ਨਵੀਂ ਦਿੱਲੀ – ਮੱਧ ਪੂਰਬ ਖੇਤਰ ਵਿਚ ਤਣਾਅ ਅਤੇ ਏਅਰਲਾਈਨਜ਼ ਦੀ ਬਦਲੀ ਰਣਨੀਤੀ ਕਾਰਨ ਭਾਰਤ ਤੋਂ ਯੂਰਪ ਤੇ ਬ੍ਰਿਟੇਨ ਜਾਣ ਵਾਲੀਆਂ ਉਡਾਣਾਂ ਵਿਚ ਤੇਜ਼ੀ ਦੇਖਣ ਨੂੰ ਮਿਲ ਰਹੀ ਹੈ।
ਗਰਮੀ ਦੀਆਂ ਛੁੱਟੀਆਂ ਦੌਰਾਨ ਜਿੱਥੇ ਪੱਛਮੀ ਏਸ਼ੀਆ ਤੇ ਦੱਖਣ-ਪੂਰਬੀ ਏਸ਼ੀਆ ਦੇ ਕਈ ਰੂਟਾਂ ’ਤੇ ਸੀਟਾਂ ਦੀ ਸਮਰੱਥਾ ਘਟਾਈ ਗਈ ਹੈ, ਉੱਥੇ ਹੀ ਬ੍ਰਿਟੇਨ (ਯੂ. ਕੇ.) ਤੇ ਯੂਰਪ ਲਈ ਏਅਰਲਾਈਨਜ਼ ਨੇ ਵਾਧੂ ਉਡਾਣਾਂ ਅਤੇ ਵੱਡੇ ਜਹਾਜ਼ ਤਾਇਨਾਤ ਕੀਤੇ ਹਨ। ਇਸ ਦਾ ਸਿੱਧਾ ਫਾਇਦਾ ਭਾਰਤੀ ਯਾਤਰੀਆਂ ਨੂੰ ਮਿਲ ਰਿਹਾ ਹੈ।
ਏਅਰ ਇੰਡੀਆ ਦੀ ਰਣਨੀਤੀ ਨਾਲ ਬਦਲਿਆ ਕੌਮਾਂਤਰੀ ਬਾਜ਼ਾਰ
ਏਅਰ ਇੰਡੀਆ ਨੇ ਪਿਛਲੇ ਕੁਝ ਮਹੀਨਿਆਂ ਵਿਚ ਆਪਣੇ ਕੌਮਾਂਤਰੀ ਨੈੱਟਵਰਕ ਨੂੰ ਮੁੜ ਸੰਗਠਿਤ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਹੈ। ਜਹਾਜ਼ਾਂ ਦੀ ਡਿਲਿਵਰੀ ਵਿਚ ਦੇਰੀ, ਵਧਦੀ ਈਂਧਨ ਲਾਗਤ ਅਤੇ ਪਾਕਿਸਤਾਨ ਦੇ ਏਅਰਸਪੇਸ ਦੀਆਂ ਪਾਬੰਦੀਆਂ ਵਰਗੇ ਕਾਰਨਾਂ ਕਰ ਕੇ ਏਅਰਲਾਈਨ ਨੇ ਕਈ ਰੂਟਾਂ ’ਤੇ ਉਡਾਣਾਂ ਵਿਚ ਕਟੌਤੀ ਕੀਤੀ ਹੈ।
ਇਸ ਦਾ ਅਸਰ ਖਾਸ ਤੌਰ ’ਤੇ ਏਸ਼ੀਆਈ ਤੇ ਪੱਛਮੀ ਏਸ਼ੀਆਈ ਸੈਕਟਰ ’ਤੇ ਪਿਆ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਏਅਰ ਇੰਡੀਆ ਦੀ ਇਸ ਰਣਨੀਤੀ ਨਾਲ ਵਿਦੇਸ਼ੀ ਏਅਰਲਾਈਨਜ਼ ਨੂੰ ਭਾਰਤੀ ਬਾਜ਼ਾਰ ਵਿਚ ਆਪਣੀ ਮੌਜੂਦਗੀ ਮਜ਼ਬੂਤ ਕਰਨ ਦਾ ਮੌਕਾ ਮਿਲ ਗਿਆ ਹੈ। ਬ੍ਰਿਟਿਸ਼ ਏਅਰਵੇਜ਼, ਲੁਫਥਾਂਸਾ ਅਤੇ ਹੋਰ ਯੂਰਪੀ ਏਅਰਲਾਈਨਜ਼ ਨੇ ਭਾਰਤ ਤੋਂ ਸਿੱਧੀਆਂ ਉਡਾਣਾਂ ਅਤੇ ਸੀਟਾਂ ਦੀ ਗਿਣਤੀ ਵਿਚ ਵੱਡਾ ਵਾਧਾ ਕੀਤਾ ਹੈ।
ਯੂ. ਕੇ. ਬਣਿਆ ਸਭ ਤੋਂ ਵੱਡਾ ਲਾਭਪਾਤਰੀ
ਐਵੀਏਸ਼ਨ ਡਾਟਾ ਮੁਤਾਬਕ ਜੂਨ ਮਹੀਨੇ ਵਿਚ ਭਾਰਤ ਤੋਂ ਯੂ. ਕੇ. ਜਾਣ ਵਾਲੀ ਸੀਟ ਸਮਰੱਥਾ ਵਿਚ ਸਭ ਤੋਂ ਵੱਧ ਵਾਧਾ ਦਰਜ ਕੀਤਾ ਗਿਆ ਹੈ। ਏਅਰਲਾਈਨਜ਼ ਨੇ ਵਧਦੀ ਮੰਗ ਨੂੰ ਪੂਰਾ ਕਰਨ ਲਈ ਵੱਡੇ ਜਹਾਜ਼ਾਂ ਦੇ ਨਾਲ ਵਾਧੂ ਸੇਵਾਵਾਂ ਸ਼ੁਰੂ ਕੀਤੀਆਂ ਹਨ ਤਾਂ ਜੋ ਵਧਦੀ ਮੰਗ ਪੂਰੀ ਕੀਤੀ ਜਾ ਸਕੇ।
ਭਾਰਤੀ ਸੈਲਾਨੀਆਂ ਵਿਚ ਲੰਡਨ ਤੇ ਯੂਰਪ ਦੀਆਂ ਹੋਰ ਸੈਰਗਾਹਾਂ ਦੀ ਮੰਗ ਲਗਾਤਾਰ ਵਧ ਰਹੀ ਹੈ। ਯਾਤਰਾ ਉਦਯੋਗ ਨਾਲ ਜੁੜੇ ਲੋਕਾਂ ਦਾ ਕਹਿਣਾ ਹੈ ਕਿ ਪੱਛਮੀ ਏਸ਼ੀਆ ਵਿਚ ਜਾਰੀ ਬੇਯਕੀਨੀ ਕਾਰਨ ਵੱਡੀ ਗਿਣਤੀ ਵਿਚ ਯਾਤਰੀ ਹੁਣ ਟ੍ਰਾਂਜ਼ਿਟ ਦੀ ਬਜਾਏ ਸਿੱਧੇ ਯੂਰਪ ਜਾਣ ਨੂੰ ਪਹਿਲ ਦੇ ਰਹੇ ਹਨ। ਇਸ ਨਾਲ ਯੂਰਪੀ ਏਅਰਲਾਈਨਜ਼ ਨੂੰ ਵੱਡਾ ਫਾਇਦਾ ਮਿਲਿਆ ਹੈ।
ਦੱਖਣ-ਪੂਰਬੀ ਏਸ਼ੀਆ ਦੇ ਰੂਟ ’ਤੇ ਦਬਾਅ
ਦੂਜੇ ਪਾਸੇ ਥਾਈਲੈਂਡ, ਸਿੰਗਾਪੁਰ ਤੇ ਮਲੇਸ਼ੀਆ ਵਰਗੀਆਂ ਮਸ਼ਹੂਰ ਸੈਰਗਾਹਾਂ ਲਈ ਸੀਟ ਸਮਰੱਥਾ ਵਿਚ ਕਮੀ ਦੇਖੀ ਗਈ ਹੈ। ਕਈ ਏਅਰਲਾਈਨਜ਼ ਨੇ ਇਨ੍ਹਾਂ ਰੂਟਾਂ ’ਤੇ ਉਡਾਣਾਂ ਦੀ ਗਿਣਤੀ ਘਟਾ ਦਿੱਤੀ ਹੈ। ਇਸ ਕਾਰਨ ਕਿਰਾਇਆਂ ਵਿਚ ਵੀ 15 ਤੋਂ 30 ਫੀਸਦੀ ਤੱਕ ਵਾਧਾ ਦਰਜ ਕੀਤਾ ਜਾ ਰਿਹਾ ਹੈ। ਮਾਹਿਰਾਂ ਅਨੁਸਾਰ ਪੱਛਮੀ ਏਸ਼ੀਆ ਵਿਚ ਤਣਾਅ ਕਾਰਨ ਉਡਾਣਾਂ ਦੇ ਰਸਤੇ ਲੰਮੇ ਹੋ ਗਏ ਹਨ, ਜਿਸ ਨਾਲ ਸੰਚਾਲਨ ਲਾਗਤ ਵਧ ਗਈ ਹੈ। ਇਹੀ ਕਾਰਨ ਹੈ ਕਿ ਏਅਰਲਾਈਨਜ਼ ਫਿਲਹਾਲ ਉਨ੍ਹਾਂ ਰੂਟਾਂ ’ਤੇ ਜ਼ਿਆਦਾ ਫੋਕਸ ਕਰ ਰਹੀਆਂ ਹਨ ਜਿੱਥੇ ਮੰਗ ਤੇ ਮੁਨਾਫਾ ਦੋਵੇਂ ਜ਼ਿਆਦਾ ਹਨ।
ਸੈਰ-ਸਪਾਟਾ ਉਦਯੋਗ ਨੂੰ ਨਵੇਂ ਟ੍ਰੈਂਡ ਦੀ ਉਡੀਕ
ਟਰੈਵਲ ਇੰਡਸਟਰੀ ਦਾ ਮੰਨਣਾ ਹੈ ਕਿ ਆਉਣ ਵਾਲੇ ਮਹੀਨਿਆਂ ਵਿਚ ਕੌਮਾਂਤਰੀ ਯਾਤਰਾ ਦੇ ਪੈਟਰਨ ਵਿਚ ਹੋਰ ਬਦਲਾਅ ਦੇਖਣ ਨੂੰ ਮਿਲ ਸਕਦੇ ਹਨ। ਜੇਕਰ ਪੱਛਮੀ ਏਸ਼ੀਆ ਦੀ ਸਥਿਤੀ ਜਲਦੀ ਆਮ ਵਰਗੀ ਨਹੀਂ ਹੁੰਦੀ ਤਾਂ ਯੂਰਪ ਤੇ ਬ੍ਰਿਟੇਨ ਭਾਰਤੀ ਯਾਤਰੀਆਂ ਲਈ ਹੋਰ ਵੀ ਮਸ਼ਹੂਰ ਬਦਲ ਬਣ ਸਕਦੇ ਹਨ। ਏਅਰਲਾਈਨਜ਼ ਵੀ ਬਾਜ਼ਾਰ ਦੀ ਮੰਗ ਅਨੁਸਾਰ ਆਪਣੀ ਰਣਨੀਤੀ ਵਿਚ ਲਗਾਤਾਰ ਬਦਲਾਅ ਕਰ ਰਹੀਆਂ ਹਨ।
ਪਾਕਿ ਨੇ ਬਦਲਿਆ ਚੀਨੀ ਸੈਟੇਲਾਈਟ ਦਾ ਰਸਤਾ, ਨਿਸ਼ਾਨੇ ’ਤੇ ਗੁਜਰਾਤ ਅਤੇ ਕਸ਼ਮੀਰ
NEXT STORY 
