ਅੰਮ੍ਰਿਤਸਰ(ਰਮਨ)- ਨਗਰ ਨਿਗਮ ਬਜਟ ਅਤੇ ਹਾਊਸ ਦੀ ਬੈਠਕ ਇਕ ਸਾਲ ਬਾਅਦ ਤਾਂ ਹੋਈ ਪਰ ਹੰਗਾਮੇ ਦੀ ਭੇਟ ਚੜ੍ਹ ਗਈ। ਇਤਿਹਾਸ ’ਚ ਪਹਿਲੀ ਵਾਰ ਹੋਇਆ ਕਿ ਹਾਊਸ ਦੀ ਬੈਠਕ ’ਚ ਮੇਅਰ ਵੱਲੋਂ ਕਿਸੇ ਨੂੰ ਵੀ ਕਿਸੇ ਤਰੀਕੇ ਦਾ ਸੰਬੋਧਨ ਨਹੀਂ ਕੀਤਾ ਗਿਆ। ਜਦੋਂ ਕਾਂਗਰਸੀ ਕੌਂਸਲਰਾਂ ਵੱਲੋਂ ਹਾਊਸ ਦੀ ਬੈਠਕ ਦੇ ਵਿਚਕਾਰ ਪਾਏ ਗਏ ਮਤਿਆਂ ’ਤੇ ਬਹਿਸ ਕਰਨੀ ਸ਼ੁਰੂ ਕੀਤੀ ਗਈ ਤਾਂ ਮੇਅਰ ‘ਪਾਸ-ਪਾਸ’ ਕਹਿੰਦੇ ਹੋਏ ਮੰਤਰੀ ਅਤੇ ਵਿਧਾਇਕਾਂ ਸਮੇਤ ਮੀਟਿੰਗ ਹਾਲ ’ਚੋਂ ਬਾਹਰ ਚਲੇ ਗਏ। ਨਿਗਮ ਹਾਊਸ ’ਚ ਜਦੋਂ ਬਜਟ ਅਤੇ ਹਾਊਸ ਦੀ ਬੈਠਕ ਨੂੰ ਲੈ ਕੇ ਕਾਂਗਰਸੀ ਕੌਂਸਲਰਾਂ ਵੱਲੋਂ ਰੌਲਾ ਪਾਇਆ ਜਾ ਰਿਹਾ ਸੀ ਤਾਂ ਸੀਨੀਅਰ ਡਿਪਟੀ ਮੇਅਰ ਵੱਲੋਂ ਖ਼ੁਦ ਕਮਾਨ ਸੰਭਾਲੀ ਗਈ। ਉਨ੍ਹਾਂ ਨਿਗਮ ਕਮਿਸ਼ਨਰ ਨੂੰ ਕਿਹਾ ਕਿ ਜਿਹੜੇ ਕੌਂਸਲਰ ਸਵਾਲ ਪੁੱਛ ਰਹੇ ਹਨ, ਉਸ ਦਾ ਉਹ ਜਵਾਬ ਦੇਣ ਕਿਉਂਕਿ ਸਾਰੇ ਲੋਕਾਂ ਦੇ ਚੁਣੇ ਹੋਏ ਨੁਮਾਇੰਦੇ ਹਨ।
ਇਹ ਵੀ ਪੜ੍ਹੋ- ਪੰਜਾਬ 'ਚ ਚਲਣਗੀਆਂ 860 ਵਿਸ਼ੇਸ਼ ਰੇਲ ਗੱਡੀਆਂ, ਕੇਂਦਰ ਸਰਕਾਰ ਦਾ ਵੱਡਾ ਫੈਸਲਾ
ਇਸ ਦੌਰਾਨ ਸਾਰੇ ਹਾਊਸ ਨੇ ਉਨ੍ਹਾਂ ਦੀ ਪ੍ਰਸ਼ੰਸਾ ਕੀਤੀ ਅਤੇ ਸ਼ਾਂਤਮਈ ਢੰਗ ਨਾਲ ਬੈਠ ਗਏ ਪਰ ਜਦੋਂ ਹਾਊਸ ਦੇ ਮਤੇ ਪੜ੍ਹੇ ਜਾ ਰਹੇ ਸਨ ਤਾਂ ਫਿਰ ਮਾਮਲਾ ਭਖ ਗਿਆ। ਕਾਂਗਰਸੀ, ਭਾਜਪਾ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਕੌਂਸਲਰ ਜ਼ਮੀਨ ’ਤੇ ਬੈਠ ਕੇ ਮੇਅਰ ਅਤੇ ਪੰਜਾਬ ਸਰਕਾਰ ਦੇ ਖ਼ਿਲਾਫ਼ ਨਾਅਰੇਬਾਜ਼ੀ ਕਰਨ ਲੱਗ ਪਏ। ਇਸ ਦੌਰਾਨ ਕਾਂਗਰਸੀ ਕੌਂਸਲਰਾਂ ਵੱਲੋਂ ਸਾਲਿਡ ਵੇਸਟ ਪ੍ਰਾਜੈਕਟ ’ਚ ਕਰੋੜਾਂ ਰੁਪਇਆ ਦੇ ਘਪਲੇ ਦੇ ਖ਼ੁਲਾਸੇ ਕਰਦੇ ਹੋਏ ਕਿਹਾ ਗਿਆ ਕਿ ਜ਼ਮੀਨੀ ਪੱਧਰ ’ਤੇ ਕੋਈ ਕੰਮ ਨਹੀਂ ਹੋ ਰਿਹਾ ਹੈ ਅਤੇ ਕਾਗ਼ਜ਼ਾਂ ’ਚ ਕੰਮ ਦਿਖਾ ਕੇ ਕੰਪਨੀਆਂ ਨੂੰ ਪੈਸੇ ਜਾਰੀ ਕੀਤੇ ਜਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜਿਹੜੀ ਹਾਊਸ ਅਤੇ ਬਜਟ ਦੀ ਬੈਠਕ ਹੋਈ ਹੈ, ਉਸ ’ਚ ਮੇਅਰ ਕੋਲ ਪੂਰਾ ਬਹੁਮਤ ਨਹੀਂ ਹੈ ਕਿਉਂਕਿ ਕਈ ਕੌਂਸਲਰ ਗੈਰ-ਹਾਜ਼ਰ ਸਨ। ਕਾਂਗਰਸੀ ਅਤੇ ਭਾਜਪਾ ਦੇ ਕੌਂਸਲਰਾਂ ਵੱਲੋਂ ਹਾਊਸ ਅਤੇ ਬਜਟ ਦੀ ਬੈਠਕ ’ਚ ਪਾਏ ਗਏ ਮਤਿਆਂ ’ਤੇ ਸਹਿਮਤੀ ਨਹੀਂ ਜਤਾਈ ਗਈ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਨੂੰ ਲੈ ਕੇ ਉਹ ਮਾਣਯੋਗ ਹਾਈਕੋਰਟ ਦਾ ਦਰਵਾਜ਼ਾ ਖੜਕਾਉਣਗੇ। ਬੈਠਕ ਸ਼ੁਰੂ ਹੋਣ ਤੋਂ ਪਹਿਲਾਂ ਕੌਂਸਲਰ ਵਿਕਾਸ ਸੋਨੀ ਵੱਲੋਂ ਮੰਗ ਕੀਤੀ ਗਈ ਕਿ ਡੀ. ਐੱਮ. ਗਗਨਦੀਪ ਸਿੰਘ ਰੰਧਾਵਾ ਦੀ ਮੌਤ ’ਤੇ ਦੋ ਮਿੰਟ ਦਾ ਮੌਨ ਰੱਖ ਕੇ ਸ਼ਰਧਾਂਜਲੀ ਦਿੱਤੀ ਜਾਵੇ, ਜਿਸ ਨੂੰ ਲੈ ਕੇ ਹਾਊਸ ਮੀਟਿੰਗ ’ਚ ਪੁੱਜੇ ਕੌਂਸਲਰਾਂ ਅਤੇ ਹੋਰ ਨੁਮਾਇੰਦਿਆਂ ਨੇ ਸ਼ਰਧਾਂਜਲੀ ਦਿੱਤੀ।
ਇਹ ਵੀ ਪੜ੍ਹੋ- ਪੰਜਾਬ ਪੁਲਸ ਦੇ ਸਬ-ਇੰਸਪੈਕਟਰ ਦੀ ਦਰਦਨਾਕ ਮੌਤ
ਦੱਸਣਯੋਗ ਹੈ ਕਿ ਨਗਰ ਨਿਗਮ ਅੰਮ੍ਰਿਤਸਰ ਦਾ ਸਾਲ 2026-27 ਦਾ ਅਨੁਮਾਨਤ ਬਜਟ ਕੁੱਲ 48118.64 ਲੱਖ ਰੁਪਏ (481.19 ਕਰੋੜ) ਦਾ ਪਾਸ ਕੀਤਾ ਗਿਆ ਹੈ ਅਤੇ ਸਰਕਾਰ ਵੱਲੋਂ ਪ੍ਰਾਪਤ ਹੋਣ ਵਾਲੀਆਂ ਗ੍ਰਾਂਟਾਂ ਇਸ ਨਾਲੋਂ ਵੱਖਰੇ ਤੌਰ ’ਤੇ ਹਨ, ਜਿਨ੍ਹਾਂ ਨਾਲ ਵੀ ਵਿਕਾਸ ਦੇ ਕੰਮ ਕਰਵਾਏ ਜਾਣਗੇ। ਜੇਕਰ ਸਰਕਾਰ ਵੱਲੋਂ ਕਿਸੇ ਵੀ ਟੈਕਸ ਫ਼ੀਸ ਆਦਿ ਦਾ ਵਾਧਾ ਕੀਤਾ ਜਾਵੇਗਾ ਤਾਂ ਉਸ ਅਨੁਸਾਰ ਨਗਰ ਨਿਗਮ ਦੀ ਆਮਦਨ ’ਚ ਵਾਧਾ ਵੱਖਰਾ ਹੋਵੇਗਾ।
38 ਏਜੰਡਿਆਂ ਦੇ ਨਾਲ 21 ਸਪਲੀਮੈਂਟਰੀ ਏਜੰਡੇ, 60 ਦੇ ਕਰੀਬ ਟੇਬਲ ਏਜੰਡੇ ਪਾਏ ਗਏ
ਹਾਊਸ ਦੀ ਬੈਠਕ ’ਚ 38 ਏਜੰਡਿਆਂ ਦਾ ਮਤਾ ਗਿਆ ਹੈ। ਇਸ ਦੇ ਨਾਲ 21 ਸਪਲੀਮੈਂਟਰੀ ਏਜੰਡੇ ਅਤੇ 60 ਦੇ ਕਰੀਬ ਕੌਂਸਲਰਾਂ ਵੱਲੋਂ ਟੇਬਲ ਏਜੰਡੇ ਪਾਏ ਗਏ ਹਨ। ਇਨ੍ਹਾਂ ’ਚ ਵਾਲਡ ਸਿਟੀ (ਅੰਦਰੂਨੀ ਇਲਾਕਿਆਂ) ਦੇ ਮੇਨ ਸੀਵਰ ਅਤੇ ਬ੍ਰਾਂਚ ਸੀਵਰ ਦੀ ਸਫ਼ਾਈ ਸੁਪਰ ਸੰਕਸ਼ਨ/ਮਿੰਨੀ ਸੁਪਰ ਸੰਕਸ਼ਨ ਮਸ਼ੀਨ ਨਾਲ ਕਰਵਾਉਣ ਸਬੰਧੀ, ਨਿਗਮ ਅਧੀਨ ਪੈਂਦੀਆਂ ਕਿਰਾਏ ਵਾਲੀਆਂ ਦੁਕਾਨਾਂ, ਲੀਜ਼ ਦੇ ਆਧਾਰ ’ਤੇ ਅਲਾਟ ਕੀਤੀਆਂ ਪ੍ਰੋਪਰਟੀਆਂ/ਦੁਕਾਨਾਂ ਅਤੇ ਨਿਗਮ ਦੀ ਮਾਲਕੀ ਵਾਲੇ ਪਲਾਟ/ਦੁਕਾਨਾਂ ਨੂੰ ਖੁੱਲ੍ਹੀ ਬੋਲੀ ਰਾਹੀਂ ਵੇਚਣ ਸਬੰਧੀ, ਹਲਕਾ ਉੱਤਰੀ ਦੀ ਵਾਰਡ ਨੰਬਰ 11 ਦੇ ਏਰੀਆ ਇੰਦਰਾ ਕਾਲੋਨੀ ਤੇ ਨਿਊ ਗ੍ਰੀਨ ਫੀਲਡ ਇੰਦਰਾ ਕਾਲੋਨੀ ਵਿਖੇ ਰੋਡ ਟਿਊਬਵੈੱਲ ਲਾਉਣ ਬਾਰੇ, ਵੱਖ-ਵੱਖ ਵਾਰਡਾਂ ’ਚ ਆਪ੍ਰੇਸ਼ਨ ਐਂਡ ਮੇਨਟੀਨੈਂਸ ਨਾਲ ਸਬੰਧਤ ਕੰਮਾਂ ਨੂੰ ਕਰਵਾਉਣ ਲਈ ਮਨਜ਼ੂਰੀ ਦੇਣ ਬਾਰੇ 10 ਕੰਮ (ਜਿਸ ’ਚ ਬਦਲੀਆਂ ਕਰਵਾਉਣ ਸਬੰਧੀ), ਵਪਾਰਕ ਖਪਤਕਾਰ ਨੂੰ ਵਾਟਰ ਮੀਟਰ ਖ਼ਰਾਬ ਹੋਣ ਦੀ ਸੂਰਤ ’ਚ ਸਰਕਾਰ ਦੇ ਨੋਟੀਫ਼ਿਕੇਸ਼ਨ ਅਨੁਸਾਰ ਤਿੰਨ ਗੁਣਾ ਰਾਸ਼ੀ ਤਹਿਤ ਬਿੱਲ ਜਾਰੀ ਕਰਨ ਬਾਰੇ, ਨਗਰ ਨਿਗਮ ਅੰਮ੍ਰਿਤਸਰ ’ਚ ਸੁਰੱਖਿਆ ਡਿਊਟੀ ਲਈ ਪੁਲਸ ਮੁਲਾਜ਼ਮਾਂ ਦੀਆਂ ਮਨਜ਼ੂਰਸ਼ੁਦਾ ਅਸਾਮੀਆਂ ’ਚ ਵਾਧਾ ਕਰਨ ਸਬੰਧੀ, ਹਰਵਿੰਦਰ ਸਿੰਘ (ਡਰਾਈਵਰ ਆਪ੍ਰੇਟਰ ਫ਼ਾਇਰ ਬ੍ਰਿਗੇਡ ਵਿਭਾਗ) ਦੇ ਤਬਾਦਲੇ ਸਬੰਧੀ, ਨਗਰ ਨਿਗਮ ਅੰਮ੍ਰਿਤਸਰ ਤੋਂ ਨਗਰ ਨਿਗਮ ਪਠਾਨਕੋਟ ਵਿਖੇ ਤਬਾਦਲਾ ਕਰਵਾਉਣ ਸਬੰਧੀ, ਨਗਰ ਨਿਗਮ ਜਲੰਧਰ ਤੋਂ ਨਗਰ ਨਿਗਮ ਅੰਮ੍ਰਿਤਸਰ ਵਿਖੇ ਤਬਾਦਲਾ ਕਰਵਾਉਣ ਸਬੰਧੀ, ਕਪਲ ਕੇਸ ਦੇ ਆਧਾਰ ’ਤੇ ਅੰਮ੍ਰਿਤਸਰ ਤੋਂ ਪਠਾਨਕੋਟ ਵਿਖੇ ਬਦਲੀ ਕਰਵਾਉਣ ਸਬੰਧੀ, ਸਿਵਲ ਵਿਭਾਗ ਅਧੀਨ ਵੱਖ-ਵੱਖ ਵਿਕਾਸ ਦੇ ਪ੍ਰਵਾਨਿਤ ਹੋਏ ਤਖਮੀਨਿਆਂ, ਵਾਤਾਵਰਣ ਵਣ ਅਤੇ ਕਮਿਸ਼ਨਰ ਨੈਸ਼ਨਲ ਕਲੀਨ ਏਅਰ ਪ੍ਰੋਗਰਾਮ ਸਬੰਧੀ ਮਾਣਯੋਗ ਹਾਊਸ ਨੂੰ ਸੂਚਿਤ ਕਰਨ ਬਾਰੇ, ਆਮ ਆਦਮੀ ਕਲੀਨਿਕ ਅਧੀਨ ਕਰਵਾਏ ਜਾਣ ਵਾਲੇ ਕੰਮਾਂ ਸਬੰਧੀ, ਫੋਕਲ ਪੁਆਇੰਟ ਅਧੀਨ ਵਿਕਾਸ ਦੇ ਕੰਮਾਂ ਸਬੰਧੀ, ਸ਼ਹਿਰ ਦੀਆਂ ਵੱਖ-ਵੱਖ ਵਾਰਡਾਂ ’ਚ ਆਪ੍ਰੇਸ਼ਨ ਐਂਡ ਮੇਨਟੀਨੈਂਸ ਨਾਲ ਸਬੰਧਤ ਕੰਮਾਂ ਨੂੰ ਕਰਵਾਉਣ ਲਈ ਮਨਜ਼ੂਰੀ ਦੇਣ ਬਾਰੇ ਅਤੇ ਗਊਸ਼ਾਲਾ ਦੀ ਮੁਰੰਮਤ ਕਰਵਾਉਣ ਬਾਰੇ ਆਦਿ ਸ਼ਾਮਲ ਹਨ।
ਇਹ ਵੀ ਪੜ੍ਹੋ- ਅੰਮ੍ਰਿਤਸਰ ਥਾਣੇ 'ਚ ਹੋਏ ਧਮਾਕੇ ਦੀ KLA ਨੇ ਲਈ ਜ਼ਿੰਮੇਵਾਰੀ
ਬਜਟ ਪਾਸ, ਪ੍ਰਕਿਰਿਆ ਫ਼ੇਲ
ਹਾਊਸ ਦੀ ਮੀਟਿੰਗ ਦੌਰਾਨ ਬਜਟ ਤਾਂ ਪਾਸ ਕੀਤਾ ਗਿਆ ਪਰ ਕਿਸੇ ਵੀ ਕੌਂਸਲਰ ਨੂੰ ਬਜਟ ਅਤੇ ਹਾਊਸ ਦੇ ਮਤਿਆਂ ’ਤੇ ਬੋਲਣ ਦਾ ਮੌਕਾ ਨਹੀਂ ਦਿੱਤਾ ਗਿਆ। ਜਦੋਂ ਕੌਂਸਲਰਾਂ ਵੱਲੋਂ ਇਸ ਸਬੰਧੀ ਵਿਰੋਧ ਕੀਤਾ ਗਿਆ ਤਾਂ ਮੇਅਰ ਵੱਲੋਂ ਮੀਟਿੰਗ ਨੂੰ ਵਿਚਾਲੇ ਛੱਡ ਕੇ ਬਿਨਾਂ ਕਿਸੇ ਜਵਾਬਦੇਹੀ ਤੋਂ ਸਾਰੇ ਮਤਿਆਂ ਨੂੰ ਪਾਸ ਕਰ ਦਿੱਤਾ ਗਿਆ, ਜਿਸ ਦਾ ਕਾਂਗਰਸੀ ਅਤੇ ਭਾਜਪਾ ਕੌਂਸਲਰਾਂ ਵੱਲੋਂ ਵਿਰੋਧ ਕੀਤਾ ਗਿਆ।
ਇਹ ਵੀ ਪੜ੍ਹੋ- ਅੰਮ੍ਰਿਤਸਰ ਹਵਾਈ ਅੱਡੇ ਨੂੰ ਲੈ ਕੇ ਅਹਿਮ ਖ਼ਬਰ: 6 ਮਹੀਨੇ ਤੱਕ...
ਜਾਅਲੀ ਮੇਅਰ ਨੂੰ ਏ. ਬੀ. ਸੀ. ਦਾ ਪਤਾ ਨਹੀਂ, ਜ਼ਬਰਦਸਤੀ ਕੁਰਸੀ ’ਤੇ ਬੈਠਾ ਹੈ
ਕਾਂਗਰਸੀ ਲੀਡਰ ਵਿਕਾਸ ਸੋਨੀ ਨੇ ਨਿਗਮ ਦੀ ਕਾਰਜਪ੍ਰਣਾਲੀ ’ਤੇ ਕਈ ਸਵਾਲੀਆ ਨਿਸ਼ਾਨ ਖੜ੍ਹੇ ਕਰਦਿਆਂ ਕਿਹਾ ਕਿ ਸਾਲਿਡ ਵੇਸਟ ਪ੍ਰਾਜੈਕਟ ਦੇ ਵਿਚਕਾਰ ਕਰੋੜਾਂ ਰੁਪਇਆ ਦਾ ਘਪਲਾ ਹੋ ਰਿਹਾ ਹੈ, ਜਿਸ ਨੂੰ ਲੈ ਕੇ ਹਾਊਸ ’ਚ ਇਨ੍ਹਾਂ ਨੂੰ ਜਵਾਬ ਦੇਣਾ ਪੈਣਾ ਸੀ ਪਰ ਉਨ੍ਹਾਂ ਨੇ ਮੇਅਰ ਨੂੰ ‘ਜਾਅਲੀ ਮੇਅਰ’ ਕਹਿੰਦੇ ਹੋਏ ਕਿਹਾ ਕਿ ਜਿਸ ਨੂੰ ਮੇਅਰਸ਼ਿਪ ਦੀ ਏ. ਬੀ. ਸੀ. ਨਹੀਂ ਪਤਾ, ਉਹ ਜ਼ਬਰਦਸਤੀ ਕੁਰਸੀ ’ਤੇ ਬੈਠਾ ਹੋਇਆ ਹੈ। ਉਨ੍ਹਾਂ ਨੇ ਚੱਲਦੇ ਹਾਊਸ ’ਚ ਵੀ ਕਮਿਸ਼ਨਰ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਅਸੀਂ ਇਸ ਨੂੰ ਮੇਅਰ ਨਹੀਂ ਮੰਨਦੇ ਹਾਂ। ਸੋਨੀ ਨੇ ਕਿਹਾ ਕਿ ਸਾਲਿਡ ਵੇਸਟ ਪ੍ਰਾਜੈਕਟ ’ਚ ਹਰ ਮਹੀਨੇ ਕਰੋੜਾਂ ਰੁਪਇਆ ਲੁਟਾਇਆ ਜਾ ਰਿਹਾ ਹੈ। ਡੰਪ ’ਤੇ ਬਾਇਓ-ਰੇਮੀਡੇਸ਼ਨ ਦੇ ਨਾਂ ’ਤੇ ਕੁਝ ਵੀ ਨਹੀਂ ਹੋ ਰਿਹਾ ਹੈ। ਮਸ਼ੀਨਰੀ ਬੰਦ ਪਈ ਹੈ ਅਤੇ ਜ਼ਮੀਨੀ ਪੱਧਰ ’ਤੇ ਕੋਈ ਕੰਮ ਨਹੀਂ ਹੋ ਰਿਹਾ ਪਰ ਕਰੋੜਾਂ ਰੁਪਏ ਹਰ ਮਹੀਨੇ ਦਿੱਲੀ ਦੀਆਂ ਕੰਪਨੀਆਂ ਨੂੰ ਦਿੱਤੇ ਜਾ ਰਹੇ ਹਨ। ਅਧਿਕਾਰੀ ਧਿਆਨ ਦੇਣ ਕਿ ਇਹ ਸਰਕਾਰੀ ਪੈਸਾ ਹੈ। ਇਸ ਦਾ ਹਿਸਾਬ ਹਰ ਮੌਜੂਦਾ ਅਫ਼ਸਰ ਨੂੰ ਦੇਣਾ ਪਵੇਗਾ।
ਕੌਂਸਲਰ ਨੀਤੂ ਟਾਂਗਰੀ ਨੇ ਕਿਹਾ ਕਿ ਹਾਊਸ ਦੀ ਬੈਠਕ ਨੂੰ ਲੈ ਕੇ ਕਿਸੇ ਵੀ ਕੌਂਸਲਰ ਨਾਲ ਕੋਈ ਚਰਚਾ ਨਹੀਂ ਹੋਈ। ਬੈਠਕ ’ਚ ਜਦੋਂ ਕਿਸੇ ਦੀ ਗੱਲ ਹੀ ਨਹੀਂ ਸੁਣਨੀ ਸੀ ਤਾਂ ਮੀਟਿੰਗ ਬੁਲਾਉਣ ਦਾ ਕੀ ਫ਼ਾਇਦਾ ਸੀ। ਉਨ੍ਹਾਂ ਕਿਹਾ ਕਿ ਹਾਊਸ ਦੀ ਮੀਟਿੰਗ ’ਚ ਮਤਾ ਨੰਬਰ 12 ਦੀ ਲੜੀ ਨੰਬਰ 5 ’ਚ ਜੋ ਪਾਇਆ ਗਿਆ ਹੈ, ਉਸ ’ਤੇ ਇਤਰਾਜ਼ ਜਤਾਇਆ ਗਿਆ ਹੈ ਕਿਉਂਕਿ ਉਸ ਦੀ ਵਿਜੀਲੈਂਸ ਬਿਊਰੋ ਵੱਲੋਂ ਜਾਂਚ-ਪੜਤਾਲ ਲਈ ਲਿਖਿਆ ਗਿਆ ਹੈ।
ਜ਼ਮੀਨੀ ਪੱਧਰ ’ਤੇ ਨਹੀਂ ਹੋ ਰਿਹਾ ਕੋਈ ਕੰਮ
ਭਾਜਪਾ ਦੇ ਕੌਂਸਲਰ ਅਮਨ ਐਰੀ ਨੇ ਕਿਹਾ ਕਿ ਨਗਰ ਨਿਗਮ ਦੇ ਬਾਹਰ ਲੱਗੀਆਂ ਟਾਈਲਾਂ ਦੀ ਮੁਰੰਮਤ ਦਾ ਇਕ ਕਰੋੜ ਰੁਪਏ ਦਾ ਮਤਾ ਪਾਇਆ ਗਿਆ ਹੈ, ਜੋ ਕਿ ਸਾਫ਼ ਤੌਰ ’ਤੇ ਦਿਸ ਰਿਹਾ ਹੈ ਕਿ ਇਹ ਪੈਸਾ ਕਿੱਥੇ ਲੱਗੇਗਾ। ਇਕ ਕਰੋੜ ਰੁਪਏ ਦੇ ਨਾਲ ਟਾਈਲਾਂ ਦੀ ਕਿੰਨੀ ਮੁਰੰਮਤ ਹੋ ਸਕਦੀ ਹੈ ਜੋ ਕਿ ਕੁਝ ਪੈਸਿਆਂ ਦੇ ਨਾਲ ਹੀ ਹੋ ਜਾਣੀ ਹੈ। ਭਾਜਪਾ ਦੇ ਕੌਂਸਲਰ ਵਿਕਾਸ ਗਿੱਲ ਨੇ ਕਿਹਾ ਕਿ ਨਿਗਮ ਵੱਲੋਂ ਕੇਂਦਰ ਦੇ ਪੈਸਿਆਂ ਨੂੰ ਖੁਰਦ-ਬੁਰਦ ਕੀਤਾ ਜਾ ਰਿਹਾ ਹੈ ਅਤੇ ਜ਼ਮੀਨੀ ਪੱਧਰ ’ਤੇ ਕੋਈ ਕੰਮ ਨਹੀਂ ਹੋ ਰਿਹਾ। ਠੇਕੇਦਾਰਾਂ ਨੂੰ ਮਿਲੀਭੁਗਤ ਨਾਲ ਬਿਨਾਂ ਵਜ੍ਹਾ ਪੈਸੇ ਜਾਰੀ ਕੀਤੇ ਜਾ ਰਹੇ ਹਨ। ਕੌਂਸਲਰ ਕੀਰਤੀ ਅਰੋੜਾ ਨੇ ਵੀ ‘ਆਪ’ ਨੂੰ ਲੰਮੇ ਹੱਥੀਂ ਲੈਂਦੇ ਹੋਏ ਕਿਹਾ ਕਿ ਸ਼ਹਿਰ ’ਚ ਕੋਈ ਵੀ ਵਿਕਾਸ ਕੰਮ ਨਹੀਂ ਹੋ ਰਿਹਾ। ਲੋਕ ਤਰਾਹ-ਤਰਾਹ ਕਰ ਰਹੇ ਹਨ। ਜਿੱਥੇ ਬੈਠਕ ’ਚ ਲੋਕਾਂ ਦੀ ਆਵਾਜ਼ ਨੂੰ ਬੁਲੰਦ ਕੀਤਾ ਜਾਣਾ ਸੀ, ਉਥੇ ਸੀਟਾਂ ’ਤੇ ਬੈਠੇ ਮੇਅਰ ਆਪਣੀ ਜ਼ਿੰਮੇਵਾਰੀ ਤੋਂ ਭੱਜਦੇ ਦੇਖੇ ਗਏ।
ਹਾਊਸ ਦੀ ਬੈਠਕ ’ਚ ਜਾਣ ਲਈ ਤਾਇਨਾਤ ਸੀ ਭਾਰੀ ਪੁਲਸ
ਹਾਊਸ ਦੀ ਬੈਠਕ ’ਚ ਜਾਣ ਲਈ ਇਸ ਵਾਰ ਨਿਗਮ ਪ੍ਰਸ਼ਾਸਨ ਵੱਲੋਂ ਸੁਰੱਖਿਆ ਨੂੰ ਲੈ ਕੇ ਸਖ਼ਤ ਪ੍ਰਬੰਧ ਕੀਤੇ ਗਏ ਸਨ। ਉਨ੍ਹਾਂ ਵੱਲੋਂ ਲਿਫ਼ਟ ਨੂੰ ਬੰਦ ਕਰ ਦਿੱਤਾ ਗਿਆ ਸੀ, ਜਿਸ ਨੂੰ ਲੈ ਕੇ ਲੋਕਾਂ ਅਤੇ ਬਜ਼ੁਰਗ ਕੌਂਸਲਰਾਂ ਨੂੰ ਕਾਫ਼ੀ ਜ਼ਿਆਦਾ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ। ਪੌੜੀਆਂ ਦਾ ਇਕ ਰਸਤਾ ਬੰਦ ਕੀਤਾ ਗਿਆ ਸੀ। ਮੀਟਿੰਗ ਹਾਲ ਨੂੰ ਜਾਣ ਲਈ ਦੂਜੀ ਮੰਜ਼ਿਲ ’ਤੇ ਪੁਲਸ ਵੱਲੋਂ ਬੈਰੀਕੇਡਿੰਗ ਕੀਤੀ ਹੋਈ ਸੀ। ਉਥੇ ਅਧਿਕਾਰੀਆਂ ਦਾ ਇਕ ਟੇਬਲ ਲਾਇਆ ਗਿਆ ਸੀ ਅਤੇ ਕੌਂਸਲਰਾਂ ਦੀ ਪਛਾਣ ਕਰਕੇ ਹੀ ਮੀਟਿੰਗ ਹਾਲ ’ਚ ਜਾਣ ਦਿੱਤਾ ਜਾਂਦਾ ਸੀ। ਜਦੋਂ ਕੌਂਸਲਰ ਅਸ਼ੋਕ ਕੁਮਾਰ ਮੀਟਿੰਗ ਹਾਲ ’ਚ ਪੁਲਸ ਦੇ ਸਾਹਮਣੇ ਹੋ ਕੇ ਨਿਕਲੇ ਤਾਂ ਕਾਂਗਰਸੀ ਕੌਂਸਲਰਾਂ ਨੇ ਵਿਰੋਧ ਕੀਤਾ ਕਿ ਇਕ ਤਾਂ ਕੌਂਸਲਰ ’ਤੇ ਐੱਫ. ਆਈ. ਆਰ. ਦਰਜ ਹੈ ਅਤੇ ਦੂਜਾ ਪੁਲਸ ਹੀ ਉਸ ਨੂੰ ਗ੍ਰਿਫ਼ਤਾਰ ਕਰਨ ਦੀ ਬਜਾਏ ਮੀਟਿੰਗ ਹਾਲ ’ਚ ਭੇਜ ਰਹੀ ਹੈ, ਜਿਸ ਦਾ ਪੁਲਸ ਨੇ ਜਵਾਬ ਦਿੱਤਾ ਕਿ ਉਨ੍ਹਾਂ ਨੂੰ ਇਸ ਸਬੰਧੀ ਜਾਣਕਾਰੀ ਨਹੀਂ ਸੀ। ਬੈਰੀਕੇਡਿੰਗ ’ਚ ਜਦੋਂ ਸੱਤਾਧਾਰੀ ਪਾਰਟੀ ਦੇ ਕੁਝ ਲੀਡਰ (ਜੋ ਕੌਂਸਲਰ ਨਹੀਂ ਸਨ) ਇਸ ਰਸਤੇ ਵਿਚਕਾਰੋਂ ਨਿਕਲੇ ਤਾਂ ਪੁਲਸ ਦੇ ਨਾਲ ਕਾਂਗਰਸੀ ਲੀਡਰਾਂ ਦੀ ਵੀ ਧੱਕਾਮੁੱਕੀ ਹੋਈ।
ਟਰੱਸਟ ਵੱਲੋਂ 30-30 ਲੱਖ ਦੇ ਕੰਮ ਪਾਸ ਪਰ ਨਿਗਮ ਵੱਲੋਂ ਨਹੀਂ ਦਿੱਤੀ ਜਾ ਰਹੀ ਐੱਨ. ਓ. ਸੀ.
ਨਗਰ ਸੁਧਾਰ ਟਰੱਸਟ ਵੱਲੋਂ ਸ਼ਹਿਰ ਦੀਆਂ 85 ਵਾਰਡਾਂ ਦੇ ਵਿਕਾਸ ਕੰਮਾਂ ਨੂੰ ਲੈ ਕੇ ਸਰਕਾਰ ਵੱਲੋਂ ਧਾਰਾ 69-ਏ ਤਹਿਤ 30-30 ਲੱਖ ਰੁਪਏ ਦੇ ਕੰਮ ਪਾਸ ਕਰਵਾਏ ਗਏ ਸਨ ਪਰ ਨਗਰ ਨਿਗਮ ਦੇ ਅਧਿਕਾਰੀਆਂ ਵੱਲੋਂ ਐੱਨ. ਓ. ਸੀ. ਜਾਰੀ ਨਹੀਂ ਕੀਤੀ ਜਾ ਰਹੀ ਸੀ। ਇਸ ਨੂੰ ਲੈ ਕੇ ਸੱਤਾਧਾਰੀ ਕੌਂਸਲਰਾਂ ਦੇ ਨਾਲ-ਨਾਲ ਕਾਂਗਰਸੀ, ਭਾਜਪਾ ਅਤੇ ਅਕਾਲੀ ਦਲ ਦੇ ਕੌਂਸਲਰ ਵੀ ਪ੍ਰੇਸ਼ਾਨ ਸਨ ਕਿਉਂਕਿ ਅਧਿਕਾਰੀ ਉਨ੍ਹਾਂ ਨੂੰ ਐੱਨ. ਓ. ਸੀ. ਜਾਰੀ ਨਹੀਂ ਕਰਦੇ ਸਨ। ਇਸ ਨੂੰ ਲੈ ਕੇ ਸੀਨੀਅਰ ਡਿਪਟੀ ਮੇਅਰ ਵੱਲੋਂ ਟੇਬਲ ਏਜੰਡਾ ਪਵਾ ਕੇ ਪਾਸ ਕਰਵਾਇਆ ਗਿਆ ਹੈ। ਹੁਣ ਦੇਖਣਾ ਇਹ ਹੈ ਕਿ ਕੀ ਨਿਗਮ ਅਧਿਕਾਰੀ ਹੁਣ ਐੱਨ. ਓ. ਸੀ. ਜਾਰੀ ਕਰਦੇ ਹਨ ਜਾਂ ਨਹੀਂ?
ਸਾਲ ਬਾਅਦ ਹੋਈ ਹਾਊਸ ਦੀ ਬੈਠਕ ’ਚ ਕਾਂਗਰਸੀ ਕੌਂਸਲਰ ਅਤੇ ਜ਼ਿਲਾ ਪ੍ਰਧਾਨ ਰਹੇ ਗੈਰ-ਹਾਜ਼ਰ
ਕਾਂਗਰਸ ਪਾਰਟੀ ਦੀ ਸ਼ਹਿਰ ’ਚ ਨੁਮਾਇੰਦਗੀ ਕਰਨ ਵਾਲੇ ਕੌਂਸਲਰ ਅਤੇ ਜ਼ਿਲਾ ਪ੍ਰਧਾਨ (ਸ਼ਹਿਰੀ) ਸੌਰਭ ਮਦਾਨ ਮਿੱਠੂ ਇਸ ਬੈਠਕ ’ਚ ਗੈਰ-ਹਾਜ਼ਰ ਦਿਸੇ। ਉਨ੍ਹਾਂ ਦੇ ਨਾਲ ਸ਼ਹਿਰ ਦੇ ਕਈ ਹੋਰ ਕੌਂਸਲਰ ਵੀ ਗੈਰ-ਹਾਜ਼ਰ ਸਨ। ਨਿਗਮ ਹਾਊਸ ਦੇ ਵਿਚਕਾਰ ਲਗਭਗ 70 ਦੇ ਕਰੀਬ ਕੌਂਸਲਰਾਂ ਨੇ ਆਪਣੀ ਹਾਜ਼ਰੀ ਦਿਖਾਈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e
ਕੇਂਦਰੀ ਜੇਲ੍ਹ ’ਚੋਂ ਫਿਰ ਮੋਬਾਈਲ ਬਰਾਮਦ
NEXT STORY 
