ਆਟੋ ਡੈਸਕ- ਦੋ ਮਹੀਨੇ ਪਹਿਲਾਂ ਜਦੋਂ ਐਲੋਨ ਮਸਕ ਦੀ ਅਗਵਾਈ ਵਾਲੀ ਅਮਰੀਕੀ ਇਲੈਕਟ੍ਰਿਕ ਕਾਰ ਨਿਰਮਾਤਾ ਟੈਸਲਾ ਨੇ ਭਾਰਤ ਵਿੱਚ ਐਂਟਰੀ ਕੀਤੀ ਸੀ ਤਾਂ ਭਾਰਤੀ ਕਾਰ ਪ੍ਰੇਮੀਆਂ ਵਿੱਚ ਬਹੁਤ ਉਤਸ਼ਾਹ ਸੀ ਅਤੇ ਅੱਜ ਉਹ ਉਤਸ਼ਾਹ ਹਕੀਕਤ ਬਣ ਗਿਆ ਹੈ। ਟੈਸਲਾ ਨੇ ਭਾਰਤ ਵਿੱਚ ਮਾਡਲ Y ਇਲੈਕਟ੍ਰਿਕ ਕਾਰ ਦੀ ਡਿਲੀਵਰੀ ਅਧਿਕਾਰਤ ਤੌਰ 'ਤੇ ਸ਼ੁਰੂ ਕਰ ਦਿੱਤੀ ਹੈ।
15 ਜੁਲਾਈ, 2025 ਨੂੰ ਕੰਪਨੀ ਨੇ ਅਧਿਕਾਰਤ ਤੌਰ 'ਤੇ ਭਾਰਤ ਵਿੱਚ ਐਂਟਰੀ ਕੀਤੀ ਸੀ, ਮੁੰਬਈ ਦੇ ਬਾਂਦਰਾ ਕੁਰਲਾ ਕੰਪਲੈਕਸ (BKC) ਵਿੱਚ ਆਪਣਾ ਪਹਿਲਾ ਸ਼ੋਅਰੂਮ ਖੋਲ੍ਹਿਆ। ਫਿਰ ਕੰਪਨੀ ਨੇ 11 ਅਗਸਤ ਨੂੰ ਦਿੱਲੀ ਵਿੱਚ ਆਪਣਾ ਦੂਜਾ ਸ਼ੋਅਰੂਮ ਖੋਲ੍ਹਿਆ ਸੀ। ਟੈਸਲਾ ਨੇ ਭਾਰਤ ਵਿੱਚ ਸ਼ੋਅਰੂਮ ਖੋਲ੍ਹਣ ਦੇ ਨਾਲ-ਨਾਲ ਆਪਣੀ ਮਾਡਲ Y ਇਲੈਕਟ੍ਰਿਕ ਕਾਰ ਵੀ ਲਾਂਚ ਕੀਤੀ ਸੀ।
ਕਿਹੋ ਜਿਹੀ ਹੈ ਟੈਸਲਾ ਕਾਰ ?
ਟੈਸਲਾ ਮਾਡਲ Y ਦੋ ਵੇਰੀਐਂਟ ਵਿੱਚ ਆਉਂਦੀ ਹੈ। ਇਸਦੇ ਸਟੈਂਡਰਡ ਰੀਅਰ-ਵ੍ਹੀਲ ਡਰਾਈਵ ਵੇਰੀਐਂਟ ਦੀ ਕੀਮਤ 59.89 ਲੱਖ ਰੁਪਏ (ਐਕਸ-ਸ਼ੋਰੂਮ) ਹੈ ਅਤੇ ਲੰਬੀ ਰੇਂਜ ਵੇਰੀਐਂਟ ਦੀ ਕੀਮਤ 67.89 ਲੱਖ ਰੁਪਏ (ਐਕਸ-ਸ਼ੋਰੂਮ) ਹੈ। ਇਹ ਕਾਰ ਕੁੱਲ 7 ਵੱਖ-ਵੱਖ ਐਕਸਟੀਰੀਅਰ ਕਲਰ ਆਪਸ਼ੰਸ ਅਤੇ 2 ਇੰਟੀਰੀਅਰ ਟ੍ਰਿਮਸ ਵਿੱਚ ਉਪਲੱਬਧ ਹੈ। ਇਸ ਕਾਰ ਵਿੱਚ 15.4-ਇੰਚ ਇਨਫੋਟੇਨਮੈਂਟ ਡਿਸਪਲੇਅ (ਫਰੰਟ), 8-ਇੰਚ ਦੀ ਰੀਅਰ ਸਕ੍ਰੀਨ, ਪਾਵਰ-ਐਡਜਸਟੇਬਲ ਫਰੰਟ ਸੀਟਾਂ ਅਤੇ ਸਟੀਅਰਿੰਗ ਕਾਲਮ, ਡਿਊਲ-ਜ਼ੋਨ ਆਟੋਮੈਟਿਕ ਕਲਾਈਮੇਟ ਕੰਟਰੋਲ, 19-ਇੰਚ ਕਰਾਸਫਲੋ ਵ੍ਹੀਲ, ਇੱਕ ਫਿਕਸਡ ਗਲਾਸ ਰੂਫ ਅਤੇ ਇੱਕ ਪਾਵਰ ਰੀਅਰ ਲਿਫਟਗੇਟ ਵਰਗੇ ਫੀਚਰਜ਼ ਦਿੱਤੇ ਜਾ ਰਹੇ ਹਨ।
ਬੈਟਰੀ ਪੈਕ ਅਤੇ ਡਰਾਈਵਿੰਗ ਰੇਂਜ
ਇਹ ਕਾਰ ਦੋ ਵੱਖ-ਵੱਖ ਬੈਟਰੀ ਪੈਕ (ਇੱਕ 60 kWh ਅਤੇ ਇੱਕ ਵੱਡਾ 75 kWh ਬੈਟਰੀ ਪੈਕ) ਦੇ ਨਾਲ ਆਉਂਦੀ ਹੈ। ਇਸਦੇ RWD ਵੇਰੀਐਂਟ ਵਿੱਚ ਇੱਕ ਸਿੰਗਲ ਇਲੈਕਟ੍ਰਿਕ ਮੋਟਰ ਹੈ ਜੋ ਲਗਭਗ 295 hp ਪੈਦਾ ਕਰਦੀ ਹੈ। ਇਸ ਤੋਂ ਇਲਾਵਾ, 60 kWh ਬੈਟਰੀ ਇੱਕ ਸਿੰਗਲ ਚਾਰਜ 'ਤੇ 500 ਕਿਲੋਮੀਟਰ ਦੀ ਡਰਾਈਵਿੰਗ ਰੇਂਜ (WLTP ਪ੍ਰਮਾਣਿਤ) ਦਿੰਦੀ ਹੈ। ਜਦੋਂ ਕਿ ਲੰਬੀ-ਰੇਂਜ ਵਾਲਾ ਵੇਰੀਐਂਟ 622 ਕਿਲੋਮੀਟਰ ਦੀ ਡਰਾਈਵਿੰਗ ਰੇਂਜ ਦਿੰਦਾ ਹੈ।
ਮੁਫ਼ਤ ਮਿਲੇਗਾ ਵਾਲ ਚਾਰਜਰ
ਟੈਸਲਾ ਨੇ ਹਰੇਕ ਨਵੇਂ ਗਾਹਕ ਨੂੰ ਘਰ ਜਾਂ ਦਫ਼ਤਰ ਵਿੱਚ ਆਸਾਨੀ ਨਾਲ ਚਾਰਜਿੰਗ ਲਈ ਇੱਕ ਮੁਫ਼ਤ ਵਾਲ ਕੁਨੈਕਟਰ ਦੇਣ ਦਾ ਐਲਾਨ ਕੀਤਾ ਹੈ। ਮੁੰਬਈ ਦੇ ਬਾਂਦਰਾ ਕੁਰਲਾ ਕੰਪਲੈਕਸ ਅਤੇ ਦਿੱਲੀ ਦੇ ਐਰੋਸਿਟੀ ਵਿੱਚ ਸ਼ੋਅਰੂਮਾਂ (ਅਨੁਭਵ ਕੇਂਦਰਾਂ) ਵਿੱਚ V4 ਸੁਪਰਚਾਰਜਰ ਅਤੇ ਡੈਸਟੀਨੇਸ਼ਨ ਚਾਰਜਰ ਵਾਲੇ ਚਾਰਜਿੰਗ ਸਟੇਸ਼ਨ ਵੀ ਤਿਆਰ ਹਨ। ਇਹ ਚਾਰਜਰ 15 ਮਿੰਟਾਂ ਵਿੱਚ ਕਾਰ ਨੂੰ ਇੰਨਾ ਚਾਰਜ ਕਰ ਦਿੰਦੇ ਹਨ ਜਿਸ ਨਾਲ ਕਾਰ ਲਗਭਗ 267 ਕਿਲੋਮੀਟਰ ਦੀ ਰੇਂਜ ਪ੍ਰਦਾਨ ਕਰ ਸਕਦੀ ਹੈ।
ਟੈਸਲਾ ਦਾ ਕਹਿਣਾ ਹੈ ਕਿ ਇਸਦਾ ਚਾਰਜਿੰਗ ਈਕੋਸਿਸਟਮ "ਪਲੱਗ ਇਨ, ਚਾਰਜ ਐਂ ਗੋ" ਦੇ ਸਿਧਾਂਤ 'ਤੇ ਕੰਮ ਕਰਦਾ ਹੈ। ਜਿੱਥੇ ਕਾਰ, ਚਾਰਜਿੰਗ ਬੁਨਿਆਦੀ ਢਾਂਚਾ ਅਤੇ ਟੈਸਲਾ ਐਪ ਇੱਕ ਸਹਿਜ ਉਪਭੋਗਤਾ ਅਨੁਭਵ ਪ੍ਰਦਾਨ ਕਰਨ ਲਈ ਇਕੱਠੇ ਕੰਮ ਕਰਦੇ ਹਨ। ਕਾਰ 'ਚ ਇਨਬਿਲਟ ਮੈਪਸ ਰਾਹੀਂ ਚਾਰਜਰ ਲੱਭੇ ਜਾ ਸਕਦੇ ਹਨ ਅਤੇ ਬੈਟਰੀ ਨੂੰ ਰੂਟ 'ਤੇ ਹੀ ਪ੍ਰੀ-ਕੰਡੀਸ਼ਨ ਕੀਤਾ ਜਾਂਦਾ ਹੈ, ਜਿਸ ਨਾਲ ਚਾਰਜਿੰਗ ਹੋਰ ਤੇਜ਼ ਹੋ ਜਾਂਦੀ ਹੈ।
'ਜਨਤਾ ਦੀ ਹਰ ਜਾਇਜ਼ ਚਿੰਤਾ ਨੂੰ ਗੱਲਬਾਤ ਤੇ ਲੋਕਤੰਤਰੀ ਤਰੀਕੇ ਨਾਲ ਕਰਾਂਗੇ ਹੱਲ'
NEXT STORY 
