ਪਟਿਆਲਾ/ਘਨੌਰ, (ਜੋਸਨ, ਅਲੀ,ਪਰਮੀਤ)— ਪੰਜਾਬ ’ਚ 3-4 ਦਿਨਾਂ ਤੋਂ ਹੋ ਰਹੀ ਲਗਾਤਾਰ ਬਾਰਸ਼ ਨਾਲ ਆਮ ਲੋਕਾਂ ਨੂੰ ਗਰਮੀ ਤੋਂ ਰਾਹਤ ਮਿਲੀ ਹੈ। ਦੂਜੇ ਪਾਸੇ ਘੱਗਰ ਅਤੇ ਪੰਚੀਦਰਾ ਨਹਿਰ ਨੇਡ਼ਲੇ ਪਿੰਡਾਂ ਦੇ ਲੋਕਾਂ ਦੀਆਂ ਮੁਸੀਬਤਾਂ ਵਧ ਗਈਆਂ ਹਨ। ਘਨੌਰ ਅਤੇ ਸਨੌਰ ਨੇਡ਼ੇ ਲੰਘ ਰਹੇ ਘੱਗਰ ਦਰਿਆ ’ਚ ਪਾਣੀ ਦਾ ਪੱਧਰ ਖਤਰੇ ਦੇ ਨਿਸ਼ਾਨ ਨੇਡ਼ੇ ਪੁੱਜ ਚੁੱਕਾ ਹੈ। ਇਸ ਕਾਰਣ ਕਈ ਪਿੰਡਾਂ ਦੇ ਲੋਕ ਸਹਿਮੇ ਹੋਏ ਹਨ। ਕਈ ਪਿੰਡਾਂ ’ਚ ਜਲਥਲ ਹੋ ਗਿਆ ਹੈ। ਇਸ ਦੌਰਾਨ ਮੀਰਾਂਪੁਰ ਚੋਅ ਵੀ ਉਛਲ ਪਿਆ ਹੈ। ਇਸੇ ਕਾਰਨ ਸਨੌਰ ਵੱਲ ਪੈਂਦੀਆਂ ਕਾਲੋਨੀਆਂ ਨੂੰ ਖਾਲੀ ਕਰਵਾ ਲਿਆ ਗਿਆ ਹੈ। ਸਰਕਾਰੀ ਸੂਤਰਾਂ ਦੇ ਮੁਤਾਬਕ ਪਿਛਲੇ 2 ਦਿਨਾਂ ਤੋਂ ਪੈ ਰਹੇ ਮੀਂਹ ਦੇ ਕਾਰਨ ਪਟਿਆਲਾ ਦੀ ਨਦੀ 'ਚ 16 ਜੁਲਾਈ ਦੀ ਸਵੇਰੇ 6 ਵਜੇ 9. 7 ਫੁੱਟ, ਜਦਕਿ ਘੱਗਰ 'ਚ ਵੀ ਪਾਣੀ ਸਰਾਲਾ ਹੈਡ 'ਤੇ ਪਾਣੀ ਦਾ ਪੱਧਰ 16.25 ਫੁੱਟ ਜਾ ਪਹੁੰਚਿਆ ਹੈ। ਪਿਛਲੇ 3-4 ਦਿਨਾਂ ਤੋਂ ਭਾਰੀ ਮੀਂਹ ਪੈਣ ਨਾਲ ਇਸ ਖੇਤਰ ’ਚੋੋਂ ਲੰਘਦੇ ਘੱਗਰ ਦਰਿਆ, ਪੰਚੀਦਰਾ ਨਹਿਰ ਆਦਿ ਸਮੇਤ ਹੋਰਨਾਂ ਨਦੀ ਨਾਲਿਆਂ ’ਚ ਪਾਣੀ ਦਾ ਪੱਧਰ ਵਧਣ ਕਾਰਣ ਘੱਗਰ ਦਰਿਆ ਨੱਕੋ-ਨੱਕ ਹੋ ਚੁੱਕਾ ਹੈ। ਕਈ ਕਿਸਾਨਾਂ ਦੀਆਂ ਫਸਲਾਂ ਪਾਣੀ ਦੀ ਲਪੇਟ ਵਿਚ ਆ ਗਈਆਂ ਹਨ। ਅੱਧੀ ਦਰਜਨ ਪਿੰਡਾਂ ਦੇ ਰਿਹਾਇਸ਼ ਵਾਲੀ ਅਬਾਦੀ ’ਚ ਪਾਣੀ ਹੀ ਪਾਣੀ ਹੋ ਗਿਆ ਹੈ। ਸਵੇਰ ਵੇਲੇ ਘੱਗਰ ਦਰਿਆ ’ਚ ਕਰੀਬ ਸਾਢੇ 14 ਫੁੱਟ ਉਚਾਈ ਦੇ ਲੈਵਲ ਨਾਲ ਪਾਣੀ ਵਹਿ ਰਿਹਾ ਸੀ, ਜੋ ਕਿ ਖਤਰੇ ਦੇ ਨਿਸ਼ਾਨ ਦੇ ਬਿਲਕੁੱਲ ਨੇਡ਼ੇ ਸੀ। ਘੱਗਰ ਦੇ ਨਾਲ ਹੀ ਲੰਘ ਰਹੀ ਐੱਸ. ਵਾਈ. ਐੱਲ. ਨਹਿਰ, ਪੰਚੀਦਰਾ ਅਤੇ ਗੰਦਾ ਨਾਲਾ ਵੀ ਬਰਸਾਤੀ ਪਾਣੀ ਨਾਲ ਨੱਕੋ-ਨੱਕ ਹੋਏ ਸਨ। ਇਲਾਕਾ ਨਿਵਾਸੀਆਂ ਨੇ ਰੋਸ ਪ੍ਰਗਟ ਕਰਦਿਆਂ ਕਿਹਾ ਕਿ ਪ੍ਰਸ਼ਾਸਨ ਨੂੰ ਹਰ ਸਾਲ ਬਾਅਦ ਹਡ਼੍ਹਾਂ ’ਚ ਹੀ ਘੱਗਰ ਦੀ ਯਾਦ ਆਉਂਦੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਘੱਗਰ ਦਰਿਆ ਦੀ ਪਹਿਲਾਂ ਹੀ ਸਫਾਈ ਕੀਤੀ ਜਾਂਦੀ ਤਾਂ ਘੱਗਰ ’ਚ ਉੱਗੇ ਘਾਹ-ਫੂਸ ਕਾਰਣ ਪਾਣੀ ਨੂੰ ਡਾਫ (ਰੋਕ) ਨਾ ਲਗਦੀ। ਪ੍ਰਸ਼ਾਸਨ ਵੱਲੋਂ ਹਡ਼੍ਹ-ਰੋਕੂ ਪੁਖਤਾ ਪ੍ਰਬੰਧ ਨਾ ਹੋਣ ਕਾਰਣ ਘੱਗਰ ’ਚ ਉੱਗੀ ਬੂਟੀ ਹੀ ਚਲਦੇ ਪਾਣੀ ਨੂੰ ਰੋਕਣ ਦਾ ਕਾਰਣ ਬਣਦੀ ਹੈ।
ਅਧਿਆਪਕ ਨੂੰ ਟਰੈਕਟਰ ਦੀ ਸਹਾਇਤਾ ਨਾਲ ਸਕੂਲ ’ਚ ਪਹੁੰਚਾਇਆ ਪਿੰਡ ਸਮਸ਼ਪੁਰ ਤੋਂ ਵਾਇਆ ਲੋਹਸਿੰਬਲੀ ਰਾਹੀਂ ਅੰਬਾਲਾ ਸ਼ਹਿਰ ਨੂੰ ਜਾਣ ਵਾਲੀ ਸਡ਼ਕ ’ਤੇ 3-3 ਫੁੱਟ ਪਾਣੀ ਹੋਣ ਕਾਰਨ ਬੱਸ ਸੇਵਾ ਸਮੇਤ ਹੋਰ ਵਾਹਨਾਂ ਨੂੰ ਵੀ ਲੰਘਣਾ ਔਖਾ ਹੋ ਰਿਹਾ ਹੈ। ਭਾਰੀ ਮੀਂਹ ਦੇ ਪਾਣੀ ਪਿੰਡਾਂ ’ਚ ਲੋਕਾਂ ਦਾ ਜਨ-ਜੀਵਨ ਪ੍ਰਭਾਵਿਤ ਹੋਇਆ ਪਿਆ ਹੈ। ਪਾਣੀ ਕਾਰਣ ਪਿੰਡ ਗਦਾਪੁਰ ਸਕੂਲ ਦੇ ਅਧਿਆਪਕ ਦਾ ਸਕੂਲ ’ਚ ਪਹੁੰਚਣਾ ਮੁਸ਼ਕਲ ਸੀ। ਉਨ੍ਹਾਂ ਨੂੰ ਪਿੰਡ ਦੇ ਯੂਥ ਆਗੂਆਂ ਨੇ ਟਰੈਕਟਰ ਦਾ ਸਹਾਇਤਾ ਨਾਲ ਸਕੂਲ ’ਚ ਪਹੁੰਚਾਇਆ।
ਕਿਸਾਨਾਂ ਦੀਆਂ ਫ਼ਸਲਾਂ ’ਚ ਭਰਿਆ ਪਾਣੀ
ਬਾਰਸ਼ ਦੇ ਪਾਣੀ ਦਾ ਪੱਧਰ ਵਧਣ ਕਾਰਨ ਪਿੰਡ ਸਮਸ਼ਪੁਰ, ਉਂਟਸਰ, ਸੰਜਰਪੁਰ, ਬੱਲੋਪੁਰ, ਕਾਮੀ ਖੁਰਦ, ਚਮਾਰੂ ਅਤੇ ਜੰਡ ਮੰਗੌਲੀ ਅਤੇ ਗਦਾਪੁਰ ਸਮੇਤ ਕਈ ਪਿੰਡਾਂ ਦੇ ਕਿਸਾਨਾਂ ਦੀ ਸੈਂਕਡ਼ੇ ਏਕਡ਼ ਫਸਲਾਂ ’ਚ ਪਾਣੀ ’ਚ ਡੁੱਬ ਗਈ ਹੈ। ਪਾਣੀ ਕਾਰਣ ਕਿਸਾਨਾਂ ਨੂੰ ਪਸ਼ੂਆਂ ਲਈ ਹਰੇ ਚਾਰੇ ਲਈ ਵੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਆਏ ਫੰਡਾਂ ਅਨੁਸਾਰ ਹੀ ਕਰਵਾਈ ਜਾਂਦੀ ਹੈ ਸਫ਼ਾਈ : ਐਕਸੀਅਨ ਬੈਂਸ
ਇਸ ਮੌਕੇ ਡਰੇਨ ਵਿਭਾਗ ਦੇ ਐਕਸੀਅਨ ਰਮਨਦੀਪ ਸਿੰਘ ਬੈਂਸ ਨੇ ਗੱਲ ਕਰਨ ’ਤੇ ਕਿਹਾ ਕਿ ਪਿੱਛੋਂ ਆ ਰਹੇ ਪਾਣੀ ਦੇ ਵਹਾਅ ਨਾਲ ਹੀ ਬੂਟੀ ਆਉਂਦੀ ਹੈ। ਇਸ ਨੂੰ ਸਾਡੇ ਬੇਲਦਾਰ ਨਾਲ ਦੀ ਨਾਲ ਕੱਢੀ ਜਾਂਦੇ ਹਨ। ਸਫਾਈ ਨਾ ਕਰਨ ਸਬੰਧੀ ਪੁੱਛਿਆ ਤਾਂ ਉਨ੍ਹਾਂ ਕਿਹਾ ਕਿ ਸਫਾਈ ਲਈ ਜਿੰਨਾ ਫੰਡ ਆਉਂਦਾ ਹੈ, ਉਸ ਮਤਾਬਕ ਕਰਵਾਈ ਜਾਂਦੀ ਹੈ।
ਜ਼ਿਲਾ ਪ੍ਰੀਸ਼ਦ ਮੈਂਬਰ ਗਗਨਦੀਪ ਜਲਾਲਪੁਰ ਨੇ ਲਿਆ ਸਥਿਤੀ ਦਾ ਜਾਇਜ਼ਾ
ਘਨੌਰ, (ਜੋਸਨ, ਅਲੀ)-ਤਿੰਨ ਦਿਨਾਂ ਤੋਂ ਰੁਕ-ਰੁਕ ਕੇ ਪੈ ਰਹੀ ਭਰਵੀਂ ਬਾਰਸ਼ ਨਾਲ ਘੱਗਰ ਅਤੇ ਹੋਰ ਨਦੀਆਂ ਵਿਚ ਵਧੇ ਪਾਣੀ ਕਾਰਣ ਹਲਕਾ ਘਨੌਰ ਅਤੇ ਸਨੌਰ ਦੇ ਦਰਜਨਾਂ ਪਿੰਡਾਂ ਦੀਆਂ ਨੀਵੀਆਂ ਜ਼ਮੀਨਾਂ ’ਚ ਖਡ਼੍ਹੀਆਂ ਫਸਲਾਂ ਡੁੱਬ ਗਈਆਂ ਹਨ। ਹਡ਼੍ਹਾਂ ਵਰਗੇ ਹਾਲਾਤ ਪੈਦਾ ਹੋ ਗਏ ਹਨ। ਅੱਜ ਹਲਕਾ ਘਨੌਰ ਦੇ ਵਿਧਾਇਕ ਮਦਨ ਲਾਲ ਜਲਾਲਪੁਰ ਦੇ ਸਪੁੱਤਰ ਅਤੇ ਮੈਂਬਰ ਜ਼ਿਲਾ ਪ੍ਰੀਸ਼ਦ ਗਗਨਦੀਪ ਸਿੰਘ ਜਲਾਲਪੁਰ ਵੱਲੋਂ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕਰ ਕੇ ਸਥਿਤੀ ਦਾ ਜਾਇਜ਼ਾ ਲਿਆ ਗਿਆ। ਇਸ ਦੌਰਾਨ ਜ਼ਿਲਾ ਪ੍ਰਧਾਨ ਗੁਰਦੀਪ ਸਿੰਘ ਉਂਟਸਰ, ਡੀ. ਐੱਸ. ਪੀ. ਘਨੌਰ ਮਨਪ੍ਰੀਤ ਸਿੰਘ ਵੀ ਵਿਸ਼ੇਸ਼ ਤੌਰ ’ਤੇ ਹਾਜ਼ਰ ਸਨ। ਗਗਨਦੀਪ ਜਲਾਲਪੁਰ ਨੇ ਕਿਹਾ ਕਿ ਪਿੰਡਾਂ ’ਚ ਨੀਵੀਆਂ ਥਾਵਾਂ ’ਤੇ ਪਾਣੀ ਭਰ ਜਾਣ ਕਾਰਨ ਕਿਸਾਨਾਂ ਦੀਆਂ ਫਸਲਾਂ ਡੁੱਬ ਗਈਆਂ ਹਨ। ਅੱਜ ਪਿੰਡ ਬਠੌਣੀਆਂ, ਗੰਡਿਆਂ ਖੇਡ਼ੀ, ਰਾਜਗਡ਼੍ਹ, ਤੇਪਲਾ, ਸ਼ੰਭੂ, ਬੱਲੋਪੁਰ, ਮਰਦਾਂਪੁਰ, ਉਂਟਸਰ, ਰਾਏਪੁਰ ਨਨਹੇਡ਼ੀ ਅਤੇ ਨੌਸ਼ਹਿਰਾ ਸਮੇਤ ਹੋਰਨਾਂ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕੀਤਾ ਗਿਆ ਹੈ। ਗਗਨਦੀਪ ਨੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਨੂੰ ਸਥਿਤੀ ਨੂੰ ਕੰਟਰੋਲ ’ਚ ਕਰਨ ਲਈ ਹਦਾਇਤਾਂ ਕੀਤੀਆਂ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੇਕਰ ਕਿਸੇ ਕਿਸਾਨਾਂ ਅਤੇ ਮਜ਼ਦੂਰਾਂ ਦਾ ਬਰਸਾਤੀ ਪਾਣੀ ਕਾਰਣ ਨੁਕਸਾਨ ਹੁੰਦਾ ਹੈ ਤਾਂ ਉਨ੍ਹਾਂ ਵੱਲੋਂ ਸਪੈਸ਼ਲ ਗਿਰਦਾਵਰੀ ਕਰਵਾ ਕੇ ਪੀੜਤ ਪਰਿਵਾਰਾਂ ਨੂੰ ਬਣਦਾ ਯੋਗ ਮੁਆਵਜ਼ਾ ਦਿਵਾਇਆ ਜਾਵੇਗਾ। ਪੰਜਾਬ ਸਰਕਾਰ ਵੱਲੋਂ ਹਡ਼੍ਹਾਂ ਵਰਗੀ ਸਥਿਤੀ ਨਾਲ ਨਜਿੱਠਣ ਲਈ ਪਹਿਲਾਂ ਹੀ ਫਲੱਡ ਕੰਟਰੂਲ ਰੂਮ ਸਥਾਪਤ ਕੀਤੇ ਗਏ ਹਨ। ਇਸ ਮੌਕੇ ਅਮਰੀਕ ਸਿੰਘ ਖਾਨਪੁਰ, ਜਗਰੂਪ ਸਿੰਘ ਹੈਪੀ ਸੇਹਰਾ, ਭੁੱਲਾ ਰਾਮ ਰਾਜਗਡ਼੍ਹ ਸਰਪੰਚ, ਸ਼ੀਸ਼ਪਾਲ ਬਠੌਣੀਆਂ ਸਰਪੰਚ ਅਤੇ ਦਰਸ਼ਨ ਸਿੰਘ ਮੰਡੌਲੀ ਸਰਪੰਚ ਸਮੇਤ ਹੋਰ ਆਗੂ ਹਾਜ਼ਰ ਸਨ।
ਅਧਿਆਪਕਾਂ ਦੀ ਘਾਟ ਤੋਂ ਨਿਰਾਸ਼ ਵਿਦਿਆਰਥੀਆਂ ਕੀਤੀ ਨਾਅਰੇਬਾਜ਼ੀ
NEXT STORY 
