ਨੈਸ਼ਨਲ ਡੈਸਕ- ਭਾਰਤ ਸਰਕਾਰ ਦੇ ਗ੍ਰਹਿ ਮੰਤਰਾਲੇ ਦੇ ਅਧੀਨ ਆਉਣ ਵਾਲੀ ਸਾਈਬਰ ਵਿੰਗ 'I4C' ਨੇ ਦੇਸ਼ ਵਿੱਚ ਵਧ ਰਹੇ ਸਾਈਬਰ ਅਪਰਾਧਾਂ ਨੂੰ ਨੱਥ ਪਾਉਣ ਲਈ ਇੱਕ ਬਹੁਤ ਵੱਡੇ ਆਪ੍ਰੇਸ਼ਨ ਨੂੰ ਅੰਜਾਮ ਦਿੱਤਾ ਹੈ। ਸਾਲ 2025 ਤੋਂ ਹੁਣ ਤੱਕ ਚੱਲੀ ਇਸ ਸਖ਼ਤ ਕਾਰਵਾਈ ਦੌਰਾਨ ਅਪਰਾਧੀਆਂ ਦੁਆਰਾ ਵਰਤੇ ਜਾ ਰਹੇ ਹਜ਼ਾਰਾਂ ਵਟਸਐਪ ਅਕਾਊਂਟਸ, ਸਿਮ ਕਾਰਡਾਂ ਅਤੇ ਮੋਬਾਈਲ ਡਿਵਾਈਸਾਂ ਨੂੰ ਪੂਰੀ ਤਰ੍ਹਾਂ ਇਨਐਕਟਿਵ ਕਰ ਦਿੱਤਾ ਗਿਆ ਹੈ।
ਵਟਸਐਪ ਅਤੇ ਸਕਾਈਪ 'ਤੇ ਵੱਡੀ ਕਾਰਵਾਈ
ਸਾਈਬਰ ਠੱਗ ਅਕਸਰ ਵਟਸਐਪ ਅਤੇ ਸਕਾਈਪ ਵਰਗੇ ਪਲੇਟਫਾਰਮਾਂ ਦਾ ਸਹਾਰਾ ਲੈ ਕੇ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾਉਂਦੇ ਹਨ। 'I4C' ਨੇ ਇਸ ਨੈੱਟਵਰਕ ਨੂੰ ਤੋੜਦਿਆਂ 83,867 ਵਟਸਐਪ ਅਕਾਊਂਟ ਅਤੇ 3,962 ਸਕਾਈਪ ਆਈਡੀ ਨੂੰ ਬਲੌਕ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ, ਠੱਗੀ ਦੇ ਉਦੇਸ਼ ਨਾਲ ਤਿਆਰ ਕੀਤੇ ਗਏ 827 ਮੋਬਾਈਲ ਐਪਸ 'ਤੇ ਵੀ ਪੂਰੀ ਤਰ੍ਹਾਂ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਸਿਮ ਕਾਰਡ ਅਤੇ IMEI ਨੰਬਰਾਂ 'ਤੇ ਸ਼ਿਕੰਜਾ
ਦੂਰਸੰਚਾਰ ਵਿਭਾਗ ਅਤੇ ਟੈਲੀਕਾਮ ਕੰਪਨੀਆਂ ਦੇ ਸਹਿਯੋਗ ਨਾਲ ਗ੍ਰਹਿ ਮੰਤਰਾਲੇ ਨੇ 8.45 ਲੱਖ ਸ਼ੱਕੀ ਸਿਮ ਕਾਰਡ ਬੰਦ ਕਰ ਦਿੱਤੇ ਹਨ। ਅਪਰਾਧੀਆਂ ਨੂੰ ਤਕਨੀਕੀ ਪੱਧਰ 'ਤੇ ਰੋਕਣ ਲਈ 2.39 ਲੱਖ ਮੋਬਾਈਲ IMEI ਨੰਬਰਾਂ ਨੂੰ ਵੀ ਬਲੈਕਲਿਸਟ ਕੀਤਾ ਗਿਆ ਹੈ, ਜਿਸ ਦਾ ਮਤਲਬ ਹੈ ਕਿ ਹੁਣ ਉਹਨਾਂ ਮੋਬਾਈਲ ਹੈਂਡਸੈੱਟਾਂ ਦੀ ਵਰਤੋਂ ਕਿਸੇ ਵੀ ਨੈੱਟਵਰਕ 'ਤੇ ਨਹੀਂ ਕੀਤੀ ਜਾ ਸਕੇਗੀ।
ਇੰਟਰਨੈੱਟ ਤੋਂ ਹਟਾਈ ਗਈ ਇਤਰਾਜ਼ਯੋਗ ਸਮੱਗਰੀ
ਡਿਜੀਟਲ ਸੁਰੱਖਿਆ ਨੂੰ ਪੁਖ਼ਤਾ ਕਰਨ ਲਈ 'ਸਹਿਯੋਗ ਪੋਰਟਲ' (Sahyog Portal) ਦੀ ਮਦਦ ਨਾਲ ਇੰਟਰਨੈੱਟ 'ਤੇ ਮੌਜੂਦ 1,11,185 ਸ਼ੱਕੀ ਅਤੇ ਇਤਰਾਜ਼ਯੋਗ ਸਮੱਗਰੀਆਂ ਨੂੰ ਹਟਾਇਆ ਗਿਆ ਹੈ। ਮੰਤਰਾਲਾ ਹੁਣ ਉਹਨਾਂ ਗਿਰੋਹਾਂ ਦੀ ਪਛਾਣ ਕਰਨ ਵਿੱਚ ਜੁਟਿਆ ਹੋਇਆ ਹੈ ਜੋ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ 'ਤੇ ਸਿਮ ਕਾਰਡ ਅਤੇ ਅਕਾਊਂਟ ਆਪਰੇਟ ਕਰ ਰਹੇ ਸਨ। ਇਸ ਵੱਡੀ ਕਾਰਵਾਈ ਨਾਲ ਸਾਈਬਰ ਅਪਰਾਧੀਆਂ ਵਿੱਚ ਹੜਕੰਪ ਮਚਿਆ ਹੋਇਆ ਹੈ ਅਤੇ ਆਮ ਨਾਗਰਿਕਾਂ ਨੂੰ ਡਿਜੀਟਲ ਧੋਖਾਧੜੀ ਤੋਂ ਬਚਾਉਣ ਲਈ ਮੰਤਰਾਲਾ ਲਗਾਤਾਰ ਨਿਗਰਾਨੀ ਵਧਾ ਰਿਹਾ ਹੈ।
ਜ਼ਮੀਨ ਦੇ ਮੁਆਵਜ਼ੇ ਲਈ ਕਲਯੁਗੀ ਪੁੱਤ ਤੇ ਨੂੰਹ ਨੇ ਕੀਤਾ ਮਾਂ ਦਾ ਕਤਲ
NEXT STORY 
