ਇੰਟਰਨੈਸ਼ਨਲ ਜੈਸਕ- ਹਾਂਗਕਾਂਗ ਦੇ ਸਭ ਤੋਂ ਪ੍ਰਮੁੱਖ ਲੋਕਤੰਤਰ ਪੱਖੀ ਕਾਰਕੁਨਾਂ ਵਿੱਚੋਂ ਇੱਕ 29 ਸਾਲਾ ਜੋਸ਼ੂਆ ਵਾਂਗ ਨੇ ਚੀਨ ਅਤੇ ਹਾਂਗਕਾਂਗ ਵਿਰੁੱਧ ਵਿਦੇਸ਼ੀ ਪਾਬੰਦੀਆਂ ਲਗਾਉਣ ਦੀ ਸਾਜ਼ਿਸ਼ ਰਚਣ ਦੇ ਰਾਸ਼ਟਰੀ ਸੁਰੱਖਿਆ ਮਾਮਲੇ ਵਿੱਚ ਆਪਣਾ ਗੁਨਾਹ ਕਬੂਲ ਕਰ ਲਿਆ ਹੈ। ਬੁੱਧਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਹੋਏ ਵਾਂਗ 'ਤੇ ਲੱਗੇ ਇਸ ਨਵੇਂ ਦੋਸ਼ ਤਹਿਤ ਉਨ੍ਹਾਂ ਨੂੰ ਘੱਟੋ-ਘੱਟ 3 ਤੋਂ 10 ਸਾਲ ਜਾਂ ਮਾਮਲੇ ਦੀ ਗੰਭੀਰਤਾ ਦੇ ਆਧਾਰ 'ਤੇ ਵੱਧ ਤੋਂ ਵੱਧ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ।
ਸਰਕਾਰੀ ਵਕੀਲਾਂ ਨੇ ਜੋਸ਼ੂਆ ਵਾਂਗ 'ਤੇ ਦੇਸ਼ ਨਿਕਾਲਾ ਦਿੱਤੇ ਗਏ ਇੱਕ ਹੋਰ ਕਾਰਕੁਨ ਨੇਥਨ ਲਾਅ ਨਾਲ ਮਿਲ ਕੇ ਕੰਮ ਕਰਨ ਦਾ ਦੋਸ਼ ਲਗਾਇਆ ਹੈ। ਵਕੀਲਾਂ ਅਨੁਸਾਰ ਦੋਵਾਂ ਨੇ ਚੀਨ ਵਿਰੁੱਧ ਪਾਬੰਦੀਆਂ, ਨਾਕਾਬੰਦੀਆਂ ਜਾਂ ਹੋਰ ਦੁਸ਼ਮਣੀ ਭਰੇ ਕਦਮ ਚੁੱਕਣ ਲਈ ਵਿਦੇਸ਼ੀ ਤਾਕਤਾਂ ਨੂੰ ਉਕਸਾਇਆ ਹੈ। ਅਦਾਲਤੀ ਸੁਣਵਾਈ ਦੌਰਾਨ ਦੱਸਿਆ ਗਿਆ ਕਿ ਵਾਂਗ ਨੇ ਵਿਦੇਸ਼ਾਂ ਦਾ ਦੌਰਾ ਕੀਤਾ ਅਤੇ ਉੱਥੋਂ ਦੇ ਸਿਆਸਤਦਾਨਾਂ ਨਾਲ ਮੁਲਾਕਾਤ ਕਰਕੇ ਪਾਬੰਦੀਆਂ ਲਈ ਲਾਬਿੰਗ ਕੀਤੀ ਸੀ। ਦੋਸ਼ ਹਨ ਕਿ ਉਸ ਨੇ ਸਾਲ 2020 ਵਿੱਚ ਰਾਸ਼ਟਰੀ ਸੁਰੱਖਿਆ ਕਾਨੂੰਨ ਲਾਗੂ ਹੋਣ ਤੋਂ ਬਾਅਦ ਵੀ ਸੋਸ਼ਲ ਮੀਡੀਆ ਰਾਹੀਂ ਇਨ੍ਹਾਂ ਪਾਬੰਦੀਆਂ ਦੀ ਮੰਗ ਲਗਾਤਾਰ ਜਾਰੀ ਰੱਖੀ ਸੀ।
ਜੋਸ਼ੂਆ ਵਾਂਗ ਹਾਂਗਕਾਂਗ ਦੇ ਅਜਿਹੇ ਇਕਲੌਤੇ ਕਾਰਕੁਨ ਹਨ, ਜਿਨ੍ਹਾਂ 'ਤੇ ਰਾਸ਼ਟਰੀ ਸੁਰੱਖਿਆ ਕਾਨੂੰਨ ਤਹਿਤ ਦੋ ਵਾਰ ਮੁਕੱਦਮਾ ਚਲਾਇਆ ਗਿਆ ਹੈ। ਇਸ ਤੋਂ ਪਹਿਲਾਂ, ਸਾਲ 2022 ਵਿੱਚ ਇੱਕ ਗੈਰ-ਅਧਿਕਾਰਤ ਪ੍ਰਾਇਮਰੀ ਚੋਣ ਵਿੱਚ ਹਿੱਸਾ ਲੈਣ ਦੇ ਮਾਮਲੇ ਵਿੱਚ ਉਸ ਨੇ ਆਪਣਾ ਗੁਨਾਹ ਕਬੂਲਿਆ ਸੀ, ਜਿਸ ਤੋਂ ਬਾਅਦ ਨਵੰਬਰ 2024 ਵਿੱਚ ਉਸ ਨੂੰ ਚਾਰ ਸਾਲ ਅਤੇ ਅੱਠ ਮਹੀਨੇ ਦੀ ਸਜ਼ਾ ਸੁਣਾਈ ਗਈ ਸੀ। ਉਹ ਨਵੰਬਰ 2020 ਤੋਂ ਲਗਾਤਾਰ ਜੇਲ੍ਹ ਵਿੱਚ ਬੰਦ ਹੈ ਅਤੇ ਉਸ ਦੀ ਰਿਹਾਈ ਜਨਵਰੀ 2027 ਵਿੱਚ ਹੋਣੀ ਸੀ, ਪਰ ਹੁਣ ਨਵਾਂ ਮਾਮਲਾ ਸਾਹਮਣੇ ਆਉਣ ਕਾਰਨ ਉਸ ਦੀਆਂ ਮੁਸ਼ਕਿਲਾਂ ਵਧ ਗਈਆਂ ਹਨ।
ਪੜ੍ਹੋ ਇਹ ਅਹਿਮ ਖ਼ਬਰ- ਬੱਚਿਆਂ ਦਾ 'ਪਾਸਪੋਰਟ' ਬਣਾਉਣਾ ਹੋਵੇਗਾ ਔਖਾ ! ਅਮਰੀਕਾ 'ਚ ਜਲਦ ਲਾਗੂ ਹੋਵੇਗਾ ਨਵਾਂ ਨਿਯਮ
ਸਾਲ 2014 ਵਿੱਚ ਜੋਸ਼ੂਆ ਵਾਂਗ ਨੇ ਸਿਰਫ਼ ਇੱਕ ਕਿਸ਼ੋਰ ਵਜੋਂ 'ਅੰਬਰੇਲਾ ਮੂਵਮੈਂਟ' ਦੀ ਅਗਵਾਈ ਕੀਤੀ ਸੀ, ਜਿਸ ਦੌਰਾਨ ਹਜ਼ਾਰਾਂ ਪ੍ਰਦਰਸ਼ਨਕਾਰੀਆਂ ਨੇ ਹਾਂਗਕਾਂਗ ਵਿੱਚ ਲੋਕਤੰਤਰ ਦੀ ਮੰਗ ਲਈ 79 ਦਿਨਾਂ ਤੱਕ ਮੁੱਖ सੜਕਾਂ ਜਾਮ ਰੱਖੀਆਂ ਸਨ। ਅਕਤੂਬਰ 2014 ਵਿੱਚ ਵੱਕਾਰੀ 'ਟਾਈਮ' ਮੈਗਜ਼ੀਨ ਨੇ ਆਪਣੇ ਕਵਰ ਪੇਜ 'ਤੇ ਉਸ ਦੀ ਤਸਵੀਰ ਛਾਪ ਕੇ ਉਸ ਨੂੰ "ਪ੍ਰਦਰਸ਼ਨ ਦਾ ਚਿਹਰਾ" ਐਲਾਨਿਆ ਸੀ। ਸਾਲ 2019 ਵਿੱਚ ਹਾਂਗਕਾਂਗ ਵਿੱਚ ਭੜਕੇ ਹੋਰ ਪ੍ਰਦਰਸ਼ਨਾਂ ਦੌਰਾਨ ਵੀ ਜੇਲ੍ਹ ਤੋਂ ਬਾਹਰ ਆਉਂਦਿਆਂ ਹੀ ਉਹ ਤੁਰੰਤ ਅੰਦੋਲਨ ਵਿੱਚ ਕੁੱਦ ਪਿਆ ਸੀ। ਇਸ ਮੁਕੱਦਮੇ ਦੀ ਦੁਨੀਆ ਭਰ ਦੀਆਂ ਮਨੁੱਖੀ ਅਧਿਕਾਰ ਸੰਸਥਾਵਾਂ ਅਤੇ ਵਿਦੇਸ਼ੀ ਆਗੂਆਂ ਨੇ ਤਿੱਖੀ ਨਿੰਦਾ ਕੀਤੀ ਹੈ।'ਕਮੇਟੀ ਫਾਰ ਫ੍ਰੀਡਮ ਇਨ ਹਾਂਗਕਾਂਗ ਫਾਊਂਡੇਸ਼ਨ' ਦੇ ਫ੍ਰਾਂਸਿਸ ਹੂਈ ਨੇ ਦੋਸ਼ ਲਗਾਇਆ ਕਿ ਚੀਨ ਸਰਕਾਰ ਵਾਂਗ ਨੂੰ ਲੰਬੇ ਸਮੇਂ ਤੱਕ ਜੇਲ੍ਹ ਵਿੱਚ ਰੱਖ ਕੇ ਉਸ ਦੀ ਲੋਕਤੰਤਰ ਪੱਖੀ ਆਵਾਜ਼ ਨੂੰ ਹਮੇਸ਼ਾ ਲਈ ਖ਼ਤਮ ਕਰਨਾ ਚਾਹੁੰਦੀ ਹੈ। ਹਿਊਮਨ ਰਾਈਟਸ ਵਾਚ ਦੀ ਏਸ਼ੀਆ ਡਾਇਰੈਕਟਰ ਇਲੇਨ ਪੀਅਰਸਨ ਨੇ ਕਿਹਾ ਕਿ ਵਾਂਗ 'ਤੇ ਇੱਕ ਤੋਂ ਬਾਅਦ ਇੱਕ ਦੋਸ਼ ਲਗਾ ਕੇ ਸਰਕਾਰ ਹਾਂਗਕਾਂਗ ਦੇ ਲੋਕਤੰਤਰ ਅੰਦੋਲਨ ਨੂੰ ਪੂਰੀ ਤਰ੍ਹਾਂ ਕੁਚਲਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਬ੍ਰਿਟੇਨ ਦੇ ਕੰਜ਼ਰਵੇਟਿਵ ਆਗੂ ਇਆਨ ਡੰਕਨ ਸਮਿਥ ਨੇ ਯੂਕੇ ਸਰਕਾਰ ਨੂੰ ਇਹ ਮੁੱਦਾ ਚੀਨ ਦੇ ਸਾਹਮਣੇ ਚੁੱਕਣ ਦੀ ਅਪੀਲ ਕੀਤੀ ।
ਸੁਣਵਾਈ ਦੌਰਾਨ ਅਦਾਲਤ ਵਿੱਚ ਜਗ੍ਹਾ ਪੱਕੀ ਕਰਨ ਲਈ ਸਮਰਥਕਾਂ ਨੇ ਰਾਤ ਭਰ ਕਤਾਰਾਂ ਲਗਾਈਆਂ ਸਨ। ਅਦਾਲਤ ਵਿੱਚ ਦਾਖਲ ਹੋਣ ਵੇਲੇ ਨੀਲੀ ਕਮੀਜ਼ ਅਤੇ ਕਾਲੀ ਐਨਕ ਪਹਿਨੇ ਵਾਂਗ ਨੇ ਆਪਣੇ ਸਮਰਥਕਾਂ ਵੱਲ ਦੇਖ ਕੇ ਹੱਥ ਹਿਲਾਇਆ। ਸੁਣਵਾਈ ਵਿੱਚ ਹਿੱਸਾ ਲੈਣ ਵਾਲੇ ਇੱਕ ਨਾਂ ਨਾ ਛਾਪਣ ਵਾਲੇ ਸਮਰਥਕ ਨੇ ਅਦਾਲਤੀ ਪ੍ਰਣਾਲੀ 'ਤੇ ਸਵਾਲ ਚੁੱਕਦਿਆਂ ਕਿਹਾ ਕਿ ਚੀਨ ਦੇ ਦਬਾਅ ਹੇਠ ਅਦਾਲਤਾਂ ਵਿੱਚ ਨਿਰਪੱਖ ਸੁਣਵਾਈ ਦੀ ਕੋਈ ਗੁੰਜਾਇਸ਼ ਨਹੀਂ ਬਚੀ ਅਤੇ ਵਾਂਗ ਵੱਲੋਂ ਗੁਨਾਹ ਕਬੂਲ ਕਰਨਾ ਇੱਕ ਮਜਬੂਰੀ ਹੈ, ਕਿਉਂਕਿ ਬੀਜਿੰਗ ਹਾਂਗਕਾਂਗ ਵਿੱਚ ਹਰ ਵਿਰੋਧੀ ਆਵਾਜ਼ ਨੂੰ ਜੜ੍ਹੋਂ ਖ਼ਤਮ ਕਰਨਾ ਚਾਹੁੰਦਾ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਪਾਕਿਸਤਾਨ 'ਚ ਮਹਿੰਗਾਈ ਨੇ ਤੋੜਿਆ ਲੱਕ ! ਕੇਂਦਰੀ ਬੈਂਕ ਲਈ ਵਿਆਜ ਦਰਾਂ 'ਚ ਰਿਆਇਤ ਦੇਣਾ ਹੋਇਆ ਔਖ਼ਾ
NEXT STORY 
