ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਪੈਟਰੋਲ ਅਤੇ ਡੀਜ਼ਲ ਬਚਾਉਣ ਲਈ ਕੀਤੀ ਗਈ ਅਪੀਲ ਤੋਂ ਬਾਅਦ ਕੇਂਦਰੀ ਊਰਜਾ ਮੰਤਰਾਲੇ ਨੇ ਇਸ ਨੂੰ ਅਮਲੀ ਜਾਮਾ ਪਹਿਨਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਮੰਤਰਾਲੇ ਨੇ ਆਪਣੇ ਕਰਮਚਾਰੀਆਂ ਲਈ ਇੱਕ ਬੇਹੱਦ ਅਨੋਖੀ ਸਕੀਮ ਪੇਸ਼ ਕੀਤੀ ਹੈ, ਜਿਸ ਤਹਿਤ ਆਪਣੀ ਨਿੱਜੀ ਕਾਰ ਦੀ ਘੱਟ ਵਰਤੋਂ ਕਰਨ ਵਾਲਿਆਂ ਨੂੰ ਨਕਦ ਇਨਾਮ ਦਿੱਤਾ ਜਾਵੇਗਾ।
ਘੱਟ ਗੱਡੀ ਚਲਾਓ, ਪੈਸੇ ਕਮਾਓ
ਊਰਜਾ ਮੰਤਰਾਲੇ ਦੀ ਇਸ ਨਵੀਂ ਯੋਜਨਾ ਮੁਤਾਬਕ ਕਰਮਚਾਰੀਆਂ ਨੂੰ ਆਪਣੀ ਕਾਰ ਦਾ ਵੇਰਵਾ ਇੱਕ ਆਨਲਾਈਨ ਪੋਰਟਲ 'ਤੇ ਦਰਜ ਕਰਨਾ ਹੋਵੇਗਾ ਅਤੇ ਆਪਣੀ ਗੱਡੀ ਦੇ ਮੀਟਰ (ਮਾਈਲੋਮੀਟਰ) ਦੀ ਰੀਡਿੰਗ ਅਪਲੋਡ ਕਰਨੀ ਹੋਵੇਗੀ। ਮਹੀਨੇ ਦੇ ਅੰਤ ਵਿੱਚ ਜਿਸ ਕਰਮਚਾਰੀ ਨੇ ਸਭ ਤੋਂ ਘੱਟ ਗੱਡੀ ਚਲਾਈ ਹੋਵੇਗੀ, ਉਸ ਨੂੰ 500 ਰੁਪਏ ਤੋਂ ਲੈ ਕੇ 2,500 ਰੁਪਏ ਤੱਕ ਦਾ ਨਕਦ ਇਨਾਮ ਦਿੱਤਾ ਜਾਵੇਗਾ। ਇਸ ਯੋਜਨਾ ਦਾ ਮੁੱਖ ਮਕਸਦ ਲੋਕਾਂ ਨੂੰ ਆਪਣੀ ਗੱਡੀ ਦੀ ਬਜਾਏ ਮੈਟਰੋ ਅਤੇ ਜਨਤਕ ਆਵਾਜਾਈ ਦੇ ਸਾਧਨਾਂ ਦੀ ਵਰਤੋਂ ਲਈ ਉਤਸ਼ਾਹਿਤ ਕਰਨਾ ਹੈ।
20 ਫੀਸਦੀ ਸਟਾਫ ਲਈ 'ਵਰਕ ਫਰੌਮ ਹੋਮ'
ਤੇਲ ਦੀ ਖਪਤ ਘਟਾਉਣ ਲਈ ਮੰਤਰਾਲੇ ਵਿੱਚ ਹੋਰ ਵੀ ਕਈ ਵੱਡੇ ਕਦਮ ਚੁੱਕੇ ਜਾ ਰਹੇ ਹਨ। ਸੂਤਰਾਂ ਅਨੁਸਾਰ, ਆਉਣ ਵਾਲੇ ਸੋਮਵਾਰ ਤੋਂ ਮੰਤਰਾਲੇ ਦੇ 20 ਫੀਸਦੀ ਕਰਮਚਾਰੀ 'ਵਰਕ ਫਰੌਮ ਹੋਮ' (ਘਰੋਂ ਕੰਮ) ਕਰਨਗੇ। ਇਸ ਲਈ ਇੱਕ ਵਿਸ਼ੇਸ਼ ਰੋਸਟਰ ਤਿਆਰ ਕੀਤਾ ਜਾ ਰਿਹਾ ਹੈ ਤਾਂ ਜੋ ਹਰ ਰੋਜ਼ 20 ਫੀਸਦੀ ਸਟਾਫ ਘਰ ਰਹਿ ਕੇ ਕੰਮ ਕਰ ਸਕੇ। ਹਾਲਾਂਕਿ, ਇਹ ਨਿਯਮ ਸਾਈਟ 'ਤੇ ਕੰਮ ਕਰਨ ਵਾਲੇ ਮੁਲਾਜ਼ਮਾਂ 'ਤੇ ਲਾਗੂ ਨਹੀਂ ਹੋਵੇਗਾ।
ਮੰਤਰੀ ਮਨੋਹਰ ਲਾਲ ਨੇ ਪੇਸ਼ ਕੀਤੀ ਮਿਸਾਲ
ਕੇਂਦਰੀ ਊਰਜਾ ਮੰਤਰੀ ਮਨੋਹਰ ਲਾਲ ਨੇ ਖੁਦ ਇਸ ਮੁਹਿੰਮ ਦੀ ਅਗਵਾਈ ਕਰਦਿਆਂ ਆਪਣੇ ਕਾਫਲੇ ਵਿੱਚੋਂ ਵਾਧੂ ਗੱਡੀਆਂ ਹਟਾ ਦਿੱਤੀਆਂ ਹਨ ਅਤੇ ਹੁਣ ਉਹ ਸਿਰਫ ਦੋ ਗੱਡੀਆਂ ਦੀ ਵਰਤੋਂ ਕਰਨਗੇ। ਉਨ੍ਹਾਂ ਨੇ ਦਿੱਲੀ ਤੋਂ ਬਾਹਰ ਦੀਆਂ ਯਾਤਰਾਵਾਂ ਲਈ ਟ੍ਰੇਨ ਦੀ ਵਰਤੋਂ ਕਰਨ ਦਾ ਫੈਸਲਾ ਲਿਆ ਹੈ ਅਤੇ ਜਲਦੀ ਹੀ ਉਹ ਇਲੈਕਟ੍ਰਿਕ ਵਾਹਨ (EV) ਦੀ ਵਰਤੋਂ ਕਰਦੇ ਨਜ਼ਰ ਆਉਣਗੇ।
ਵਿਦੇਸ਼ੀ ਮੁਦਰਾ ਭੰਡਾਰ ਨੂੰ ਬਚਾਉਣ ਦਾ ਟੀਚਾ
ਸਰਕਾਰ ਦਾ ਮੰਨਣਾ ਹੈ ਕਿ ਮੌਜੂਦਾ ਸੰਕਟ ਦੇ ਸਮੇਂ ਵਿੱਚ ਸਭ ਤੋਂ ਵੱਡੀ ਚੁਣੌਤੀ ਦੇਸ਼ ਦੇ ਵਿਦੇਸ਼ੀ ਮੁਦਰਾ ਭੰਡਾਰ ਨੂੰ ਬਚਾਉਣਾ ਹੈ। ਤੇਲ ਦੀ ਖਪਤ ਘਟਾ ਕੇ ਇਸ ਟੀਚੇ ਨੂੰ ਹਾਸਲ ਕੀਤਾ ਜਾ ਸਕਦਾ ਹੈ। ਮੰਤਰਾਲੇ ਨੇ ਆਪਣੇ ਸਾਰੇ ਅਧਿਕਾਰੀਆਂ ਅਤੇ ਸਹਾਇਕ ਸਰਕਾਰੀ ਕੰਪਨੀਆਂ ਦੇ ਮੁਲਾਜ਼ਮਾਂ ਨੂੰ ਵੀ ਵੱਧ ਤੋਂ ਵੱਧ ਮੈਟਰੋ ਦੀ ਵਰਤੋਂ ਕਰਨ ਦੀ ਹਦਾਇਤ ਦਿੱਤੀ ਹੈ।
ਹੇਮਾ ਮਾਲਿਨੀ ਨੇ 'ਮੇਰੋ ਮਥੁਰਾ' ਐਪ ਕੀਤੀ ਲਾਂਚ, ਹੁਣ ਘਰ ਬੈਠੇ ਮਿਲਣਗੀਆਂ ਨਗਰ ਨਿਗਮ ਦੀਆਂ ਸੇਵਾਵਾਂ
NEXT STORY 
