ਮੁੰਬਈ— ਭਾਰਤ ਅਤੇ ਸਾਊਦੀ ਅਰਬ ਵਿਚਾਲੇ ਨਵਾਂ ਹਵਾਬਾਜ਼ੀ ਸੇਵਾ ਸਮਝੌਤਾ ਹੋਇਆ ਹੈ। ਹੁਣ ਇਕ ਹਫਤੇ ਦੇ ਅੰਦਰ ਦੋਹਾਂ ਦੇਸ਼ਾਂ ਵਿਚਾਲੇ ਆਉਣ-ਜਾਣ ਵਾਲੇ ਹਵਾਈ ਯਾਤਰੀਆਂ ਦਾ ਕੋਟਾ ਵਧਾ ਕੇ 50,000 ਕਰ ਦਿੱਤਾ ਗਿਆ ਹੈ, ਜੋ ਕਿ ਪਹਿਲਾਂ 28,000 ਹੀ ਸੀ। ਬੀਤੇ ਹਫਤੇ ਸਾਊਦੀ ਅਰਬ ਦੇ ਰਿਆਦ ਵਿਚ ਇਸ ਸਮਝੌਤੇ 'ਤੇ ਦਸਤਖਤ ਕੀਤੇ ਗਏ ਸਨ। ਸੂਤਰਾਂ ਨੇ ਦੱਸਿਆ ਕਿ ਸਮਝੌਤੇ ਤੋਂ ਬਾਅਦ ਪਹਿਲੇ ਪੜਾਅ ਵਿਚ ਸੀਟਾਂ ਨੂੰ ਵਧਾ ਕੇ 36,000 ਕੀਤਾ ਜਾਵੇਗਾ ਅਤੇ ਫਿਰ ਉਸ ਨੂੰ ਵਧਾ ਕੇ 50,000 ਤਕ ਪਹੁੰਚਾਇਆ ਜਾਵੇਗਾ। ਇਸ ਸਮਝੌਤੇ ਤੋਂ ਬਾਅਦ ਦੋਹਾਂ ਦੇਸ਼ਾਂ ਤੋਂ ਚੱਲਣ ਵਾਲੀਆਂ ਏਅਰਲਾਈਨਜ਼ ਆਪਣੀਆਂ ਉਡਾਣਾਂ ਦੀ ਗਿਣਤੀ ਵਧਾ ਸਕਦੀਆਂ ਹਨ। ਇਹ ਭਾਰਤ ਅਤੇ ਸਾਊਦੀ ਅਰਬ ਵਿਚਾਲੇ ਵੱਖ-ਵੱਖ ਖੇਤਰਾਂ ਵਿਚ ਵਧਦੇ ਸਹਿਯੋਗ ਦਾ ਨਤੀਜਾ ਵੀ ਹੋ ਸਕਦਾ ਹੈ। ਇਹ ਵੀ ਵਜ੍ਹਾ ਹੈ ਕਿ ਭਾਰਤੀ ਏਅਰਲਾਈਨਜ਼ ਨੇ ਯਾਤਰੀਆਂ ਦਾ ਕੋਟਾ ਵਧਾਉਣ ਦੇ ਪ੍ਰਸਤਾਵ ਦਾ ਵਿਰੋਧ ਨਹੀਂ ਕੀਤਾ।
ਦਰਅਸਲ ਭਾਰਤ ਅਤੇ ਸਾਊਦੀ ਅਰਬ ਵਿਚਾਲੇ ਜਹਾਜ਼ ਯਾਤਰਾ ਲਈ ਵੱਖ-ਵੱਖ ਕਾਰਨ ਜ਼ਿੰਮੇਵਾਰ ਹਨ। ਸਾਊਦੀ ਅਰਬ ਤੋਂ ਅੱਗੇ ਜਾਣ ਵਾਲੇ ਯਾਤਰੀਆਂ ਦੀ ਗਿਣਤੀ ਕਾਫੀ ਘੱਟ ਹੈ। ਜ਼ਿਆਦਾਤਰ ਯਾਤਰੀ ਭਾਰਤ ਤੋਂ ਸਾਊਦੀ ਅਰਬ ਅਤੇ ਸਾਊਦੀ ਅਰਬ ਤੋਂ ਭਾਰਤ ਤਕ ਹੀ ਆਉਂਦੇ-ਜਾਂਦੇ ਹਨ। ਇਸ ਦੇ ਉਲਟ ਆਬੂ ਧਾਬੀ, ਦੁਬਈ, ਦੋਹਾਂ ਜਾਂ ਮਸਕਟ ਹਵਾਈ ਅੱਡਿਆਂ ਦਾ ਇਸਤੇਮਾਲ ਭਾਰਤੀ ਯਾਤਰੀ ਅਫਰੀਕਾ, ਯੂਰਪ ਅਤੇ ਅਮਰੀਕਾ ਦੀ ਯਾਤਰਾ ਦੇ ਇਕ ਪੜਾਅ ਦੇ ਤੌਰ 'ਤੇ ਕਰਦੇ ਹਨ। ਸੀਟਾਂ ਵਧਾਉਣ ਦਾ ਨਵਾਂ ਸਮਝੌਤਾ ਹੋਣ ਤੋਂ ਬਾਅਦ ਦੋਹਾਂ ਦੇਸ਼ਾਂ ਦੀ ਏਅਰਲਾਈਨਜ਼ ਆਪਣਾ ਟ੍ਰੈਫਿਕ ਵਧਾ ਸਕਣਗੀਆਂ। ਫਿਲਹਾਲ ਦੋਹਾਂ ਦੇਸ਼ਾਂ ਵਿਚਾਲੇ ਕਰੀਬ 30 ਫੀਸਦੀ ਯਾਤਰੀ ਦੂਜੇ ਖਾੜੀ ਦੇਸ਼ਾਂ ਦੇ ਰਸਤਿਓਂ ਆਉਂਦੇ ਹਨ ਪਰ ਸਿੱਧੀ ਉਡਾਣਾਂ ਵਧਣ ਨਾਲ ਏਅਰਲਾਈਨਜ਼ ਨੂੰ ਆਪਣੀ ਬਾਜ਼ਾਰ ਹਿੱਸੇਦਾਰੀ ਵਧਾਉਣ ਵਿਚ ਮਦਦ ਮਿਲੇਗੀ।
ਸਾਲ 2018 ਵਿਚ ਦੋਹਾਂ ਦੇਸ਼ਾਂ ਵਿਚਾਲੇ ਕਰੀਬ 50 ਲੱਖ ਯਾਤਰੀਆਂ ਦੀ ਆਵਾਜਾਈ ਰਹੀ ਸੀ। ਭਾਰਤੀ ਏਅਰਲਾਈਨਜ਼ ਵਿਚ ਏਅਰ ਇੰਡੀਆ, ਏਅਰ ਇੰਡੀਆ ਐਕਸਪ੍ਰੈੱਸ, ਇੰਡੀਗੋ ਅਤੇ ਸਪਾਈਸਜੈੱਟ ਵੱਖ-ਵੱਖ ਸ਼ਹਿਰਾਂ ਤੋਂ ਸਾਊਦੀ ਅਰਬ ਲਈ ਉਡਾਣਾਂ ਸੰਚਾਲਤ ਕਰਦੀਆਂ ਹਨ। ਜਦਕਿ ਸਾਊਦੀ ਅਰਬ ਤੋਂ ਸਾਊਦੀ ਅਰਬੀਅਨ ਏਅਰਲਾਈਨਜ਼ ਅਤੇ ਫਲਾਈਨੈੱਸ ਦੀਆਂ ਉਡਾਣਾਂ ਭਾਰਤ ਆਉਂਦੀਆਂ ਹਨ।
ਪੰਚਕੂਲਾ ਦੰਗੇ ਅਤੇ ਹਿੰਸਾ ਮਾਮਲੇ 'ਚ ਹਨੀਪ੍ਰੀਤ ਨੂੰ ਮਿਲੀ ਜ਼ਮਾਨਤ
NEXT STORY