ਜੈਪੁਰ : ਰਾਜਸਥਾਨ ਦੇ ਜੈਪੁਰ ਵਿਚ ਆਪਣੇ ਦੋਸਤਾਂ ਨਾਲ ਜਨਮ ਦਿਨ ਦੀ ਪਾਰਟੀ ਮਨਾਉਣ ਗਏ ਇੱਕ ਬੱਚੇ ਦੀ ਸਵੀਮਿੰਗ ਪੂਲ ਵਿੱਚ ਡੁੱਬਣ ਕਾਰਨ ਮੌਤ ਹੋ ਗਈ। ਮ੍ਰਿਤਕ ਬੱਚੇ ਦਾ ਨਾਂ ਅਵਿਨਾਸ਼ ਹੈ, ਜੋ ਆਪਣੇ 14ਵੇਂ ਜਨਮ ਦਿਨ 'ਤੇ ਇਕ ਪੂਲ ਪਾਰਟੀ 'ਚ ਗਿਆ ਸੀ। ਸਾਰੀ ਘਟਨਾ ਦੀ ਸੀਸੀਟੀਵੀ ਫੁਟੇਜ ਸਾਹਮਣੇ ਆਈ ਹੈ। ਇਸ ਦੌਰਾਨ ਪੁਲੀਸ ਨੇ ਸਵੀਮਿੰਗ ਪੂਲ ਦੇ ਸੰਚਾਲਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਇਹ ਘਟਨਾ ਮਾਨਸਰੋਵਰ ਖੇਤਰ ਦੇ ਐੱਸਆਰ ਸਵੀਮਿੰਗ ਪੂਲ 'ਤੇ ਵਾਪਰੀ। ਇੱਥੇ 14 ਜੁਲਾਈ ਨੂੰ ਅਵਿਨਾਸ਼ ਕੁਮਾਰ ਯਾਦਵ ਨਾਂ ਦਾ ਬੱਚਾ ਆਪਣਾ ਜਨਮ ਦਿਨ ਮਨਾਉਣ ਲਈ ਆਪਣੇ 3 ਦੋਸਤਾਂ ਨਾਲ ਸਵੀਮਿੰਗ ਪੂਲ ਗਿਆ ਸੀ। ਆਪਣੇ 14ਵੇਂ ਜਨਮਦਿਨ ਨੂੰ ਯਾਦਗਾਰ ਬਣਾਉਣ ਲਈ, ਉਸਨੇ ਆਪਣੀ ਮਾਂ ਤੋਂ ਪੈਸੇ ਲਏ ਅਤੇ ਇੱਕ ਪੂਲ ਪਾਰਟੀ ਦੀ ਯੋਜਨਾ ਬਣਾਈ। ਕਰੀਬ 10.30 ਵਜੇ ਅਵਿਨਾਸ਼ ਆਪਣੇ ਦੋਸਤਾਂ ਨਾਲ ਪੂਲ ਦੇ ਆਲੇ-ਦੁਆਲੇ ਮਸਤੀ ਕਰਨ ਲੱਗਾ।
ਦੋਸਤਾਂ ਨੂੰ ਲਾਸ਼ ਪਾਣੀ 'ਤੇ ਤੈਰਦੀ ਮਿਲੀ
ਇਸ ਦੌਰਾਨ ਕੁਝ ਦੋਸਤ ਪੂਲ 'ਚ ਉਤਰ ਗਏ। ਉਨ੍ਹਾਂ ਨੂੰ ਦੇਖਦਿਆਂ ਕੁਝ ਦੇਰ ਬਾਅਦ ਅਵਿਨਾਸ਼ ਵੀ ਤਲਾਅ ਦੇ ਦੂਜੇ ਪਾਸੇ 7 ਫੁੱਟ ਡੂੰਘਾਈ 'ਚ ਉਤਰ ਗਿਆ ਪਰ ਕੁਝ ਹੀ ਸਕਿੰਟਾਂ ਬਾਅਦ ਉਸ ਦੀ ਟਿਊਬ ਪਲਟ ਗਈ ਅਤੇ ਅਵਿਨਾਸ਼ ਡੁੱਬਣ ਲੱਗਾ। ਇਸ ਦੌਰਾਨ ਉਸ ਦੇ ਦੋਸਤ ਅਤੇ ਹੋਰ ਬੱਚੇ ਪੂਲ ਦੇ ਦੂਜੇ ਪਾਸੇ ਮਸਤੀ ਕਰ ਰਹੇ ਸਨ। ਪਰ ਅਵਿਨਾਸ਼ ਬਾਰੇ ਕਿਸੇ ਨੂੰ ਪਤਾ ਨਹੀਂ ਲੱਗਾ। ਕਰੀਬ ਅੱਧੇ ਘੰਟੇ ਬਾਅਦ ਉਸ ਦੇ ਦੋਸਤਾਂ ਨੇ ਅਵਿਨਾਸ਼ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਫਿਰ ਉਸ ਦੀ ਲਾਸ਼ ਪਾਣੀ 'ਤੇ ਤੈਰਦੀ ਦਿਖਾਈ ਦਿੱਤੀ। ਇਸ ਤੋਂ ਬਾਅਦ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਪੁਲਸ ਨੇ ਕਹੀ ਇਹ ਗੱਲ
ਮਾਨਸਰੋਵਰ ਥਾਣੇ ਦੇ ਅਧਿਕਾਰੀ ਰਾਜਿੰਦਰ ਗੋਦਾਰਾ ਨੇ ਦੱਸਿਆ ਕਿ ਹਾਦਸੇ ਤੋਂ ਬਾਅਦ ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਨੇ ਸਵੀਮਿੰਗ ਪੂਲ ਦੇ ਸੰਚਾਲਕ ਖਿਲਾਫ ਰਿਪੋਰਟ ਦਰਜ ਕਰਵਾਈ, ਜਿਸ ਤੋਂ ਬਾਅਦ ਮੌਕੇ ਦੀ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ ਗਈ। ਹਾਦਸੇ ਤੋਂ ਬਾਅਦ ਸਵੀਮਿੰਗ ਪੂਲ ਦਾ ਸੰਚਾਲਕ ਵਿਸ਼ਨੂੰ ਚੌਧਰੀ ਵੀ ਫਰਾਰ ਹੋ ਗਿਆ। ਹੁਣ ਪੁਲਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜ ਦਿੱਤਾ ਹੈ।
ਏਜੰਸੀਆਂ ਵਿਚਾਲੇ ਬਿਹਤਰ ਤਾਲਮੇਲ ਨਾਲ ਖਤਮ ਹੋਵੇਗਾ ਅੱਤਵਾਦੀ ਨੈੱਟਵਰਕ : ਸ਼ਾਹ
NEXT STORY 
