ਨੈਸ਼ਨਲ ਡੈਸਕ : ਸੁਰੱਖਿਆ ਬਲਾਂ ਲਈ ਇੱਕ ਵੱਡੀ ਸਫਲਤਾ ਵਿੱਚ ਨਕਸਲੀ ਕਮਾਂਡਰ ਮਾਡਵੀ ਹਿਡਮਾ (Madvi Hidma) ਨੂੰ ਛੱਤੀਸਗੜ੍ਹ ਵਿੱਚ ਸੁਰੱਖਿਆ ਬਲਾਂ ਨੇ ਢੇਰ ਕਰ ਦਿੱਤਾ ਹੈ। ਸੂਤਰਾਂ ਮੁਤਾਬਕ ਛੱਤੀਸਗੜ੍ਹ ਦੇ ਸੁਕਮਾ ਵਿੱਚ ਚੱਲ ਰਹੇ ਮੁਕਾਬਲੇ ਵਿੱਚ ਹਿਡਮਾ ਤੇ ਉਸ ਦੀ ਦੂਜੀ ਪਤਨੀ ਰਾਜੇ (ਰਾਜੱਕਾ) ਦੇ ਮਾਰੇ ਜਾਣ ਦੀ ਖ਼ਬਰ ਹੈ। ਜਾਣਕਾਰੀ ਅਨੁਸਾਰ ਮੁਕਾਬਲੇ ਵਿੱਚ ਹੁਣ ਤੱਕ ਕੁੱਲ 6 ਨਕਸਲੀਆਂ ਦੇ ਮਾਰੇ ਜਾਣ ਦੀ ਪੁਸ਼ਟੀ ਹੋਈ ਹੈ, ਜਿਨ੍ਹਾਂ ਵਿੱਚ ਕੁਝ ਸੀਨੀਅਰ ਕੈਡਰ ਵੀ ਸ਼ਾਮਲ ਹਨ।
ਹਿਡਮਾ 'ਤੇ ਭਾਰੀ 1 ਕਰੋੜ ਰੁਪਏ ਦਾ ਇਨਾਮ ਸੀ। ਇਹ ਐਨਕਾਊਂਟਰ ਮੁੱਖ ਤੌਰ 'ਤੇ ਛੱਤੀਸਗੜ੍ਹ-ਆਂਧਰਾ ਪ੍ਰਦੇਸ਼ ਬਾਰਡਰ 'ਤੇ ਅੱਲੂਰੀ ਸੀਤਾਰਾਮ ਜ਼ਿਲ੍ਹੇ ਦੇ ਜੰਗਲਾਂ ਵਿੱਚ ਹੋਇਆ ਹੈ। ਗ੍ਰੇਹਾਊਂਡਜ਼ ਦੇ ਜਵਾਨਾਂ ਦੇ ਸਰਚ ਆਪਰੇਸ਼ਨ ਦੌਰਾਨ ਸੁਰੱਖਿਆ ਬਲ ਅਤੇ ਨਕਸਲ ਕੈਡਰ ਵਿਚਕਾਰ ਝੜਪ ਹੋ ਗਈ। ਨਕਸਲੀਆਂ ਦੀ ਮੌਜੂਦਗੀ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਸੁਰੱਖਿਆ ਬਲਾਂ ਨੇ ਏਰ੍ਰਾਬੋਰ ਪੁਲਿਸ ਸਟੇਸ਼ਨ ਖੇਤਰ ਦੇ ਜੰਗਲਾਂ ਵਿੱਚ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ ਸੀ। ਹਿਡਮਾ (ਅਸਲੀ ਨਾਮ: ਸੰਤੋਸ਼) ਦੀ ਉਮਰ 43 ਸਾਲ ਸੀ ਅਤੇ ਉਹ ਨਕਸਲੀਆਂ ਦੀ ਸਭ ਤੋਂ ਘਾਤਕ ਹਮਲਾਵਰ ਯੂਨਿਟ, ਪੀ.ਐੱਲ.ਜੀ.ਏ. ਬਟਾਲੀਅਨ ਨੰਬਰ 1 ਦਾ ਮੁਖੀ ਸੀ।
ਅਪਰਾਧਾਂ ਦਾ ਜ਼ਿੰਮੇਵਾਰ:
ਮਾਡਵੀ ਹਿਡਮਾ, ਜੋ ਕਿ CPI (ਮਾਓਵਾਦੀ) ਦੀ ਸੈਂਟਰਲ ਕਮੇਟੀ ਦਾ ਸਭ ਤੋਂ ਨੌਜਵਾਨ ਮੈਂਬਰ ਸੀ ਅਤੇ ਬਸਤਰ ਖੇਤਰ ਤੋਂ ਕਮੇਟੀ ਵਿੱਚ ਸ਼ਾਮਲ ਹੋਣ ਵਾਲਾ ਇਕਲੌਤਾ ਆਦਿਵਾਸੀ ਸੀ, ਘੱਟੋ-ਘੱਟ 26 ਹਥਿਆਰਬੰਦ ਹਮਲਿਆਂ ਲਈ ਜ਼ਿੰਮੇਵਾਰ ਸੀ।
ਮੁੱਖ ਹਮਲੇ ਜਿਨ੍ਹਾਂ ਵਿੱਚ ਉਹ ਸ਼ਾਮਲ ਸੀ:
• 2010 ਦੰਤੇਵਾੜਾ ਹਮਲਾ: ਜਿਸ ਵਿੱਚ 76 ਸੀ.ਆਰ.ਪੀ.ਐੱਫ. ਜਵਾਨ ਸ਼ਹੀਦ ਹੋਏ ਸਨ।
• 2013 ਝੀਰਮ ਘਾਟੀ ਕਤਲੇਆਮ: ਜਿਸ ਵਿੱਚ ਚੋਟੀ ਦੇ ਕਾਂਗਰਸੀ ਨੇਤਾਵਾਂ ਸਮੇਤ 27 ਲੋਕ ਮਾਰੇ ਗਏ ਸਨ।
• 2013 ਦਰਭਾ ਘਾਟੀ ਕਤਲੇਆਮ ਅਤੇ 2017 ਦਾ ਸੁਕਮਾ ਹਮਲਾ ਵੀ ਹਿਡਮਾ ਦੇ ਨਾਮ 'ਤੇ ਦਰਜ ਹਨ।
• 2021 ਸੁਕਮਾ-ਬੀਜਾਪੁਰ ਮੁਕਾਬਲਾ: ਜਿਸ ਵਿੱਚ 22 ਸੁਰੱਖਿਆ ਕਰਮੀ ਸ਼ਹੀਦ ਹੋਏ ਸਨ।
ਇਲਾਕੇ ਵਿੱਚ ਸੁਰੱਖਿਆ ਬਲਾਂ ਵੱਲੋਂ ਕਾਂਬਿੰਗ ਆਪਰੇਸ਼ਨ ਅਜੇ ਵੀ ਜਾਰੀ ਹੈ।
ਯਾਤਰੀਆਂ ਲਈ ਖੁਸ਼ਖਬਰੀ: ਹੁਣ ਸਟੇਸ਼ਨ 'ਤੇ ਵੀ ਮਿਲੇਗਾ ਬ੍ਰਾਂਡੇਡ ਫਾਸਟ ਫੂਡ, ਰੇਲਵੇ ਨੇ ਦਿੱਤੀ ਮਨਜ਼ੂਰੀ
NEXT STORY 
