ਵੈੱਬ ਡੈਸਕ - ਸਵੇਰ ਦੇ ਸਮੇਂ ਅਕਸਰ ਸਾਰਿਆਂ ਨੂੰ ਅਜਿਹੇ ਨਾਸ਼ਤੇ ਦੀ ਤਲਾਸ਼ ਹੁੰਦੀ ਹੈ ਜੋ ਬਣਾਉਣ 'ਚ ਜਲਦੀ ਤਿਆਰ ਹੋ ਜਾਵੇ ਅਤੇ ਸਿਹਤ ਲਈ ਵੀ ਫਾਇਦੇਮੰਦ ਹੋਵੇ। ਮਹਾਰਾਸ਼ਟਰ ਦਾ ਮਸ਼ਹੂਰ 'ਕਾਂਦਾ ਪੋਹਾ' (ਪਿਆਜ਼ ਵਾਲਾ ਪੋਹਾ) ਅੱਜਕੱਲ੍ਹ ਪੂਰੇ ਭਾਰਤ 'ਚ ਹਰਮਨ ਪਿਆਰਾ ਹੋ ਰਿਹਾ ਹੈ। ਪੋਹਾ ਨਾ ਸਿਰਫ਼ ਆਇਰਨ ਅਤੇ ਕਾਰਬੋਹਾਈਡ੍ਰੇਟਸ ਨਾਲ ਭਰਪੂਰ ਹੁੰਦਾ ਹੈ, ਸਗੋਂ ਇਹ ਪਚਣ 'ਚ ਵੀ ਬਹੁਤ ਹਲਕਾ ਹੈ। ਅੱਜ ਅਸੀਂ ਤੁਹਾਨੂੰ ਦੱਸਾਂਗੇ ਕਿ ਕਿਵੇਂ ਤੁਸੀਂ ਰਸੋਈ 'ਚ ਮੌਜੂਦ ਸਧਾਰਨ ਚੀਜ਼ਾਂ ਨਾਲ ਬਾਜ਼ਾਰ ਵਰਗਾ ਖਿੜਿਆ-ਖਿੜਿਆ ਪੋਹਾ ਤਿਆਰ ਕਰ ਸਕਦੇ ਹੋ।
ਸਮੱਗਰੀ :-
- 2 ਕੱਪ ਪੋਹਾ (ਮੋਟਾ ਪੋਹਾ ਬਿਹਤਰ ਰਹਿੰਦਾ ਹੈ)
- 2 ਮੱਧਮ ਆਕਾਰ ਦੇ ਪਿਆਜ਼ (ਬਾਰੀਕ ਕੱਟੇ ਹੋਏ)
- 2-3 ਹਰੀਆਂ ਮਿਰਚਾਂ
- ਮੁੱਠੀ ਭਰ ਮੂੰਗਫਲੀ ਦੇ ਦਾਣੇ
- ਕੜੀ ਪੱਤਾ, ਰਾਈ (ਸਰੋਂ ਦੇ ਬੀਜ), ਹਲਦੀ ਅਤੇ ਨਮਕ
-- ਨਿੰਬੂ ਦਾ ਰਸ ਅਤੇ ਤਾਜ਼ਾ ਹਰਾ ਧਨੀਆ
ਬਣਾਉਣ ਦਾ ਸਹੀ ਤਰੀਕਾ :-
- ਪੋਹਾ ਬਣਾਉਣ ਦੀ ਸਭ ਤੋਂ ਅਹਿਮ ਕੜੀ ਇਸ ਨੂੰ ਭਿਉਂਣਾ ਹੈ। ਪੋਹੇ ਨੂੰ ਇਕ ਛਾਣਣੀ 'ਚ ਰੱਖ ਕੇ ਸਾਫ਼ ਪਾਣੀ ਨਾਲ ਧੋਵੋ ਅਤੇ 5 ਮਿੰਟ ਲਈ ਛੱਡ ਦਿਓ। ਯਾਦ ਰੱਖੋ, ਪੋਹੇ ਨੂੰ ਪਾਣੀ 'ਚ ਡੁਬੋ ਕੇ ਨਹੀਂ ਰੱਖਣਾ, ਨਹੀਂ ਤਾਂ ਇਹ ਚਿਪਕ ਜਾਵੇਗਾ। ਇਸ ਦੌਰਾਨ ਇਕ ਕੜਾਹੀ 'ਚ ਤੇਲ ਗਰਮ ਕਰੋ ਅਤੇ ਮੂੰਗਫਲੀ ਨੂੰ ਕ੍ਰਿਸਪੀ ਹੋਣ ਤੱਕ ਭੁੰਨ ਕੇ ਬਾਹਰ ਕੱਢ ਲਓ।
- ਹੁਣ ਉਸੇ ਤੇਲ 'ਚ ਰਾਈ ਅਤੇ ਕੜੀ ਪੱਤੇ ਦਾ ਤੜਕਾ ਲਗਾਓ। ਇਸ ਤੋਂ ਬਾਅਦ ਕੱਟੇ ਹੋਏ ਪਿਆਜ਼ ਅਤੇ ਹਰੀਆਂ ਮਿਰਚਾਂ ਪਾਓ। ਪਿਆਜ਼ ਨੂੰ ਬਹੁਤ ਜ਼ਿਆਦਾ ਲਾਲ ਨਹੀਂ ਕਰਨਾ, ਬਸ ਹਲਕਾ ਗੁਲਾਬੀ ਹੋਣ ਤੱਕ ਪਕਾਓ। ਹੁਣ ਇਸ 'ਚ ਹਲਦੀ ਅਤੇ ਨਮਕ ਪਾ ਕੇ ਚੰਗੀ ਤਰ੍ਹਾਂ ਮਿਲਾਓ। ਅਖੀਰ 'ਚ ਭਿੱਜਿਆ ਹੋਇਆ ਪੋਹਾ ਅਤੇ ਭੁੰਨੀ ਹੋਈ ਮੂੰਗਫਲੀ ਪਾ ਕੇ ਹਲਕੇ ਹੱਥਾਂ ਨਾਲ ਮਿਕਸ ਕਰੋ।
ਸਵਾਦ ਵਧਾਉਣ ਲਈ ਖਾਸ ਟਿਪ
- ਜਦੋਂ ਪੋਹਾ ਪੂਰੀ ਤਰ੍ਹਾਂ ਮਿਕਸ ਹੋ ਜਾਵੇ, ਤਾਂ ਇਸ 'ਤੇ ਹਲਕਾ ਜਿਹਾ ਪਾਣੀ ਦਾ ਛਿੱਟਾ ਮਾਰ ਕੇ 2 ਮਿੰਟ ਲਈ ਢੱਕ ਦਿਓ। ਇਸ ਨਾਲ ਪੋਹਾ ਨਰਮ ਅਤੇ ਖਿੜਿਆ ਹੋਇਆ ਬਣੇਗਾ। ਗੈਸ ਬੰਦ ਕਰਨ ਤੋਂ ਬਾਅਦ ਇਸ ਵਿੱਚ ਅੱਧੇ ਨਿੰਬੂ ਦਾ ਰਸ ਅਤੇ ਬਾਰੀਕ ਕੱਟਿਆ ਹਰਾ ਧਨੀਆ ਪਾਓ। ਤੁਹਾਡਾ ਗਰਮਾ-ਗਰਮ ਚਟਪਟਾ ਕਾਂਦਾ ਪੋਹਾ ਤਿਆਰ ਹੈ। ਇਸ ਨੂੰ ਤੁਸੀਂ ਉੱਪਰੋਂ ਬੇਸਨ ਦੀ ਸੇਵ (ਭੁਜੀਆ) ਪਾ ਕੇ ਸਰਵ ਕਰ ਸਕਦੇ ਹੋ।
ਦਿੱਲੀ ਸਰਕਾਰ ਦਾ ਔਰਤਾਂ ਤੇ ਟ੍ਰਾਂਸਜੈਂਡਰਾਂ ਨੂੰ ਵੱਡਾ ਤੋਹਫ਼ਾ, ਹੁਣ ਬੱਸਾਂ 'ਚ ਮੁਫ਼ਤ ਯਾਤਰਾ ਦੇ ਨਾਲ...
NEXT STORY 
