ਵੈਟੀਕਨ ਸਿਟੀ (ਵਾਰਤਾ) : ਦੁਨੀਆ ਭਰ ਦੇ ਕੈਥੋਲਿਕ ਈਸਾਈਆਂ ਦੇ ਧਾਰਮਿਕ ਆਗੂ ਪੋਪ ਫਰਾਂਸਿਸ ਦਾ ਅੰਤਿਮ ਸੰਸਕਾਰ 26 ਅਪ੍ਰੈਲ ਨੂੰ ਹੋਵੇਗਾ। 'ਹੋਲੀ ਸੀ' ਨੇ ਅੱਜ ਇਹ ਅਧਿਕਾਰਤ ਐਲਾਨ ਕੀਤਾ। 'ਹੋਲੀ ਸੀ' ਕੈਥੋਲਿਕ ਚਰਚ ਦੀ ਕੇਂਦਰੀ ਪ੍ਰਬੰਧਕ ਸੰਸਥਾ ਹੈ। ਇਹ ਵੈਟੀਕਨ ਸਿਟੀ 'ਚ ਸਥਿਤ ਹੈ ਤੇ ਪੋਪ ਦੇ ਅਧੀਨ ਕੰਮ ਕਰਦਾ ਹੈ। ਇਹ ਚਰਚ ਦੇ ਪ੍ਰਸ਼ਾਸਨ, ਅਨੁਸ਼ਾਸਨ ਤੇ ਅੰਤਰਰਾਸ਼ਟਰੀ ਸਬੰਧਾਂ ਲਈ ਜ਼ਿੰਮੇਵਾਰ ਹੈ।
ਪ੍ਰੈਸ ਸਰਵਿਸ ਨੇ ਇੱਕ ਬਿਆਨ 'ਚ ਕਿਹਾ ਕਿ ਸ਼ਨੀਵਾਰ, 26 ਅਪ੍ਰੈਲ, 2025 ਨੂੰ, ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10:00 ਵਜੇ, ਪੋਪ ਫਰਾਂਸਿਸ ਦਾ ਅੰਤਿਮ ਸੰਸਕਾਰ ਸੇਂਟ ਪੀਟਰਜ਼ ਬੇਸਿਲਿਕਾ ਦੇ ਸਾਹਮਣੇ ਕੀਤਾ ਜਾਵੇਗਾ। ਅੰਤਿਮ ਸੰਸਕਾਰ ਦੀ ਸੇਵਾ ਸੇਂਟ ਪੀਟਰਸ ਸਕੁਏਅਰ ਵਿੱਚ ਹੋਵੇਗੀ। ਇਸ ਮੌਕੇ 'ਤੇ ਕਾਲਜ ਆਫ਼ ਕਾਰਡੀਨਲਜ਼ ਦੇ ਡੀਨ, ਕਾਰਡੀਨਲ ਜਿਓਵਨੀ ਬੈਟਿਸਟਾ ਰੇ, ਅੰਤਿਮ ਸੰਸਕਾਰ ਦੀ ਪ੍ਰਾਰਥਨਾ ਦੀ ਅਗਵਾਈ ਕਰਨਗੇ। ਪੋਪ ਫਰਾਂਸਿਸ ਦੀ ਦੇਹ ਅੰਤਿਮ ਸੰਸਕਾਰ ਤੋਂ ਪਹਿਲਾਂ ਸੇਂਟ ਪੀਟਰਜ਼ ਬੇਸਿਲਿਕਾ ਵਿਖੇ ਰੱਖੀ ਜਾਵੇਗੀ, ਜਿੱਥੇ ਲੋਕ ਸ਼ਰਧਾਂਜਲੀ ਦੇ ਸਕਦੇ ਹਨ। ਅੰਤਿਮ ਸੰਸਕਾਰ ਤੋਂ ਬਾਅਦ, ਉਨ੍ਹਾਂ ਦੀ ਦੇਹ ਨੂੰ ਸਾਂਤਾ ਮਾਰੀਆ ਮੈਗੀਓਰ ਬੇਸਿਲਿਕਾ ਵਿੱਚ ਦਫ਼ਨਾਇਆ ਜਾਵੇਗਾ, ਜੋ ਕਿ ਪੋਪ ਫਰਾਂਸਿਸ ਦੀ ਇੱਛਾ ਸੀ।
ਪੋਪ ਫਰਾਂਸਿਸ ਦੀ ਮੌਤ ਤੋਂ ਬਾਅਦ, ਅਗਲੇ ਪੋਪ ਦੀ ਚੋਣ ਕਾਰਡੀਨਲ ਦੁਆਰਾ ਕੀਤੀ ਜਾਵੇਗੀ। ਇਸ ਪ੍ਰਕਿਰਿਆ ਵਿੱਚ 80 ਸਾਲ ਤੋਂ ਘੱਟ ਉਮਰ ਦੇ 115 ਕਾਰਡੀਨਲ ਹਿੱਸਾ ਲੈ ਸਕਦੇ ਹਨ। ਉਹ ਵੈਟੀਕਨ ਸਿਟੀ ਦੇ ਸਿਸਟੀਨ ਚੈਪਲ ਵਿੱਚ ਵੋਟ ਪਾਉਣਗੇ, ਜਿੱਥੇ ਦੋ ਤਿਹਾਈ ਬਹੁਮਤ ਨਵੇਂ ਪੋਪ ਦੀ ਚੋਣ ਕਰੇਗਾ। ਕੈਥੋਲਿਕ ਚਰਚ ਦੇ 266ਵੇਂ ਪੋਪ ਪੋਪ ਫਰਾਂਸਿਸ ਨੇ ਆਪਣੇ ਕਾਰਜਕਾਲ ਦੌਰਾਨ ਵਿਸ਼ਵ ਪੱਧਰ 'ਤੇ ਸ਼ਾਂਤੀ, ਪਿਆਰ, ਵਾਤਾਵਰਣ ਸੁਰੱਖਿਆ ਅਤੇ ਸਮਾਜਿਕ ਨਿਆਂ ਲਈ ਆਵਾਜ਼ ਬੁਲੰਦ ਕੀਤੀ। ਉਨ੍ਹਾਂ ਦੇ ਦੇਹਾਂਤ ਨਾਲ ਦੁਨੀਆ ਭਰ ਦੇ ਕੈਥੋਲਿਕ ਭਾਈਚਾਰੇ 'ਚ ਡੂੰਘਾ ਸੋਗ ਹੈ।
ਦੁਨੀਆ ਭਰ ਦੇ ਕਈ ਰਾਜਾਂ ਦੇ ਮੁਖੀ, ਧਾਰਮਿਕ ਆਗੂ ਅਤੇ ਸ਼ਰਧਾਲੂ ਉਨ੍ਹਾਂ ਦੇ ਅੰਤਿਮ ਸੰਸਕਾਰ ਸਮਾਰੋਹ 'ਚ ਸ਼ਾਮਲ ਹੋ ਸਕਦੇ ਹਨ। ਅਗਲੇ ਪੋਪ ਦੇ ਸੰਭਾਵੀ ਉੱਤਰਾਧਿਕਾਰੀ ਵਜੋਂ ਜਿਨ੍ਹਾਂ ਪ੍ਰਮੁੱਖ ਕਾਰਡੀਨਲਾਂ ਦੇ ਨਾਵਾਂ 'ਤੇ ਚਰਚਾ ਹੋ ਰਹੀ ਹੈ, ਉਨ੍ਹਾਂ ਵਿੱਚ ਕਾਰਡੀਨਲ ਲੁਈਸ ਐਂਟੋਨੀਓ ਟੈਗਲ, ਕਾਰਡੀਨਲ ਮੈਟੀਓ ਜ਼ੁਪੀ ਅਤੇ ਕਾਰਡੀਨਲ ਪੀਟਰ ਟਕਰਸਨ ਸ਼ਾਮਲ ਹਨ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਖਾਲਸਾ ਸਾਜਨਾ ਦਿਵਸ ਮੌਕੇ ਸਿਨਸਿਨਾਟੀ 'ਚ ਸ਼ਾਹੀ ਜਾਹੋ-ਜਲਾਲ ਨਾਲ ਕੱਢਿਆ ਗਿਆ ਵਿਸ਼ਾਲ ਨਗਰ ਕੀਰਤਨ
NEXT STORY 
