ਦੇਸ਼ ’ਚ ਅੱਲ੍ਹੜਾਂ ਵੱਲੋਂ ਤੇਜ਼ ਰਫ਼ਤਾਰ ਨਾਲ ਵਾਹਨ ਚਲਾਉਣ ਦੇ ਨਤੀਜੇ ਵਜੋਂ ਦੁਰਘਟਨਾਵਾਂ ’ਚ ਚਿੰਤਾਜਨਕ ਹੱਦ ਤੱਕ ਵਾਧਾ ਹੋਇਆ ਹੈ ਅਤੇ ਸੜਕ ਦੁਰਘਟਨਾਵਾਂ ’ਚ ਵੱਡੀ ਗਿਣਤੀ ’ਚ ਲੋਕਾਂ ਦੀਆਂ ਮੌਤਾਂ ਹੋਣ ਨਾਲ ਪਰਿਵਾਰ ਉੱਜੜ ਰਹੇ ਹਨ, ਜਿਨ੍ਹਾਂ ਦੀਆਂ ਇਸੇ ਸਾਲ ਸਾਹਮਣੇ ਆਈਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :
* 10 ਫਰਵਰੀ ਨੂੰ ‘ਮੁੰਬਈ’ ਦੇ ‘ਵਿਦਿਆ ਵਿਹਾਰ’ ਇਲਾਕੇ ’ਚ ਇਕ ਨਾਬਾਲਗ ਦੀ ਤੇਜ਼ ਰਫ਼ਤਾਰ ਐੱਸ. ਯੂ. ਵੀ. (ਵੱਡੀ ਕਾਰ) ਨੇ ਇਕ ਸਕੂਟਰ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਨਾਲ ਸਕੂਟਰ ਸਵਾਰ ਵਿਅਕਤੀ ਅਤੇ ਉਸ ਦੀ ਪਤਨੀ ਗੰਭੀਰ ਰੂਪ ’ਚ ਜ਼ਖਮੀ ਹੋ ਗਏ।
*17 ਫਰਵਰੀ ਨੂੰ ‘ਦਿੱਲੀ’ ਦੇ ‘ਦਵਾਰਕਾ’ ਇਲਾਕੇ ’ਚ ਤੇਜ਼ ਰਫ਼ਤਾਰ ਨਾਲ ਕਾਰ ਭਜਾ ਰਹੇ ਇਕ ਨਾਬਾਲਗ ਨੇ 23 ਸਾਲਾ ਨੌਜਵਾਨ ‘ਸਾਹਿਲ ਧਨੇਸ਼ਰਾ’ ਨੂੰ ਦਰੜ ਦਿੱਤਾ, ਜਿਸ ਨਾਲ ਉਸ ਦੀ ਮੌਤ ਹੋ ਗਈ।
* 2 ਅਗਸਤ ਨੂੰ ‘ਹੈਦਰਾਬਾਦ’ (ਤੇਲੰਗਾਨਾ) ਦੇ ‘ਮਧੁਰਾ ਨਗਰ’ ਪੁਲਸ ਸਟੇਸ਼ਨ ਖੇਤਰ ’ਚ ਸਵੇਰ ਦੇ ਸਮੇਂ ਇਕ 17 ਸਾਲਾ ਨਾਬਾਲਗ ਲੜਕੇ ਨੇ ਕਿਰਾਏ ਦੀ ਕਾਰ ਚਲਾਉਂਦੇ ਹੋਏ ਕਹਿਰ ਵਰ੍ਹਾਇਆ। ਉਸ ਨੇ ਪਹਿਲਾਂ ਇਕ ਦੋਪਹੀਆ ਵਾਹਨ ਨੂੰ ਟੱਕਰ ਮਾਰੀ ਅਤੇ ਫਿਰ ਬੇਕਾਬੂ ਕਾਰ ਨੂੰ 7 ਹੋਰ ਵਾਹਨਾਂ ਨਾਲ ਟਕਰਾ ਦਿੱਤਾ। ਇਸ ਭਿਆਨਕ ਦੁਰਘਟਨਾ ’ਚ ਮੋਟਰਸਾਈਕਲ ’ਤੇ ਜਾ ਰਹੇ 55 ਸਾਲਾ ਵਿਅਕਤੀ ਦੀ ਗੰਭੀਰ ਸੱਟਾਂ ਲੱਗਣ ਕਾਰਨ ਮੌਤ ਹੋ ਗਈ ਅਤੇ ਇਕ ਹੋਰ ਵਿਅਕਤੀ ਜ਼ਖਮੀ ਹੋ ਗਿਆ।
* 8 ਅਕਤੂਬਰ ਨੂੰ ‘ਨਵੀਂ ਦਿੱਲੀ’ ’ਚ ਆਪਣੇ ਦੋਸਤ ਦਾ ਜਨਮਦਿਨ ਮਨਾਉਣ ਲਈ ਕਿਰਾਏ ’ਤੇ ਲਈ ਮਹਿੰਗੀ ਕਾਰ ’ਚ ਤੇਜ਼ ਰਫ਼ਤਾਰ ਨਾਲ ਜਾ ਰਹੇ ਨਾਬਾਲਗ ਨੇ 3 ਗੱਡੀਆਂ ਨੂੰ ਟੱਕਰ ਮਾਰ ਦਿੱਤੀ ਅਤੇ ਸੜਕ ਪਾਰ ਕਰ ਰਹੇ ‘ਉਮਾਸ਼ੰਕਰ’ ਨਾਂ ਦੇ ਇਕ ਵਿਅਕਤੀ ਨੂੰ ਵੀ ਦਰੜ ਦਿੱਤਾ, ਜਿਸ ਨਾਲ ਉਸ ਦੀ ਮੌਤ ਹੋ ਗਈ।
* 14 ਅਕਤੂਬਰ ਨੂੰ ‘ਪਟਿਆਲਾ’ (ਪੰਜਾਬ) ’ਚ ਸੜਕ ’ਤੇ ਅੰਨੇਵਾਹ ਗੱਡੀ ਭਜਾ ਰਹੇ ਇਕ ਨਾਬਾਲਗ ਨੇ ਕਈ ਗੱਡੀਆਂ ਨੂੰ ਟੱਕਰ ਮਾਰ ਕੇ ਨੁਕਸਾਨਿਆ, ਜਿਸ ਨਾਲ ਸੜਕ ’ਤੇ ਹਫੜਾ-ਦਫੜੀ ਮਚ ਗਈ। ਅਧਿਕਾਰੀਆਂ ਨੇ ਇਸ ਸਬੰਧੀ ਬੱਚੇ ਦੇ ਮਾਤਾ-ਪਿਤਾ ਵਿਰੁੱਧ ਐਕਸ਼ਨ ਲੈਣ ਦਾ ਫੈਸਲਾ ਕੀਤਾ ਹੈ।
* 16 ਅਕਤੂਬਰ ਨੂੰ ‘ਦਾਵਣਗੇਰੇ’ (ਕਰਨਾਟਕ) ’ਚ ਰਾਸ਼ਟਰੀ ਰਾਜਮਾਰਗ-48 ’ਤੇ ‘ਬਾੜਾ ਕਰਾਸ’ ਨੇੜੇ ਆਪਣੇ ਦੋਸਤ ਨਾਲ ਤੇਜ਼ ਰਫ਼ਤਾਰ ਨਾਲ ਕਾਰ ਭਜਾ ਰਹੇ ਇਕ 14 ਸਾਲਾ ਨਾਬਾਲਗ ਨੇ ਸੜਕ ਦੇ ਕਿਨਾਰੇ ਖੜ੍ਹੇ ਇਕ ਸੀ. ਐੱਨ. ਜੀ. ਕੰਟੇਨਰ ਨੂੰ ਪਿੱਛੋਂ ਟੱਕਰ ਮਾਰ ਦਿੱਤੀ, ਜਿਸ ਨਾਲ ਨਾਬਾਲਗ ਕਾਰ ਚਾਲਕ ਅਤੇ ਉਸ ਦੇ 17 ਸਾਲਾ ਦੋਸਤ ਦੀ ਘਟਨਾ ਵਾਲੀ ਥਾਂ ’ਤੇ ਹੀ ਮੌਤ ਹੋ ਗਈ।
* 24 ਅਕਤੂਬਰ ਨੂੰ ‘ਚੇਨਈ’ (ਤਾਮਿਲਨਾਡੂ) ’ਚ ‘ਪੋਝੀਚਲੂਰ’ ਨੇੜੇ ‘ਤਾਂਬਰਮ-ਮਦੁਰਵਾਯਲ ਬਾਈਪਾਸ ਰੋਡ’ ’ਤੇ ਆਪਣੇ 4 ਦੋਸਤਾਂ ਨਾਲ ਤੇਜ਼ ਰਫ਼ਤਾਰ ਨਾਲ ਕਾਰ ਚਲਾ ਰਹੇ 17 ਸਾਲਾ ਨਾਬਾਲਗ ਦੀ ਕਾਰ ਦੇ ਕੰਟਰੋਲ ਗੁਆ ਦੇਣ ਕਾਰਨ ਹਾਦਸਾਗ੍ਰਸਤ ਹੋ ਜਾਣ ਨਾਲ ਉਸ ਦੇ 17 ਸਾਲਾ ਦੋਸਤ ‘ਸਲਾਥ ਰਾਜ’ ਦੇ ਸਿਰ ’ਚ ਗੰਭੀਰ ਸੱਟ ਲੱਗਣ ਨਾਲ ਮੌਕੇ ’ਤੇ ਹੀ ਉਸ ਦੀ ਮੌਤ ਹੋ ਗਈ।
* 24 ਅਕਤੂਬਰ ਨੂੰ ਹੀ ‘ਕੋਚੀ’ (ਕੇਰਲਮ) ’ਚ ਤੇਜ਼ ਰਫ਼ਤਾਰ ਨਾਲ ਆਪਣੇ ਐਡੀਸ਼ਨਲ ਸੈਸ਼ਨ ਜੱਜ ਪਿਤਾ ਦੀ ‘ਮਰਸਡੀਜ਼ ਬੈਂਜ਼’ ਕਾਰ ਭਜਾ ਰਹੇ ਨਾਬਾਲਗ ਨੇ ਸਕੂਟਰ ’ਤੇ ਆਪਣੇ ਘਰ ਜਾ ਰਹੇ 54 ਸਾਲਾ ਵਿਅਕਤੀ ‘ਜੈ ਬਾਲ ਕ੍ਰਿਸ਼ਨਨ’ ਨੂੰ ਦਰੜ ਦਿੱਤਾ, ਜਿਸ ਨਾਲ ਉਸ ਦੀ ਘਟਨਾ ਵਾਲੀ ਥਾਂ ’ਤੇ ਹੀ ਮੌਤ ਹੋ ਗਈ। ਇਸ ਮਾਮਲੇ ’ਚ ਕੇਰਲ ਹਾਈ ਕੋਰਟ ਨੇ ਉਕਤ ਜੱਜ ਵਿਰੁੱਧ ਕੇਸ ਦਰਜ ਕਰਨ ਦੀ ਇਜਾਜ਼ਤ ਦਿੱਤੀ ਹੈ।
* ਅਤੇ ਹੁਣ 26 ਅਕਤੂਬਰ ਨੂੰ ‘ਮੁੰਬਈ’ ’ਚ ਤੇਜ਼ ਰਫ਼ਤਾਰ ਨਾਲ ਪਾਣੀ ਨਾਲ ਭਰਿਆ ਟੈਂਕਰ ਚਲਾ ਰਹੇ ਇਕ 14 ਸਾਲਾ ਨਾਬਾਲਗ ਨੇ ਸੜਕ ਦੇ ਕੰਡੇ ਖੜ੍ਹੀ ਇਕ ਕਾਰ ਨੂੰ ਟੱਕਰ ਮਾਰਨ ਤੋਂ ਬਾਅਦ ਇਕ ਕੰਧ ਨਾਲ ਟੈਂਕਰ ਦੀ ਟੱਕਰ ਮਾਰ ਦਿੱਤੀ, ਜਿਸ ਨਾਲ ਕਾਰ ਅਤੇ ਕੰਧ ਦੋਵੇਂ ਬੁਰੀ ਤਰ੍ਹਾਂ ਨੁਕਸਾਨੇ ਗਏ।
ਯਕੀਨਨ ਹੀ ਅੱਲ੍ਹੜਾਂ ’ਚ ਬਿਨਾਂ ਲਾਇਸੈਂਸ ਅਤੇ ਤੇਜ਼ ਰਫ਼ਤਾਰ ਨਾਲ ਵਾਹਨ ਚਲਾਉਣ ਦਾ ਵਧ ਰਿਹਾ ਰੁਝਾਨ ਬੇਹੱਦ ਚਿੰਤਾ ਦਾ ਵਿਸ਼ਾ ਹੈ। 18 ਸਾਲ ਤੋਂ ਘੱਟ ਉਮਰ ਦੇ ਨਾਬਾਲਗ ਨੂੰ ਵਾਹਨ ਚਲਾਉਂਦੇ ਹੋਏ ਫੜੇ ਜਾਣ ਜਾਂ ਦੁਰਘਟਨਾ ਦਾ ਕਾਰਨ ਬਣਨ ਦੀ ਸਥਿਤੀ ’ਚ ਗੱਡੀ ਦਾ ਰਜਿਸਟ੍ਰੇਸ਼ਨ ਸਰਟੀਫਿਕੇਟ 12 ਮਹੀਨਿਆਂ ਲਈ ਰੱਦ ਕਰ ਕੇ ਉਸ ਦੇ ਮਾਤਾ-ਪਿਤਾ/ਵਾਹਨ ਮਾਲਕ ’ਤੇ 25,000 ਰੁਪਏ ਦਾ ਜੁਰਮਾਨਾ ਅਤੇ 3 ਸਾਲ ਤੱਕ ਕੈਦ ਦੀ ਸਜ਼ਾ ਤੋਂ ਇਲਾਵਾ ਦੋਸ਼ੀ ਨਾਬਾਲਗ ਨੂੰ 25 ਸਾਲ ਦਾ ਹੋਣ ਤੱਕ ਡਰਾਈਵਿੰਗ ਲਾਇਸੈਂਸ ਜਾਰੀ ਨਾ ਕਰਨ ਦਾ ਪ੍ਰਬੰਧ ਹੈ।
ਅਜਿਹੀਆਂ ਘਟਨਾਵਾਂ ਰੋਕਣ ਲਈ ਜਿੱਥੇ ਮਾਪਿਆਂ ਨੂੰ ਆਪਣੇ ਬੱਚਿਆਂ ’ਤੇ ਕੰਟਰੋਲ ਰੱਖਣ ਦੀ ਸਖ਼ਤ ਲੋੜ ਹੈ, ਉੱਥੇ ਹੀ ਥਾਂ-ਥਾਂ ’ਤੇ ਕੈਮਰੇ ਲਗਾਉਣ ਅਤੇ ਦੋਸ਼ੀਆਂ ਨੂੰ ਯੋਗ ਸਜ਼ਾ ਦੇਣ ਅਤੇ ਚਲਾਨਾਂ ਦੀ ਤਾਮੀਲ ਯਕੀਨੀ ਬਣਾਉਣ ਦੀ ਵੀ ਲੋੜ ਹੈ। ਇਸ ਲਈ ਟ੍ਰੈਫਿਕ ਸਟਾਫ਼ ਦੀ ਕਮੀ ਦੂਰ ਕਰਨ ਦੇ ਨਾਲ-ਨਾਲ ਨਿਯਮਾਂ ਦੀ ਪਾਲਣਾ ਕਰਵਾਉਣ ’ਚ ਨਾਕਾਮ ਰਹਿਣ ਵਾਲੇ ਕਰਮਚਾਰੀਆਂ ਵਿਰੁੱਧ ਵੀ ਤੁਰੰਤ ਸਖਤ ਕਾਰਵਾਈ ਕਰਨ ਦੀ ਲੋੜ ਹੈ।
—ਵਿਜੇ ਕੁਮਾਰ
ਈ. ਐੱਸ. ਟੀ. ਆਈ. ਸੀ. 2026 : ਵਿਗਿਆਨ ਨੂੰ ਵਿਕਸਤ ਭਾਰਤ ਦੀਆਂ ਉਮੀਦਾਂ
NEXT STORY 
