀ ਬਚਾਉਣ ਲਈ ਵੀ ਵਧੀਆ ਪ੍ਰਬੰਧ ਕੀਤੇ ਗਏ ਹਨ। ਪਾਣੀ ਦੀ ਸੁਰੱਖਿਆ ਨੂੰ ਧਿਆਨ 'ਚ ਰੱਖਦੇ ਹੋਏ ਨਿਰਮਾਤਾਵਾਂ ਨੇ ਇਮਾਰਤ 'ਚ ਹੀ ਮੀਂਹ ਦੇ ਪਾਣੀ ਨੂੰ ਇਕੱਠਾ ਕਰਨ ਦੇ ਪ੍ਰਬੰਧ ਵੀ ਕੀਤੇ ਹਨ। ਇਸ ਨੂੰ ਸਿੰਚਾਈ ਅਤੇ ਟਾਇਲਟ ਲਈ ਇਸਤੇਮਾਲ ਕੀਤਾ ਜਾਵੇਗਾ।
ਇਮਾਰਤ ਦਾ ਡਿਜ਼ਾਇਨ ਵੀ ਅੱਗੇ ਵੱਲ ਨੂੰ ਝੁਕਿਆ ਹੈ। ਇਸ ਨਾਲ ਇਮਾਰਤ 'ਚ ਏਅਰ ਕੰਡੀਸ਼ਨਰਾਂ ਦੀ ਜ਼ਰੂਰਤ ਘੱਟ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਇਮਾਰਤ ਦੇ ਝੁਕੇ ਹੋਣ ਕਾਰਨ ਇੱਥੇ ਧੁੱਪ ਕਾਰਨ ਗਰਮੀ ਨਹੀਂ ਹੋਵੇਗੀ।
ਇਮਾਰਤ ਦਾ ਨਿਰਮਾਣ 2016 'ਚ ਸ਼ੁਰੂ ਹੋਇਆ ਸੀ। ਤਕਰੀਬਨ ਦੋ ਸਾਲਾਂ 'ਚ ਹੀ ਇਸ ਨੂੰ ਤਿਆਰ ਕਰ ਲਿਆ ਗਿਆ। 2018 'ਚ ਐਮਸਟਰਡਮ 'ਚ ਹੋਏ ਵਰਲਡ ਆਰਕੀਟੈਕਚਰ ਫੈਸਟੀਵਲ 'ਚ ਇਸ ਨੂੰ 'ਆਫਿਸ-ਫਿਊਚਰ ਪ੍ਰੋਜੈਕਟ' ਦੇ ਐਵਾਰਡ ਨਾਲ ਨਵਾਜਿਆ ਜਾ ਚੁੱਕਾ ਹੈ।
ਹੌਰਸ ਰਾਈਡਿੰਗ ਦੀ ਨੈਸ਼ਨਲ ਚੈਂਪੀਅਨ ਗੁਰਨਾਜ਼ ਕੌਰ ਲਾਖਨ ਸ੍ਰੀ ਹਰਿਮੰਦਰ ਸਾਹਿਬ ਹੋਈ ਨਤਮਸਤਕ
NEXT STORY 
