ਨਿਊਯਾਰਕ, (ਇੰਟਰਨੈਸ਼ਨਲ ਡੈਸਕ) : ਕ੍ਰਿਸਮਸ ਦੀ ਸ਼ਾਮ ਵੇਲੇ ਅਮਰੀਕਾ ਦੇ ਕਈ ਪ੍ਰਮੁੱਖ ਸ਼ਹਿਰਾਂ ਦੇ ਅਸਮਾਨ ਵਿੱਚ ਇੱਕ ਰਹੱਸਮਈ ਲਾਲ ਰਥ ਦੇਖੇ ਜਾਣ ਦੀਆਂ ਖਬਰਾਂ ਨੇ ਪੂਰੇ ਦੇਸ਼ ਵਿੱਚ ਉਤਸ਼ਾਹ ਪੈਦਾ ਕਰ ਦਿੱਤਾ ਹੈ। ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (ਪਹਿਲਾਂ ਟਵਿੱਟਰ) 'ਤੇ ਅਜਿਹੇ ਕਈ ਵੀਡੀਓਜ਼ ਵਾਇਰਲ ਹੋ ਰਹੇ ਹਨ, ਜਿਨ੍ਹਾਂ ਵਿੱਚ ਸਾਂਤਾ ਕਲਾਜ਼ ਵਰਗਾ ਦਿਖਣ ਵਾਲਾ ਇੱਕ ਵਿਅਕਤੀ ਚਮਕਦਾਰ ਲਾਲ ਰਥ 'ਤੇ ਸਵਾਰ ਹੋ ਕੇ ਉੱਡਦਾ ਦਿਖਾਈ ਦੇ ਰਿਹਾ ਹੈ।
ਪ੍ਰਮੁੱਖ ਸ਼ਹਿਰਾਂ ਵਿੱਚ ਦੇਖਿਆ ਗਿਆ ਨਜ਼ਾਰਾ
ਰਿਪੋਰਟਾਂ ਅਨੁਸਾਰ, ਇਹ ਨਜ਼ਾਰਾ ਨਿਊਯਾਰਕ ਸਿਟੀ ਵਿੱਚ ਸਟੈਚੂ ਆਫ ਲਿਬਰਟੀ ਦੇ ਉੱਪਰੋਂ ਲੰਘਦੇ ਹੋਏ ਦੇਖਿਆ ਗਿਆ। ਇਸ ਤੋਂ ਇਲਾਵਾ, ਸੈਨ ਫਰਾਂਸਿਸਕੋ, ਫਿਲਾਡੇਲਫੀਆ ਅਤੇ ਸ਼ਿਕਾਗੋ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਵੀ ਹਜ਼ਾਰਾਂ ਲੋਕਾਂ ਨੇ ਇਸ ਅਨੋਖੀ ਘਟਨਾ ਨੂੰ ਦੇਖਣ ਦਾ ਦਾਅਵਾ ਕੀਤਾ ਹੈ। ਚਸ਼ਮਦੀਦਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਅਸਮਾਨ ਵਿੱਚੋਂ ਘੰਟੀਆਂ ਵੱਜਣ ਦੀਆਂ ਮਿੱਠੀਆਂ ਆਵਾਜ਼ਾਂ ਅਤੇ ਸਾਂਤਾ ਦੇ ਹੱਸਣ ਦੀ 'ਜੌਲੀ' ਆਵਾਜ਼ ਵੀ ਸੁਣਾਈ ਦਿੱਤੀ।
ਕੀ ਇਹ ਕੋਈ ਡਰੋਨ ਸ਼ੋਅ ਹੈ?
ਹਾਲਾਂਕਿ ਅਜੇ ਤੱਕ ਇਸ ਗੱਲ ਦੀ ਪੁਸ਼ਟੀ ਨਹੀਂ ਹੋਈ ਹੈ ਕਿ ਇਹ ਉੱਡਦੀ ਵਸਤੂ ਅਸਲ ਵਿੱਚ ਕੀ ਸੀ, ਪਰ ਕੁਝ ਸੋਸ਼ਲ ਮੀਡੀਆ ਯੂਜ਼ਰਸ ਦਾ ਮੰਨਣਾ ਹੈ ਕਿ ਇਹ ਅਮਰੀਕੀ ਸਰਕਾਰ ਵੱਲੋਂ ਲੋਕਾਂ ਦੇ ਮਨੋਰੰਜਨ ਲਈ ਆਯੋਜਿਤ ਕੀਤਾ ਗਿਆ ਇੱਕ ਗੁਪਤ ਡਰੋਨ ਸ਼ੋਅ ਹੋ ਸਕਦਾ ਹੈ। ਇੰਟਰਨੈਟ 'ਤੇ ਅਜਿਹੀਆਂ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਜਾ ਰਹੀਆਂ ਹਨ ਜਿਨ੍ਹਾਂ ਵਿੱਚ 'ਰੇਨਡੀਅਰ' ਦੀ ਸ਼ਕਲ ਵਾਲੇ ਡਰੋਨ ਦਿਖਾਈ ਦੇ ਰਹੇ ਹਨ।
ਟ੍ਰੈਕਿੰਗ ਵੈੱਬਸਾਈਟਾਂ 'ਤੇ ਵੀ ਦਿਖੀ ਹਲਚਲ
ਦਿਲਚਸਪ ਗੱਲ ਇਹ ਹੈ ਕਿ ਫਲਾਈਟ ਟ੍ਰੈਕਿੰਗ ਵੈੱਬਸਾਈਟਾਂ ਨੇ 60,000 ਫੁੱਟ ਦੀ ਉਚਾਈ 'ਤੇ ਇਕ ਅਸਧਾਰਨ ਜਹਾਜ਼ ਟ੍ਰੈਕ ਕੀਤਾ ਹੈ, ਜਿਸਦਾ ਕਾਲ ਸਾਈਨ 'R3DN053'ਅਤੇ ਰਜਿਸਟ੍ਰੇਸ਼ਨ 'HOHOHO'ਦਰਸਾਈ ਗਈ ਸੀ। ਇਸ ਜਹਾਜ਼ ਦਾ ਰੂਟ 'ਨੌਰਥ ਪੋਲ ਟੂ ਨੌਰਥ ਪੋਲ' ਦੱਸਿਆ ਗਿਆ। ਇਸ ਦੇ ਨਾਲ ਹੀ, ਉੱਤਰੀ ਅਮਰੀਕੀ ਐਰੋਸਪੇਸ ਡਿਫੈਂਸ ਕਮਾਂਡ ਵੀ 1955 ਤੋਂ ਚਲੀ ਆ ਰਹੀ ਆਪਣੀ ਰਵਾਇਤ ਅਨੁਸਾਰ ਸਾਂਤਾ ਦੇ ਸਫਰ ਦੀ ਨਿਗਰਾਨੀ ਕਰ ਰਹੀ ਹੈ।
ਸ਼ਿਕਾਗੋ ਪੁਲਸ ਦੀ ਅਪੀਲ
ਇਸ ਦੌਰਾਨ, ਸ਼ਿਕਾਗੋ ਦੀ ਪੁਲਸ ਨੇ ਲੋਕਾਂ ਨੂੰ ਇੱਕ ਅਜੀਬ ਅਪੀਲ ਕਰਦਿਆਂ ਕਿਹਾ ਹੈ ਕਿ ਉਹ ਅਸਮਾਨ ਵਿੱਚ ਦਿਖਾਈ ਦੇ ਰਹੇ ਸਾਂਤਾ ਕਲਾਜ਼ 'ਤੇ ਗੋਲੀਆਂ ਨਾ ਚਲਾਉਣ। ਪੁਲਸ ਨੇ ਲੋਕਾਂ ਨੂੰ ਯਾਦ ਦਿਵਾਇਆ ਕਿ ਉਹ ਵਿਅਕਤੀ ਸਿਰਫ ਬੱਚਿਆਂ ਨੂੰ ਤੋਹਫੇ ਵੰਡਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।ਇਸ ਘਟਨਾ ਨੇ ਪੂਰੇ ਅਮਰੀਕਾ ਵਿੱਚ ਕ੍ਰਿਸਮਸ ਦੀਆਂ ਖੁਸ਼ੀਆਂ ਨੂੰ ਹੋਰ ਵਧਾ ਦਿੱਤਾ ਹੈ ਅਤੇ ਲੋਕ ਇਸ ਰਹੱਸਮਈ ਨਜ਼ਾਰੇ ਨੂੰ ਲੈ ਕੇ ਕਾਫੀ ਉਤਸ਼ਾਹਿਤ ਹਨ।
ਕੈਨੇਡਾ 'ਚ ਫ਼ਾਇਰਿੰਗ ਕਾਰਨ ਮਾਰੇ ਗਏ ਪੰਜਾਬੀ ਮੁੰਡਿਆਂ ਦੀ ਮ੍ਰਿਤਕ ਦੇਹ ਪਹੁੰਚੀ ਪੰਜਾਬ, ਨਹੀਂ ਵੇਖ ਹੁੰਦੇ ਪਰਿਵਾਰ ਦੇ ਹੰਝੂ
NEXT STORY 
