ਅਮਰੋਹਾ— ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਾਂਗਰਸ, ਸਪਾ ਅਤੇ ਬਸਪਾ 'ਤੇ ਅੱਤਵਾਦ ਨੂੰ ਮਦਦ ਪਹੁੰਚਾਉਣ ਦਾ ਦੋਸ਼ ਲਗਾਉਂਦੇ ਹੋਏ ਕਿਹਾ ਕਿ ਇਹ ਦਲ ਦੁਨੀਆ ਦੇ ਸਾਹਮਣੇ ਬੇਨਕਾਬ ਹੋ ਰਹੇ ਪਾਕਿਸਤਾਨ ਦੇ ਪੱਖ ਦੀਆਂ ਗੱਲਾਂ ਕਰ ਕੇ ਉੱਥੇ 'ਹੀਰੋ' ਬਣਨ ਦੀ ਹੋੜ 'ਚ ਲੱਗੇ ਹਨ। ਮੋਦੀ ਨੇ ਅਮਰੋਹਾ ਲੋਕ ਸਭਾ ਖੇਤਰ ਤੋਂ ਭਾਜਪਾ ਉਮੀਦਵਾਰ ਕੰਵਰ ਸਿੰਘ ਤੰਵਰ ਦੇ ਸਮਰਥਨ 'ਚ ਆਯੋਜਿਤ ਰੈਲੀ 'ਚ ਕਿਹਾ,''ਜਦੋਂ ਪਾਕਿਸਤਾਨ ਪੂਰੀ ਦੁਨੀਆ ਦੇ ਸਾਹਮਣੇ ਬੇਨਕਾਬ ਹੋ ਰਿਹਾ ਹੈ ਤਾਂ ਇਹ ਉਸ ਦੇ ਪੱਖ ਦੀ ਗੱਲ ਕਰ ਰਹੇ ਹਨ, ਉੱਥੇ ਹੀਰੋ ਬਣਨ ਦਾ ਮੁਕਾਬਲਾ ਕਰ ਰਹੇ ਹਨ। ਕਾਂਗਰਸ ਹੋ ਜਾਂ ਫਿਰ ਸਪਾ-ਬਸਪਾ, ਅੱਤਵਾਦ 'ਤੇ ਇਸੇ ਨਰਮ ਰਵੱਈਏ ਕਾਰਨ ਕੁਝ ਲੋਕਾਂ ਦੇ ਹੌਂਸਲੇ ਬੁਲੰਦ ਹੋਏ ਹਨ। ਇਨ੍ਹਾਂ ਦਲਾਂ ਨੇ ਸਿਰਫ ਅੱਤਵਾਦ ਦੀ ਹੀ ਮਦਦ ਨਹੀਂ ਕੀਤੀ ਹੈ, ਇਨ੍ਹਾਂ ਤੁਹਾਡੇ ਜੀਵਨ ਅਤੇ ਪਛਾਣ ਨੂੰ ਸੰਕਟ 'ਚ ਪਾਇਆ ਹੈ।'' ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਉੱਤਰ ਪ੍ਰਦੇਸ਼ 'ਚ ਸਪਾ, ਬਸਪਾ ਅਤੇ ਦਿੱਲੀ 'ਚ ਕਾਂਗਰਸ ਦੀ ਸਰਕਾਰ ਸੀ, ਉਦੋਂ ਕਦੇ ਅਯੁੱਧਿਆ ਅਤੇ ਕਾਸ਼ੀ ਨੂੰ ਦਹਿਲਾ ਦਿੱਤਾ ਜਾਂਦਾ ਸੀ, ਕਦੇ ਰਾਮਪੁਰ 'ਚ ਸੀ.ਆਰ.ਪੀ.ਐੱਫ. ਕੈਂਪ 'ਤੇ ਹਮਲਾ ਹੁੰਦਾ ਸੀ। ਦੇਸ਼ ਦੀਆਂ ਏਜੰਸੀਆਂ ਬਹੁਤ ਮਿਹਨਤ ਕਰ ਕੇ ਇਨ੍ਹਾਂ ਘਟਨਾਵਾਂ 'ਚ ਸ਼ਾਮਲ ਲੋਕਾਂ ਨੂੰ ਫੜਦੀਆਂ ਸਨ ਪਰ ਵੋਟ ਬੈਂਕ ਕਾਰਨ ਭੂਆ-ਭਤੀਜੇ (ਮਾਇਆਵਤੀ-ਅਖਿਲੇਸ਼) ਦੀਆਂ ਸਰਕਾਰਾਂ ਉਨ੍ਹਾਂ ਨੂੰ ਛੱਡ ਦਿੰਦੀਆਂ ਸਨ।''
ਕੁਝ ਲੋਕਾਂ ਨੂੰ ਹਿੰਦੁਸਤਾਨ 'ਚ ਰੋਣਾ ਆਉਂਦੈ
ਮੋਦੀ ਨੇ ਦਾਅਵਾ ਕੀਤਾ ਕਿ ਪਿਛਲੇ 5 ਸਾਲਾਂ 'ਚ ਧਮਾਕੇ ਇਸ ਲਈ ਰੁਕ ਗਏ, ਕਿਉਂਕਿ ਦਿੱਲੀ 'ਚ ਤੁਸੀਂ ਇਕ ਚੌਕੀਦਾਰ ਬਿਠਾ ਦਿੱਤਾ, ਜੋ ਅੱਤਵਾਦੀਆਂ ਨੂੰ ਨਰਕ 'ਚੋਂ ਵੀ ਲੱਭ ਲਿਆਏਗਾ। ਉਨ੍ਹਾਂ ਨੇ ਕਿਹਾ,''ਮੋਦੀ ਅੱਤਵਾਦ ਨੂੰ ਵੋਟ ਬੈਂਕ ਨਾਲ ਨਹੀਂ ਤੌਲਦਾ।'' ਪ੍ਰਧਾਨ ਮੰਤਰੀ ਨੇ ਪਾਕਿਸਤਾਨ 'ਚ ਹਾਲ 'ਚ ਹੋਏ ਹਵਾਈ ਹਮਲੇ ਦਾ ਜ਼ਿਕਰ ਕਰਦੇ ਹੋਏ ਜਨਤਾ ਤੋਂ ਪੁੱਛਿਆ,''ਤੁਸੀਂ ਮੈਨੂੰ ਦੱਸੋ ਕਿ ਕੀ ਅੱਤਵਾਦੀ ਹਮਲੇ ਤੋਂ ਬਾਅਦ ਮੈਨੂੰ ਚੁੱਪ ਹੋ ਜਾਣਾ ਚਾਹੀਦਾ ਸੀ ਜਾਂ ਉਨ੍ਹਾਂ 'ਤੇ ਹਮਲਾ ਕਰਨਾ ਚਾਹੀਦਾ ਸੀ। ਮੈਂ ਸਹੀ ਕੀਤਾ ਨਾ, ਅਜਿਹੇ ਹੀ ਕਰਨਾ ਚਾਹੀਦਾ ਪਰ ਅੱਤਵਾਦੀਆਂ ਨੂੰ ਉਨ੍ਹਾਂ ਦੀ ਭਾਸ਼ਾ 'ਚ ਜਵਾਬ ਦੇਣਾ ਸਾਡੇ ਦੇਸ਼ 'ਚ ਹੀ ਕੁਝ ਲੋਕਾਂ ਨੂੰ ਪਰੇਸ਼ਾਨ ਕਰਦਾ ਹੈ। ਉਨ੍ਹਾਂ ਦੀ ਰਾਤਾਂ ਦੀ ਨੀਂਦ ਉੱਡ ਜਾਂਦੀ ਹੈ। ਜਦੋਂ ਭਾਰਤ ਡੰਕੇ ਦੀ ਚੋਟ 'ਤੇ ਦੁਸ਼ਮਣ ਨੂੰ ਮਾਰਦਾ ਹੈ ਤਾਂ ਕੁਝ ਲੋਕਾਂ ਨੂੰ ਹਿੰਦੁਸਤਾਨ 'ਚ ਰੋਣਾ ਆਉਂਦਾ ਹੈ।''
ਦੇਸ਼ ਦੇ ਵਿਕਾਸ ਲਈ ਮਜ਼ਬੂਤ ਸਰਕਾਰ ਬਣਾਉਣਾ ਜ਼ਰੂਰੀ
ਮੋਦੀ ਨੇ ਉੱਤਰ ਪ੍ਰਦੇਸ਼ 'ਚ ਸਪਾ-ਬਸਪਾ-ਰਾਲੋਦ ਗਠਜੋੜ 'ਤੇ ਤੰਜ਼ ਕੱਸਦੇ ਹੋਏ ਕਿਹਾ ਕਿ ਕੁਝ ਲੋਕ ਵੱਖ-ਵੱਖ ਜਾਤੀਆਂ ਦੇ ਨਾਂ 'ਤੇ ਸਮਾਜ ਅਤੇ ਦੇਸ਼ 'ਚ ਖੱਡ ਪੈਦਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪ੍ਰਦੇਸ਼ ਦੀ ਜਨਤਾ ਨੇ ਸਾਲ 2014 ਦੀਆਂ ਲੋਕ ਸਭਾ ਅਤੇ 2017 ਦੀਆਂ ਵਿਧਾਨ ਸਭਾ ਚੋਣਾਂ 'ਚ ਅਜਿਹੀਆਂ ਤਾਕਤਾਂ ਨੂੰ ਮੂੰਹ ਤੋੜ ਜਵਾਬ ਦਿੱਤਾ ਸੀ। ਪ੍ਰਧਾਨ ਮੰਤਰੀ ਨੇ ਬਾਬਾ ਸਾਹਿਬ ਭੀਮਰਾਵ ਅੰਬੇਡਕਰ, ਯੋਗੇਂਦਰ ਨਾਥ ਮੰਡਲ ਅਤੇ ਬਾਬੂ ਜਗਜੀਵਨ ਰਾਮ ਦਾ ਨਾਂ ਲੈਂਦੇ ਹੋਏ ਕਾਂਗਰਸ 'ਤੇ ਇਨ੍ਹਾਂ ਦੀ ਨਜ਼ਰਅੰਦਾਜੀ ਅਤੇ ਅਪਮਾਨ ਕਰਨ ਦਾ ਦੋਸ਼ ਲਗਾਇਆ। ਜੇਕਰ ਕਾਂਗਰਸ ਅਤੇ ਮਹਾਮਿਲਾਵਟ (ਸਪਾ-ਬਸਪਾ-ਰਾਲੋਦ ਗਠਜੋੜ) ਵਾਲੇ ਚੋਣਾਂ ਜਿੱਤਦੇ ਹਨ ਤਾਂ ਇਨ੍ਹਾਂ ਮਹਾਪੁਰਸ਼ਾਂ ਦਾ ਸਨਮਾਨ ਨਹੀਂ ਹੋ ਸਕੇਗਾ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਪੂਰੀ ਦੁਨੀਆ 'ਚ ਦੇਸ਼ ਦੀ ਸਾਖ ਅੱਜ ਜਿੰਨੀ ਉੱਚੀ ਹੈ, ਓਨੀ ਪਹਿਲਾਂ ਕਦੇ ਨਹੀਂ ਸੀ। ਦੇਸ਼ ਦੇ ਵਿਕਾਸ ਦੀ ਗਤੀ ਨੂੰ ਇਸੇ ਤਰ੍ਹਾਂ ਬਣਾਏ ਰੱਖਣ ਲਈ ਮਜ਼ਬੂਤ ਸਰਕਾਰ ਬਣਾਉਣਾ ਬਹੁਤ ਜ਼ਰੂਰੀ ਹੈ। ਭਾਜਪਾ ਉਮੀਦਵਾਰਾਂ ਨੂੰ ਮਿਲਣ ਵਾਲਾ ਹਰ ਵੋਟ ਮੋਦੀ ਦੇ ਖਾਤੇ 'ਚ ਜਾਵੇਗਾ।
ਗੁਰੂਗ੍ਰਾਮ ਦੇ ਪ੍ਰਾਈਵੇਟ ਹਸਪਤਾਲ 'ਚ ਸੁਰੱਖਿਆ ਕਰਮਚਾਰੀ ਦੀ ਹੱਤਿਆ
NEXT STORY 
