ਵੈੱਬ ਡੈਸਕ - ਅਜੋਕੇ ਸਮੇਂ 'ਚ ਬੱਚਿਆਂ ਤੋਂ ਲੈ ਕੇ ਵੱਡਿਆਂ ਤੱਕ ਹਰ ਕੋਈ ਚਾਈਨੀਜ਼ ਫੂਡ ਦਾ ਸ਼ੌਕੀਨ ਹੈ। ਬਾਹਰੋਂ ਮਿਲਣ ਵਾਲੇ ਸਪਰਿੰਗ ਰੋਲ ਸੁਆਦ ਤਾਂ ਹੁੰਦੇ ਹਨ, ਪਰ ਸਿਹਤ ਪੱਖੋਂ ਕਈ ਵਾਰ ਸਵਾਲ ਖੜ੍ਹੇ ਕਰਦੇ ਹਨ। ਜੇਕਰ ਤੁਸੀਂ ਵੀ ਰੈਸਟੋਰੈਂਟ ਵਰਗਾ ਸੁਆਦ ਘਰ 'ਚ ਹੀ ਲੈਣਾ ਚਾਹੁੰਦੇ ਹੋ, ਤਾਂ ਤੁਸੀਂ ਬੜੀ ਆਸਾਨੀ ਨਾਲ ਸਪਰਿੰਗ ਰੋਲ ਤਿਆਰ ਕਰ ਸਕਦੇ ਹੋ।
ਜ਼ਰੂਰੀ ਸਮੱਗਰੀ
ਸ਼ੀਟ ਲਈ
- 100 ਗ੍ਰਾਮ ਮੈਦਾ, 50 ਗ੍ਰਾਮ ਕੌਰਨ ਫਲੋਰ (ਵਿਕਲਪੀ), ਚੁਟਕੀ ਨਮਕ ਅਤੇ ਪਾਣੀ।
ਸਟਫਿੰਗ ਲਈ
- ਬੰਦ ਗੋਭੀ (ਬਾਰੀਕ ਕੱਟੀ ਹੋਈ), ਗਾਜਰ, ਸ਼ਿਮਲਾ ਮਿਰਚ, ਪਿਆਜ਼, ਅਤੇ ਫ਼ਰਾਂਸਬੀਨ।
ਮਸਾਲੇ
- ਨਮਕ, ਕਾਲੀ ਮਿਰਚ, ਸੋਇਆ ਸੌਸ, ਸਿਰਕਾ ਅਤੇ ਚਿੱਲੀ ਸੌਸ।
ਤਲਣ ਲਈ
- ਕੁਕਿੰਗ ਆਇਲ।
ਬਣਾਉਣ ਦਾ ਤਰੀਕਾ
ਸਪਰਿੰਗ ਰੋਲ ਸ਼ੀਟ ਤਿਆਰ ਕਰਨਾ
- ਸਭ ਤੋਂ ਪਹਿਲਾਂ ਇਕ ਭਾਂਡੇ 'ਚ ਮੈਦਾ, ਨਮਕ ਅਤੇ ਪਾਣੀ ਮਿਲਾ ਕੇ ਇਕ ਪਤਲਾ ਅਤੇ ਮੁਲਾਇਮ ਘੋਲ ਤਿਆਰ ਕਰ ਲਓ। ਇਕ ਨਾਨ-ਸਟਿਕ ਪੈਨ ਨੂੰ ਗਰਮ ਕਰੋ ਅਤੇ ਇਸ 'ਤੇ ਘੋਲ ਪਾ ਕੇ ਪਤਲੇ ਪੂੜੇ ਵਾਂਗ ਫੈਲਾਓ। ਜਦੋਂ ਇਹ ਕਿਨਾਰੇ ਛੱਡਣ ਲੱਗ ਜਾਵੇ, ਤਾਂ ਇਸਨੂੰ ਉਤਾਰ ਲਓ।
ਸਬਜ਼ੀਆਂ ਦੀ ਸਟਫਿੰਗ
- ਇਕ ਪੈਨ 'ਚ ਥੋੜ੍ਹਾ ਜਿਹਾ ਤੇਲ ਗਰਮ ਕਰੋ ਅਤੇ ਉਸ 'ਚ ਕੱਟੀਆਂ ਹੋਈਆਂ ਸਾਰੀਆਂ ਸਬਜ਼ੀਆਂ ਨੂੰ ਤੇਜ਼ ਅੱਗ 'ਤੇ 2-3 ਮਿੰਟ ਲਈ ਭੁੰਨੋ। ਸਬਜ਼ੀਆਂ ਨੂੰ ਪੂਰੀ ਤਰ੍ਹਾਂ ਨਹੀਂ ਗਾਲਣਾ, ਤਾਂ ਜੋ ਉਨ੍ਹਾਂ ਦਾ ਕੜਚਵਾਂਪਨ ਬਣਿਆ ਰਹੇ। ਹੁਣ ਇਸ 'ਚ ਸੋਇਆ ਸੌਸ, ਸਿਰਕਾ, ਨਮਕ ਅਤੇ ਮਿਰਚ ਮਿਲਾ ਕੇ ਠੰਢਾ ਹੋਣ ਲਈ ਰੱਖ ਦਿਓ।
ਰੋਲ ਬਣਾਉਣਾ ਅਤੇ ਬੰਦ ਕਰਨਾ
- ਤਿਆਰ ਕੀਤੀ ਹੋਈ ਸ਼ੀਟ ਦੇ ਇਕ ਕਿਨਾਰੇ 'ਤੇ ਸਬਜ਼ੀਆਂ ਦਾ ਮਿਸ਼ਰਣ ਰੱਖੋ। ਮੈਦੇ ਅਤੇ ਪਾਣੀ ਦਾ ਗਾੜ੍ਹਾ ਘੋਲ ਕਿਨਾਰਿਆਂ 'ਤੇ ਲਗਾਓ ਤਾਂ ਜੋ ਰੋਲ ਚੰਗੀ ਤਰ੍ਹਾਂ ਚਿਪਕ ਜਾਵੇ ਅਤੇ ਤਲਣ ਵੇਲੇ ਖੁੱਲ੍ਹੇ ਨਾ। ਇਸਨੂੰ ਸਾਵਧਾਨੀ ਨਾਲ ਰੋਲ ਕਰਦੇ ਹੋਏ ਦੋਵਾਂ ਪਾਸਿਆਂ ਤੋਂ ਬੰਦ ਕਰ ਦਿਓ।
ਫਰਾਈ ਕਰਨਾ
- ਕੜਾਹੀ 'ਚ ਤੇਲ ਗਰਮ ਕਰੋ ਅਤੇ ਮੱਧਮ ਅੱਗ 'ਤੇ ਇਨ੍ਹਾਂ ਰੋਲਜ਼ ਨੂੰ ਗੋਲਡਨ ਬ੍ਰਾਊਨ ਹੋਣ ਤੱਕ ਤਲੋ। ਗਰਮਾ-ਗਰਮ ਸਪਰਿੰਗ ਰੋਲਜ਼ ਨੂੰ ਆਪਣੀ ਪਸੰਦ ਦੀ ਚਟਨੀ ਜਾਂ ਟਮੈਟੋ ਕੈਚਪ ਨਾਲ ਸਰਵ ਕਰੋ।
ਚਿਹਰੇ 'ਤੇ ਚਾਹੁੰਦੇ ਹੋ ਕੁਦਰਤੀ ਨਿਖਾਰ ਤਾਂ ਅੱਜ ਹੀ ਵਰਤਣਾ ਸ਼ੁਰੂ ਕਰੋ ਐਲੋਵੇਰਾ ਜੈੱਲ, ਜਾਣੋ ਲਗਾਉਣ ਦਾ ਸਹੀ ਤਰੀਕਾ
NEXT STORY 
