ਪ੍ਰਯਾਗਰਾਜ - ਮਸੀਤਾਂ ਦੇ ਲਾਉਡ ਸਪੀਕਰ ਨਾਲ ਤੇਜ਼ ਆਵਾਜ਼ ਵਿੱਚ ਗਾਈ ਜਾਣ ਵਾਲੀ ਅਜਾਨ ਨਾਲ ਮਚੇ ਕੋਹਰਾਮ ਤੋਂ ਬਾਅਦ ਆਈ.ਜੀ. ਪ੍ਰਯਾਗਰਾਜ ਨੇ ਰੇਂਜ ਦੇ ਚਾਰਾਂ ਜ਼ਿਲ੍ਹਿਆਂ ਦੇ ਡੀ.ਐੱਮ. ਅਤੇ ਐੱਸ.ਐੱਸ.ਪੀ. ਨੂੰ ਰਾਤ 10 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਮੰਦਰ ਅਤੇ ਮਸੀਤਾਂ ਵਿੱਚ ਲਾਉਡ ਸਪੀਕਰਾਂ ਨੂੰ ਵਜਾਉਣ 'ਤੇ ਰੋਕ ਲਗਾਉਣ ਲਈ ਇੱਕ ਪੱਤਰ ਭੇਜਿਆ ਹੈ। ਆਈ.ਜੀ. ਪ੍ਰਯਾਗਰਾਜ ਨੇ ਪੱਤਰ ਦੇ ਰਾਹੀਂ ਪਾਲਿਊਸ਼ਨ ਐਕਟ ਅਤੇ ਹਾਈਕੋਰਟ ਅਤੇ ਸੁਪਰੀਮ ਕੋਰਟ ਦੇ ਨਿਰਦੇਸ਼ਾਂ ਦਾ ਸਖਤੀ ਨਾਲ ਪਾਲਣ ਕਰਾਉਣ ਲਈ ਵੀ ਕਿਹਾ ਹੈ। ਜਿਸ ਦੇ ਤਹਿਤ ਰਾਤ 10 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਲਾਉਡ ਸਪੀਕਰ ਵਜਾਉਣ ਜਾਂ ਹੋਰ ਕਿਸੇ ਪਬਲਿਕ ਐਡਰੇਸ ਸਿਸਟਮ ਦੇ ਇਸਤੇਮਾਲ 'ਤੇ ਪੂਰੀ ਤਰ੍ਹਾਂ ਰੋਕ ਰਹੇਗੀ।
ਆਈ.ਜੀ. ਮੁਤਾਬਕ ਬਾਹੂਬਲੀ ਵਿਧਾਇਕ ਮੁਖਤਾਰ ਅੰਸਾਰੀ ਦੇ ਭਰਾ, ਗਾਜ਼ੀਪੁਰ ਤੋਂ ਸੰਸਦ ਮੈਂਬਰ ਅਫਜਾਲ ਅੰਸਾਰੀ ਨੇ ਪਿਛਲੇ ਸਾਲ ਰਮਜਾਨ ਤੋਂ ਪਹਿਲਾਂ ਇਲਾਹਾਬਾਦ ਹਾਈਕੋਰਟ ਵਿੱਚ ਲਾਉਡ ਸਪੀਕਰ ਰਾਹੀਂ ਅਜਾਨ ਦੀ ਮੰਗ ਨੂੰ ਲੈ ਕੇ ਇੱਕ ਜਨਹਿੱਤ ਪਟੀਸ਼ਨ ਵੀ ਦਾਖਲ ਕੀਤੀ ਸੀ। ਜਿਸ 'ਤੇ ਇਲਾਹਾਬਾਦ ਹਾਈਕੋਰਟ ਨੇ ਫੈਸਲਾ ਸੁਣਾਉਂਦੇ ਹੋਏ ਕਿਹਾ ਸੀ ਕਿ ਲਾਉਡ ਸਪੀਕਰ ਨਾਲ ਅਜਾਨ ਸੁਣਾਉਣਾ, ਇਸਲਾਮ ਦਾ ਧਾਰਮਿਕ ਹਿੱਸਾ ਨਹੀਂ ਹੈ। ਕੋਰਟ ਨੇ ਕਿਹਾ ਲੋਕਾਂ ਨੂੰ ਬਿਨਾਂ ਆਵਾਜ਼ ਪ੍ਰਦੂਸ਼ਣ ਨੀਂਦ ਦਾ ਅਧਿਕਾਰ ਹੈ ਅਤੇ ਇਹ ਜੀਵਨ ਦੇ ਮੂਲ ਅਧਿਕਾਰ ਵਿੱਚ ਸ਼ਾਮਿਲ ਹੈ। ਕਿਸੇ ਨੂੰ ਵੀ ਆਪਣੇ ਮੂਲ ਅਧਿਕਾਰਾਂ ਲਈ ਦੂਜੇ ਦੇ ਮੂਲ ਅਧਿਕਾਰਾਂ ਦੀ ਉਲੰਘਣਾ ਕਰਣ ਦਾ ਅਧਿਕਾਰ ਨਹੀਂ ਹੈ।
ਆਈ.ਜੀ. ਮੁਤਾਬਕ ਪਾਲਿਊਸ਼ਨ ਐਕਟ ਵਿੱਚ ਵੀ ਰਾਤ 10 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਲਾਉਡ ਸਪੀਕਰ ਵਜਾਉਣ ਦੀ ਮਨਾਹੀ ਹੈ। ਹਾਲਾਂਕਿ ਵਿਆਹ, ਬੰਦ ਕਮਰੇ ਵਿੱਚ ਪਾਰਟੀ ਵਰਗੇ ਪ੍ਰੋਗਰਾਮਾਂ 'ਤੇ ਵਿਸ਼ੇਸ਼ ਮਨਜ਼ੂਰੀ ਲੈ ਕੇ ਰਾਤ 12 ਵਜੇ ਤੱਕ ਨਿਸ਼ਚਿਤ ਵਾਲਿਊਮ ਵਿੱਚ ਲਾਉਡ ਸਪੀਕਰ ਵਜਾਉਣ ਦੀ ਆਗਿਆ ਦਿੱਤੀ ਜਾ ਸਕਦੀ ਹੈ ਪਰ ਰਾਤ ਵਿੱਚ ਪੂਰੀ ਸਖਤੀ ਨਾਲ ਇਸ ਨੂੰ ਰੋਕਿਆ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਇਲਾਹਾਬਾਦ ਸੈਂਟਰਲ ਯੂਨੀਵਰਸਿਟੀ ਦੀ ਕੁਲਪਤੀ ਪ੍ਰੋਫੈਸਰ ਸੰਗੀਤਾ ਸ਼੍ਰੀਵਾਸਤਵ ਨੇ ਤਿੰਨ ਮਾਰਚ ਨੂੰ ਕਲਾਇਵ ਰੋਡ ਦੀ ਮਸੀਤ ਵਿੱਚ ਤੇਜ਼ ਆਵਾਜ਼ ਵਿੱਚ ਦਿੱਤੀ ਜਾਣ ਵਾਲੀ ਅਜਾਨ ਨਾਲ ਨੀਂਦ ਵਿੱਚ ਖਲਲ ਨੂੰ ਲੈ ਕੇ ਡੀ.ਐੱਮ. ਪ੍ਰਯਾਗਰਾਜ ਨੂੰ ਪੱਤਰ ਲਿਖਿਆ ਸੀ। ਉਨ੍ਹਾਂ ਨੇ ਇਸ ਪੱਤਰ ਦੀ ਕਾਪੀ ਕਮਿਸ਼ਨਰ ਆਈ.ਜੀ. ਅਤੇ ਡੀ.ਆਈ.ਜੀ. ਨੂੰ ਵੀ ਭੇਜੀ ਸੀ।
ਨੋਟ- ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ? ਕੁਮੈਂਟ ਬਾਕਸ ਵਿੱਚ ਦਿਓ ਜਵਾਬ।
ਸਾਬਕਾ ਕਾਂਗਰਸ ਸੰਸਦ ਮੈਂਬਰ ਅੰਨੂ ਟੰਡਨ ਨੂੰ ਦੋ ਸਾਲ ਦੀ ਸਜ਼ਾ, ਟ੍ਰੇਨ ਰੋਕ ਕੇ ਕੀਤਾ ਸੀ ਪ੍ਰਦਰਸ਼ਨ
NEXT STORY 
