ਮੈਲਬੌਰਨ— ਆਸਟ੍ਰੇਲੀਆ ਦੇ ਸ਼ਹਿਰ ਮੈਲਬੌਰਨ 'ਚ ਇਕ ਪੰਜਾਬੀ ਟੈਕਸੀ ਡਰਾਈਵਰ ਨਾਲ ਕੁੱਟਮਾਰ ਹੋਣ ਦੀ ਖਬਰ ਹੈ। ਇਹ ਘਟਨਾ ਸ਼ਨੀਵਾਰ ਵਾਪਰੀ ਸੀ, ਜਿਸ ਦੀ ਵਿਸਥਾਰ ਜਾਣਕਾਰੀ ਪੀੜਤ ਨੇ ਹਸਪਤਾਲ 'ਚ ਛੁੱਟੀ ਮਿਲਣ ਮਗਰੋਂ ਹੁਣ ਦਿੱਤੀ ਹੈ। ਇਸ ਕੁੱਟਮਾਰ 'ਚ ਡਰਾਈਵਰ ਦੇ ਸਿਰ ਤੇ ਚਿਹਰੇ 'ਤੇ ਗੰਭੀਰ ਸੱਟਾਂ ਲੱਗੀਆਂ ਸਨ, ਨਾਲ ਹੀ ਨੱਕ ਦੀ ਹੱਡੀ ਵੀ ਟੁੱਟੀ ਹੈ।
ਰਿਪੋਰਟਾਂ ਮੁਤਾਬਕ, ਪੰਜਾਬੀ ਡਰਾਈਵਰ ਨੇ ਸ਼ਰਾਬੀ ਤੇ ਬਦਸਲੂਕੀ ਨਾਲ ਪੇਸ਼ ਆ ਰਹੇ ਕੁਝ ਯਾਤਰੀਆਂ ਨੂੰ ਸਰਵਿਸ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਡਰਾਈਵਰ ਦਾ ਇਹ ਵੀ ਕਹਿਣਾ ਹੈ ਕਿ ਉਸ ਨਾਲ ਕੁੱਟਮਾਰ ਦੌਰਾਨ ਨਸਲੀ ਟਿੱਪਣੀ ਵੀ ਕੀਤੀ ਗਈ। ਉਹ ਪਿਛਲੇ ਇਕ ਸਾਲ ਤੋਂ ਕਰਾਊਨ ਕੈਸੀਨੋ 'ਚ ਟੈਕਸੀ ਡਰਾਈਵਰ ਹੈ। ਡਰਾਈਵਰ ਨੇ ਕਿਹਾ ਕਿ ਰਾਤ ਸਮੇਂ ਟੈਕਸੀਆਂ ਲਾਈਨ 'ਚ ਲੱਗੀਆਂ ਸਨ ਤੇ ਉਸ ਦਾ ਸਵਾਰੀ ਲੈ ਜਾਣ ਦਾ ਚੌਥਾ ਨੰਬਰ ਸੀ। ਇਸ ਦੌਰਾਨ ਇਕ ਕੁੜੀ ਤੇ ਦੋ ਮੁੰਡੇ ਉਸ ਦੀ ਗੱਡੀ 'ਚ ਆ ਕੇ ਬੈਠ ਗਏ। ਉਸ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਉਸ ਦੀ ਟੈਕਸੀ ਦਾ ਨੰਬਰ ਅਜੇ ਲੇਟ ਆਉਣਾ ਹੈ, ਇਸ ਲਈ ਉਹ ਅਗਲੀ ਗੱਡੀ 'ਚ ਚਲੇ ਜਾਣ ਪਰ ਇਸ 'ਤੇ ਉਹ ਉਸ ਨੂੰ ਗਲਤ ਬੋਲਣ ਲੱਗ ਗਏ। ਫਿਰ ਟੈਕਸੀ 'ਚੋਂ ਬਾਹਰ ਨਿਕਲਦਿਆਂ ਇਕ ਮੁੰਡੇ ਨੇ ਉਸ ਦੀ ਪੱਗ ਖਿੱਚੀ ਅਤੇ ਬਾਹਰ ਸੁੱਟ ਦਿੱਤੀ।
ਉਹ ਆਪਣੀ ਪੱਗ ਚੁੱਕਣ ਗਿਆ ਤਾਂ ਉਸ ਨੇ ਉਸ 'ਤੇ ਹਮਲਾ ਕਰ ਦਿੱਤਾ। ਹੱਥੋ-ਪਾਈ ਦੌਰਾਨ ਉਸ ਦੇ ਨੱਕ ਦੀ ਹੱਡੀ ਟੁੱਟ ਗਈ ਤੇ ਉਸ ਦੇ ਚਿਹਰੇ 'ਤੇ ਸੱਟ ਲੱਗੀ। ਕੁਝ ਸਮੇਂ ਬਾਅਦ ਉਸ ਦੇ ਇਕ ਸਾਥੀ ਨੇ ਉਸ ਨੂੰ ਬਚਾਇਆ ਤੇ ਪੁਲਸ ਨੂੰ ਸੱਦਿਆ ਗਿਆ। ਉਸ ਨੇ ਮੰਗ ਕੀਤੀ ਕਿ ਇਸ ਮਾਮਲੇ ਦੀ ਚੰਗੀ ਤਰ੍ਹਾਂ ਜਾਂਚ ਹੋਣੀ ਚਾਹੀਦੀ ਹੈ ਤੇ ਦੋਸ਼ੀ ਨੂੰ ਸਜ਼ਾ ਮਿਲਣੀ ਚਾਹੀਦੀ ਹੈ ਤਾਂ ਕਿ ਕਿਸੇ ਹੋਰ ਨਾਲ ਅਜਿਹਾ ਨਾ ਹੋਵੇ।
ਟਰੰਪ ਨੇ ਹੁਣ ਈਰਾਨ ਦੇ ਸਟੀਲ ਤੇ ਹੋਰ ਉਦਯੋਗਾਂ 'ਤੇ ਲਾਇਆ ਬੈਨ
NEXT STORY 
