ਭਗਵਾਨ ਸ਼੍ਰੀ ਕ੍ਰਿਸ਼ਨ ਤੇ ਬਲਰਾਮ ਦੇ ਰਣਭੂਮੀ 'ਚ ਆਉਣ 'ਤੇ ਚਾਣੂਰ ਅਤੇ ਮੁਸ਼ਟਿਕ ਨੇ ਉਨ੍ਹਾਂ ਨੂੰ ਮਲਯੁੱਧ ਲਈ ਲਲਕਾਰਿਆ। ਸ਼੍ਰੀ ਕ੍ਰਿਸ਼ਨ ਚਾਣੂਰ ਨਾਲ ਅਤੇ ਬਲਰਾਮ ਜੀ ਮੁਸ਼ਟਿਕ ਨਾਲ ਜਾ ਭਿੜੇ। ਭਗਵਾਨ ਸ਼੍ਰੀ ਕ੍ਰਿਸ਼ਨ ਦੇ ਅੰਗਾਂ ਦੀ ਰਗੜ ਨਾਲ ਚਾਣੂਰ ਦੀ ਰਗ-ਰਗ ਢਿੱਲੀ ਪੈ ਗਈ। ਉਨ੍ਹਾਂ ਨੇ ਚਾਣੂਰ ਦੀਆਂ ਦੋਵੇਂ ਬਾਹਾਂ ਫੜ ਲਈਆਂ ਤੇ ਬੜੇ ਜੋਸ਼ ਨਾਲ ਕਈ ਵਾਰ ਘੁਮਾ ਕੇ ਧਰਤੀ 'ਤੇ ਮਾਰਿਆ। ਚਾਣੂਰ ਦੇ ਪ੍ਰਾਣ ਨਿਕਲ ਗਏ ਤੇ ਉਹ ਕੱਟੇ ਦਰੱਖਤ ਦੀ ਤਰ੍ਹਾਂ ਡਿਗ ਕੇ ਸ਼ਾਂਤ ਹੋ ਗਿਆ। ਬਲਰਾਮ ਜੀ ਨੇ ਮੁਸ਼ਟਿਕ ਨੂੰ ਇਕ ਘਸੁੰਨ ਮਾਰਿਆ ਤੇ ਉਹ ਖੂਨ ਉਗਲਦਾ ਹੋਇਆ ਧਰਤੀ 'ਤੇ ਡਿਗ ਕੇ ਮਰ ਗਿਆ। ਦੇਖਦੇ ਹੀ ਦੇਖਦੇ ਕੰਸ ਦੇ ਪੰਜ ਪ੍ਰਮੁੱਖ ਪਹਿਲਵਾਨ ਸ਼੍ਰੀ ਕ੍ਰਿਸ਼ਨ ਤੇ ਬਲਰਾਮ ਵਲੋਂ ਮਾਰੇ ਗਏ। ਭਗਵਾਨ ਸ਼੍ਰੀ ਕ੍ਰਿਸ਼ਨ ਅਤੇ ਬਲਰਾਮ ਦੀ ਇਸ ਅਦਭੁੱਤ ਲੀਲਾ ਨੂੰ ਦੇਖ ਕੇ ਦਰਸ਼ਕਾਂ ਨੂੰ ਬੜਾ ਆਨੰਦ ਹੋਇਆ। ਚਾਰੇ ਪਾਸਿਓਂ ਉਨ੍ਹਾਂ ਦੀ ਜੈ-ਜੈਕਾਰ ਤੇ ਪ੍ਰਸ਼ੰਸਾ ਹੋਣ ਲੱਗੀ ਪਰ ਕੰਸ ਨੂੰ ਇਸ ਨਾਲ ਬਹੁਤ ਦੁੱਖ ਹੋਇਆ। ਉਹ ਹੋਰ ਵੀ ਚਿੜ੍ਹ ਗਿਆ। ਜਦੋਂ ਉਸ ਦੇ ਪ੍ਰਧਾਨ ਪਹਿਲਵਾਨ ਮਾਰੇ ਗਏ ਅਤੇ ਬਚੇ ਹੋਏ ਭੱਜ ਗਏ, ਉਦੋਂ ਉਸ ਨੇ ਵਾਜੇ ਬੰਦ ਕਰਵਾ ਦਿੱਤੇ। ਕੰਸ ਨੇ ਆਪਣੇ ਸੇਵਕਾਂ ਨੂੰ ਆਗਿਆ ਦਿੱਤੀ ਕਿ ਵਾਸੂਦੇਵ ਦੇ ਲੜਕਿਆਂ ਨੂੰ ਬਾਹਰ ਕੱਢ ਦਿਓ, ਗੋਪਾਂ ਦਾ ਸਾਰਾ ਧਨ ਖੋਹ ਲਓ ਅਤੇ ਨੰਦ ਨੂੰ ਬੰਦੀ ਬਣਾ ਲਓ ਤੇ ਵਾਸੂਦੇਵ-ਦੇਵਕੀ ਨੂੰ ਮਾਰ ਦਿਓ। ਉਗਰਸੇਨ ਮੇਰੇ ਪਿਤਾ ਹੋਣ 'ਤੇ ਵੀ ਦੁਸ਼ਮਣਾਂ ਨਾਲ ਮਿਲੇ ਹੋਏ ਹਨ। ਇਸ ਲਈ ਉਨ੍ਹਾਂ ਨੂੰ ਵੀ ਜਿਊਂਦਾ ਨਾ ਛੱਡੋ।
ਕੰਸ ਇਸ ਤਰ੍ਹਾਂ ਵਧ-ਚੜ੍ਹ ਕੇ ਬਕਵਾਸ ਕਰ ਹੀ ਰਿਹਾ ਸੀ ਕਿ ਭਗਵਾਨ ਸ਼੍ਰੀ ਕ੍ਰਿਸ਼ਨ ਫੁਰਤੀ ਨਾਲ ਉੱਛਲ ਕੇ ਉਸ ਦੇ ਮੰਚ 'ਤੇ ਪਹੁੰਚ ਗਏ। ਜਦੋਂ ਕੰਸ ਨੇ ਦੇਖਿਆ ਕਿ ਉਸ ਦੀ ਮੌਤ ਰੂਪੀ ਭਗਵਾਨ ਸ਼੍ਰੀ ਕ੍ਰਿਸ਼ਨ ਉਸ ਦੇ ਸਾਹਮਣੇ ਆ ਗਏ ਹਨ ਤਾਂ ਉਹ ਵੀ ਤਲਵਾਰ ਲੈ ਕੇ ਉੱਠ ਖੜ੍ਹਾ ਹੋਇਆ ਤੇ ਸ਼੍ਰੀ ਕ੍ਰਿਸ਼ਨ 'ਤੇ ਵਾਰ ਕਰਨ ਲਈ ਪੈਂਤੜਾ ਬਦਲਣ ਲੱਗਾ। ਜਿਸ ਤਰ੍ਹਾਂ ਗਰੁੜ ਸੱਪ ਨੂੰ ਫੜ ਲੈਂਦਾ ਹੈ, ਉਸੇ ਤਰ੍ਹਾਂ ਹੀ ਸ਼੍ਰੀ ਕ੍ਰਿਸ਼ਨ ਨੇ ਕੰਸ ਨੂੰ ਫੜ ਲਿਆ। ਕੰਸ ਦਾ ਮੁਕੁਟ ਡਿਗ ਗਿਆ। ਭਗਵਾਨ ਨੇ ਵਾਲਾਂ ਤੋਂ ਫੜ ਕੇ ਉਸ ਨੂੰ ਮੰਚ ਤੋਂ ਧਰਤੀ 'ਤੇ ਪਟਕ ਦਿੱਤਾ। ਫਿਰ ਸ਼੍ਰੀ ਕ੍ਰਿਸ਼ਨ ਖੁਦ ਉਸ ਦੇ ਉਪਰ ਟੁੱਟ ਪਏ। ਉਨ੍ਹਾਂ ਦੇ ਉਸ 'ਤੇ ਟੁੱਟਦੇ ਹੀ ਕੰਸ ਦੀ ਮੌਤ ਹੋ ਗਈ।ਕੰਸ ਲਗਾਤਾਰ ਦੁਸ਼ਮਣ ਭਾਵ ਨਾਲ ਸ਼੍ਰੀ ਕ੍ਰਿਸ਼ਨ ਦਾ ਹੀ ਚਿੰਤਨ ਕਰਦਾ ਰਹਿੰਦਾ ਸੀ। ਉਹ ਖਾਂਦੇ-ਪੀਂਦੇ, ਉੱਠਦੇ-ਬੈਠਦੇ ਆਪਣੇ ਸਾਹਮਣੇ ਭਗਵਾਨ ਸ਼੍ਰੀ ਕ੍ਰਿਸ਼ਨ ਨੂੰ ਹੀ ਦੇਖਦਾ ਰਹਿੰਦਾ ਸੀ। ਇਸ ਦੇ ਪ੍ਰਭਾਵ ਨਾਲ ਉਸ ਨੂੰ ਸਾਰੂਪ ਮੁਕਤੀ ਦੀ ਪ੍ਰਾਪਤੀ ਹੋਈ। ਸਭ ਦੇ ਦੇਖਦੇ ਹੀ ਦੇਖਦੇ ਉਸ ਦੇ ਸਰੀਰ 'ਚੋਂ ਇਕ ਦਿਵਯ ਤੇਜ ਨਿਕਲ ਕੇ ਸ਼੍ਰੀ ਕ੍ਰਿਸ਼ਨ 'ਚ ਸਮਾ ਗਿਆ।ਕੰਸ ਦੇ ਮਰਦਿਆਂ ਹੀ ਕੜਕੂ ਆਦਿ ਉਸ ਦੇ ਅੱਠ ਛੋਟੇ ਭਰਾ ਸ਼੍ਰੀ ਕ੍ਰਿਸ਼ਨ ਅਤੇ ਬਲਰਾਮ ਜੀ ਦਾ ਵਧ ਕਰਨ ਲਈ ਦੌੜੇ ਪਰ ਬਲਰਾਮ ਜੀ ਨੇ ਪਲ ਭਰ 'ਚ ਹੀ ਉਨ੍ਹਾਂ ਸਭ ਦਾ ਕੰਮ ਤਮਾਮ ਕਰ ਦਿੱਤਾ। ਉਸ ਸਮੇਂ ਆਕਾਸ਼ 'ਚ ਪੀਪਨੀਆਂ ਵੱਜਣ ਲੱਗੀਆਂ। ਬ੍ਰਹਮਾ, ਸ਼ੰਕਰ ਅਤੇ ਇੰਦਰ ਆਦਿ ਦੇਵਤਾ ਬੜੇ ਆਨੰਦ ਨਾਲ ਭਗਵਾਨ ਸ਼੍ਰੀ ਕ੍ਰਿਸ਼ਨ 'ਤੇ ਫੁੱਲਾਂ ਦੀ ਵਰਖਾ ਕਰਦੇ ਹੋਏ ਉਨ੍ਹਾਂ ਦੀ ਉਸਤਤ ਕਰਨ ਲੱਗੇ।
ਕੰਸ ਤੇ ਉਸ ਦੇ ਭਰਾਵਾਂ ਦੀਆਂ ਇਸਤਰੀਆਂ ਆਪਣੇ ਪਤੀਆਂ ਦੀ ਮੌਤ 'ਤੇ ਵਿਰਲਾਪ ਕਰਦੀਆਂ ਹੋਈਆਂ ਉਥੇ ਆਈਆਂ। ਭਗਵਾਨ ਸ਼੍ਰੀ ਕ੍ਰਿਸ਼ਨ ਸਾਰੇ ਸੰਸਾਰ ਦੇ ਜੀਵਨਦਾਤਾ ਹਨ। ਉਨ੍ਹਾਂ ਨੇ ਕੰਸ ਦੀਆਂ ਰਾਣੀਆਂ ਨੂੰ ਸਮਝਾ ਕੇ ਹੌਸਲਾ ਦਿੱਤਾ। ਤਦਨੰਤਰ ਭਗਵਾਨ ਸ਼੍ਰੀ ਕ੍ਰਿਸ਼ਨ ਨੇ ਮਰਨ ਵਾਲਿਆਂ ਦੀ ਲੋਕ ਰੀਤ ਅਨੁਸਾਰ ਕਿਰਿਆ ਕਰਮ ਦਾ ਪ੍ਰਬੰਧ ਕਰਵਾ ਦਿੱਤਾ।
ਸ਼੍ਰੀ ਆਦਿ ਸ਼ੰਕਰ ਮੰਦਰ
NEXT STORY 
